འདི་ན་སྡེ་བཞི་དཔལ་གྱི་རིན་ཆེན་འབྱུང་བའི་གནས། །
སྡེ་འབངས་གསེར་གྱི་མིག་ཅན་དུང་ཕྱུར་བཅུ་བཞི་ཚོགས། །
བདེ་སྐྱིད་རླབས་ཀྱི་རི་མོ་དང་འགྲོགས་རྩེན་པ་ཡི། །
བདེ་དགའི་བཞད་སྒྲ་འབུམ་གྱི་མེ་ཏོག་བཀྲག་ལ་བསྟོད། །
ཤར་གྱི་འཛིན་མའི་མཚོ་ཡི་ལྟེ་བའི་གྲུ་གཟིངས་ནས། །
སྐྱ་རེངས་དང་པོའི་འོད་ཀྱི་གྲོས་ཆེན་བསྡུར་བ་ཡིས། །
མཚར་སྡུག་ངོ་མཚར་སྟོང་ལྡན་ཉིན་མོའི་སྣང་བ་ཆེ། །
འཛིན་མའི་ཁྱོན་འདིར་ཡོངས་སུ་གསལ་བྱས་མངོན་པར་བསྟོད། །
འདྲ་མིན་ཚོགས་ཁག་སྤྲིན་ནག་སྟུག་པོའི་བང་རིམ་དབུས། །
དཔའ་གདེངས་དབྱར་རྔ་ཕྱོགས་བཅུར་སྒྲོག་པའི་གད་རྒྱངས་ཀྱིས། །
ཕྱི་དང་ནང་གི་ངན་དགུའི་དུག་ཅན་རྡུལ་བརླགས་ཏེ། །
གཞན་ཕན་བདུད་རྩིས་འཛིན་མའི་དབུགས་དབྱུང་བྱས་འདིར་བསྟོད། །
རི་བོ་གསུམ་གྱི་རྡུལ་ཕུང་མ་ལུས་དོང་དུ་མནན། །
སྤྲ་སེར་སྤྲེལ་གྱི་སྔོན་ཐོན་མཚོན་ཆ་དུམ་བུར་བཅག །
མི་དམངས་སྟོབས་རྩལ་ལྕགས་རི་ལྷུན་པོའི་ལྟེ་བ་ནས། །
གསར་བརྗེའི་དར་ཆ་དགུང་དུ་དམར་པོའི་མདངས་འཛིན་བསྟོད། །
དཀའ་སྡུག་ཚ་གྲང་གངས་རྡུལ་ལས་ཀྱང་གྲངས་མང་ལ། །
སྙིང་ཤུགས་བརྟན་པོ་རི་རབ་བརྩེགས་པས་དོ་མིན་ཞིང་། །
དམངས་ཀྱི་བདེ་སྐྱིད་སེམས་སུ་འཛིན་པའི་ཐོག་མའི་བློ། །
མི་འགྱུར་མི་ཤིགས་ཕ་ལམ་རྡོ་ལས་སྲ་བརྟན་བསྟོད། །
ལོ་རྒྱུས་རིང་མོའི་བཞུད་ལམ་དོད་པའི་ཞབས་རྗེས་རེར། །
ཁྲག་དང་རྔུལ་གྱི་འགྲོ་གྲོན་རྒྱ་མཚོས་གཞལ་མིན་ལ། །
དེ་བཞིན་དཔའ་དང་རྒྱལ་ཁའི་སྒྲ་དབྱངས་འཛམ་གླིང་གི །
འཛིན་མའི་ཁྱོན་ཀུན་མ་ཁྱབ་མེད་པའི་གྲགས་པ་བསྟོད། །
དུས་དང་མཐུན་པའི་ཇུས་བཀོད་བློ་ཡི་བཅོས་བསྒྱུར་ལྡན། །
དུས་ལས་མ་ཡོལ་བསམ་བློ་གསར་པའི་ཤེས་རབ་འོད། །
དུས་ཐོག་ཆར་བཞིན་དུས་བཞི་ཀུན་ཏུ་ཕན་དང་བདེ། །
དུས་དྲུག་དག་ཏུ་དམངས་ཀྱི་སེམས་སུ་ཡོངས་འཕྲོས་བསྟོད། །
ཨེ་མ་མི་རིགས་ང་དྲུག་མེ་ཏོག་བཞད་པའི་ཚལ། །
སྲིད་དང་རིག་པའི་སྙན་གླུ་ཅི་དགར་གྲག་པའི་སར། །
སྟོབས་དང་འབྱོར་བའི་དབྱར་མཚོ་དགུང་ལ་འགྲན་དང་ལྷན། །
ཏང་གི་འཁྲུངས་སྐར་བཅུ་ཕྲག་བཅུ་ལྡན་ཤར་འདི་བསྟོད། །
བསྟོད་པའི་མེ་ཏོག་ཚིག་གི་སྒྱུ་རྩལ་ཞན་ན་ཡང་། །
བསྟོད་པ་དོན་ལྡན་མིག་མཐོང་ལག་ཟིན་འཕེལ་རྒྱས་ཀྱི། །
རྣམ་པ་གསར་པ་འཛམ་གླིང་མིག་གི་ཀོང་བུ་རུ། །
མངོན་པར་འཁྱིལ་བའི་ངོ་མཚར་སྟོང་ལྡན་ལྷག་ཏུ་བསྟོད། །
