ཐང་ཆེན་དུ་ཞབས་བྲོ་འཁྲབ་ནས་སྦྱོང་བརྡ་བྱས་པ་དང་དངོས་མང་བཤམས་སྟོན་ཁང་དུ་ཕྱིན་ནས་རིག་གནས་ཤུལ་དངོས་ལ་བལྟས་ཤིང་།ཞིང་པའི་དཔེ་མཛོད་ཁང་དུ་ཕྱིན་ནས་དཔེ་ཆ་ཀློག་རྒྱུ་སོགས་བྱས་ཏེ། དེང་སང་དཀར་མཛེས་ཁུལ་གྱི་ས་གཞི་ཆེན་པོར་སྣ་མང་ཕུན་སུན་ཚོགས་པའི་བྱེད་སྒོ་སྤེལ་བ་ནི་མི་སེར་ཚོའི་ནམ་རྒྱུན་གྱི་འཚོ་བ་རོལ་ཚུལ་ཞིག་ཏུ་གྱུར་དང་འགྱུར་བཞིན་ཡོད་པ་རེད།

ཁྱོན་ཡོངས་ནས་རིག་གནས་དམངས་ཕན་གྱི་དྲང་བདེན་ནུས་པ་བཏོན་ཏེ་མི་སེར་ཚོར་དྲོད་སྐྱིད་ཀྱི་ཚོར་སྣང་ནམ་ཡང་འགྱུར་མེད་ཡོང་ཆེད། རང་ཁུལ་གྱིས་རིག་གནས་དམངས་ཕན་གྱི་ལས་གཞི་ལག་ལེན་བསྟར་ཤུགས་ཆེ་རུ་བཏང་སྟེ་གཞི་རིམ་མང་ཚོགས་ལ་ཞབས་ཕྱི་བསྒྲུབས་ནས། ཉིན་རེ་བཞིན་འཕེལ་འགྱུར་ཡོང་བའི་མི་དམངས་ཀྱི་བསམ་པའི་རིག་གནས་ཀྱི་དགོས་མཁོ་སྐོང་གང་ཐུབ་བྱས་པ་རེད།

རྨང་གཞིའི་སྒྲིག་བཀོད་འཐུས་ཚང་བཏང་ནས་དམངས་ཕན་གྱི་དཔེ་མཚོན་ དེབ་རིས་འཛུགས་སྐྱོང་བྱས།

ཕྱག་ཕྲེང་རྫོང་ཕྲེང་སྟོད་གྲོང་རྡལ་སྤེལ་གྲོང་གྲོང་སྡེར་སླེབས་སྐབས། འབྲས་བུའི་ཁུར་པོ་ལྗིད་པའི་ཤིང་སྡོང་གི་ཡལ་ག་ཐུར་དུ་དཔྱང་། བཀྲག་མདངས་སྣ་ལྔ་ལྡན་པའི་མེ་ཏོག་གིས་འཛུམ་མདངས་རབ་ཏུ་རྒྱས། མགོ་ལྕོགས་ལྡེམ་ལྡེམ་བྱེད་པའི་ལོ་ཏོག་སྟོན་རླུང་ལྡང་ཕྱོགས་དང་བསྟུན་ནས་གཉེར་རིས་རྒྱུ་བའི་རྣམ་པ་མངོན། གྲ་སྟར་འགྲིག་པའི་བོད་ཁང་རྣམས་ནི་མི་ཏིག་ཐང་དུ་གདལ་བའི་རིགས་སུ་མཐུན། གྲོང་སྡེ་རིམ་པའི་རིག་གནས་བྱེད་སྒོ་སྤེལ་ཁང་དེ་མཛེས་སྡུག་གི་ཡུལ་ལྗོངས་ལྟ་བུར་གྱུར་འདུག་པ་རེད།

