སྙིང་སེང་རྒྱལ།
སྡེ་འདི་ཐོག་མ་རབ་བྱུང་ལྔ་པའི་མཇུག་ཙམ་ལ་སོག་བཙུན་སྟོན་པ་ཡེ་ཤེས་ཀྱིས་བཏབ་པ་ཞིག་ཡིན། དེ་ཡང་མཁས་པ་དང་གྲུབ་པའི་དབང་ཕྱུག་དམ་པ་སོག་བཙུན་སྟོན་པ་ཡེ་ཤེས་རྒྱལ་མཚན་གྱིས་མདོ་སྨད་དུ་བོན་གྱི་གདུལ་བྱ་ཡོད་པར་གཟིགས་ནས་ཐོག་མར་རེབ་གོང་གསེར་མོ་ལྗོངས་ཀྱི་ཁོ་ཚེ་ཨ་ཡག་རྐྱང་སོགས་ཀྱིས་གདན་དྲངས་པ་ལྟར་ཡུལ་སོ་སོར་ཞབས་ཀྱིས་བཅགས། སྡེ་སོ་སོ་བྱིན་གྱིས་བརླབས་ནས་གཤེན་རབ་གཞུང་ལུགས་ཀྱི་རྒྱལ་མཚན་སྒྲེང་བར་མཛད་པའི་སྙན་པ་ཕྱོགས་སུ་རྒྱས། དུས་དེར་སྟོང་ཆེ། ཤ་རྒྱ། སོག་ཀྱཱ། སྐ་སྐྱ་སོགས་ཀྱི་གདན་འདྲེན་ཞུས་པར་བརྟེན་བླ་མའི་ཐུགས་དགྱེས་ཚོར་ཆེན་པོ་གནང་ཞིང་ཡུལ་ཕྱོགས་སོ་སོར་བོན་སྟོན་སྤེལ་བའི་ཆེད་དུ་ལྗོངས་འདིར་ཞབས་ཀྱི་པདྨོ་ཉེ་བར་བཀོད་པའི་ཚེ། ཕྱོགས་དུ་མ་ནས་དད་ལྡན་གྱི་སློབ་མ་མི་ཏོག་ལ་བུང་བ་བཞིན་འདུ་བ་བྱུང་། གདུལ་བྱ་སོ་སོའི་བློ་དང་འཚམས་པར་འཆད་ཁྲིད་ཀྱི་སྒོ་ནས་བོན་སྦྱིན་རྒྱ་ཆེར་བསྩལ་ནས་ཐམས་ཅད་མ་འོངས་པ་ན་བོན་གྱི་གདུལ་བྱར་འགྱུར་བའི་ཐུགས་སྨོན་ཤུགས་དྲག་མཛད། ཚུལ་དེ་ལྟའི་སྒོ་ནས་སྙིགས་མའི་དུས་འདིར་རང་དོན་གྱི་ཉམས་ལེན་དང་བསྟན་དོན་ཟུང་འབྲེལ་ལ་གཟིགས་ནས། མདོ་ཕྱོགས་སུ་རྣམ་དག་འདུལ་བ་འཛིན་པ་རབ་བྱུང་གི་སྡེ་དང་། སྔགས་ཕྱོགས་སུ་སྒྲུབ་གཤེན་ལྕང་ལོ་འཆང་བ་སྔགས་འཆང་གི་སྡེ་སོགས་ཡུལ་འདིར་དར་བར་མཛད་དེ། ཁྱུང་མོ་གྲྭ་ཚང་གཡུང་དྲུང་ཕུན་ཚོགས་གླིང་འདི་ཉིད་གསར་འདེབས་ཀྱི་དུས་ནི་རབ་དུས་ལྕགས་ལུག་སྤྱི་ལོ1351ལོར་འདུ་ཁང་རྟེན་བརྟེན་པ་བཅས་སྐྱེ་རྒུའི་བསོད་ནམས་ཀྱི་ཞིང་དུ་བསྐྲུན་པར་མཛད།
