ལྷོ་པ་འགྱུར་མེད་རྡོ་རྗེ།

        ཡུལ་ཤུལ་གྲོང་ཁྱེར་གྱི་སྐྱེ་རྒུ་མདོ་ནས་ཟུར་མང་ཡུལ་ཚོ་རུ་ལམ་ཐག་སྤྱི་ལེ༢༠༠ལྷག་ཡོད་པ་དང་།  རླངས་འཁོར་ཆུང་བར་བསྡད་དེ་སོང་ན་ཆུ་ཚོད་གསུམ་ལྷག་གིས་ཇམ་ཤེས་ནགས་ཚལ་དུ་བསླེབས་ཐུབ། ལུང་པ་དེའི་ཕུ་ནས་མདའ་བར་དུ་ཙ་ཆུ་ཞེས་པའི་ཆུ་བོ་དྭངས་ཤིང་བསིལ་ལ་སྔོ་ལྗང་གི་མདོག་དང་ལྡན་པ་ཞིག་ཡོད་པ་དེ་བཞུར་བའི་མཐའ་མར་རྫ་ཆུ་ལ་འདྲེས་འདུག   སྟོད་དུ་སྤང་ཐང་དང་སྤང་རི། བར་དུ་སྤང་རི་དང་བྲག་རི། སྨད་དུ་བྲག་རི་དང་ནགས་རི། སའི་ཆགས་སྟངས་དང་གནམ་གཤིས་ཀྱི་ཆ་རྐྱེན་དང་རྩི་ཤིང་གི་སྐྱེས་ཚུལ་སོགས་ལ་འགྱུར་བ་ཇི་ལྟར་བྱུང་ཡང་དྭངས་གཙང་གི་ཆུ་བོ་དེ་ནི་ཇེ་ཆེ་ནས་ཇེ་ཆེར་འགྲོ་བ་ལས་གཞན་འགྱུར་ལྡོག་ཅི་ཡང་མི་འདུག
        ནགས་ཚལ་སྟུག་པོའི་གསེབ་ཏུ་སྤྲེའུ་རིགས་མང་པོ་ཡོད་པ་དང། ཆུ་བོའི་འགྲམ་གཉིས་ཀྱི་དབྱིབས་སྣ་ཚོགས་པའི་བྲག་རིའི་ངོས་སུ་གསེར་རྩི་དང་ཚོན་མདོག་འདྲ་མིན་གྱིས་བྲིས་པའི་ལྷ་སྐུ་དང་མ་ཎི་སོགས་ཤིན་ཏུ་ཡག་པོ་གྲངས་ལས་འདས་པ་མཐོང་ཐུབ་ཅིང་། རྡོ་བ་རེ་རེའི་ངོས་སུའང་མ་ཎི་དང་སྐུ་བརྙན་བརྐོས་འདུག་པས། ད་ནི་དགུན་དུས་ཡིན་རུང་ཚོན་ཁྲ་ཅན་གྱི་ཡུལ་ལྗོངས་འདི་ལ་དུས་ཚིགས་ཀྱིས་འགྱུར་བ་ཆེན་པོ་གཏོང་ཐུབ་ཀྱིན་མེད་པ་ཤེས།  དེ་ལས་ལྡོག་སྟེ།  ལུང་པ་འདི་ཡིས་དབྱར་དགུན་སྟོན་དཔྱིད་དུས་ཚིགས་བཞི་བོ་ཁ་སྐྱེངས་སུ་བཅུག་ཡོད་པ་རེད།   ལྷ་ཤིང་ཤུག་པ་དང་སྟག་པ་དང་གསོམ་པ་སོགས་ཤིང་སྡོང་རིགས་མི་འདྲ་བ་དག་གི་རྩ་རུ་ཁ་བས་ཁེངས་ཤིང་ཉི་མ་ཕྱི་དྲོའི་དུས་སུ་ཁ་བ་བཞུས་ཤུལ་དུ་རྩ་ལྡུམ་སྔོན་པོ་དང་སེར་པོ་ད་དུང་བསྐམས་མི་འདུག
        ལམ་བར་དུ་བྲག་རི་ཆེན་པོ་བརྗིད་ཆགས་ཡིད་དུ་འོང་བ་ཞིག་འགྱིང་འདུག་པ་དེའི་མིང་ལ་གནས་ཆེན་པད་མ་མཐོང་གྲོལ་ཟེར་ཏེ། ཨུ་རྒྱན་གྱི་སློབ་དཔོན་པདྨ་འབྱུང་གནས་རིན་པོ་ཆེའི་སྒྲུབ་གནས་རེད་ཅེས་གྲགས་ལ། ལུག་གི་ལོ་ལ་ཐག་ཉེ་རིང་ཀུན་ནས་གནས་སྐོར་དུ་ཡོང་མཁན་ཤིན་ཏུ་མང་ཟེར། 