སྤེལ་གྲོང་གྲོང་སྡེའི་ཏང་ཀྲི་པུའུ་ཧྲུའུ་ཅི་བསྟན་འཛིན་ཉི་མས་གསར་འགོད་པར་གྲོང་སྡེ་རིམ་པའི་བྱེད་སྒོ་སྤེལ་ཁང་ནི་གྲོང་མི་ཚོའི་ཐུན་མོང་གི་ཁྱིམ་གཞིས་ལྟ་བུ་ཡིན། གྲོང་སྡེ་རིམ་པའི་བྱེད་སྒོ་སྤེལ་ཁང་དུ་བརྗོད་དོན་གཙོ་བོ་ཏང་གི་ཉིན་མོ་དང་། དཔྱིད་གསར་དུས་ཆེན་གྱི་རིག་རྩལ་འཁྲབ་སྟོན། ཞིང་འབྲོག་པའི་གཟའ་ཉི་མ། ནམ་རྒྱུན་གྱི་ཚོགས་འདུ་འཚོགས་པ་སོགས་བྱས་ནས་གྲོང་མིའི་རིག་གནས་བྱེད་སྒོ་ཕུན་སུམ་ཚོགས་པ་དང་། སུན་སྣང་སྐྱེ་འོས་པའི་འཚོ་བ་བྱེད་སྟངས་དང་གྲོང་སྡེའི་གཉེན་ཉེ་བར་ལའང་ཕན་ཚུན་དེ་བས་མཛའ་མཐུན་བྱུང་བ་རེད་ཅེས་ངོ་སྤྲོད་བྱས་པ་རེད།

གྲོང་སྡེ་རིམ་པའི་རིག་གནས་བྱེད་སྒོ་སྤེལ་ཁང་གི་ཕན་ནུས་སྔར་བས་འདོན་སྤེལ་བྱས་ཏེ་རང་ཁུལ་གྱི་སྤྱི་པའི་རིག་གནས་བྱ་གཞག་འཕེལ་རྒྱས་ཡོང་བར་ནུས་ཤུགས་སྣོན་ཆེད། མིག་སྔའི་བར་དུ་རང་ཁུལ་གྱིས་གྲོང་སྡེ་རིམ་པའི་བྱེད་སྒོ་སྤེལ་ཁང1360ཡི་ཨར་ལས་དང་ལྷུ་ལག་སྒྲིག་སྐྱེལ་ལས་ཀ་ལེགས་འགྲུབ་བྱུང་ཡོད་པ་རེད།

མིག་སྔར་རང་ཁུལ་གྱིས་ཡུལ་ཤོག་དང་གྲོང་རྡལ་ཡོད་ཚད་ལ་ཕྱོགས་བསྡུས་རིག་གནས་ས་ཚུགས་བསྐྲུན་ནས། གཞི་རིམ་གྱི་རིག་གནས་སྒྲིག་བཀོད་སྔར་བས་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་ཆབས་ཅིག མུ་མཐུད་དེ་གཞི་རིམ་གྱི་ཕྱོགས་བསྡུས་རིག་གནས་ཞབས་ཞུའི་ལྟེ་གནས་ཀྱི་འཛུགས་སྐྲུན་ཨར་ལས་དང་།ཞབས་ཞུའི་བྱེད་ནུས་དང་ཆུ་ཚད་བཅས་འཐུས་སྒོ་ཚང་དུ་བཏང་ཡོད་པ་རེད།

བརྒྱད་ཟིལ་རྫོང་གི་ཁོངས་སུ་ཝང་ཁྲང་ཧྲེང་ཟེར་བའི་མི་དེ་མི་ཤེས་མཁན་ཕལ་ཆེར་མེད་པ་རེད། 1992ལོར་བརྒྱད་ཟིལ་རྫོང་གིས་དཀར་གྲོང་རྡལ་གྱི་རིག་གནས་ས་ཚུགས་ཀྱི་མིང་བྱང་དེ་ཁོ་བོའི་ཁྱིམ་དུ་འགེལ་ནས། རིག་གནས་ས་ཚུགས་ཀྱི་ནུས་པ་གང་ལེགས་འདོན་ཏེ་ཡུལ་དེའི་གྲོས་ཚོགས་ཆེ་ཆུང་དང་། རིག་གནས་བྱེད་སྒོ་སྣ་ཚོགས། སྒྲོག་འགྲེལ་བྱེད་སྒོ་སོགས་ལ་སྟབས་བདེ་མང་པོ་སྤྲད་པ་དང་ཆབས་ཅིག རྫོང་དེས་ད་དུང་ཝང་ཁྲང་ཧྲེང་ཁུལ་དང་རྫོང་གི་སྒྲོག་འགྲེལ་པའི་མིང་ཐོར་བཀོད་ནས་སྔོན་རྗེས་སུ་ཚོགས་པ་མང་པོར་ཕྱིན་ཏེ་སྒྲོག་འགྲེལ་ཐེངས300ལྷག་བྱས་པ་རེད།

