ཞི་ཅིན་ཕིང་གིས༼མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས༽འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དྲུག་པའི་འཛམ་གླིང་གི་འགོ་ཁྲིད་པའི་དབུ་ཚོགས་ཐོག་ཡིག་ཐོག་ཤིས་ཚིག་གསུངས་གནང་བ།
         སྤྱི་ཟླ་11ཚེས་1ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས༼མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས༽ འཇོག་མཁན་ཕྱོགས་ཀྱི་འཛམ་གླིང་གི་འགོ་ཁྲིད་པའི་དབུ་ཚོགས་ཐེངས་ཉེར་དྲུག་པའི་ཐོག་ཡིག་ཐོག་ཤིས་ཚིག་གསུངས་ཡོད་པ་རེད།
        ཞི་ཅིན་ཕིང་གིས། མིག་སྔར་གནམ་གཤིས་འགྱུར་ལྡོག་གི་ཤུགས་རྐྱེན་ངན་པ་ཉིན་བཞིན་མངོན་གསལ་དོད་དུ་འགྲོ་བ་དང་གོ་ལ་ཧྲིལ་པོའི་བྱ་སྤྱོད་ཀྱི་ཁ་ཚ་དགོས་གཏུག་རང་བཞིན་མུ་མཐུད་ཆེ་རུ་འགྲོ་བཞིན་ཡོད། ཇི་ལྟར་བྱས་ནས་གནམ་གཤིས་འགྱུར་ལྡོག་ལ་ཁ་གཏད་གཅོག་པ་དང་འཛམ་གླིང་གི་དཔལ་འབྱོར་སླར་གསོ་ཡོང་བར་སྐུལ་འདེད་གཏོང་རྒྱུ་ནི་ང་ཚོར་འཕྲད་པའི་དུས་རབས་ཀྱི་བརྗོད་གཞི་ཞིག་རེད་ཅེས་གསུངས་གནང་ཡོད།
        དོན་དེའི་ཐད་ཞི་ཅིན་ཕིང་གིས་གྲོས་འགོ་དོན་ཚན་ཁག་གསུམ་བཏོན་གནང་བ་སྟེ། གཅིག་ནས་ཕྱོགས་མང་གི་ཐུན་མོང་ངོས་འཛིན་སྲུང་སྐྱོང་བྱེད་དགོས། གནམ་གཤིས་འགྱུར་ལྡོག་སོགས་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་པར་ཕྱོགས་མང་རིང་ལུགས་ནི་ཐབས་ཤེས་ཡག་ཤོས་དེ་རེད། ༼མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས༽དང་དེ་བཞིན༼ཕ་རི་སིའི་ཆོད་ཡིག༽ནི་རྒྱལ་སྤྱིའི་སྤྱི་ཚོགས་ཀྱིས་མཉམ་དུ་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་གཞི་རྩའི་བཅའ་ཁྲིམས་ཀྱི་བརྩི་སྲུང་ཞུ་ཡུལ་ཞིག་ཡིན། ཕྱོགས་ཁག་གིས་ད་ཡོད་ཀྱི་ཐུན་མོང་ངོས་འཛིན་གྱི་རྨང་གཞིའི་ཐོག་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་བ་དང་མཉམ་ལས་ལ་ཤུགས་སྣོན་བརྒྱབ་ནས། ཀེ་ལ་སི་ཀོའི་ཚོགས་ཆེན་ལེགས་སྒྲུབ་ལྡན་པའི་ངང་འཚོག་ཐུབ་རྒྱུ་འགན་ལེན་བྱེད་དགོས།
