རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ཏང་ཙུའུ་ཡིས་གྲོས་ཚོགས་སྐོང་འཚོགས་བྱས་ནས། ཞི་ཅིན་ཕིང་གི་ཁྲིམས་སྐྱོང་དགོངས་པ་དང་ཀྲུང་དབྱང་གི་ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ལས་དོན་གྲོས་ཚོགས་ཀྱི་དགོངས་པ་སློབ་སྦྱོང་ལག་བསྟར་བྱས་པ་དང་། ལི་ཀྲང་ཧྲུའུ་ཡིས་གྲོས་ཚོགས་གཙོ་སྐྱོང་གནང་བ་མ་ཟད་གསུང་བཤད་གནང་བ།

        འདི་ག་ལས་ཁུངས་ནས་སྤེལ་བའི་གནས་ཚུལ། ཀྲུང་གུང་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ཏང་ཙུའུ་ཡིས་སྤྱི་ཚེས་༢༣ཉིན་པེ་ཅིང་དུ་གྲོས་ཚོགས་སྐོང་འཚོགས་གནང་ནས། ཞི་ཅིན་ཕིང་གི་ཁྲིམས་སྐྱོང་དགོངས་པ་དང་ཀྲུང་དབྱང་གི་ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ལས་དོན་གྲོས་ཚོགས་ཀྱི་དགོངས་པ་སློབ་སྦྱོང་ལག་བསྟར་བྱས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུད་ཀྱི་རྒྱུན་ལས་ཨུ་ཡོན། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་། ཏང་ཙུའུ་ཡི་ཧྲུའུ་ཅི་ལི་ཀྲང་ཧྲུའུ་ཡིས་གྲོས་ཚོགས་གཙོ་སྐྱོང་གནང་བ་མ་ཟད་གསུང་བཤད་གནང་ཡོད།

        གྲོས་ཚོགས་ཐོག ཀྲུང་དབྱང་གིས་ཁྲིམས་ལྟར་རྒྱལ་ཁབ་སྐྱོང་བའི་ལས་དོན་གྲོས་ཚོགས་སྐོང་འཚོགས་གནང་ཡོད། དེ་ནི་རང་རེའི་ཏང་གི་ལོ་རྒྱུས་ཐོག་ཐེངས་དང་པོ་ཞིག་རེད། གྲོས་ཚོགས་ཀྱི་གྲུབ་འབྲས་ཆེ་ཤོས་དེ་ནི་ཞི་ཅིན་ཕིང་གི་ཁྲིམས་སྐྱོང་དགོངས་པ་བཏོན་པ་དེ་རེད། རྒྱལ་ཡོངས་མི་དམངས་འཐུས་ཚོགས་ནི་རྒྱལ་ཁབ་ཀྱི་ཁྲིམས་འཛུགས་ལས་ཁུངས་དང་ཁྲིམས་ལུགས་ལག་བསྟར་བྱེད་པའི་ལྟ་སྐུལ་ལས་ཁུངས་རེད།

        ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ནང་འགན་འཁྲི་གལ་ཆེན་འཁུར་མུས་རེད། ཞི་ཅིན་ཕིང་གི་ཁྲིམས་སྐྱོང་དགོངས་པ་དང་ཀྲུང་དབྱང་གི་ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ལས་དོན་གྲོས་ཚོགས་ཀྱི་དགོངས་པ་སློབ་སྦྱོང་ལག་བསྟར་བྱེད་པར། དུས་རབས་གསར་པར་ཁྲིམས་ལྟར་རྒྱལ་ཁབ་སྐྱོང་བར་སྐུལ་འདེད་གཏོང་དགོས་དོན་གང་ཡིན་མིན་དང་། ཁྲིམས་ལྟར་རྒྱལ་ཁབ་སྐྱོང་བའི་དུས་རབས་ཀྱི་སློབ་གཞི་གལ་ཆེན་དེ་ལག་བསྟར་གང་འདྲ་བྱེད་མིན་ལ་གཞིགས་ནས། མི་དམངས་འཐུས་ཚོགས་ཀྱི་ལམ་ལུགས་རིགས་པའི་གཞུང་དང་ལས་ཀའི་ལག་ལེན་དངོས་དང་ཟུང་འབྲེལ་བྱས་ཏེ་བསམ་བློ་གཏོང་བ་དང་བསམ་ཤེས་བྱ་དགོས་པ་ཞིག་ཡིན་པའི་ངོས་འཛིན་བྱས་ཡོད།

