བཞིན་ལེགས་མཛེས་སྡུག་མཚན་དཔེའི་གཟི་བྱིན་ལས།།
རིག་སྟོང་འདོད་འཇོའི་མྱོ ས་བུམ་ཆེར་རྒྱས་ཤིང་།།
སྲིད་ཞིའི་དབྱངས་སྙན་བག་ཡངས་ལྷུར་ལེན་ལྷས།།
བརྩེ་གཟིགས་ངག་གི་རོལ་མོའི་སྙན་པ་སྩོལ།།
ཕྱོགས་གླང་ཆོས་གྲགས་རྣམ་དཔྱོད་ཉི་ཟླའི་རླབས།།
ཕྱོགས་སུ་འཁྱུག་པའི་མདོ་དང་སྡེ་བདུན་གཞུང་།།
རིགས་ལམ་སྣང་བརྒྱ་བཞད་པའི་འཕྲུལ་འཁོར་ཆེ།།
མངོན་ལྐོག་རྨོངས་རྡུལ་འཐག་པའི་གཉེན་དུ་རྒྱུ།།
ཕུང་ཁམས་ལ་སོགས་གཞི་ལྔའི་ཤེས་བྱའི་ནོར།།
ཡང་ཡང་མངོན་པར་ཐང་མར་བརྡལ་བ་ན།།
ཕྱོགས་ནས་འདུ་བའི་སྐལ་ལྡན་བློ་གསལ་ཚོས།།
ཆོས་ཀུན་རིན་ཐང་གཞལ་བའི་བློ་གྲོས་རྒྱས།།
དུཿཁའི་རྒྱ་མཚོར་སྐྱོ་བའི་ངེས་འབྱུང་གིས།།
ཐར་ལམ་གྲུར་ཞུགས་ཚངས་སྤྱོད་དེད་དཔོན་སྡེས།།
ལུས་ངག་བག་ཡོད་ཁྲིམས་ལྡན་སྤྱོད་བཟང་གིས།།
རྒྱུ་འབྲས་སྤང་བླངས་གནད་ལ་ལྷུར་ལེན་མཛེས།།
ཐུན་མོང་སེམས་བསྐྱེད་ལྟ་བའི་མལ་སྟེང་ནས།།
བསྐྱེད་རྫོགས་ཐེག་མཆོག་གདམས་པའི་ཉམས་ལེན་གྱིས།།
སྣང་བཞི་དག་པའི་རྣལ་འབྱོ ར་གདེང་རྙེད་ན།།
ཟུང་འཇུག་བཛྲ་དྷཱ་རའི་གོ་འཕང་བརྙེས།།
ཐོག་མཐའ་བར་གསུམ་དགེ་བ་དམ་པའི་ཆོས།།
བསྒྲུབས་དང་བསྒྲུབ་ཚུལ་ཤེས་པས་དེ་ལྟ་མོད།།
མི་ཤེས་ལད་ཟློ ས་གཟུགས་ཀྱིས་ངལ་བ་ཡིས།།
གཉིས་མེད་མི་ཚེ་ཁད་ཀྱིས་ཟད་པར་ཕངས།།
རིས་མེད་རིག་གཞུང་རྫས་བརྒྱའི་བྲོ ་བ་ཀུན།།
རྣམ་དཔྱོད་ལག་རྩལ་མཁས་པས་གཡོ་སྦྱོར་ཟས།།
བློ་གསལ་མགྲོན་པོའི་ཞལ་དུ་སྨིན་པ་ན།།
སྦྱང་འདོད་སྤྲོ་དགའི་མགྲིན་ལམ་ཡངས་པོར་གྱུར།།
ཐུབ་བསྟན་འོད་ཟེར་བརྒྱ་པའི་གུར་ཁྱི མ་ན།།
བཤད་སྒྲུབ་ལྷུར་ལེན་རིས་མེད་དམ་པ་རྣམས།།
