ཟླ་6པའི་ཚེས་5ཉིན་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ལི་ཐང་རྫོང་གི་ལོ་གཅིག་དུས་གཅིག་གི་དབྱར་རྩྭ་དགུན་འབུ་འཐུ་བའི་དུས་སྐབས་ཡིན་ཞིང་། རྒྱ་མཚོའི་ངོས་ལས་མཐོ་ཚད་སྨི་4500ཟིན་པའི་དབྱར་རྩྭ་དགུན་འབུའི་རི་སྟེང་དུ། མོ་ལ་སྨད་ཤང་ཚ་ཁ་གྲོང་ཚོའི“ཞིང་འབྲོག་མི་དམངས་མཚན་མོའི་སློབ་གྲྭས”ངལ་གསོའི་ཉིན་མོ་བེད་སྤྱད་ནས་སློབ་ཁྲིད་བྱེད་འགོ་ཚུགས་པ་རེད།
འདི་ནི་ཞིང་འབྲོག་མི་དམངས་མཚན་མོའི་སློབ་གྲྭའི་སློབ་ཁྲིད་བྱེད་པའི་ཡུལ་དངོས་རེད།
“དབྱར་རྩྭ་དགུན་འབུ་འཐུ་སྐབས་ཚང་མ་ཁ་ཐོར་དུ་གནས་ཏེ་དུས་ཚོད་དང་ས་གནས་ལ་ཚོད་འཛིན་ཐེབས་པས། ཞིང་འབྲོག་མང་ཚོགས་གནས་གང་དུ་སོང་ཚེ་ང་ཚོས་མཚན་མོའི་སློབ་གྲྭ་དེ་གར་འཚོགས་ནས ‘ལུག་འཚོ་བའི་རྣམ་པས’སྐོར་སྐྱོད་ཀྱིས་འཚོགས་ཤིང་། མཚན་མོའི་སློབ་གྲྭ་སྟོང་པར་གཏན་ནས་འཇོག་མི་རུང་”ཞེས་ཚ་ཁ་གྲོང་ཚོའི་ཧྲུའུ་ཅི་དང་པོ་ཝང་ཧྲུན་ཐའོ་ཡིས་དེ་ལྟར་བཤད།
གནས་སྐབས་སུ་བཙུགས་པའི་སློབ་ཁང་དུ་ཞིང་འབྲོག་མང་ཚོགས་རྣམས་སྐོར་བ་བྱས་ནས་སར་བསྡད་དེ། “ཟླ་5པའི་ཚེས་23ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་སྲིད་གྲོས་སྐབས་བཅུ་གསུམ་པའི་ཚོགས་འདུ་ཐེངས་གསུམ་པའི་དཔལ་འབྱོར་ལས་རིགས་ཀྱི་ཨུ་ཡོན་མཉམ་འབྲེལ་ཚོགས་ཆུང་གི་ཚོགས་འདུར་ཞུགས་སྐབས་བསྟན་དོན། ང་ཚོས་ཏོག་གསར་གློ་ཚད་རིམས་ནད་ཀྱིས་བཟོས་པའི་ཤུགས་རྐྱེན་ངན་པ་ཧུར་ཐག་སྒོས་ཁྱད་བསད་བྱེད་དགོས་ཤིང་། དེ་བས་དཀའ་ཚེགས་ཆེ་བའི་འབད་བརྩོན་བྱས་ཏེ་དབུལ་སྒྲོལ་འགག་སྒྲོལ་གྱི་དམག་འཐབ་ལ་ཕྱོགས་ཡོངས་ནས་རྒྱལ་ཁ་མཐའ་གཅིག་ཏུ་ལེན་དགོས”ཞེས་ཝང་ཧྲུན་ཐའོ་ཡིས་བོད་སྐད་ཀྱི་ལམ་ནས་རྒྱལ་ཡོངས་ཀྱི“ཚོགས་འདུ་གཉིས”ཀྱི་དགོངས་དོན་དང་དེ་བཞིན་དབུལ་སྒྲོལ་འགག་སྒྲོལ་གྱི་སྲིད་ཇུས་སྒྲོག་འགྲེལ་བྱེད་བཞིན་ཡོད་པ་རེད། ཁོང་གིས་སྟབས་བདེ་དང་། ཐད་ཀར། དུས་ཐོག