འདི་ག་ལས་ཁུངས་ནས་སྤེལ་བའི་གནས་ཚུལ། ཉེ་དུས། ཀྲུང་གུང་ཀྲུང་དབྱང་གིས་བཟོ་བཅོས་བརྒྱབ་རྗེས་ཀྱི་༼ཀྲུང་གོ་གུང་ཁྲན་ཏང་གི་ས་གནས་རྩ་འཛུགས་ཀྱི་འདེམས་བསྐོའི་ལས་དོན་སྲོལ་ཡིག༽པར་འགྲེམ་བྱས་པ་དང་འབྲེལ་བརྡ་ཐོ་བཏང་ནས། ས་གནས་ཁག་དང་ཚན་པ་ཁག་གིས་སྲོལ་ཡིག་ལྟར་ལག་བསྟར་བྱེད་དགོས་པའི་བླང་བྱ་བཏོན་ཡོད།
        བརྡ་ཐོའི་ནང་བསྟན་དོན། 《སྲོལ་ཡིག》གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་མཛུབ་སྟོན་བྱེད་པ་དང་། ཏང་གི་སྒྲིག་ཡིག་རྩ་བའི་གཞི་འཛིན་སར་བརྩིས་པ། ཏང་གི་ཚོགས་ཆེན་བཅུ་དགུ་པ་དང་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་། གསུམ་པ། བཞི་པ། ལྔ་པ་བཅས་ཀྱི་དགོངས་དོན་ལག་བསྟར་གཏིང་ཟབ་བྱེད་པ། དུས་རབས་གསར་པའི་ཏང་འཛུགས་སྐྱོང་གི་སྤྱིའི་བླང་བྱ་དང་དུས་རབས་གསར་པའི་ཏང་གི་རྩ་འཛུགས་ཀྱི་ལམ་ཕྱོགས་ལག་བསྟར་དོན་འཁྱོལ་བཅས་བྱས་ཡོད་པས། དུས་རབས་གསར་པའི་ཏང་གི་ས་གནས་རྩ་འཛུགས་ཀྱི་འདེམས་བསྐོའི་ལས་དོན་གྱི་རྩ་བའི་གཞི་འཛིན་ས་ཡིན། 《སྲོལ་ཡིག》ལ་བཟོ་བཅོས་བརྒྱབ་པ་དང་ལག་བསྟར་བྱས་པ་དེས། ཏང་གི་ཁྱོན་ཡོངས་འགོ་ཁྲིད་རྒྱུན་འཁྱོངས་དང་དེར་ཤུགས་སྣོན་རྒྱག་པ་དང་། ཏང་གི་གཅིག་སྡུད་གཅིག་གྱུར་ལ་སྲུང་སྐྱོང་བྱེད་པའི་རྩ་འཛུགས་ལམ་ལུགས་འཐུས་ཚང་དུ་གཏོང་བ། ཏང་གི་ས་གནས་རྩ་འཛུགས་ཀྱི་འདེམས་བསྐོ་ཚད་ལྡན་བཟོ་བ། ཏང་གི་ས་གནས་རྩ་འཛུགས་འཛུགས་སྐྱོང་ལ་ཤུགས་སྣོན་རྒྱག་པ། ཏང་གི་སྲིད་འཛིན་ནུས་པ་དང་འགོ་ཁྲིད་ཆུ་ཚད་མཐོ་རུ་གཏོང་བ་བཅས་ལ་དོན་སྙིང་གལ་ཆེན་ལྡན་ཡོད།
        བརྡ་ཐོའི་ནང་། རིམ་ཁག་ཏང་ཨུད་ཀྱིས་“འདུ་ཤེས་བཞི”ཆེ་རུ་གཏོང་བ་དང་། “བློ་སྤོབས་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བཅས་བྱས་ཏེ་བྱེད་པོའི་འགན་འཁྲི་དོན་འཁྱོལ་ནན་ཏན་བྱེད་པ་དང་། 《སྲོལ་ཡིག》ལག་བསྟར་བྱེད་པའི་སྒྲིག་འཛུགས་དང་འགོ་ཁྲིད་ལ་ཤུགས་སྣོན་རྒྱག་དགོས་པ་དང་། དྲིལ་བསྒྲགས་གསལ་འགྲེལ་དང་སློབ་སྦྱོང་སྦྱོང་བརྡར་བྱེད་རྒྱུར་དམ་འཛིན་ཡག་པོ་བྱེད་པ་དང་། རིམ་ཁག་ཏང་རྩ་འཛུགས་དང་རྒྱ་ཆེའི་ཏང་ཡོན་ལས་བྱེད་པ་ཚོས་《སྲོལ་ཡིག》སློབ་སྦྱོང་ནན་ཏན་བྱ་རྒྱུར་སྐུལ་འདེད་གཏོང་བ། 《སྲོལ་ཡིག》ལག་བསྟར་དོན་འཁྱོལ་བྱེད་པའི་བསམ་བློའི་རང་རྟོགས་དང་། ཆབ་སྲིད་རང་རྟོགས། བྱ་སྤྱོད་རང་རྟོགས་བཅས་ཆེ་རུ་གཏོང་དགོས་པ། ཏང་ཡོན་འགོ་ཁྲིད་ལས་བྱེད་པ་དང་ལྷན་དོན་དུ་འགན་འཁུར་བློ་མཐུན་གཙོ་བོས་སྣེ་ཁྲིད་ནས་སློབ་སྦྱོང་དང་། སྣེ་ཁྲིད་ནས་ཞིབ་འཇུག སྣེ་ཁྲིད་ནས་ལག་བསྟར་བྱེད་དགོས། ཀྲུང་དབྱང་རྩ་འཛུགས་པུས་འབྲེལ་ཡོད་ཚན་པའི་དབར་ལྟ་སྐུལ་མཛུབ་ཁྲིད་བྱེད་རྒྱུར་ཤུགས་སྣོན་བརྒྱབ་ནས། 《སྲོལ་ཡིག》གི་གཏན་འབེབས་ཁག་ལག་བསྟར་དོན་འཁྱོལ་ནུས་ལྡན་ཐུབ་རྒྱུ་འགན་ལེན་བྱེད་དགོས་པ་དང་། ས་གནས་ཁག་དང་ཚན་པ་ཁག་གིས་《སྲོལ་ཡིག》ནང་གི་གནས་ཚུལ་དང་གྲོས་འགོ་གལ་ཆེན་ལག་བསྟར་བྱེད་སྐབས་ཏང་ཀྲུང་དབྱང་ལ་དུས་ཐོག་ཏུ་སྙན་སེང་ཞུ་དགོས་པ་བཅས་ཀྱི་བླང་བྱ་བཏོན་ཡོད་པ་རེད།
        《སྲོལ་ཡིག》དེར་སྤྱིའི་རྩ་དོན་དང་། འཐུས་མིའི་འདེམས་བསྐོ་བྱ་ཐབས། ཨུ་ཡོན་ལྷན་ཁང་གི་ཨུ་ཡོན་གྱི་འདེམས་བསྐོ་བྱ་ཐབས། རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་དང་ཧྲུའུ་ཅི་དང་ཧྲུའུ་ཅི་གཞོན་པའི་འདེམས་བསྐོ་བྱ་ཐབས། འདེམ་བསྐོ་དང་ཞིབ་བཤེར་སྙན་འབུལ་ཞུ་བ། སྒྲིག་ཁྲིམས་དང་ལྟ་སྐུལ། ཞར་བྱུང་དོན་ཚན་བཅས་ཁྱོན་ལེའུ་8དང་དོན་ཚན་49ཡོད།