        གཉིས་ནས་དངོས་གཉེར་བྱ་སྤྱོད་ལ་དམིགས་དགོས། བྱ་སྤྱོད་སྤེལ་ཚེ་བསམ་འདུན་གཞི་ནས་དོན་དངོས་སུ་འགྱུར་ཐུབ། ཕྱོགས་ཁག་གིས་ཁ་དན་ཚིག་གནས་ལ་སྣང་ཆེན་བྱས་ནས་ལག་ལེན་བསྟར་རུང་བའི་དམིགས་འབེན་དང་འདུན་ལྗོངས་བཟོ་དགོས་པ་མ་ཟད་རྒྱལ་ཚུལ་ལ་གཞིགས་པ་དང་རང་ནུས་གང་ཡོད་བཏོན་ནས་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་བྱ་ཐབས་དོན་འཁྱོལ་བྱ་རྒྱུར་སྐུལ་འདེད་གཏོང་དགོས། དར་རྒྱས་ཆེ་བའི་རྒྱལ་ཁབ་ཀྱིས་རང་ཉིད་ཀྱིས་ལས་དོན་སྔར་བས་མང་བ་སྒྲུབ་དགོས་པ་མ་ཟད། ད་དུང་གོང་འཕེལ་འགྲོ་བཞིན་པའི་རྒྱལ་ཁབ་ལ་རྒྱབ་སྐྱོར་སྔར་ལས་ལྷག་པ་བྱེད་དགོས།
        གསུམ་ནས་སྦགས་མེད་བརྗེ་འགྱུར་མགྱོགས་སུ་གཏོང་དགོས། ཚན་རྩལ་གསར་གཏོད་ལ་་སྐུལ་འདེད་གཏོང་བ་དང་། ནུས་ཁུངས་ཐོན་ཁུངས་དང་། ཐོན་ལས་གྲུབ་ཆ། འཛད་སྤྱོད་གྲུབ་ཆ་བཅས་བརྗེ་སྒྱུར་རིམ་སྤོར་ལ་སྐུལ་འདེད་གཏོང་བ། དཔལ་འབྱོར་སྤྱི་ཚོགས་སྦགས་མེད་གོང་འཕེལ་འགྲོ་རྒྱུར་སྐུལ་འདེད་གཏོང་བ། གོང་འཕེལ་དང་སྲུང་སྐྱོང་ཕན་ཚུན་མཐུན་སྦྱོར་བྱེད་པའི་ཐབས་ལམ་གསར་པ་འཚོལ་ཞིབ་བྱེད་དགོས་པ་བཅས་ཡིན་པ་རེད།
        ཞི་ཅིན་ཕིང་གིས། ཀྲུང་གོས་མི་དང་རང་བྱུང་ཁམས་ཀྱི་ཚེ་སྲོག་ཐུན་མོང་མ་ལག་གི་འདུ་ཤེས་འཛིན་སྟངས་རྒྱུན་འཁྱོངས་བྱེད་པ་དང་། འབྱུང་ཁམས་སྔོན་ལ་འཇོག་པ་དང་སྦགས་མེད་ཐཱན་ཉུང་གི་གོང་འཕེལ་འགྲོ་ལམ་ཐོག་བསྐྱོད་རྒྱུ་རྒྱུན་འཁྱོངས་བྱེད་པ། སྦགས་མེད་ཐཱན་ཉུང་གི་འཁོར་རྒྱུག་གོང་འཕེལ་གྱི་དཔལ་འབྱོར་མ་ལག་བསྐྲུན་མགྱོགས་སུ་གཏོང་བ། ཐོན་ལས་ གྲུབ་ཆ་ལེགས་སྒྲིག་ལ་རྒྱུན་མཐུད་ངང་སྐུལ་འདེད་གཏོང་བ། ཟད་གྲོན་ཆེ་བ་དང་འབུད་བཤངས་བྱེད་མང་བའི་རྣམ་གྲངས་རྨོངས་ཚོད་ངང་འཕེལ་རྒྱས་གཏོང་རྒྱུ་བཀག་འགོག་མཐའ་གཅིག་ཏུ་བྱེད་པ། ནུས་ཁུངས་སྦགས་མེད་ཐཱན་ཉུང་གི་ཕྱོགས་སུ་བརྗེ་སྒྱུར་བྱེད་མགྱོགས་སུ་གཏོང་བ། སླར་སྐྱེས་ནུས་རྒྱུ་གོང་འཕེལ་ཤུགས་ཆེན་གཏོང་བ། རླུང་གློག་འོད་ཧྥུའི་རྟེན་གཞི་ཆེ་གྲས་ཀྱི་རྣམ་གྲངས་འཆར་འགོད་འཛུགས་སྐྲུན་བཅས་བྱེད་བཞིན་ཡོད། ཉེ་ཆར། ཀྲུང་གོས༼གོང་འཕེལ་གྱི་འདུ་ཤེས་གསར་པ་ཆ་ཚང་དང་གནད་འཁེལ་ངང་ལག་བསྟར་བྱས་ཏེ་ཐཱན་རྩེ་གྲངས་ལ་སླེབས་པ་དང་ཐཱན་བཏང་སྙོམས་ཀྱི་ལས་དོན་ཡག་པོ་བསྒྲུབ་རྒྱུའི་སྐོར་གྱི་བསམ་འཆར༽དང༼སྤྱི་ལོ2030ལོའི་གོང་ དུ་ཐཱན་རྩེ་གྲངས་ལ་སླེབས་པ་བྱ་རྒྱུའི་བྱ་སྤྱོད་ཇུས་གཞི༽ཁྱབ་བསྒྲགས་བྱས་པ་དང་། ད་དུང་ནུས་ཁུངས་དང་། བཟོ་ལས། ཨར་ལས། འགྲིམ་འགྲུལ་སོགས་གཙོ་གནད་ཁྱབ་ཁོངས་དང་། རྡོ་སོལ་དང་། གློག་ཤུགས། ངར་ལྕགས། ཨར་འདམ་སོགས་གཙོ་གནད་ལས་རིགས་ཀྱི་ལག་བསྟར་ཇུས་གཞི་གཅིག་རྗེས་གཉིས་མཐུད་ངང་ཡོངས་བསྒྲགས་བྱ་རྒྱུ་དང་། ཚན་རྩལ་དང་། ཐཱན་འདུས། ནོར་ཁྲལ། དངུལ་རྩ་སོགས་ཀྱི་འགན་ལེན་བྱ་ཐབས་བཏོན་ཐོག ཐཱན་རྩེ་གྲངས་ལ་སླེབས་པ་དང་། ཐཱན་བཏང་སྙོམས། “1+N”བཅས་ཀྱི་སྲིད་ཇུས་མ་ལག་ཅིག་ཆགས་པ་བྱས་ནས། དུས་ཚོད་རེའུ་མིག་དང་། འཆར་འགོད་རིས་མོ། ལས་གྲྭའི་ས་བཀྲ་བཅས་ཁ་གསལ་བཟོ་དགོས་ཞེས་ནན་གསུངས་གནང་ཡོད།
        ཞི་ཅིན་ཕིང་གིས། ཀྲུང་གོའི་གནའ་མིས“བྱ་སྤྱོད་དངོས་ལག་བསྟར་བྱས་ཚེ་གནམ་འོག་བཅོས་སྐྱོང་བྱ་ཐུབ” ཅེས་བརྗོད་གནང་ཡོད། ཀྲུང་གོའི་ཕྱོགས་ཀྱིས་ཕྱོགས་ཁག་གིས་བྱ་སྤྱོད་སྤེལ་ཤུགས་ཆེ་རུ་གཏོང་བ་དང་ལག་གདང་སྦྲེལ་ནས་གནམ་གཤིས་འགྱུར་ལྡོག་གི་འགྲན་སློང་ལ་ཁ་གཏད་བཅག་སྟེ་མིའི་རིགས་ཀྱི་ཐུན་མོང་གི་སའི་གོ་ལའི་ཁྱིམ་གཞིས་ལ་མཉམ་དུ་སྲུང་སྐྱོང་བྱ་རྒྱུའི་རེ་བ་ཡོད་ཅེས་གསུངས་ཡོད།
        གོ་ལ་ཧྲིལ་པོའི་འགོ་ཁྲིད་པའི་དབུ་ཚོགས་དེ་སྤྱི་ཟླ་11ཚེས་1ཉིན་ནས་ཚེས་2ཉིན་བར་ཀེ་ལ་སི་ཀོའི༼མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས༽འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དྲུག་པའི་རིང་འཚོགས་ཡོད་པ་རེད།