གོ་ཆོད་པ་བཅས་ཀྱི་བྱེད་ཐབས་སྤྱད་ནས་ཏང་དང་སྲིད་གཞུང་གི་གསུང་སྒྲ་དུས་ཐོག་ཏུ་དབྱར་རྩྭ་དགུན་འབུ་འཐུ་བའི་མང་ཚོགས་ལ་བརྒྱུད་བསྒྲགས་བྱས།
ཚ་ཁ་གྲོང་ཚོའི་ཞིང་འབྲོག་མི་དམངས་མཚན་མོའི་སློབ་གྲྭས་ད་དུང་སྲོལ་རྒྱུན་གྱི་སློབ་ཁྲིད་བྱེད་སྟངས་ལ་བསྒྱུར་བཅོས་བྱས་ཏེ། ཁག་བགོས་ཀྱིས་སྒྲོག་འགྲེལ་བྱེད་པ་དང་། གཅིག་གཏད་གཅིག་གིས་ཤེས་བྱའི་དྲིས་ལན་གནང་བ། ཤེས་བྱའི་དྲིས་ལན་འདེབས་པ་སོགས་ཀྱི་རྣམ་པ་སྣ་མང་སྤྱད་དེ། དུད་ཚང་གི་གནས་ཚུལ་དང་ཟུང་འབྲེལ་བྱས་ནས་ཡིག་ཚགས་དང་གཱ་བཟོས་པའི་དུད་ཚང་ལ“སེམས་ཁྲལ་མེད་པ་གཉིས་དང་འགན་ལེན་གསུམ”དང་། དེར་ཐོབ་པའི “ཀུན་ཕན་སྲིད་ཇུས་”དང་། ལོངས་སུ་སྤྱོད་པའི“གནད་སྨིན་དབུལ་སྐྱོར་གྱི་སྲིད་ཇུས”ཡིག་ཚགས་དང་གཱ་བཟོས་ནས་ཕྱིར་འཐེན་བྱེད་པའི་གོ་རིམ་སོགས་སྒྲོག་འགྲེལ་བྱས་པར་མ་ཟད་ས་གནས་དེ་གར་ཚད་ལེན་ཚོད་ལྟ་བྱས་པ་དང་། ཡིག་ཚགས་དང་གཱ་བཟོས་པའི་དུད་ཚང་མ་ཡིན་པ་རྣམས་ལ་དེས་མྱངས་པའི“ཀུན་ཕན་སྲིད་ཇུས”སོགས་བལྟོས་བཅས་ཀྱི་སྲིད་ཇུས་སྒྲོག་འགྲེལ་བྱས་ཤིང་། དབུལ་སྐྱོར་གྱི་ཤེས་བྱ་དེ་བས་ཁ་གསལ་དང་གོ་བདེ་བ་ཡོང་ཆེད། སློབ་ཁྲིད་བྱས་པའི་བརྒྱུད་རིམ་ཁྲོད་དུ་ “དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་མཐའ་གཅིག་ཏུ་ཐོབ་པ་བྱེད་དགོས”པ་དང་།“དབུལ་སྒྲོལ་དང་གྲོང་གསེབ་དར་རྒྱས་ནུས་ལྡན་སྒོས་སྦྲེལ་མཐུད་ཡོང་བར་བསྟུད་མར་སྐུལ་འདེད་བཏང་སྟེ། ནུས་ཤུགས་ཡོད་རྒུས་དབུལ་སྒྲོལ་གྱི་མང་ཚོགས་ཕྱུག་འགྱུར་ཕྱོགས་སུ་སྐྱོད་པར་འཇུག་ཆེད”སོགས་2020ལོའི་རྒྱལ་ཡོངས་སྲིད་གཞུང་གི་ལས་དོན་སྙན་སྒྲོན་གྱི་མ་