ད་ལྟར་རིག་གནས་ས་ཚུགས་ཀྱི་བཤམས་སྟོན་བྱེད་སར་ཝང་ཁྲང་ཧྲེང་གིས་བྲིས་པའི་རི་མོ་དང་རོལ་དབྱངས་སྣ་ཚོགས་འགེལ་འདུག ཁོས་རིག་གནས་འདིས་ང་རང་ལ་སྦྱོང་བརྡར་བྱེད་པའི་གོ་སྐབས་སྤྲད་ནས་རིག་གནས་པ་ཞིག་འགྱུར་བའི་བསམ་དོན་གྲུབ་པ་རེད་ཅེས་བཤད།

ལི་ཐང་རྫོང་དགའ་བ་གྲོང་རྡལ་གྱི་ཞིང་པའི་དཔེ་ཀློག་ཁང་དུ་སྤྱི་ཚོགས་ཚན་རྩལ་དང་། བཅའ་ཁྲིམས། འཚོ་བ། ལོ་ཆུང་བྱིས་པ་ལ་སོགས་པའི་སྐོར་གྱི་དཔེ་ཆ་སྣ་ཚོགས་བཤམས་ནས་ཞིང་འབྲོག་པ་ཚོས་རང་གིས་ལྟ་དགའ་བའི་དཔེ་ཆ་དག་ཀློག་བཞིན་པ་རེད། ཤེས་རྟོགས་བྱུང་བ་ལྟར་ན། དགའ་བ་གྲོང་རྡལ་གྱིས་ཞིང་པའི་དཔེ་ཀློག་ཁང་དེ་རིག་གནས་དམངས་ཕན་གྱི་དྲང་བདེན་ནུས་པ་འདོན་ཡུལ་གཙོ་བོ་བྱས་ཏེ། ཞིང་པས་དཔེ་ཆ་ཀློག་པ་དང་། དཔེ་ཆ་སྤྱོད་པ། ཚན་རྩལ་རིག་གནས་ཀྱི་ཤེས་བྱ་སྦྱོང་བར་སྐུལ་འདེད་བཏང་བ་དང་། ཞིང་སྡེའི་རིག་གནས་འཚོ་བ་ཕུན་སུན་ཚོགས་པ་དང་རིག་གནས་ཀྱི་ཁོར་ཡུག་ལེགས་སུ་བཏང་ནས། ཞིང་པའི་སྤྱི་ཡོངས་ཀྱི་བྱང་ཚད་དང་ཞིང་སྡེའི་ཡ་རབས་ཚུལ་ལྡན་ཡིན་ཚད་ཇེ་དྲག་ཏུ་བཏང་སྟེ་དཔལ་འབྱོར་དང་སྤྱི་ཚོགས་མཐོན་སྦྱོར་འཕེལ་རྒྱས་ཡོང་བར་སྐུལ་འདེད་བཏང་བ་རེད།

འཛུགས་སྐྲུན་གྱི་གཞི་ཁྱོན་བསྡོམས་འབོར་སྨི་གྲུ་བཞི་མ1957ཡོད་པའི་དཔེ་ཀློག་ཁང་དུ་དཔེ་ཆ་ཁྲི13ཡོད་འདུག གྲངས་ཀ་འདིས་མིག་སྔའི་འབའ་ཐང་རྫོང་བྱ་ཁྱུང་དཔེ་མཛོད་ཁང་གི་དངོས་ཤུགས་མཚོན་ཐུབ་པ་རེད། ཤེས་རྟོགས་བྱུང་བ་ལྟར་ན། དཔེ་མཛོད་ཁང་འདིར་བྱིས་པའི་ཀློག་དེབ་དང་། ཆ་འཕྲིན་ཞབས་ཞུ། རིག་གནས་འགྲེམ་སྟོན་སོགས་འདུས་ཡོད། འབྲེལ་ཡོད་ལས་སྒྲུབ་མི་སྣས་དཔེ་མཛོད་ཁང་ནི་འབའ་ཐང་རྫོང་གི་སྤྱི་པའི་རིག་གནས་འཛུགས་སྐྱོང་གི་མངོན་གསལ་གནས་ཚུལ་ཡིན་པས་འབའ་ཐང་རྫོང་གི་རིག་གནས་ཀྱི་རྣམ་པ་གསར་གཏོད་གཏོང་བར་སྐུལ་འདེད་བཏང་དང་གཏོང་ཡོད་པ་རེད་ཅེས་ངོ་སྤྲོད་བྱས་པ་རེད།