        གྲོས་ཚོགས་ཐོག ཞི་ཅིན་ཕིང་གི་ཁྲིམས་སྐྱོང་དགོངས་པ་ནི་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་དུས་རབས་ཀྱི་བླང་བྱ་དང་མཐུན་ནས་དུས་ཐོག་ཏུ་གྲུབ་པའི་རིགས་པའི་གཞུང་ལུགས་གསར་གཏོད་ཀྱི་གྲུབ་འབྲས་གལ་ཆེན་ཞིག་ཡིན་པ་དང་། མར་ཁེ་སི་རིང་ལུགས་ཁྲིམས་སྐྱོང་རིགས་པའི་གཞུང་ལུགས་ཀྲུང་གོ་ཅན་གྱི་གྲུབ་འབྲས་གསར་ཤོས་ཤིག ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་གྲུབ་ཆ་གལ་ཆེན་ཞིག་བཅས་ཡིན། དགོངས་པ་གལ་ཆེན་འདིར་ཀྲུང་གོའི་གུང་ཁྲན་ཏང་མིས་ཁྲིམས་སྐྱོང་འཛུགས་སྐྱོང་གི་ཡུན་རིང་འཚོལ་ཞིབ་ཁྲོད་གྲུབ་པའི་ཉམས་མྱོང་གསོག་འཇོག་དང་བློ་གྲོས་ཀྱི་ཉིང་བཅུད་འདུས་ཡོད་པ་དང་། རང་རེའི་ཏང་གིས་གུང་ཁྲན་ཏང་གི་སྲིད་སྐྱོང་ཆོས་ཉིད་དང་། སྤྱི་ཚོགས་རིང་ལུགས་འཛུགས་སྐྲུན་གྱི་ཆོས་ཉིད། མིའི་རིགས་ཀྱི་སྤྱི་ཚོགས་འཕེལ་རྒྱས་ཀྱི་ཆོས་ཉིད་བཅས་ལ་ངོས་འཛིན་བྱེད་ཚད་མཐོ་ཚད་གསར་པ་ཞིག་ཏུ་སླེབས་པ་མཚོན་ཡོད། དུས་རབས་༢༡པའི་མར་ཁེ་སི་རིང་ལུགས་ཀྱི་ཁྲིམས་སྐྱོང་རིགས་པའི་གཞུང་ལུགས་ཀྱི་ཡུལ་ཁམས་གསར་པ་བཏོད་ཡོད། ཞི་ཅིན་ཕིང་གི་ཁྲིམས་སྐྱོང་དགོངས་པའི་རིགས་པའི་གཞུང་ལུགས་དང་ལག་ལེན་གྱི་དོན་སྙིང་གལ་ཆེན་ལ་ངོས་འཛིན་གཏིང་ཟབ་བྱས་ཏེ། རང་རྟོགས་ངང་ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་རྩ་བའི་སྲུང་བྱ་དང་བྱ་སྤྱོད་ཀྱི་ཕྱོགས་སྟོན་དུ་བརྩི་དགོས་ཞེས་བསྟན་ཡོད།