ཡིག་སྒྲོག་འགྲེལ་བྱས་པ་མ་ཟད། ལྷག་པར་དུ་ཕན་འབྲས་ངོ་མ་ཐོབ་པའི་སྲིད་ཇུས་འབོར་ཆེན་དཔེར་བཞག་ནས་ཞིང་འབྲོག་མང་ཚོགས་ལ་ཏང་གི་བཀའ་དྲིན་ཤེས་རྟོགས་ཐུབ་པ་བྱས་ཡོད།“ང་ཚོས་རི་སྟེང་དུ་དབྱར་རྩྭ་དགུན་འབུ་འཐུ་དུས་ཆ་འཕྲིན་གྱི་སྟབས་མི་བདེ་བས། རྒྱལ་ཁབ་ཀྱི་དམངས་ཕན་སྲིད་ཇུས་ཁ་ཤས་དུས་ཐོག་ཏུ་རྒྱུས་ལོན་བྱེད་མི་ཐུབ། དེ་བས་ལས་དོན་རུ་ཁག་གིས་ང་ཚོར་སྲིད་ཇུས་གསལ་བོར་བཤད་པ་དང་། ང་ཚོས་ཀྱང་དེ་ཅི་ཞིག་ཡིན་པ་ཤེས་ཐུབ་ཀྱི་ཡོད། རྒྱལ་ཁབ་ཀྱི་དམངས་ཕན་སྲིད་ཇུས་ཁོང་དུ་ཆུད་པ་དང་ཆབས་ཅིག ང་ཚོས་ཀྱང་རྒྱལ་ཁབ་ཀྱི་དམངས་ཕན་སྲིད་ཇུས་བྱང་ཆུབ་པའི་སྒོ་ནས་བེད་སྤྱོད་ཐུབ་ཀྱི་ཡོད། དེ་ནི་དངོས་ཕན་ངོ་མ་ཞིག་ཡིན་ཞིང་། དེ་བས་ཀྱང་ང་ཚོས་སློབ་སྦྱོང་བྱེད་པའི་རྩ་ཆེའི་བསྟན་བཅོས་ཡིན” ཞེས་ཞིང་འབྲོག་མང་ཚོགས་ཀུན་དགའ་རྒྱ་མཚོས་དེ་ལྟར་བཤད།
“དབུལ་སྐྱོར་བྱེད་དགོས་ན་སྔོན་ལ་བློ་སྟོབས་སྐྱོར་དགོས་པ་དང་། བློ་སྟོབས་སྐྱོར་ན་སྔོན་ལ་རིག་སྐྱོར་བྱེད་དགོས། དབུལ་སྒྲོག་འགག་སྒྲོལ་ནི་ ‘དུས་ཚོད་སྐར་ཆ་ཙམ་ཡང་མཚམས་འཇོག་མི་རུང་ཞིང་། གོམ་གང་ཙམ་ཡང་སྤོ་ནོར་བྱེད་མི་རུང་བ་དང་། ཉིན་གཅིག་ལའང་འགོར་འགྱངས་བྱེད་མི་རུང་’།མཚན་མོའི་སློབ་གྲྭ་ཉིན་གཅིག་ལའང་མཚམས་འཇོག་མི་རུང་། རིམ་པ་རྗེས་མར་ང་ཚོས་ ‘གཏན་འཇགས་+འཁོར་རྒྱུག’གི་བྱེད་ཐབས་སྤྱད་ནས་མུ་མཐུད་དུ་མཚན་མོའི་སློབ་གྲྭ་འཛུགས་སྐྱོང་ལ་ཤུགས་སྣོན་རྒྱག་པ་དང་། མང་ཚོགས་རང་ཉིད་ཀྱི་སྐད་ཆ་དང་། གོ་ཐུབ་པའི་རྣམ་པ། སྤྲོ་སྣང་ཡོད་པའི་སློབ་ཁྲིད་ཀྱིས་སྤུས་འབོར་གཉིས་ལྡན་གྱིས་མང་ཚོགས་ཀྱི་ཁྲོད་དུ་བསྐྱོད་ནས་ཚང་མར་ཞབས་འདེགས་ཞུ་རྒྱུ་ཡིན”ཞེས་མོ་ལ་སྨད་ཤང་གི་ཏང་ཨུད་ཧྲུའུ་ཅི་བློ་བཟང་བྱང་ཆུབ་ཀྱིས་དེ་ལྟར་བཤད།
