ཉེ་ཆར། སི་ཁྲོན་ཞིང་ཆེན་མེན་དབྱང་གྲོང་ཁྱེར་ཕིང་ཝུའུ་རྫོང་ཧུང་དབྱང་འགག་བོད་རིགས་ཤང་དུ་ཁ་བ་ཐེངས་ཤིག་བབས་པས། སི་ཁྲོན་སྤྲེའུ་སེར་ཁྱུ་དང་ཁྱུ་བྱས་ནས་རི་འདབས་སུ་སླེབས་ཏེ་ཁ་བའི་ཁྲོད་ཁ་ཟས་འཚོལ་བཞིན་རྩེད་འཇོར་རོལ་བ་རེད། སྤྲེའུ་སེར་དེ་དག་སྐབས་རེར་ཁ་བའི་ཁྲོད་ཡར་མར་སྐྱོད་པ་དང་། སྐབས་རེར་ནགས་ཁྲོད་དུ་མཆོང་ལྡིང་བྱེད་པའི་རྣམ་པ་ནི་དངོས་གནས་ཡིད་དབང་འཕྲོག་པ་ཞིག་རེད།
སི་ཁྲོན་སྤྲེའུ་སེར་གྱི་མིང་གཞན་ལ་སེང་གེའི་སྣ་ཅན་གྱི་སྤྲེའུ་དང་། སྣ་ལོག་སྤྲེའུ། སྤྲེའུ་སྤུ་སེར་ཞེས་འབོད་ཅིང་། རྒྱུན་དུ་ཁྱུ་དང་ཁྱུ་བྱས་ནས་རི་མཐོའི་ནགས་གསེང་དུ་འཚོ་སྡོད་བྱེད་པ་དང་། དེ་ནི་ཀྲུང་གོར་ཁོ་ནར་ཡོད་པའི་རྩ་ཆེའི་སྲོག་ཆགས་རིགས་ཤིག་ཡིན་པ་མ་ཟད། རྒྱལ་ཁབ་ཀྱི་རིམ་པ་དང་པོའི་སྲུང་སྐྱོང་སྲོག་ཆགས་རིགས་ཀྱང་ཡིན། སི་ཁྲོན་ནི་སི་ཁྲོན་སྤྲེའུ་སེར་ཐོག་མར་རྙེད་ས་ཡིན་ལ། འཚོ་སྡོད་རྒྱ་ཁྱོན་ཆེས་ཆེ་ཞིང་གྲངས་འབོར་ཆེས་མང་ལ། སི་ཁྲོན་སྤྲེའུ་སེར་གྱི་རང་བྱུང་སྲུང་སྐྱོང་ཁུལ་ཆེས་མང་པའི་ཞིང་ཆེན་ཡང་ཡིན་པས། སྤྲེའུ་སེར་གྲངས་འབོར་ཁྲི་ལྷག་སི་ཁྲོན་གྱི་རྨིན་ཧྲན་དང་ཆུང་ལའེ་རི་རྒྱུད་དུ་འཚོ་སྡོད་བྱས་ཡོད། །