རིག་གནས་དུས་སྟོན་གྱི་བྱེད་སྒོ་སྤེལ་ནས་དམངས་ཕན་གྱི་བྱ་བ་བསྒྲུབས།

སྔར་ལས་ལྷག་པར་རིག་གནས་དམངས་ཕན་གྱི་ནུས་ཤུགས་འདོན་སྤེལ་བྱས་ཏེ་མི་སེར་གྱི་འཚོ་བ་ཕུན་སུམ་ཚོགས་པོ་ཡོང་ཆེད། རང་ཁུལ་གྱི་རྫོང(གྲོང་ཁྱེར)སོ་སོས་རྒྱུན་མཐུད་ངང་རིག་གནས་ཀྱི་དུས་སྟོན་རབ་དང་རིམ་པ་འཛུགས་གཉེར་བྱས་པ་རེད།

སྤྱི་ཟླ7པའི་ཚེས18ཉིན་ཉག་ཆུ་རྫོང་སྡེ་ཚྭ་ཡུལ་ཤོག་གིས2020ལོའི་རིག་གནས་ཡུལ་སྐོར་བྱེད་སྒོ་དང་ཞིང་འབྲོག་པའི་ལུས་རྩལ་འགྲན་ཚོགས་མགོ་བཙུགས་ནས། བྱེད་སྒོ་སྤེལ་ཡུལ་དུ《མཛེས་སྡུག་གི་ཉག་ཆུ》དང་ 《ཏང་ལ་འབུལ་བའི་གླུ་དབྱངས་ཤིག》ཅེས་པའི་གླུ་དབྱངས་ཀྱིས་ཉག་ཆུའི་བུ་དང་བུ་མོའི་ཏང་དང་རྒྱལ་ཁབ།ཕ་ཡུལ་སོགས་ལ་བཅངས་པའི་བརྩེ་སེམས་མཚོན་པ་རེད།

སྤྱི་ཟླ7པའི་ཚེས29ནས31ཉིན་གྱི་བར་གནས་མཆོག་དཀར་མཛེས་ལ་འཛོམས་ནས་རླངས་འཁོར་བཏང་ནས་ཞིང་ཁམས་ལྟ་བུའི་མི་ཡུལ་སྐོར་གྱིས་བརྗོད་བྱ་བྱས་པའི2020ལོའི་སི་ཁྲོན་དཀར་མཛེས་ཁུལ་གྱི་རི་ཀླུང་རིག་གནས་ཡུལ་སྐོར་དུས་ཆེན་གྱི་ཚོགས་ར་གཙོ་བོ་ལི་ཐང་དུ་གཉེར་བ་རེད། སྐབས་དེར་སྐབས་བཞི་པའི་ལི་ཐང་ཚང་དབྱངས་རྒྱ་མཚོའི་མཛའ་གླུའི་དུས་སྟོན་དང་ཁམས་པའི་ཆེས་མཛེས་སྡུག་གི་ཕོ་རྒོད་འདེམས་སྒྲུག་བྱེད་པའི་འགྲན་བསྡུར་ཆེན་པོ། གནའ་བོའི་སྲོལ་རྒྱུན་གྱི་བོད་ཀྱི་ཟློས་གར། སྤྲོ་ཉམས་ལྡན་པའི་བོད་པའི་ཞབས་བྲོ།དམངས་ཁྲོད་ཀྱི་ལ་གླུ་སྙན་མོ་སོགས་རང་ཁུལ་གྱི་རིག་གནས་དུས་སྟོན་གྱི་དམིགས་བསལ་ཉམས་འགྱུར་མཚོན་བྱེད་དུ་གྱུར་པ་རེད།

ལི་ཐང་རྫོང་རིག་གནས་ཁང་གི་ལས་སྒྲུབ་མི་སྣས་དུས་སྟོན་གྱི་ཚོགས་རའི་བྱེད་སྒོ་ཡིས་མང་ཚོགས་ཀྱི་འཚོ་བའི་སྤྲོ་སྣང་སྐྱེས་ཐོག་མང་ཚོགས་ཀྱི་འཚོ་བའི་གཤིས་ངན་འཕོ་འགྱུར་གཏོང་ཐུབ་ངེས་རེད་ཅེས་མྱོང་ཚོར་ཟབ་མོ་ཡོད་པའི་སྒོ་ནས་དེ་ལྟར་བཤད་པ་རེད།

