ཀྲུང་གོ་བོད་ལྗོངས་དྲ་བས་སྤེལ་བའི་གནས་ཚུལ་ལྟར་ན། འབྲོག་པ་ཚེ་དབྱངས་ཁྱིམ་གྱིས་2019ལོའི་ཟླ་12པར་བོད་རང་སྐྱོང་ལྗོངས་ནག་ཆུ་གྲོང་ཁྱེར་ཨ་མདོ་རྫོང་གི་གནས་སྤོས་མང་ཚོགས་3364དང་མཉམ་དུ། ཆ་སྙོམས་ས་བབ་མཐོ་ཚད་སྨི་5000ཡས་མས་ཀྱི་བོད་བྱང་ཐང་ནས་ས་བབ་མཐོ་ཚད་སྨི་3500ཟིན་པའི་བོད་ལྷོའི་ལུང་གཞུང་ཁུལ་དུ་གནས་སྤོ་བྱས་ཡོད་པས། ཚེ་དབྱངས་ཁྱིམ་ཚང་གི་འཚོ་བའི་སྤུས་ཚད་མཐོ་རུ་ཕྱིན་ཡོད་པ་རེད།
གནས་སྡོད་བྱས་རྗེས། འབྲོག་ཁུལ་གྱི་མང་ཚོགས“སྤོ་ཐུབ་པ་དང་། སྡོད་ཐུབ་པ། ཕྱུག་འགྱུར་ཐུབ་པ”བཅས་ཡོང་ཆེད། བོད་རང་སྐྱོང་ལྗོངས་ཀྱིས་འབྲེལ་ཡོད་ཐོན་ལས་འཆར་འགོད་ལ་སྤྱི་འདོམས་སྐུལ་འདེད་བཏང་ཞིང་། སྔ་རྗེས་སུ་ངལ་ནུས་མངགས་གཏོང་ཀུང་སི་དང་། སྡེ་ལས་གཙང་སྦྲའི་ཀུང་སི། སྔོ་ལྗང་བདག་སྐྱོང་ཀུང་སི་སོགས་ཀུང་སི་གསུམ་བཙུགས་ནས་གནས་སྤོས་མང་ཚོགས་ཐག་ཉེ་སར་ལས་ཞུགས་ཐུབ་པ་བྱས་པ་རེད།
དེ་ནས་ཚེ་དབྱངས་ཀྱིས་འཚེམ་བཟོའི་ལག་རྩལ་གསོ་སྦྱོང་འཛིན་གྲྭར་ཞུགས་པས་འབྲོག་པ་ཞིག་ནས་ཐོན་ལས་བཟོ་བར་འགྱུར་འགོ་ཚུགས། སྐབས་ཤིག་རིང་སློབ་སྦྱོང་བྱས་པ་བརྒྱུད། རྨང་གཞིའི་འཚེམ་བཟོའི་ལག་རྩལ་རགས་ཙམ་ཁོང་དུ་ཆུད་ནས་ཁོང་བདེ་བླག་ངང་སློབ་ཐོན་བྱུང་བའི་སློབ་མ་ཁག་དང་པོར་གྱུར་བ་དང་ཆབས་ཅིག་ངལ་རྩོལ་གྱི་གན་རྒྱ་དངོས་སུ་བཞག་ནས་ལས་གནས་སུ་ཞུགས།
ད་ཆ་ཚེ་དབྱངས་ཀྱིས་སྐེ་དར་དམར་པོ་དང་། སྒྲོག་ཙེའི་ཁེབས་རས་། ཤེལ་ཡོལ། ཉལ་གདན་སོགས་བཟོ་ཤེས་པ་དང་། དེ་ནས་ཟླ་བ་གཉིས་གསུམ་ཙམ་སློབ་སྦྱོང་བྱས་རྗེས། སློབ་མའི་གོས་སོགས་སྔར་ལས་རྙོག་འཛིང་ཆེ་བའི་བཟོ་རྩལ་ཁོང་དུ་ཆུད་རྒྱུ་རེད། ཚེ་དབྱངས་ཀྱི་འབད་བརྩོན་གྱིས་མཐའ་འཁོར་གྲོགས་པོ་རྣམས་ལ་ཤུགས་རྐྱེན་ཐེབས་བཞིན་ཡོད། ཁོང་གིས་ད་དུང་རང་ཉིད་ཀྱི་དབང་པོ་སྐྱོན་ཅན་གྱི་གྲོགས་པོ་ཞིག་གསོ་སྦྱོང་ནང་ཞུགས་སུ་འཇུག་རྩིས་ཡོད། ཁོང་གིས“ངའི་གྲོགས་པོ་དབང་པོ་སྐྱོན་ཅན་ཡིན་པའི་རྐྱེན་གྱིས་ལས་ཀ་རྙེད་ཁག་པོ་ཡོད། འོན་ཀྱང་འཚེམ་བཟོའི་ལས་ལ་རྐང་པ་གཅིག་གིས་ཆོག་པས་ངས་ལས་ཀར་བརྟེན་ནས་ཁོ་མོས་འཚོ་བ་ཡག་པོ་སྐྱེལ་རྒྱུར་སྐུལ་འདེད་གཏོང་འདོད་ཡོད་ཅེས་བཤད།
ཀུང་སིས་རྙིང་པས་གསར་པ་ཁྲིད་པ་དང་། སྤེལ་རོགས་ཁྲིད་གསུམ་གྱི་རྣམ་པ་སྤྱད་དེ་གནས་སྤོས་མང་ཚོགས་དེ་བས་མང་བ་གསོ་སྦྱོང་ལས་ཞུགས་ནང་ཞུགས་རྒྱུར་སྐུལ་འདེད་གཏོང་གི་ཡོད། མིག་སྔར་ཁག་དང་པོའི་སློབ་མ་40ཚང་མ་དཔྱད་ཞིབ་བརྒྱུད་ལས་གནས་ཐོག་དངོས་སུ་གདན་ཞུ་བྱས་པ་རེད། ཁོང་ཚོའི་ལས་ཀའི་ཧུར་སེམས་ཆེ་བས་རང་ཉིད་ཀྱི་ལག་གཉིས་ལ་བརྟེན་ནས་ལས་ཞུགས་འབབ་འཕར་ཡོང་བ་བྱེད་བཞིན་ཡོད།