        ཟུར་མང་ལུང་པ་ཟེར་ནའང་འདྲ། ཇམ་ཤིས་ལུང་པ་ཟེར་ན་འདྲ། ཡུལ་དེའི་ཕྱོགས་བཞི་མཚམས་བརྒྱད་རི་བོ་མཐོན་པོས་བསྐོར་ཡོད་ཅིང་།  རི་བོ་ཐམས་ཅད་ནགས་ཚལ་སྟུག་པོས་གཡོགས་འདུག་ལ།  ནགས་ཚལ་ཁྲོད་དུ་སྲོག་ཆགས་གང་དགར་རྒྱུ་བཞིན་པ་དང་། སྲོག་ཆགས་སྣ་ཚོགས་རང་བྱུང་དྲི་བཟང་གིས་མྱོས་བར་གྱུར་པས། ངོ་མ་བློ་སེམས་ཉམས་དགའ་བར་བྱེད་པའི་གནས་མཆོག་ཅིག་རེད་སྙམ།   གྲོང་སྡེའི་ལོགས་སུ་ཀརྨ་སྒ་བྲིས་འབྲོག་ཕན་ལས་རིགས་ལག་རྩལ་སློབ་གྲྭ་བཙུགས་ཡོད་པ་དང་།  སློབ་གྲྭ་དེ་འཛུགས་མཁན་ཡེ་ཤེས་ཆོས་འཕེལ་ཁོང་ནི༡༩༧༤ལོར་སྐྱེས་ཤིང་ད་ལྟ་ས་དེ་གའི་དགོན་པ་ཞིག་གི་མཁན་པོ་ཡིན་པ་རེད། ཁོང་དང་སློབ་གྲྭའི་ལས་སྣེ་བ་ཚོ་ནི་ཇམ་ཤིས་ཧོར་ཚང་གི་ཁྱིམ་རྒྱུད་དེ་ཧོར་ཤན་པ་རྨེ་རུ་རྩེའི་རྗེས་རབས་ཡིན་ཟེར། 
ངས་ཧོར་ཚང་གི་ད་ལྟའི་གནས་སྟངས་སྐོར་དྲིས་པ་ན།  ཡེ་ཤེས་ཆོས་འཕེལ་ལགས་ཀྱིས་གསུངས་དོན། ངག་རྒྱུན་དུ་ཧོར་ཚང་མི་རབས་བཅོ་བརྒྱད་༼ལོ་རྒྱུས་དངོས་སུ་མི་རབས་བདུན་བརྒྱད་ཙམ༽བར་དུ་ཐང་ཀ་འབྲི་བ་དང་མགར་བྱེད་པ་དང་མདའ་བཟོ་བའི་ལག་རྩལ་གྱི་རྒྱུན་ཡོད་པར་བཤད།ཕྱིས་སུ་སྤྱི་རྩིས༡༩༥༨ལོ་དང་རིག་གནས་གསར་བརྗེ་ཆེན་པོའི་སྐབས་སུ་ཉམས་པར་གྱུར།ད་ལྟ་ལྷ་སྐུ་འབྲི་མཁན་བུ་བུ་མོ་འགའ་ཡོད་ལ།གྲི་རྡུང་བ་དང་ཤིང་བཟོ་མཁན་མི་རྒན་གཅིག་ཡོད་པ་རེད།ཧོར་ཚང་ནི་སྔོན་ཆད་བརྒྱ་དཔོན་གྱི་ཚོ་བ་ཞིག་ཡིན།ད་ལྟ་དུད་ཁྱིམ་བརྒྱ་ལྷག་དང་མི་གྲངས་ལྔ་བརྒྱ་ལྷག་ཡོད་པ་རེད།གཙོ་བོ་ནི་ཕྱུགས་ཟོག་འཚོ་སྐྱོང་དང་ལག་ཤེས་བཟོ་ལས་ལ་བརྟེན་ནས་འཚོ་བ་རོལ་རྒྱུ་མ་གཏོགས་ཞིང་ལས་ཆེན་པོ་དར་ཡོད་པ་མ་རེད།གྲོ་ནས་ཉུང་ངུ་ཙམ་འདེབས་པ་དང་།རྩྭ་སར་སྤང་རི་ཅུང་ཆེན་པོ་ཡོད། གནས་འདི་རུ་དབྱར་རྩྭ་དགུན་འབུ་མང་པོ་ཡོད་པ་མ་རེད། སྡོད་ཁང་ནི་ཤིང་ཁང་དང་རྡོ་ཁང་ཡང་ན་ཤིང་རྡོ་འདྲེས་མའི་ཁང་པ་བོད་ཀྱི་བཟོ་རྩལ་གྱི་ཁྱད་ཆོས་ཡོད་པ་དང་། དེ་ལ་ས་འགུལ་གྱི