ང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང་།

དོན་ཚན་ཞེ་བདུན་པ། རང་བྱུང་མི་གཅིག་པར་ཁེ་གྱོང་འབྲེལ་བ་ཡོད་མི་ལ་ལས་ཁོ་ཤི་བར་ཁྱབ་བསྒྲགས་བྱེད་དགོས་པའི་རེ་འདུན་ཞུས་པ་དང་། ཁེ་གྱོང་འབྲེལ་བ་ཡོད་མི་ལ་ལས་ཁོ་གར་སོང་ཆ་མེད་གྱུར་པ་ཁྱབ་བསྒྲགས་བྱེད་དགོས་པའི་རེ་འདུན་ཞུས་ཚེ། བཅའ་ཁྲིམས་འདིར་གཏན་འབེབས་བྱས་པའི་ཤི་བར་ཁྱབ་བསྒྲགས་བྱེད་པའི་ཆ་རྐྱེན་འཛོམས་པ་ཡིན་ན། མི་དམངས་ཁྲིམས་ཁང་གིས་ཤི་བར་ཁྱབ་བསྒྲགས་བྱེད་དགོས།

དོན་ཚན་ཞེ་བརྒྱད་པ། ཤི་བར་ཁྱབ་བསྒྲགས་བྱས་པའི་མི་ཡིན་ན། མི་དམངས་ཁྲིམས་ཁང་གིས་ཤི་བར་ཁྱབ་བསྒྲགས་བྱས་པའི་དཔྱད་མཚམས་བཏང་ཉིན་དེ་ཁོ་རང་ཤི་བའི་དུས་ཚོད་ལ་རྩི་དགོས། བསམ་ཡུལ་ལས་འདས་པའི་དོན་རྐྱེན་གྱི་དབང་གིས་གར་སོང་ཆ་མེད་དུ་གྱུར་ནས་ཤི་བར་ཁྱབ་བསྒྲགས་བྱས་པ་ཡིན་ན། བསམ་ཡུལ་ལས་འདས་པའི་དོན་རྐྱེན་བྱུང་ཉིན་དེ་ཁོ་རང་ཤི་བའི་དུས་ཚོད་ལ་རྩི་དགོས།

དོན་ཚན་ཞེ་དགུ་པ། རང་བྱུང་མི་ཞིག་ཤི་བར་ཁྱབ་བསྒྲགས་བྱས་མོད་ཀྱང་ཤི་མེད་པ་ཡིན་ན། རང་བྱུང་གི་མི་དེས་རང་ཉིད་ཤི་བར་ཁྱབ་བསྒྲགས་བྱས་རིང་དུ་སྤེལ་བའི་དམངས་དོན་བཅའ་ཁྲིམས་བྱ་སྤྱོད་ཀྱི་ནུས་པ་ལ་ཤུགས་རྐྱེན་མི་ཐེབས་པ་ཡིན།

དོན་ཚན་ལྔ་བཅུ་པ། ཤི་བར་ཁྱབ་བསྒྲགས་བྱས་པའི་མི་དེ་བསྐྱར་དུ་ཐོན་པ་ཡིན་ན། ཁོ་རང་ངམ་ཁོ་དང་ཁེ་གྱོང་འབྲེལ་བ་ཡོད་མིས་རེ་འདུན་ཞུས་པ་བརྒྱུད། མི་དམངས་ཁྲིམས་ཁང་གིས་ཤི་བའི་ཁྱབ་བསྒྲགས་དེ་ཕྱིར་འཐེན་བྱེད་དགོས།

དོན་ཚན་ང་གཅིག་པ། ཤི་བར་ཁྱབ་བསྒྲགས་བྱས་པའི་མི་དེའི་གཉེན་སྒྲིག་འབྲེལ་བ་ནི། ཤི་བར་ཁྱབ་བསྒྲགས་བྱས་ཉིན་ནས་རྩིས་མེད་བཟོ་དགོས། ཤི་བའི་ཁྱབ་བསྒྲགས་ཕྱིར་འཐེན་བྱས་ཚེ། གཉེན་སྒྲིག་འབྲེལ་བ་ནི་ཤི་བའི་ཁྱབ་བསྒྲགས་ཕྱིར་འཐེན་བྱས་ཉིན་ནས་རང་ཤུགས་སུ་སླར་གསོ་བྱེད་དགོས། ཡིན་ན་ཡང་ཁོའི་བཟའ་ཟླ་ཡང་བསྐྱར་གཉེན་སྒྲིག་བྱས་ཟིན་པའམ་གཉེན་སྒྲིག་ཐོ་འགོད་ལས་ཁུངས་ལ་ཡིག་ཐོག་ནས་གཉེན་སྒྲིག་གི་འབྲེལ་བ་སླར་གསོ་བྱེད་འདོད་མེད་པ་གསལ་བསྒྲགས་བྱས་པ་འདིའི་ཁོངས་སུ་མི་ཚུད།

