དག་པ་རྫ་ཆས་དང་བཟོ་སྐྲུན་ཡོ་བྱད།
དག་པ་རྫ་ཆས་བཟོ་བའི་རྫ་ས་ནི“ས་སྐམ”ཞེས་པའི་ས་དམར་གྱི་རིགས་ཤིག་དང་རྡོ་ལེབ(ས་དཀར)གཉིས་བསྲེས་ནས་གྲུབ་པ་ཞིག་ཡིན། “ས་དཀར”ནི་དག་པ་གྲོང་ཚོའི་མདུན་ངོས་ཀྱི་རི་སྟེང་དུ་ཡོད་ཅིང་། “ས་སྐམ”ནི་བཀྲ་ཤིས་སྒང་ཤང་ནས་་ཐོན་པ་ཞིག་རེད། བཟོ་དུས་ལེགས་པར་བཟོས་པའི་འཇིམ་བག་འཁོར་ལོའི་ནང་དུ་འཇོག་དགོས་ཤིང་། འཁོར་གཞོང་འཁོར་སྐྱོད་བྱེད་པ་དང་མཉམ་དུ་ལག་པས་འཇིམ་བག་འཐེན་ནས་དབྱིབས་སུ་འགྱུར་བ་དང་དེ་ནས་རྐང་བ་འབྱར་བ། ཀོ་ལྤགས་འཇམ་པོའི་རས་ཀྱིས་བརླན་པར་བྱེད་པ། ཤིང་ཐུར་གྱིས་རི་མོ་བརྐོ་བ་བཅས་བྱས་ཚེ་རྫ་ཆས་ཀྱི་འདམ་རྐོ་ཞིག་བཟོས་ནས་གྲུབ་པ་ཡིན་ལ། དེ་ནས་གྲིབ་བསིལ་གྱིས་སྐམ་པ་ན་སྲེག་ཆོག་པ་རེད།
གྲོང་མིས་བཟོ་སྐྲུན་བརྒྱུད་རིམ་འགྲེམས་སྟོན་བྱེད་བཞིན་པ།
དག་པ་རྫ་ཆས་བཟོ་རྩལ་ནི་མལ་གྲོ་གུང་དཀར་རྫོང་གི་སྲོལ་རྒྱུན་མི་རིགས་ཀྱི་ཁྱད་ཆོས་ལྡན་པའི་ལག་ཤེས་བཟོ་རྩལ་ཞིག་ཡིན་ལ་དེར་ལོ་ངོ་སྟོང་ཕྲག་གི་ལོ་རྒྱུས་ཡུན་རིང་ལྡན་པ་དང་། དེའི་ཐོན་རྫས་ཀྱི་བཟོ་ལྟ་དང་དཔེ་རིས་ལ་དམིགས་བསལ་གྱི་ཁྱད་ཆོས་ལྡན་ཡོད། 2006ལོར། དག་པ་རྫ་ཆས་བཟོ་རྩལ་དེ་ཁག་དང་པོའི་བོད་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་ནང་བཅུག་པ་རེད། མགྱོགས་པའི་དག་པ་རྫ་ཆས་ནི་མི་རྣམས་ཀྱི་མཐོང་ལམ་ནས་རིམ་བཞིན་མཐོང་རྒྱུ་མེད་པར་གྱུར་ཡོད།
དག་པ་རྫ་ཕོར།
སྲོལ་རྒྱུན་ལག་ཤེས་བཟོ་རྩལ་དེར་ཚེ་སྲོག་གསར་པ་ཞིག་སྦྱིན་ཆེད། ཉེ་བའི་ལོ་ཤས་རིང་མལ་གྲོ་གུང་དཀར་རྫོང་གིས་ཁྱད་ལྡན་ཐོན་ལས་ལ་སྲིད་ཇུས་ཀྱི་རོགས་སྐྱོར་བྱེད་ཤུགས་རྒྱུན་ཆད་མེད་པར་ཆེ་རུ་བཏང་ཡོད། 2009ལོའི་ཟླ10པར། མལ་གྲོ་གུང་དཀར་རྫོང་གིས་མ་དངུལ་སྒོར་ཁྲི100ལྷག་ཙམ་བཏང་ནས། དག་པ་རྫ་ཆས་བཟོ་གྲྭ་བསྐྲུན་པ་དང་འབྲེལ་ཅང་སུའུ་ཞིང་ཆེན་ནན་ཅིང་གྲོང་ཁྱེར་གྱི་རོགས་སྐྱོར་བརྒྱུད་སྲེག་བཟོའི་སྒྲིག་ཆས་ཉོ་སྒྲུབ་བྱས་པ་དང་། 