་གནོད་སྐྱོན་མི་ཐེབས་པའི་ནུས་པ་ལྡན། ཤིང་རིགས་དང་སྨན་སྣ་གང་མང་འཛོམས་ཡོད་ཀྱང་མི་གཅོད། རི་དྭགས་དང་གཅན་གཟན་སྣ་མང་དང་རྩ་ཆེན་ཡོད་ཀྱང་མི་རྔོན། ཡུལ་ལུང་འདིའི་གྲོང་མི་རྣམས་སྐྱེ་ཁམས་ལེགས་བཅོས་དང་ཁོར་ཡུག་སྲུང་སྐྱོང་བྱེད་པར་ཧ་ཅང་དགའ་མོས་ཡོད་པ་མ་ཟད་དེ་དང་འབྲེལ་བའི་བྱ་འགུལ་ཡང་གང་མང་སྤེལ་བཞིན་ཡོད་ཅེས་ལན་བཏབ་བྱུང་།
        ཡེ་ཤེས་ཆོས་འཕེལ་ལགས་ཀྱིས་ང་ལ་གསུངས་པ་ལྟར་ན། སློབ་གྲྭ་འདི་ནི༢༠༡༣ལོར་གསར་དུ་བཙུགས་ཤིང་། སློབ་གྲྭ་ཆགས་ཡུལ་དེ་ལ་གཡང་མགོ་མ་ཞེས་འབོད་པས།རྗེས་སོར་སློབ་གྲྭའི་མིང་ལའང་གཡང་མགོ་མ་ཞེས་གདགས་རྩིས་ཡོད་ཟེར། གནས་དེ་ནས་ཆབ་མདོའི་ས་མཚམས་སུ་སྤྱི་ལེ་གསུམ་ལས་མེད་ལ། སློབ་གྲྭའི་སློབ་མ་ནི་མཚོ་སྔོན་དང་སི་ཁྲོན་དང་བོད་ལྗོངས་བཅས་ཞིང་ལྗོངས་གསུམ་གྱི་རྫོང་ཁག་དགུ་ནས་ཡོང་ཡོད་པ་རེད་ཟེར། སློབ་གྲྭ་དེས་ཐང་ཀའི་འཛིན་གྲྭ་དང་བོད་ཀྱི་གསོ་རིག་འཛིན་གྲྭ་བཅས་བསླབ་བྱའི་ལག་རྩལ་རིགས་གཉིས་ཁྲིད་ཀྱིན་ཡོད་ལ། གཙོ་བོར་ཀརྨ་སྒར་བྲིས་ཀྱི་རྒྱུན་འཛིན་པ་གསོ་སྐྱོང་བྱེད་ཀྱིན་ཡོད་པ་དང་།  དུས་རྒྱུན་དུ་འཛམ་གླིང་གེ་སར་རྒྱལ་པོའི་སྒྲུང་དང་འབྲེལ་བའི་དམངས་ཁྲོད་རིག་གནས་དང་། བོད་ཀྱི་སྐད་ཡིག་དང་རྒྱའི་སྐད་ཡིག་དང་གྲངས་རྩིས་རིག་པ་གསུམ་ཁྲིད་ཀྱིན་ཡོད་པ་མ་ཟད།དགེ་སློབ་ཚང་མས་ཉིན་རེར་གེ་སར་གསོལ་ཁ་འདོན་པ་དང་གླིང་བྲོ་བདེ་ཆེན་རོལ་མོ་འཁྲབ་ཀྱིན་ཡོད་ཟེར། སློབ་གྲྭ་ཡོངས་སུ་ད་ལྟ་སློབ་མ་བརྒྱ་དང་བཅུ་ཡས་མས། དགེ་རྒན་ལ་བོད་ཡིག་དགེ་རྒན་གཉིས་དང་། རྒྱ་ཡིག་དགེ་རྒན་གཉིས་དང་། གྲངས་རྩིས་རིག་པའི་དགེ་རྒན་གཅིག་དང་། གསོ་བ་རིག་པའི་གཉིས་དང་། ཐང་ཀའི་དགེ་རྒན་གཉིས་བཅས་ཡོད་པ་རེད། ཀརྨ་སྒ་བྲིས་ཐང་ཀ་འཛིན་གྲྭ་ལ་སློབ་མ༨༦ཡོད་པ་དང་། ཐང་ཀའི་དགེ་རྒན་ཆེ་བ་གཉིས་ཡོད་པ་སྟེ། གཅིག་ནི་ཀ་ཤོད་ཀརྨ་བདེ་ལེགས་ལགས་ཡིན་པ་དང་། ད་ལྟ་དགུང་ལོ་དགུ་བཅུར་བསླེབས་ཟིན། གཅིག་ཤོས་ཀྱི་མིང་ལ་ཀ་ཤོད་བསྟན་འཛིན་རྒྱལ་མཚན་ཟེར་ཞིང་ཆབ་མདོ་རྫོང་ཀརྨ་ཡུལ་ཚོའི་ཡིན་ཏེ། གནས་དེ་ནི་ཀརྨ་སྒར་བྲིས་ཀྱི་ལུགས་སྲོལ་དར་ས་རེད། རྒྱལ་དབང་ཀརྨ་བའི་དགོན་པ་ཐོག་མའང་ས་དེར་ཆགས་ཡོད། ཐང་ཀའི་དགེ་རྒན་ཆུང་བ་བཞི་ཡོད་པ་ཚང་མ་ཀ་ཤོད་ཀརྨ་བདེ་ལེགས་མཆོ་གི་སློབ་མ་ཡིན་པ་དང་། ཕ་ཡུལ་ནི་རང་ས་གནས་འདིའི་ཡིན་ཞེས་ཟེར།  གསོ་རིག་འཛིན་གྲྭ་ནི་གསར་དུ་བཙུགས་ནས་ལོ་གཉིས་མ་གཏོགས་འགོར་མེད་ལ། ད་ལྟ་སློབ་མ་༢༥ཡོད་པ་དང་། ལོ་གསུམ་པའི་རྗེས་སུ་མཐར་ཕྱིན་དགོས་སྐོར་གསུངས་བྱུང་། 
        སློབ་གྲྭ་གསར་དུ་བཙུགས་མ་ཐག་པའི་སྐབས་སུ་འདུག་སའི་ཁང་པ་མེད་པས། ལོ་གཉིས་ཙམ་ལ་སློབ་ཕྲུག་ཕོ་རྣམས་སྦྲ་གུར་དུ་བསྡད་པ་དང་མོ་རྣམས་ཤིང་གི་པགས་པས་བཟོས་པའི་ཁང་པ་རུ་བསྡད་པ་ཡིན་ཟེར།
        ཡེ་ཤེས་ཆོས་འཕེལ་ཁོང་གིས་རང་ལོ་ལྔ་ཙམ་གྱི་སྐབས་སུ་རང་གི་ཕ་ལས་འཛམ་གླིང་གེ་སར་རྒྱལ་པོའི་སྒྲུང་ལ་ཉན་པ་དང་། ཕ་རྒན་སྒྲུང་ལ་ཤིན་ཏུ་དགའ་ཞིང་དཔེ་ཆ་མང་པོ་ཉར་ཡོད་པས། ལོ་བདུན་བརྒྱད་ཙམ་གྱི་སྐབས་སུ་ཁོས་ཀྱང་བོད་ཡིག་བསླབ་ཅིང་སྒྲུང་དཔེ་བལྟས་པ་ཡིན་ཟེར།   ཡེ་ཤེས་ཆོས་འཕེལ་ལགས་རང་ལོ་བཅུ་ཙམ་གྱི་སྐབས་སུ།  ཕ་ཡིས་ཁོ་རང་ཡུལ་དེའི་བླ་མའི་དྲུང་དུ་བསྐྱལ་ནས་གེ་སར་གསོལ་ཁ་སོགས་བསླབ་ཏུ་བཅུག་པ་དང་།   ལོ་བཅུ་དྲུག་བཅུ་བདུན་སྐབས་སུ་ནོར་ལུག་འཚོ་ཞོར་དུ་སྒྲུང་དཔེ་མང་པོར་བལྟས་པ་དང་མཚན་མོ་རེར་གྲོང་སྡེའི་དགོང་འདོན་སྐབས་སུ་གེ་སར་གསོལ་ཁ་འདོན་པས། གེ་སར་རིག་གནས་ལ་བག་ཆགས་ཟབ་མོ་ཐེབས་པ་རེད།   རང་ལོ་ཉེར་གསུམ་ནས་སུམ་ཅུའི་བར་དུ་ཁོ་རང་གསེར་རྟ་བླ་རུང་དུ་ཕྱིན་ནས་ནང་བའི་གཞུང་ལ་ཐོས་བསམ་དང་བོད་ཀྱི་ཐུན་མོང་རིག་གནས་ལ་སློབ་གཉེར་བྱས། རྩ་བའི་བླ་མ་འཇིགས་མེད་ཕུན་ཚོགས་མཆོག་ནི་འདན་སྲས་གཡུ་འོད་འབུམ་མེའི་རྣམ་སྤྲུལ་ཡིན་པས། དུས་རྒྱུན་དུ་གེ་སར་གྱི་གར་འཆམ་དང་གླིང་བྲོ་བདེ་ཆེན་རོལ་མོ་སོགས་འཁྲབ་པའམ་ཁྲིད་ཀྱིན་ཡོད་པས།དེ་ཕྱོགས་ལའང་སྦྱང་བ་མང་དུ་བྱས།རང་གི་ཕ་མ་དང་མེས་པོ་རྣམས་ཀྱིས་གེ་སར་རིག་གནས་ལ་ཧ་ཅང་དགའ་ཞེན་བྱེད་པ་དང་།  