སྤྱི་ཟླ8པའི་ཚེས6ཉིན་གྱི་སྔ་དྲོར། 2020ལོར་སི་ཁྲོན་རི་ཀླུང་ཡུལ་སྐོར་དུས་སྟོན་གྱི་བྱེད་སྒོ་རབ་དང་རིམ་པ་སྟེ་གསེར་ཐར་གྱི་རིག་གནས་ཡུལ་སྐོར་དུས་སྟོན་གྱི་བྱེད་སྒོ་གཉེར་མགོ་བཙུགས། དུས་སྟོན་སྐབས་སྣང་འཆར་ལྡན་པའི་གསེར་ཐར་གྱི་རྒྱན་གོས་འཁྲབ་སྟོན་དང་། དམངས་ཁྲོད་སྒྱུ་རྩལ། གཟུགས་མེད་རིག་གནས་ཤུལ་དངོས་ཀྱི་འཁྲབ་སྟོན་ཐོག་གསེར་ཐར་རྫོང་གི་གཟུགས་མེད་རིག་གནས་ཤུལ་དངོས་དང་མི་རིགས་ཀྱི་གོས་རྒྱན་ཐོན་ཁུངས་འགྲེམ་སྟོན་གང་ལེགས་བྱས་ནས། རྒྱ་ཆེ་བའི་ལས་བྱེད་པ་དང་མང་ཚོགས། ཡུལ་སྐོར་བ་སོགས་ཀྱི་མིག་དབང་འགུགས་པ་རེད།

རིག་གནས་གྲོང་གསེབ་ཏུ་སྤེལ་ནས་དམངས་ཕན་གྱི་རྨང་གཞི་སྲ་བརྟན་བཏང་།

སྤྱི་ཟླ7པའི་ཚེས30ཉིན་བྲག་མགོ་རྫོང་ཉི་མོ་ཡུལ་ཤོག་ཏུ་རྫོང་རིག་གནས་ཁང་གིས་ཡང་བསྐྱར་རིག་གནས་གྲོང་གསེབ་ཏུ་སྤེལ་བའི་བྱེད་སྒོ་ཐེངས་ཤིག་སྤེལ་ནས་ཡུལ་དེའི་མི་སེར་གྱི་བསམ་པའི་རིག་གནས་ཀྱི་དགོས་མཁོ་སྐོང་ལ། རང་ཁུལ་གྱི་གོང་འོག་ཚང་མས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་རིག་རྩལ་དགོངས་ཚོགས་ཐོག་གི་གསུང་བཤད་ཀྱི་སྙིང་དོན་གྱིས་ཁྲིད་སྟོན་བྱས་ཏེ། སྔར་ལས་ལྷག་པར་ཏང་གི་ཚོགས་ཆེན་བཅུ་དགུ་པའི་སྙིང་དོན་ཡང་དུ་ལག་བསྟར་དོན་འཁྱོལ་གཏིང་ཟབ་བྱས་པའི་ཉམས་ཞིབ་ཐེངས་ཤིག་ཡིན་པ་རེད།

ཤེས་རྟོགས་བྱུང་བར་ལྟར་ན། རིག་གནས་ཀྱི་དམངས་ཕན་ལས་ཀ་ནུས་ལྡན་སྒྲུབ་ཆེད། རང་ཁུལ་གྱི་རྫོང（གྲོང་ཁྱེར）སོ་སོས་གནམ་ལོ་གསར་ཚེས་དང་དཔྱིད་གསར་དུས་ཆེན་སོགས་ཀྱི་གོ་སྐབས་བཟང་པོར་བསྟུན་ནས། ཚོགས་ཆེན་བཅོ་བརྒྱད་པའི་སེམས་པ་གཅིག་མཐུན་གྱིས་འབྱོར་འབྲིང་སྤྱི་ཚོགས་སྐྲུན་པར་དྲིལ་བསྒྲགས་བྱེད་པ་སོགས་བརྗོད་དོན་གཙོ་བོའི་རིག་གནས་གྲོང་གསེབ་ཏུ་སྤེལ་བའི་དམངས་ཕན་བྱེད་སྒོ་ཐེངས4220སྤེལ་ནས་མང་ཚོགས་མིའི་ཐེངས་གྲངས་ཁྲི114ལ་ཕན་པ་ཐོབ་པ་རེད།