2011ལོའི་ཟླ11པར་མལ་གྲོ་གུང་དཀར་རྫ་ཆས་ཆེད་ལས་མཉམ་ལས་ཁང་དངོས་སུ་བཙུགས་པ་རེད། ད་ལོའི་ཟླ5པར། མལ་གྲོ་གུང་དཀར་རྫོང་དང་གུང་དཀར་གྲོང་རྡལ་གྱི་འབྲེལ་ཡོད་ལས་ཁུངས། དེ་བཞིན་ནན་ཅིང་བོད་སྐྱོར་ལས་དོན་ཚོགས་ཆུང་གི“མཚམས་སྦྱོར”བྱས་པ་བརྒྱུད་བོད་ལྗོངས་སྨི་ཧྲེན་དག་པ་རྫ་ཆས་ཚད་ཡོད་ཀུང་སི་ནི་མཉམ་ལས་ཁང་གི་རྨང་གཞིའི་ཐོག་དངོས་སུ་བཙུགས་པ་རེད།
“འདས་ཟིན་པའི་ལོ་ངོ་གཅིག་ནང་། ང་ཚོ་བོད་ལྗོངས་སུ་རྟོག་ཞིབ་ཐེངས་བདུན་ལ་ཡོང་བ་དང་ས་གནས་དེ་གའི་སྲིད་གཞུང་གི་རྒྱབ་སྐྱོར་འོག་ང་ཚོས་མཐར་རྣམ་གྲངས་དེ་དོན་འཁྱོལ་བྱ་རྒྱུའི་ཐག་བཅད་པ་ཡིན”ཞེས་བོད་ལྗོངས་སྨི་ཧྲེན་དག་པ་རྫ་ཆས་རྒྱུན་འཛིན་ཚད་ཡོད་ཀུང་སིའི་ཏུང་ཧྲི་ཀྲང་ཧྥུ་ཞའོ་ལུང་གིས་དེ་བཞིན་ངོ་སྤྲོད་གནང་བྱུང་། ཀུང་སི་དེའི་ནང་ཞུགས་རྗེས་འཇིམ་བག་གི་སྦྱོར་རྟ་དང་བཟོ་རྩལ། རྩི་རྩིའི་སྦྱོར་རྟ་ནས་བསྲེགས་གྲུབ་བཟོ་རྩལ་སོགས་ཕྱོགས་ཡོངས་ནས་ཞིབ་འཇུག་དང་གསར་སྤེལ་བྱས་ཡོད། གསར་སྤེལ་གྱི་བསམ་ཕྱོགས་ཐད། བོད་ཀྱི་རིག་གནས་ཀྱི་གཞི་རྒྱུ་སོར་འཇོག་བྱེད་པའི་རྨང་གཞིའི་ཐོག དེང་རབས་ཀྱི་རྒྱན་སྤྲོས་ལག་རྩལ་དང་ཟུང་འབྲེལ་བྱས་ཏེ་ལེགས་སྐྱེས་དང་ཉིན་མཁོའི་དངོས་རྫས། ཨར་ཁང་གི་འཛད་རྫས་བཅས་ཕྱིར་ཚོང་ཐབས་ལམ་ཆེན་པོ་གསུམ་སྔར་བས་ཤར་གཏོང་བྱེད་ཐུབ་ཡོད་ཅིང་། ས་གནས་དེ་གར་ཕྱིར་ཚོང་བྱེད་པ་མ་ཟད། རྒྱལ་ཡོངས་ཀྱི་ས་གནས་ཁག་དང་འཛམ་གླིང་གི་ཕྱོགས་སུའང་བསྐྱོད་དགོས་པ་རེད་ཟེར།
བོད་ལྗོངས་སྨི་ཧྲེན་དག་པ་རྫ་ཆས་རྒྱུན་འཛིན་ཚད་ཡོད་ཀུང་སིས་བཟོས་པའི་རྫ་ཆས་སྐོར་ཐོག་མ།
མིག་སྔར།སྨི་ཧྲེན་དག་པ་རྫ་ཆས་བཟོ་གྲྭ་སྔར་བས་རྒྱས་སྐྲུན་བྱེད་བཞིན་ཡོད་པ་དང་། ད་ལོའི་ཟླ9པར་དངོས་སུ་ཐོན་སྐྱེད་བྱེད་འགོ་ཚུགས་པ་རེད། དེ་དང་ཆབས་ཅིག་ཁག་དང་པོའི་བོད་རིགས་སློབ་ཆེན་སློབ་མ6ཀྱང་ལས་རྐང་དུ་ཞུགས་ཡོད་པ་དང་། མངོན་མིན་རིག་གནས་ཤུལ་བཞག་རྒྱུན་འཛིན་ལ་སྐུལ་འདེད་གཏོང་བ་དང་ཆབས་ཅིག་ལས་ཞུགས་ལ་སྔར་བས་སྐུལ་ཁྲིད་བྱས་ཏེ་ས་གནས་དེ་གའི་གྲོང་མི་ཕྱུག་འགྱུར་ཡོང་རྒྱུར་རོགས་རམ་བྱེད་བཞིན་ཡོད་པ་རེད།
