མགུར་གྱི་གོ་དོན་ལ་བསྟན་པ་སྔ་དར་དང་ཕྱི་དར་གྱི་སྐབས་གཉིས་ནས་འགྲེལ་རྒྱག་སྟངས་ཤིག་ཡོད་པས། དེ་ཡང་བསྟན་པ་སྔ་དར་གྱི་སྐབས་སུ་མགུར་དང་གླུ་གཉིས་ནི་དོན་གཅིག་མིང་གི་རྣམས་གྲངས་ཡིན་པ་ལས་སོ་སོར་དབྱེ་བ་འབྱེད་རྒྱུ་མེད་པ་དང་། རྗེས་ཀྱི་བསྟན་པ་ཕྱིར་དར་སྐབས་ནས་བཟུང་མགུར་དང་གླུ་གཉིས་ལ་དོན་གྱི་དབྱེ་བ་བྱུང་བ་རེད། འདི་ཡང་དུས་ཚོད་ཀྱི་འགྲོས་དང་བསྟུན་ནས་གནའ་བོའི་བོད་རྩོམ་ལ་འགྱུར་ལྡོག་དང་འཕེལ་རྒྱས་སོང་བའི་དན་རྟགས་ཤིག་རེད། སྤྱིར་འཛམ་གླིང་སྤྱིའི་འགྲོ་ཕྱོགས་དང་བསྟུན་ན་རྩོམ་རིག་གི་མགོ་ཁུངས་དེ་དམངས་ཁྲོད་རྩོམ་རིག་ཡིན་པས་རང་རེའི་བོད་ལ་མཚོན་ན་ཡང་ཐོག་མའི་མགུར་གླུ་དེ་རྗེས་ཀྱི་རྩོམ་རིག་དར་སའི་ཆུ་མགོ་དང་བོད་རྩོམ་གྱི་ཡུམ་དོད་(文学母体)ལྟ་བུ་ཞིག་ཏུ་གྱུར་བ་རེད།