གྲོང་སྡེའི་མི་མང་གིས་གུ་རུ་རིན་པོ་ཆེ་དང་གེ་སར་རྒྱལ་པོ་ལ་དད་མོས་ཆེན་པོ་ཡོད་པས།ཁོ་རང་ཡང་གེ་སེ་རིག་གནས་རྒྱུན་འཛིན་དང་དར་སྤེལ་གྱི་ཕྱོགས་སུ་སྤྲོ་བ་ཡོད་པ་མ་ཟད་ནུས་ཤུགས་གང་ཡོད་འདོན་བཞིན་ཡོད་དེ། ཚོང་ལས་དང་འབྲེལ་བ་མེད་པར་ལས་རིགས་ལག་རྩལ་སློབ་གྲྭ་བསྒྲུབས་ཏེ་བོད་ཀྱི་སྲོལ་རྒྱུན་རིག་གནས་ཁྱབ་སྤེལ་བྱེད་པར་འབད་པ་བྱེད་ཀྱིན་ཡོད་པ་རེད།
        ཡེ་ཤེས་ཆོས་འཕེལ་ལགས་ཀྱིས་མ་དངུལ་ཤོག་སྒོར་ས་ཡ་གསུམ་བཏང་ཞིང་སློབ་གྲྭའི་དགེ་སློབ་བདུན་ཅུ་ལྷག་གིས་ལོ་གསུམ་ལ་བྲིས་པའི་གླིང་གེ་སར་རྒྱལ་པོའི་སྒྲུང་ནང་གི་མི་སྣ་གལ་ཆེན་གྱི་ཐང་ཀ་བརྒྱ་ཐམ་པ་དེ་སྤྱི་རྩིས༢༠༡༩ལོར་ཡོངས་སུ་གྲུབ།  ང་རང་ཐང་ཀ་འཛིན་གྲྭའི་ནང་དུ་སོང་ནས་ལྟ་དུས། སློབ་ཁང་ཆེན་པོ་དེའི་གྱང་ངོས་དང་བར་ཁྱམས་རེ་རེའི་ཀ་མགོ་དང་གདུང་མའི་འདབས་སུ་ཀརྨ་སྒ་བྲིས་ལུགས་ལྟར་བཞེངས་པའི་འཛམ་གླིང་གེ་སར་རྒྱལ་པོ་དང་། སྤྱི་དཔོན་རོང་ཚ་ཁྲ་རྒན།མུ་སྤྱང་རིན་ཆེན་དར་ལུ། སྤྱི་དཔོན་སྣང་ངུ་གཡུ་སྟག  ཤེལ་དཀར་རྒྱང་གྲགས། ཚ་ཞང་འདན་མ་བྱང་ཁྲ། གདོང་འབུམ་པའི་རྒྱ་ཚ་ཞལ་དཀར། འབུམ་པའི་དགྲ་ལྷ་རྩེ་རྒྱལ། དར་འཕེན་དུག་གི་སྡོང་པོ། སྟག་རོང་ཉ་ཚ་ཨ་བརྟན། ཧོར་སྡིག་སྤྱོད་ཤན་པ་རྨེ་རུ། དཔའ་མོ་ཨ་སྟག་ཀླུ་མོ། རྒོད་པོ་ཉི་མ་ལྷུན་གྲུབ། ལྕགས་ནག་དཔོན་པོ་སེང་སེང་། ནག་རུ་ཐར་པ་རྒྱལ་མཚན། གུང་པ་བུ་ཡི་ཁྲོ་རྒྱལ། སྟག་རོང་སྤྲིན་ཚ་ངོ་ལུག  གོ་འཇོ་བླ་མ་རྒྱལ་མཚན།མུ་པའི་དར་འཛོམས་ངོ་ལུག  མུ་པའི་དར་འཕེན་ནག་པོ། འདན་སྲས་གཡུ་འོད་འབུམ་མེ། རོང་སྲས་ལྷ་རྒོད་འབུམ་ལུ། རྒྱལ་སྲས་མ་ཎི་ཀ་ར། འབུམ་དཔོན་ཐོག་རྒོད་འབར་བ། སྟག་སྲས་ནོར་བུ་རྩེ་རྒྱལ། ཐང་རྩེ་གཡུ་འབྲུག