དོན་ཚན་ང་གཉིས་པ། ཤི་བར་ཁྱབ་བསྒྲགས་བྱས་པའི་རིང་ལ་ཤི་བར་ཁྱབ་བསྒྲགས་བྱས་པའི་མི་དེའི་བུ་ཕྲུག་མི་གཞན་གྱིས་ཁྲིམས་ལྟར་ཉར་གསོ་བྱས་ཡོད་ན། ཤི་བའི་ཁྱབ་བསྒྲགས་ཕྱིར་འཐེན་བྱས་རྗེས། རང་ཉིད་མོས་མཐུན་མ་བྱུང་བ་རྒྱུ་མཚན་དུ་བྱས་ནས་ཉར་གསོའི་བྱ་སྤྱོད་ལ་ནུས་པ་མེད་པའི་འདོད་ཚུལ་བཟུང་མི་ཆོག །

དོན་ཚན་ང་གསུམ་པ། ཤི་བའི་ཁྱབ་བསྒྲགས་ཕྱིར་འཐེན་བྱས་པའི་མིར་བཅའ་ཁྲིམས་འདིའི་ལེན་ཚན་དྲུག་པ་ལྟར་ཁོའི་རྒྱུ་ནོར་ཐོབ་པའི་དམངས་དོན་བྱེད་པོར་རྒྱུ་ནོར་ཕྱིར་སློག་བྱེད་དགོས་པའི་རེ་འདུན་འདོན་དབང་ཡོད། ཕྱིར་སློག་བྱེད་ཐབས་བྲལ་ན་གུན་གསབ་འོས་འཚམ་སྤྲོད་དགོས།

ཁེ་གྱོང་འབྲེལ་བ་ཡོད་མིས་གནས་ཚུལ་ངོ་མ་གསང་བ་བྱས་པའི་རྐྱེན་གྱིས་མི་གཞན་ཤི་བར་ཁྱབ་བསྒྲགས་བྱེད་དུ་བཅུག་པ་ལས་དེའི་རྒྱུ་ནོར་ཐོབ་པ་ཡིན་ན། རྒྱུ་ནོར་ཕྱིར་སློག་བྱེད་དགོས་པར་མ་ཟད། དེ་ལས་བཟོས་པའི་གྱོང་གུན་ལ་སྐྱིན་གསབ་འགན་འཁྲི་ཡང་འཁུར་དགོས།

ས་བཅད་བཞི་པ། མི་སྒེར་གྱི་བཟོ་ཚོང་ཐེམ་དུད་དང་གྲོང་གསེབ་ཀྱི་འགན་གཙང་ལེན་གྱིས་གཉེར་སྐྱོང་ཐེམ་དུད།

དོན་ཚན་ང་བཞི་པ། རང་བྱུང་མིས་བཟོ་ཚོང་ལས་རིགས་གཉེར་སྐྱོང་བྱེད་པར་ཁྲིམས་ལྟར་ཐོ་འགོད་བྱས་ཡོད་ཕྱིན། མི་སྒེར་གྱི་བཟོ་ཚོང་ཐེམ་དུད་ཡིན། མི་སྒེར་གྱི་བཟོ་ཚོང་ཐེམ་དུད་ལ་ཚོང་མིང་བཏགས་ཆོག་པ་ཡིན།

དོན་ཚན་ང་ལྔ་པ། གྲོང་གསེབ་ཀྱི་ཐུན་མོང་དཔལ་འབྱོར་རྩ་འཛུགས་ཀྱི་ཁོངས་མིར་ཁྲིམས་ལྟར་གྲོང་གསེབ་ཀྱི་ས་ཞིང་འགན་གཙང་ལེན་གྱིས་གཉེར་སྐྱོང་བྱེད་དབང་ཐོབ་པ་དང་། ཁྱིམ་ཚང་གིས་འགན་གཙང་ལེན་གྱིས་གཉེར་སྐྱོང་བྱེད་པ་ནི་གྲོང་གསེབ་ཀྱི་འགན་གཙང་ལེན་གྱིས་གཉེར་སྐྱོང་ཐེམ་དུད་ཡིན།

