རྒྱལ་བསྟན་དབྱར་གྱི་མཛེས་ལྗོངས་སུ།།

གསེར་གྱི་མེ་ཏོག་འདེབས་མཁས་པ།།

ཟུར་ཕུད་ལྔ་བ་མཁྱེན་པའི་གཏེར།།

ཆོས་ཀྱི་རྡོ་རྗེ་གཏན་གྱི་སྐྱབས།།

ལྷག་བསམ་འོ་མའི་མཚོ་མོ་ལ།།

སྙིང་སྟོབས་འཇའ་ཚོན་རྟག་འཁྱུད་པའི།།

རྒྱལ་སྲས་སྨན་གྱི་ལྗོན་པ་ཆེ།།

ཆོས་ཀྱི་རྡོ་རྗེ་འགྲོ་བའི་མགོན།།

མཁྱེན་རབ་གློག་གི་ཟེར་མ་ཡིས།།

སྐལ་ལྡན་སྙིང་གི་མུན་སེལ་བ།།

ས་གསུམ་འགྲོ་བའི་བླ་མ་མཆོག།

གློ་བུར་གཤེགས་པ་སྙིང་ལ་ལྕི།།

དུས་ལོག་མུན་པའི་བསྐལ་བ་ལ།།

དུས་ལ་གཟིགས་པའི་བྱམས་པ་ཡིས།།

དུས་ཀྱི་འགྲོ་བའི་དོན་མཛད་པ།།

དུས་ཀྱི་དེད་དཔོན་གང་དུ་བཞུད།།

དྲི་བྲལ་རྣམ་དག་ཚུལ་ཁྲིམས་ལྡན།།

མང་ཐོས་ནོར་གྱིས་ཐུགས་རྒྱུད་ཕྱུག།

བསྟན་དང་འགྲོ་བའི་མིག་གཅིག་པུ།།

ཕ་རྒོད་བླ་མ་གང་དུ་བཞུད།།


མ་རུང་གདུལ་དཀའི་ལུས་ཅན་ཀུན།།

རྨད་བྱུང་ཐབས་མཁས་སྤྱོད་བཟང་གིས།།

ཡང་དག་ལམ་ལ་འཁྲིད་མཁས་པའི།།

འགྲོ་བའི་དཔུང་གཉེན་གང་དུ་བཞུགས།།


ཕན་བདེ་པད་ཚལ་འཇོམས་པ་ཡི།།

མི་སྲུན་གླང་བོ་བྱེ་བའི་དཔུང་།།

དུས་གཅིག་བྱེར་མཛད་གྲུབ་པའི་དབང་།།

མཐུ་སྟོབས་དབང་ཕྱུག་གང་དུ་བཞུད།།

རིང་ལུགས་མཐའ་བྲལ་དབུ་མའི་ལམ།།

ཟབ་མོ་རིམ་གཉིས་རྣམ་འབྱོར་གྱིས།།

ཉམས་སུ་བཞེས་པས་རྟོགས་པ་མཐོ།།

གྲུབ་རིགས་ཁྱུ་མཆོག་གང་དུ་བཞུད།།


སློབ་གསོའི་མྱུ་གུ་འབུས་པའི་དུས།།

ཚངས་པའི་བུ་མོས་བཞད་སྒྲ་ཡིས།།

སྦུག་འཐོམ་གཉིད་ལས་དཀྲོག་པའི་གཏམ།།

ཉི་མ་བཞིན་དུ་ཀུན་ནས་འབར།།

དགེ་ལྡན་གྲུབ་མཐའི་གཟི་བྱིན་གྱིས།།

མུན་པར་འོད་ཀྱི་མིག་བྱིན་པའི།།

གསེར་མདོག་གསེར་གྱི་རིང་ལུགས་མཆོག།།

དུས་མཐར་སྤེལ་ལ་མེ་ཏོག་བརྩེགས།།


འཕགས་ཡུལ་གཉིས་པ་ལྷ་ལྡན་ནས།།

གཞུང་ལྔའི་ལུང་རིགས་འོད་རྣོན་གྱིས།།

ཕས་རྒོད་དམ་བཅའ་གཏོར་བའི་སྒྲ།།

གོ་ལའི་ཁྱོན་ན་ད་དུང་གྲགས།།

མཛེས་ལྡན་གསེར་མོ་ལྗོངས་ཀྱི་ལྟོར།།

ཞབས་ཀྱི་མེ་ཏོག་བཀོད་པ་ནས།།

ཨ་རོལ་ལ་སོགས་པཎ་ཆེན་ཀུན།།

ཚུལ་བཞིན་བསྟེན་ལ་རབ་ཏུ་འདུད།།

མགོན་ཁྱོད་མན་ངག་གསེར་གྱི་ཁུའི།།

བྱང་སེམས་རིན་ཆེན་ས་བོན་ལ།།

དགེ་ལེགས་འདབ་བརྒྱ་གྲོལ་བའི་གཏམ།།

གོ་ལའི་མ་ཐེག་འཁུན་སྒྲ་འབྱིན།།

མུན་པས་ཟ་བའི་འཇིག་རྟེན་འདི།།

ཤེས་རབ་སྒྲོན་མེའི་འོད་སྣང་གིས།།

མཐོན་པོའི་ས་ལ་བཏེགས་པ་ཡང་།།

ནོར་གཡང་སྟོང་གིས་ཁུག་པ་མིན།།

ཕྱག་རྩོམ་ས་ལེ་སྦྲམ་གྱི་རིར།།

བཀྲ་ཤིས་གཟི་འོད་རྟག་བཀྲ་ཞིང་།།

གྲགས་དཀར་གཏམ་གྱིས་འཁྱུད་པའི་ཚེ།།

གོ་ལའི་མ་བཟོད་སྡང་མིག་འཛུགས།།

ནོར་གྱི་མཐུན་སྦྱོར་ཞན་པའི་བུ།།

ནོར་གྱིས་བསྐྱངས་པའི་སྦྱིན་པ་ལ།།

གཡུར་ཟའི་འབྲས་བུ་སྨིན་པའི་ཚེ།།

ནོར་ལྷའི་ཚོགས་ཀྱང་ཀུན་ཏུ་ཞུམ།།

དམིགས་མེད་བརྩེ་བ་སྙིང་རྗེ་ཡིས།།

ཕྱི་ནང་འགལ་འདུ་གྱོད་ཀྱི་སྣ།།

ཞི་བར་བཏང་བའི་ཕྱག་རྗེས་ལ།།

ཆེན་པོ་དག་ཀྱང་མེ་ཏོག་གཏོར།།

བསྟན་པ་འཛིན་པའི་རྨང་གཞི་ལ།།

གདན་ས་ཡིད་དགའ་ཆོས་འཛིན་དང་།།

སྲས་མཁར་ལ་སོགས་གྲྭ་ས་ཀུན།།

འོད་དུ་བལྟེམས་པ་ཁྱོད་ཀྱི་དྲིན།།

གཡང་གི་ར་བ་སྟུག་པོ་ན།།

སློབ་གསོ་དཔག་བསམ་ལྗོན་པ་ཆེར།།

ཞིམ་མངར་འབྲས་བུས་དུད་པ་ཡང་།།

འཇམ་དབྱངས་བླ་མ་ཁྱོད་ཀྱི་དྲིན།།

འདི་ན་འཆམ་མཐུན་ཞི་བདེའི་མཚོར།།

སྤྲོ་དགའ་རླབས་ཀྱི་དབྱངས་རྟ་ཡིས།།

མཛེས་པར་དཀྲིས་པའི་བདེ་སྐྱིད་ཀྱང་།།

དམ་པའི་བྱིན་རླབས་ཁོ་ནར་ངེས།།

གདུལ་དཀའི་འགྲོ་བ་འདུལ་བ་ལ།།

བཞད་པའི་རྡོ་རྗེ་ཡབ་སྲས་དང་།།

ཐུགས་བསྐྱེད་སྨོན་ལམ་མཐུ་ཟབ་པའི།།