སྤྱི་ཟླ7པའི་ཚེས16ནས21ཉིན་གྱི་བར་ཉག་ཆུ་རྫོང་གི་ཁམས་པའི་ཕོ་རྒོད་ཀྱི་སྒྱུ་རྩལ་ཚོགས་པ་སྡེ་ཚྭ་ཡུལ་ཤོག་ཏུ་ཕྱིན་ནས་རིག་གནས་དང་། བཅའ་ཁྲིམས། དབུལ་ཐར་འགག་སྒྲོལ་གྱི་སྒྱུ་རྩལ་སོགས་གྲོང་གསེབ་ཏུ་སྤེལ་བའི་བྱེད་སྒོ་སྤེལ་བ་རེད། རིག་གནས་འཛུགས་སྐྱོང་གི་ལས་ཀ་ཡག་པོ་སྤེལ་རྒྱུའི་འདུ་ཤེས་ལྟར། སྒྱུ་རྩལ་ཚོགས་པ་དེས་སྡེ་ཚྭ་ཡུལ་ཤོག་གི་གྲོང་སྡེ་ལྔའི་ཞིང་འབྲོག་པ་དང་མཉམ་དུ་མཉམ་འབྲེལ་དགོངས་ཚོགས་འཚོགས་པ་རེད། ཉིན6གི་རིང་ལ་རིག་གནས་གྲོང་གསེབ་ཏུ་སྤེལ་བའི་འབྲེལ་ཡོད་བྱེད་སྒོ་ཐེངས10སྤེལ་ནས་སྡེ་ཚྭ་ཡུལ་ཤོག་གི་མི་སེར་ཚོའི་གདེང་འཇོག་ཡག་པོ་ཐོབ་པ་རེད།

ཤེས་རྟོགས་བྱུང་བ་ལྟར་ན། རང་ཁུལ་གྱི་རྒྱ་ཆེ་བའི་སྒྱུ་རྩལ་ལས་དོན་སྒྲུབ་མཁན་གྱིས་བྱེད་སྟངས་དང་ནང་དོན་རྒྱུན་མཐུད་དུ་གསར་གཏོད་བྱས་ནས་རང་ངོས་ཀྱི་རིག་གནས་ཁྱད་ཆོས་འདོན་སྤེལ་བྱས་ཤིང་། རྒྱ་ཆེ་བའི་མི་དམངས་མང་ཚོགས་ལ་གླུ་དབྱངས་དང་། སྐོར་བྲོ། འཁྲབ་ཚན་ཐུང་ངུ་སོགས་ལྟ་དགའ་ཉན་འདོད་ཡོད་པའི་ལེ་ཚན་སྣ་མང་བཟོས་ནས་དུས་ཐོག་ཏུ་ཏང་གི་བྱེད་ཕྱོགས་སྲིད་ཇུས་དང་ཕུལ་བྱུང་གི་མི་རིགས་རིག་གནས་གཞི་རིམ་གྱི་མང་ཚོགས་ཁྲོད་ཏུ་སྤེལ་མཐར། ཏང་གི་དྲིལ་བསྒྲགས་ཀྱི་མགྲིན་ཚབ་པའི་ནུས་པ་འདོན་སྤེལ་དང་ཞིང་སྡེའི་འབྲོག་ཁུལ་གྱི་དྲིལ་བསྒྲགས་རིག་གནས་ཀྱི་གཡུལ་ས་ལྟ་བུ་དེ་སྲ་བརྟན་བཏང་བ་རེད།

བསྡུམས་རྩིས་བྱས་པ་ལྟར་ན། ཉེ་བའི་ལོ་ཤས་རིང་། ཁུལ་གླུ་གར་ཚོགས་པས་ཐོག་མའི་བསམ་འདུན་མི་བརྗེད་ཅིང་འགན་འཁྲི་སེམས་ལ་བརྟན་པོ་འཆང་བ་ཡིས་བརྗོད་དོན་གཙོ་བོ་བྱས་པའི་རིག་གནས་གྲོང་གསེབ་ཏུ་སྤེལ་བའི་བྱེད་སྒོ་སྤེལ་ནས། ཁག་བགོས་ཏེ་རང་ཁུལ་གྱི་ལྷོ་བྱང་གཉིས་ཀྱི་ཡུལ་དུ་རིག་རྩལ་འཁྲབ་སྟོན་ཐེངས62བྱས་ཏེ་ཁུལ་ཡོངས་ཀྱི་ཡུལ་ཤོག་དང་གྲོང་རྡལ64ལ་ཁེབས་ནས་ལྟ་མཁན་མིའི་ཐེངས་གྲངས་ཁྲི5ལྷག་ལ་ཟིན་པ་རེད།

