དགེ་རུ་འཇམ་དབྱངས་བློ་གྲོས་ནི་ཆུང་དུས་ནས་རི་མོ་འབྲི་བར་དགའ་བས་རྡོ་སྐུ་འདྲ་མིན་དང་དཀར་ཡོལ་སོགས་ཀྱི་མཛེས་རིས་དག་ལ་དཔེ་བྱས་ཏེ་རི་མོ་འདྲ་མིན་འབྲི་བའི་གོམས་སྲོལ་བཟང་པོ་ཡོད།རང་གི་མེས་པོ་དག་གི་རེ་སྨོན་ལྟར་རང་ལོ་བཅུ་བཞི་ལ་སོན་སྐབས་ཀརྨ་སྒར་བྲིས་ཀྱི་ལྷ་བཟོ་གྲགས་ཅན་ཤོད་བུའི་བསོད་ནམས་ཉི་མའི་མདུན་ནས་ཀརྨ་སྒར་བྲིས་ཀྱི་ཐང་ག་འབྲི་རྩལ་ལ་སྦྱོང་བ་མཐར་ཕྱིན་བྱས། ནང་ཆེན་ཕྱོགས་ཀྱི་དགོན་སྡེ་ཁག་ལ་དགེ་རྒན་དང་ལྷན་དུ་གནས་བརྟེན་བཅུ་དྲུག་དང་རྒྱན་དྲུག་མཆོག་གཉིས་སོགས་ཀྱི་ཐང་ག་མང་པོ་འབྲི་བཞེངས་བྱས་མྱོང་། གཞན་ཡང་བོད་ཀྱི་གཟབ་ཆེན་དང་གཟབ་ཆུང་སོགས་ངོ་མཚར་བའི་ཡིག་གཟུགས་དག་ལ་སྦྱངས་པ་བྱས། སྦྱང་བྱ་གཙོ་བོ་ནི་རིག་པའི་གནས་ཆེན་ལྔ་ཡི་ཡ་གྱལ་བཟོ་རིག་པའི་ཆ་ཤས་ཐུན་མོང་མ་ཡིན་པའི་བོད་ཀྱི་ཐང་ག་འབྲི་བའི་ལག་ཤེས་འདི་ཉིད་ཡིན་ལ།ནང་ཆེན་ཡུལ་ནས་རི་མོའི་སྒྱུ་རྩལ་འགྲན་ཚོགས་སུ་ཞུགས་སྐབས་ཨང་གཉིས་པའི་གཟེངས་རྟགས་དང་བསྟོད་བསྔགས་བླ་ན་མེད་པ་ཐོབ་པ་དང་། རང་གི་འབད་བརྩོན་ལ་བརྟེན་ནས་ད་ལྟ་ནང་ཆེན་རྫོང་གི་མངོན་མིན་ཤུལ་བཞག་རིག་གནས་ཀྱི་རྒྱུན་འཛིན་པར་གྱུར་ཡོད།