བླ་མ་ཡིད་བཞིན་ནོར་བུར་འདུད།།

འཇམ་དབྱངས་བླ་མ་མཁྱེན་པའི་གཏེར།།

ངག་དབང་བཀྲ་ཤིས་ལ་སོགས་ཀྱི།།

སྐུ་ཡི་རོལ་བ་མཐའ་ཡས་པའི།།

ངོ་མཚར་གཏིང་མཐའ་སུ་ཞིག་དཔོག།

འགྲོ་ལ་གང་འཚམས་སྐྱེས་ཕྲེང་གི།

བྱིན་རླབས་གཟི་འབར་ཡོན་ཏན་ལ།།

རྟག་ཏུ་བརྩོན་པའི་མཆན་གྱི་བུར།།

བཀྲ་ཤིས་སྩོལ་ཅིག་ཕ་རྒོད་ཀྱེ།།

ཞི་འཇམ་བག་ཡོད་བརྗིད་པའི་སྐུ།།

སྙན་འཇེབས་ཚངས་པའི་དབྱངས་ཀྱི་གསུངས།།

བློ་བཟང་རྒྱལ་བསྟན་འཛིན་པའི་ཐུགས།།

ཕན་བདེ་རྒྱ་མཚོའི་མགོན་ལ་འདུད།།

ལྷུན་གྲུབ་མཁྱེན་བརྩེའི་འོད་སྟོང་གིས།

པད་མོའི་སྦུབས་རྒྱ་གྲོལ་མཛད་པའི།།

ཕན་བདེ་བྱེ་བའི་ཉི་མ་ཆེ།།

དྲིན་ལྡན་བླ་མ་གཙུག་གིས་མཆོད།།

མྱུ་ཁྱུད་གངས་ཀྱི་ར་བ་ན།།

ཁྱེད་ལ་གློ་སྙིང་བྲང་གཏོད་པའི།།

གུས་ལྡན་ལྷ་འབངས་ཅོག་སོ་ལ།།

བརྩེ་བའི་ཕྱི་མིག་གཟིགས་པར་ཞུ།།

འུར་འུར་འཕྲུལ་གྱི་འཚུབ་མ་ཡིས།།

གནམ་ས་བརྡེབས་པའི་དུས་ལོག་ཏུ།།

གཡོ་མེད་ཏིང་འཛིན་བརྟན་པའི་མགོན།།

རྒྱལ་སྲས་དཔའ་བོའི་ཞབས་ལ་འདུད།།

གངས་ལ་ཉི་མ་འཁྱུད་པ་བཞིན།།

ལྟ་བའི་མི་ངོམས་གསེར་གྱི་ཞལ།།

དྲན་ཞིང་དྲན་བཞིན་བོས་པ་ན།།

བརྩེ་བའི་བྱིན་རླབས་གནང་བར་ཤོག།

བདག་པས་གཞན་གཅེས་བྱམས་པ་ཡིས།།

འགྲོ་བའི་དོན་ཆེན་བསྒྲུབ་པ་ལ།།

ཐེག་ཆེན་སྙིང་སྟོབས་བཞེས་པའི་གཏམ།།

སྲིད་པ་གསུམ་གྱི་ཁྱོན་ལས་བརྒལ།།

ཁྱེད་ནི་དག་པ་རྡོ་རྗེའི་སྐུའི།།

དོན་དམ་ཆོས་ལ་དབང་འབྱོར་ཡང་།།

ཐ་མལ་སྣང་ངོར་ཞི་སྟོན་པ།།

སྐལ་བས་ཐོས་པས་རབ་ཏུ་སྐྱོ།།


མཆོག་གསུམ་ཐུགས་རྗེའི་བདེན་པ་དང་།།

བསླུ་མེད་རྟེན་འབྱུང་བྱིན་མཐུ་ཡིས།།

འདོད་པའི་དོན་རྣམས་མ་ལུས་པ།།

མྱུར་དུ་འགྲུབ་པའི་དགེ་ལེགས་སྩོལ།།