དོན་ཚན་ང་དྲུག་པ། མི་སྒེར་གྱི་བཟོ་ཚོང་ཐེམ་དུད་ཀྱི་བུ་ལོན་ནི། མི་སྒེར་གྱིས་གཉེར་སྐྱོང་བྱས་པ་ཡིན་ན། མི་སྒེར་གྱི་རྒྱུ་ནོར་གྱིས་འཇལ་དགོས། ཁྱིམ་ཚང་གིས་གཉེར་སྐྱོང་བྱས་པ་ཡིན་ན། ཁྱིམ་ཚང་གི་རྒྱུ་ནོར་གྱིས་འཇལ་དགོས། དབྱེ་བ་འབྱེད་དཀའ་བའི་རིགས་ཡིན་ན། ཁྱིམ་ཚང་གི་རྒྱུ་ནོར་གྱིས་འཇལ་དགོས།

གྲོང་གསེབ་ཀྱི་འགན་གཙང་ལེན་གྱིས་གཉེར་སྐྱོང་ཐེམ་དུད་ཀྱི་བུ་ལོན་ནི། གྲོང་གསེབ་ཀྱི་ས་ཞིང་འགན་གཙང་ལེན་གྱིས་གཉེར་སྐྱོང་བྱེད་པའི་ཞིང་དུད་ཀྱི་རྒྱུ་ནོར་གྱིས་འཇལ་དགོས། དོན་དངོས་ཐོག་ཞིང་དུད་ཀྱི་ཁོངས་མི་ཁག་ཅིག་གིས་གཉེར་སྐྱོང་བྱེད་པ་ཡིན་ན། ཁོངས་མི་ཁག་དེའི་རྒྱུ་ནོར་གྱིས་འཇལ་དགོས།

ལེའུ་གསུམ་པ། ཁྲིམས་མི།

ས་བཅད་དང་པོ། སྤྱིར་བཏང་གི་གཏན་འབེབས།

དོན་ཚན་ང་བདུན་པ། ཁྲིམས་མི་ནི་དམངས་དོན་ཁེ་དབང་སྤྱོད་ནུས་དང་དམངས་དོན་བྱ་སྤྱོད་སྤེལ་ནུས་ཡོད་པ་དང་། ཁྲིམས་ལྟར་རང་ཚུགས་སུ་དམངས་དོན་ཁེ་དབང་སྤྱོད་རྒྱུ་ཡོད་ལ་དམངས་དོན་འོས་འགན་སྒྲུབ་འགན་འཁུར་པའི་རྩ་འཛུགས་ཡིན།

དོན་ཚན་ང་བརྒྱད་པ།

ཁྲིམས་མི་ལ་རང་ཉིད་ཀྱི་མིང་དང་། རྩ་འཛུགས་སྒྲིག་གཞི། གཞིས་གནས། རྒྱུ་ནོར་རམ་གྲོན་དངུལ་བཅས་ཡོད་དགོས། ཁྲིམས་མི་བཙུགས་འཐུས་པའི་བྱེ་བྲག་གི་ཆ་རྐྱེན་དང་ལས་རིམ་གྱི་ཐད་དུ་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་གཞིར་འཛིན་དགོས།

ཁྲིམས་མི་འཛུགས་སྐབས། བཅའ་ཁྲིམས་དང་སྲིད་འཛིན་ཁྲིམས་སྲོལ་དུ་འབྲེལ་ཡོད་ལས་ཁུངས་ཀྱི་ཆོག་མཆན་འཐོབ་དགོས་པར་གཏན་འབེབས་བྱས་ཡོད་ན། དེའི་གཏན་འབེབས་གཞིར་འཛིན་དགོས།

དོན་ཚན་ང་དགུ་པ། ཁྲིམས་མིའི་དམངས་དོན་ཁེ་དབང་སྤྱོད་ནུས་དང་དམངས་དོན་བྱ་སྤྱོད་སྤེལ་ནུས་ནི། ཁྲིམས་མི་འཛུགས་པའི་དུས་ནས་བྱུང་ཞིང་། ཁྲིམས་མི་མཇུག་སྒྲིལ་བའི་དུས་སུ་མེད་པར་འགྱུར་བ་ཡིན།༼ མུ་འགོད། ༽