ཁུལ་མི་རིགས་དངོས་མང་བཤམས་སྟོན་ཁང་གིས་ལྔ་པའི་ཚེས18ཉིན་གྱི་རྒྱལ་སྤྱིའི་དངོས་མང་བཤམས་སྟོན་ཁང་གི་ཉིན་མོའི་དུས་ཚོད་དང་བསྟུན་ནས། སྐྱེ་ཁམས་དང་། ལོ་རྒྱུས། གཟུགས་མེན་རིག་གནས་ཤུལ་དངོས། གསར་བརྗེའི་གནས་གཞི་རྙིང་པ་སོགས་སྐོར་གྱི་འཁོར་རྒྱུག་འགྲེམ་སྟོན་པང་ལེབ་བཤམས་སྟོན་བྱས་སྟབས། རྒྱ་ཆེ་བའི་གྲོང་མིས་དངོས་མང་བཤམས་སྟོན་ཁང་ལ་ཆ་རྒྱུས་དེ་བས་ཟབ་མོ་ལོན་ཐུབ་པར་མ་ཟད།དངོས་མང་བཤམས་སྟོན་ཁང་གི་དང་བླངས་པ་བསྡུ་ལེན་བྱེད་པར་རྨང་གཞི་ཡག་པོ་བཏིང་ཡོད་པ་རེད།

ཁུལ་རིག་གནས་ཁང་གིས་དྲུག་གཅིག་བྱིས་པའི་དུས་ཆེན་དང་། བདུན་གཅིག་ཏང་གི་དུས་ཆེན། བརྒྱད་གཅིག་དམག་འཛུགས་དུས་ཆེན་སོགས་ཀྱི་གོ་སྐབས་དང་བསྟུན་ནས།དཀར་མཛེས་ཁུལ་གྱི་དམིགས་བསལ་སློབ་གསོའི་སློབ་གྲྭ་དང་གཉའ་ལུང་འགོ་གྲོང་སྡེ་གསར་པ། ཁུལ་དྲག་ཆས་ཉེན་རྟོག་ཡན་ལག་དཔུང་སྡེར་ཕྱིན་ནས་སྒྱུ་རྩལ་འཁྲབ་སྟོན་བྱས་པར་མ་ཟད། འབྲེལ་ཡོད་སྡེ་ཁག་དང་མཉམ་དུ་སེར་ཤུལ་རྫོང་གི་ཡུལ་ཤོག་དང་གྲོང་རྡལ5ལ་ཕྱིན་ནས་སྒྱུ་རྩལ་དང་ཕྱུགས་འབྲོག་ལས་རིགས་སོགས་ཀྱི་རིག་གནས་གྲོང་གསེབ་ཏུ་སྤེལ་བའི་བྱེད་སྒོ་སྤེལ་བ་རེད།

ཁུལ་དཔེ་མཛོད་ཁང་གིས་བཙོན་ཁང་གི་མི་དམངས་ཉེན་རྟོག་པར་བསམ་པའི་འཚོ་བཅུད་ལྟ་བུའི་རིག་རྩལ་སྤེལ་བར་མ་ཟད་ཁུལ་རིག་གནས་མཉམ་འབྲེལ་ལྷན་ཚོགས་དང་མཉམ་དུ་དབུལ་ཐར་འབྱོར་འབྲིང་གི་ལམ་དུ་སྒྱུ་རྩལ་དང་མཉམ་དུ་སྐྱོད་ཅེས་པའི་དཔེ་ཆ་ལེགས་སྐྱེས་སུ་ཕུལ་བའི་བྱེད་སྒོ་སྤེལ་ནས། རྫོང(གྲོང་ཁྱེར)18ཀྱི་དཔེ་མཛོད་ཁང་ལ་ས་གནས་རང་ཉིད་ཀྱི་རྩོམ་པ་པོས་རྩོམ་པའི་ཕུལ་བྱུང་གི་ཀློག་དེབ་ཁྱོན་བསྡོམས་ཆ7000ཕུལ་བ་རེད།།