སྟག་རོང་ཁྲོ་རྒྱལ་བེར་དམར། ལྷ་བུ་ནམ་མཁའ་སེང་ཞལ།གཟུ་ཆེན་ཝེར་མའི་ལྷ་དར། ལྷ་རྗེ་ཀུན་དགའ་ཉི་མ། རྩིས་པ་ལྷ་བུ་གཡང་དཀར། བོད་ཕྲུག་མི་ཆུང་ཁ་བདེ། ཐང་དཀར་རྩེ་རྒོད། བེ་རི་ཉི་མ་ཁྲི་བཙན། མགར་ཆོས་དར་རྒྱལ་པོ། གདོང་བཙན་སྣང་ངུ་ཨ་དཔལ། བློན་པོ་གར་དར་ཕྱིང་སྔོན། བྱང་སྲས་ཨུན་ཊི་ལེགས་པ། ཐང་དཀར་རྩེ་རྒོད། ཁམས་པ་གཡུལ་ལྡན། ཤན་པ་སྟོང་ཤོང་འབྲུག་སྒྲ། སྟག་གཟིག་ཞལ་དཀར་ལྡེམ་པ། ཤན་ཚ་རླུང་ལྷ་མགྱོགས་ལྡན། བྱེ་རུ་བཀའ་བློན་ཆོས་འགྲུབ། བདུད་རི་ཤན་པ་དམར་པོ། མཐིང་རྒྱལ་སྟག་རྒོད་རྔམ་བཙན། གྲོ་མ་གཤིན་བདུད་ནག་མགོ། ར་འདྲ་འཆི་བདག་ཡ་མེད། བྱ་ཆེན་ཀརྨ་དགྲ་འདུལ། སོག་སྲས་དུང་ཆུང་འོད་དཀར། ཡབ་ཆེན་སེང་བློན་རྒྱལ་པོ། གླིང་མ་བཞིའི་དཔོན་པོ་ཁྲོ་ཐུང་། ནུ་བོ་རོང་ཚ་དམར་ལེབ། སྐྱ་ལོ་སྟོན་པ་རྒྱལ་མཚན། འོམ་བུའི་ཨ་ནུ་དཔའ་སེང་། གསེར་པའི་ཉི་འབུམ་དར་ཡག དཔའ་ལ་སེང་སྟག་ཨ་དོམ། འབྲུ་སྒ་སྡེ་ཆོས་སྐྱོང་བེར་ནག སྟག་རོང་ཨ་ནུ་གཟིག་འཕེན། འཇང་སྲས་གཡུ་ཁྲི་གུང་སྔོན།   འཇང་ཕྲུག་གཡུ་ལྷ་ཐོག་འགྱུར། དུང་སྐྱོང་སྟག་ལྷ་ཁྲི་དཀར། སྐྱ་ལོའི་སྣང་སྲས་གཡུ་སྟག  སྐྱ་ལོའི་བུ་ཡག་འབྲུག་རྒྱལ། ཨ་འབར་བུ་ཡི་འཕེན་སྟག  མི་ཆེན་རྒྱལ་བའི་ལྷུན་འགྲུབ།གླིང་ཆེན་ཐར་བུ་བསོད་ནམས།བརྒྱ་དཔོན་བན་དེ་དམར་ལུ།སྟོང་དཔོན་ཡ་མི་སོ་ཁྲ།དཀར་རུ་ཉི་མ་རྒྱལ་མཚན་ནི། དབང་བཅོད་དབང་པོ་དར་ཕན།  ཨ་དགེ་ཚངས་པའི་ངོ་ལུག མོ་མ་ཀུན་ཤེས་ཐིག་པོ། སྒྱུ་མཁན་ཁ་ཆེ་མིག་དམར། བཅོ་ལྔའི་དཔའ་གསར་ཟླ་བ། འབྲུ་མི་དཀར་ལྷའུ་བསམ་འགྲུབ། རྨ་ཉིན་རྫོང་དཔོན་པོ་ལྷ་ཀླུ། གཡུང་ཡག་མགོན་པོ་སྟོང་ཐུབ། ཁྲ་གདོང་བསྟན་འཛིན་གྲགས་པ། ག དོང་བཙན་སྣང་ངུ་ཨ་བརྟན། འབྲུ་སྲས་ནམ་མཁའི་ཐོག་རྒྱལ། གསེར་པའི་བུ་ཆུང་ཐར་ཡག འོམ་བུའི་སྤྱང་ཁྲི་རྔམ་ཆེན། འཇང་ཁུ་བྱུག་པདྨ་ཉི་གྲགས། བེར་ཐུལ་བུ་ཡི་ལྷ་རྒོད། གཡུ་སྲས་གཡུ་འབྲུག་ཐོག་རྒྱལ། རྨི་ལི་དཔོན་པོ་བྲག་བཙན། མོན་ཕྲུག་ཟླ་བ་ཁྲབ་བཙན། ཤིང་རོང་རྨ་བྱ་བཙན་པོ། མོན་གྱི་ཨ་ཁུ་རྡོ་རྒན། ཨ་གྲགས་ཉི་མ་གྲགས་པ། སྙེ་མོའི་སྟག་ཚང་ཞལ་དཀར། མཐིང་ཤོད་འཕྲུལ་ལྕེ། ཞང་ཞུང་སྟག་མོ་ཁྲི་བརྟན། སོག་སེར་པོའི་སྟག་དམར་སྟོབས་ཆེན། སྟོབས་རྒྱལ་རིན་ཆེན་གྲགས་པ། ཁྱི་ཤི་བུ་ཡི་རྒུ་རུ། སྒ་སྐྱ་ལོ་སེང་ལྕམ་འབྲུག་མོ།  