        གྲོས་ཚོགས་ཐོག ཞི་ཅིན་ཕིང་གི་ཁྲིམས་སྐྱོང་དགོངས་པའི་ནང་དོན་གཏིང་ཟབ་པ་དེར་གོ་བ་གཏིང་ཟབ་ལེན་དགོས། གཅིག་ནི་བློ་རྩ་བརྟན་པོས་གཡོ་འགུལ་མི་བྱེད་པ་གཉིས་སྒྲུབ་དགོས་པ་དང་། རྩ་ཁྲིམས་ནང་གཏན་ལ་ཕབ་པའི་ཀྲུང་གོའི་གུང་ཁྲན་ཏང་གི་འགོ་ཁྲིད་ཀྱི་གནས་བབ་གཡོ་འགུལ་མེད་པར་རྒྱུན་འཁྱོངས་བྱེད་པ། རྩ་ཁྲིམས་ནང་གཏན་ལ་ཕབ་པའི་མི་དམངས་དམངས་གཙོའི་སྲིད་དབང་སྒེར་འཛིན་གྱི་རྒྱལ་ཁབ་སྒྲིག་སྲོལ་དང་མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་སྲིད་དབང་འཛུགས་ལུགས་གཡོ་འགུལ་མེད་པར་རྒྱུན་འཁྱོངས་བྱེད་དགོས། དེ་ནི་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ལམ་ལུགས་ཀྱི་རྩ་བའི་རྩ་དོན་ཡིན་པ་དང་། གཉིས་ནི་བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་ཁྲིམས་སྐྱོང་བགྲོད་ལམ་དུ་བསྐྱོད་དགོས་དང་། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བར་ཡུན་རིང་རང་བཞིན་ལྡན་པའི་ལམ་ལུགས་ཀྱི་འགན་སྲུང་མཁོ་འདོན་བྱ་དགོས། དེ་ནི་ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བར་ངེས་པར་དུ་རྒྱུན་འཁྱོངས་བྱ་དགོས་པའི་ཁ་ཕྱོགས་ཆེན་པོ་ཞིག་རེད། གསུམ་ནི་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་ནི་ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བར་སྐུལ་འདེད་གཏོང་བའི་སྤྱིའི་ལག་པ་འཛིན་ས་ཡིན་པར་གོ་བ་གཏིང་ཟབ་ལེན་དགོས། ཁྲིམས་སྐྱོང་གི་ཐོག་ནས་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བར་འཕྲད་པའི་གནད་དོན་རབ་དང་རིམ་པ་ཐག་གཅོད་བྱེད་པར་ལམ་ལུགས་ཅན་གྱི་ཇུས་གཞི་རྒྱུན་ཆད་མེད་པར་མཁོ་འདོན་བྱ་དགོས། བཞི་ནི་རྒྱལ་ནང་བཅོས་སྐྱོང་དང་རྒྱལ་སྤྱིའི་བཅོས་སྐྱོང་ལ་མཐུན་སྦྱོར་ངང་སྐུལ་འདེད་གཏོང་བ་དང་། རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་ཀྱི་ཁེ་ཕན་བཅས་ལ་སྔར་བས་སྲུང་སྐྱོང་བྱེད་དགོས། ལྔ་ནི་འགོ་ཁྲིད་ལས་བྱེད་པའི་འགག་རྩའི་ཉུང་ཤས་དེ་ཉིད་དམ་འཛིན་བྱ་དགོས་ཞེས་ནན་བཤད་བྱས་ཡོད།

        གྲོས་ཚོགས་ཐོག ཞི་ཅིན་ཕིང་གི་ཁྲིམས་སྐྱོང་དགོངས་པ་ལག་བསྟར་དོན་འཁྱོལ་མཐའ་གཅིག་ཏུ་བྱེད་དགོས་པ་དང་། ཁྱོན་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ཆབ་སྲིད་ཀྱི་ཁ་ཕྱོགས་དང་། གནས་བབ་གལ་ཆེན། ལས་ཀའི་བཀོད་སྒྲིག ལས་འགན་གཙོ་བོ། འབྲེལ་བ་གལ་ཆེན། འགན་སྲུང་གལ་ཆེན་བཅས་དམ་འཛིན་བྱེད་པ་དང་། རང་རྟོགས་ཀྱིས་མི་དམངས་འཐུས་ཚོགས་ཀྱི་ལས་ཀ་དེ་ཏང་དང་རྒྱལ་ཁབ་ཀྱི་ལས་ཀའི་སྤྱི་ཡོངས་ཀྱི་ཁྲོད་དུ་བཞག་ནས་བསམ་གཞིགས་དང་། ཇུས་འགོད། སྐུལ་སྤེལ་བཅས་བྱ་དགོས་ཞེས་ནན་བཤད་བྱས་ཡོད་པ་རེད།