སྐུ་ཚེ་ཡུན་འཚོ་ཐུགས་མཐུན་ཁྲིམས་གཙང་གིས།།
སྐྱེ་དགུར་སྨན་པའི་མཛད་བཟང་དར་རྒྱས་ཤོག།།
སྐུལ་ཚིག་བརྗིད་ལྡན་དབྱར་སྐྱེས་གླལ་བའི་སྒྲས།།
སྙན་ཚིགས་གཤིབས་པའི་སྒྲོ་གཤོག་གཟེངས་བྱས་ཀྱང་།
འཁྱུག་པའི་ལས་ལ་རྨོ ངས་རྡུལ་མ་བྲལ་བས།།
མཁས་པ་དགྱེས་པའི་གཟིགས་མོར་སོམ་ཉིས་འཁྱུད།།
དགེ་ལ་བརྩོན་པའི་གཟུགས་བརྙན་ཕལ་མོ་ཆེར།།
སྐྱབས་སེམས་བསྔོ་བའི་སྦྱོར་རྗེས་མ་ཚང་བས།།
མགོ་རྔ་ཆད་པའི་དགེ་སྦྱོར་དུམ་བུ་དག།
ཐེག་གསུམ་གྲུབ་བཞིར་གང་གཏོགས་བློ་རེ་དོགས།།
སྲིད་པའི་ཆོས་བརྒྱད་འཁྲུགས་པའི་གཡུལ་ས་ནས།།
ལས་ཉོན་མདའ་མཚོན་ཐེབས་པའི་སྡུག་བསྔལ་དག།
འབྱིན་བྱེད་ཞི་བསིལ་དམ་ཆོས་སྨན་གྱི་མཆོག།
བསྟེན་པའི་ཀུན་སྤྱོད་ཉན་སེམས་སྒོམ་ལ་རག།
རིག་པའི་ཤེས་ཡོན་ཆུ་ཐིགས་བསགས་པའི་ཁར།།
སྤྱོད་བཟང་གཞན་ཕན་སེམས་ཀྱི་ཞག་འཁྱིལ་བ།།
བཏུང་བ་མི་ཚེའི་འཚོ་ཐབས་བདུད་རྩི་ཞེས།།
ཡང་ཡང་ལྷ་མིའི་གསུང་ལས་བསྒྲགས་པ་ཐོས།།
བརྗོད་བྱ་དྲི་མེད་ནོར་བུའི་དཀྱིལ་འཁོར་ཆེ།།
རྗོད་བྱེད་བསྟར་ལེགས་མུ་ཏིག་ཚོམ་བུ་བཀྲ།།
ནང་ཆོས་རིན་ཆེན་མཎྜལ་བཤམས་པ་འདི།།
སྐལ་བཟང་བསོད་ནམས་མིག་གི་དགའ་སྟོན་ཉིད།།
བྱམས་མགོན་ཐུགས་གསང་ཟབ་རྒྱས་བདུད་རྩི ་ལས།།
བཅུས་པའི་སྙིང་ནོར་མཁྱེན་གསུམ་སྦྱོར་བཞིའི་སྒོམ།
གབ་འབྱི ན་འདོད་འཇོའི་ཡན་ལག་ཡོངས་རྫོགས་པ།།
རྒྱ་ཆེན་ཉམས་བཞེས་བློ་ཡི་རྩེ་མོར་ཕབ།།
འཕགས་པ་ཀླུ་དང་ཟླ་བའི་ཞབས་ཟུང་གིས།།
ཆོས་རྣམས་གནས་ལུགས་རིགས་པའི་དཔྱད་ལམ་ན།།
སྟོང་དང་རྟེན་འབྱུང་འགལ་མེད་གྲོགས་འཆར་བས།།
མཐའ་གཉིས་རྒྱ་གྲོལ་དབུ་མའི་ལྟ་གྲུབ་ཕྱེས།།