སྔོ་ལོ་བུ་མོ་ནེའུ་ཆུང་། གྲོ་ལོ་པད་དཀར་ལྷ་མཛེས། སྤྱི་དཔོན་བུ་མོ་གཡུ་སྒྲོན། ཚ་ཞང་བུ་མོ་མཛེས་སྒྲོན། ཡ་ཐའི་བུ་མོ་གསེར་མཚོ། ཁྲོ་ཐུང་བུ་མོ་ཁྲོ་མཚོ། མ་ཡུམ་འགོག་བཟའ་ལྷ་མོ། རྒྱ་བཟའ་ལྷ་དཀར་སྒྲོལ་མ། རག་བཟའ་དགེ་མཚོ། འདན་བཟའ་གསེར་མཚོ། མེ་བཟའ་འབུམ་སྐྱིད། མགར་བཟའ་ཆོས་སྒྲོན། འཇང་བཟའ་པདྨ་ཆོས་སྒྲོན། མོན་བཟའ་མེ་ཏོག་ལྷ་མཛེས། དར་བཟའ་གཡུ་སྒྲོན་བཅས་ཀྱི་སྣང་བརྙན་གྱིས།  ལོ་ངོ་སྟོང་ཕྲག་གཅིག་གི་རྗེས་སུ་སྐྱེས་པའི་ང་ཚོའི་ཡིད་དབང་ཐང་ཀའི་སྒྱུ་རྩལ་ལ་བརྟེན་ནས་རིམ་གྱིས་བཀུག་འགྲོའོ། །
        མི་སྒེར་པ་སུ་ཡི་ཞིག་ཡིན་རུང་སེམས་སུ་འཆར་བཀོད་སྣ་ཚོགས་འཐེན་ཕོད་པ་དང་ཁ་ནས་གང་དྲན་བཤད་སླ་བོ་རེད་དེ། ང་རང་ཉིད་ཀྱང་སྟོང་བསམ་ལ་དགའ་བ་ཞིག་ཡིན། འོན་ཀྱང་སེམས་སུ་དྲན་པ་དང་ཁ་ནས་བཤད་པ་དེ་མངོན་སུམ་འཚོ་བའི་ཁྲོད་དུ་ལག་ལེན་ཏུ་བསྟར་རྒྱུ་ནི་ཧ་ཅང་དཀའ་བར་འདུག ཡེ་ཤེས་ཆོས་འཕེལ་ལགས་ལ་མཚོན་ན། རབ་བྱུང་མཁན་པོ་ཞིག་ཡིན་པ་མ་གཏོགས་ཁེ་ལས་སོགས་ཀྱི་ཚོང་བདག་ཅིག་མ་རེད། ཁོས་རང་གི་ཐབས་ཤེས་རབ་དང་ཚེགས་བརྩོན་འགྲུས་ལ་བརྟེན་ནས་ལས་རིགས་ལག་རྩལ་སློབ་གྲྭ་ཞིག་དབེན་པའི་ལུང་ཁུག་ཏུ་བཙུགས་ཤིང་། སློབ་གྲྭ་འགྲིམ་པའི་སྐལ་བ་མ་ལྡན་པའི་བོད་པའི་བུ་ཕྲུག་ཕོ་མོ་སྐོར་ཞིག་ཐག་ཉེ་རིང་གི་ཡུལ་ལུང་སོ་སོ་ནས་བསྡུས་ཏེ་རིན་མེད་དུ་རིག་གནས་ཤེས་བྱ་དང་ལག་རྩལ་སྦྱང་དུ་བཅུག་པ་ནི་དེ་བས་ཀྱང་ལས་སླ་བོ་ག་ལ་ཡིན། ད་དུང་ཡང་། ཁོས་ཐང་ཀའི་དགེ་རྒན་གྲགས་ཅན་གདན་ཞུས་ཏེ་སློབ་ཕྲུག་ཚོར་ཡུན་རིང་བོར་བྲིས་རྒྱུན་འཁྲིད་རྒྱུ་དང་ཐང་ཀའི་རྒྱུན་འཛིན་པ་གསོ་སྐྱོང་བྱེད་པའི་ལས་ཀ་ནི་དཀའ་ངལ་ཅི་ཙམ་ལ་གདོང་གཏད་དགོས་པ་ཁོ་རང་ཉིད་ཀྱིས་ཤེས་པ་ལས་གཞན་སུས་ཀྱང་རྟོགས་མི་སྲིད། དེ་ལས་ཀྱང་མ་དཔེ་སྟོན་མཁན་མེད་ལ་ཟུར་བལྟ་བྱེད་སའང་མེད་པར་གེ་སར་སྒྲུང་གི་མི་སྣ་དང་གཏམ་རྒྱུད་བརྗོད་བྱ་མི་འདྲ་བརྒྱ་ཕྲག་གཅིག་ཙམ་དགེ་སློབ་རྣམས་ཀྱིས་མཉམ་གཅིག་ཏུ་བྲི་དགོས་ཚེ།དེ་ལ་བློ་དང་སྤོབས་པ་ག་ཚོད་དགོས་པ་གནམ་གྱིས་མཁྱེན་པ་རེད། ཡེ་ཤེས་ཆོས་འཕེལ་ལགས་ཀྱི་ལས་རིགས་ལག་རྩལ་སློབ་གྲྭ་དེ་ཚད་ཅི་འདྲ་ཞིག་་ལ་འཕེལ་རྒྱས་འགྲོ་ཐུབ་པ་ངས་མི་ཤེས་ལ། སློབ་གྲྭའི་དགེ་སློབ་ཀྱིས་མཉམ་གཅིག་ཏུ་བྲིས་པའི་སྒྲུང་ཐང་དེ་དག་གི་སྒྱུ་རྩལ་གྱི་རིན་ཐང་སོགས་ག་འདྲ་ཡོད་པའང་ངས་མི་ཤེས་མོད། གང་ལྟར་ས་ཆ་ཆུང་ཆུང་ཞིག་ཏུ་ཕྱོགས་ཡར་མར་གྱི་སློབ་ཕྲུག་ཚོའི་རྒྱུད་དུ་སྲོལ་རྒྱུན་རིག་གནས་སྲུང་སྐྱོང་དང་རྒྱུན་འཛིན། དར་སྤེལ་གཏོང་བའི་ས་བོན་ལེགས་པར་བཏབ་ཅིང་ཁ་ཕྱོགས་དྲང་པོ་བསྟན་པ་མ་ཟད། ཁོ་རང་གིས་དངོས་སུ་སྣེ་ཁྲིད་དེ་མདུན་དུ་སྐྱོད་པའི་འབད་འབུངས་ཀྱི་སྙིང་སྟོབས་འདི་ལ་རྗེས་སུ་ཡི་རང་དང་དད་གུས་བྱ་རྒྱུ་ནི་ཀུན་གྱི་འོས་འགན་ཡིན་པ་འདྲ། ས་གཞི་ཀོ་བས་མི་ཁེབས་ཀྱང་། ལྷམ་མཐིལ་ཀོ་བས་གཡོགས་ན་ཆོག་ཅེས་པའི་བོད་ཀྱི་གཏམ་དཔེ་ཞིག་ངའི་ཡིད་དུ་དྲན་བྱུང་།
        ཡེ་ཤེས་ཆོས་འཕེལ་ལགས་ཀྱིས་ང་ལ་གསུངས་དོན།  ཐང་ཀ་སློབ་པ་ལ་ཐོག་མར་ཐིག་རྩ་ཇི་ལྟར་བྲི་བའི་ཚད་དེ་ངེས་པར་དུ་ཐིག་ཡིག་བློར་འཛིན་དགོས་པ་རེད། ལྷ་ཞི་བ་དང་ཁྲོ་བོ་དང་ཞི་མ་ཁྲོ་སོགས་མི་འདྲ་བ་རེ་རེའི་སྐུ་བརྙན་དེ་ཐང་ཀའི་ངོས་སུ་ཇི་ལྟར་བྲི་དགོས་ལུགས་དེ་ཐིག་རྩ་གཅིག་གྱུར་ཡིན་པ་རེད།  ལས་རིགས་ལག་རྩལ་སློབ་གྲྭ་འདི་ནས་སློབ་མཐར་ཕྱིན་པའི་སློབ་མ་བདུན་ཅུ་ལྷག་ཡོད་པ་དེ་དག་གིས་ད་ལྟ་རང་རྐྱ་ཐུབ་པར་ཐང་ཀ་འབྲི་བ་དང་གཞན་ལ་སློབ་ཁྲིད་ཀྱང་བྱེད་ཐུབ་ཀྱི་འདུག     གསོ་རིག་འཛིན་གྲྭའི་སློབ་མ་རྣམས་མ་འོངས་པ་ན་ས་མཐའི་ཡུལ་ཕྱོགས་འདིའི་མི་མང་གི་བདེ་ཐང་སྲུང་མཁན་དུ་འགྱུར་རྒྱུའི་རེ་བ་ང་ལ་ཡོད་ཅེས་ཟེར།