ཡིད་ལྷུང་ལྷ་མཚོ།
ད་ནི་ཡོན་ཏན་གནས་ལྔ་བསྟན་པ་ནི༔ ཡོན་ཏན་གནས་ཀྱི་གཙོ་བོ་རྒྱས་པས་བཤད༔ བོད་ཀྱི་མདོ་ཁམས་འབྲི་ཟླ་ཞེས་བྱ་རུ༔ རུ་དམ་གངས་ཀྱི་ར་བ་སྦས་པའི་ཡུལ༔ དབུས་ཀྱི་རི་བོ་སེང་ཆེན་བརྒྱད་བསྣོལ་ནང༔ གསང་སྔགས་སྣོད་རུང་ཡུལ་གྲུ་བཅོ་བརྒྱད་སྦས༔ ཡུལ་གྱི་ཆགས་ཚུལ་པདྨ་ཁ་ཕྱེ་འདྲ༔ དབུས་ཀྱི་བྲག་རི་དཔག་ཚད་གཅིག་གི་སྟེང༔ རང་བྱུང་རྡོ་ཡི་མཆོད་རྟེན་ཁྱད་པར་ཅན༔ འོད་ཟེར་ནམ་མཁའི་དབྱིངས་སུ་འགྲོ་བ་དང༔ བྲག་དེའི་ནང་དུ་སྤྲུལ་པའི་ལྷ་ཁང་ནི༔ འོད་འབར་ཞེས་བྱ་མདའ་རྒྱངས་གང་ཙམ་ཡོད༔ ནང་དུ་གསེར་གྱི་ཐུབ་པ་ཐོག་ཚད་གཅིག༔ ཡོན་བདག་དཔལ་མོ་ཧེ་ཡིས་བཞེངས་པ་ཡི༔ དངུལ་གྱི་ཉེ་སྲས་མི་ཚད་བརྒྱད་རྣམས་དང༔ དུང་དང་གཡུ་ཡི་སྒྲོལ་མ་དཀར་སྔོན་བཞུགས༔ རྒྱ་ནག་པཱ་ལ་ཏ་ཡི་རྒྱལ་པོ་ཡིས༔ པད་འབྱུང་བདག་ལ་ཕུལ་བའི་ནོར་སྣ་དང༔ ཁྱད་པར་བཟོ་ཁྱད་བྱེ་རུའི་ཚེ་དཔག་མེད༔ ཀ་མ་ལ་ཡི་རྒྱ་དཔེ་ཐམས་ཅད་བཞུགས༔ ཕྱོགས་མཚམས་རྣམས་ཀྱི་ལུང་ཆེན་བཅོ་བརྒྱད་དུ༔ གཏེར་ཆེན་གསུམ་དང་གཏེར་ཕྲན་བརྒྱད་རེ་སྦས༔ སྲུང་མ་ཡ་མ་བཅུ་གཉིས་མ་སངས་བརྒྱད༔ ལྷ་ཡི་དགེ་བསྙེན་རྡོ་རྗེ་དགའ་བར་གཏད༔ གཡས་ཀྱི་རི་ནི་རལ་གྲི་ཕྱར་བ་འདྲ༔ ཤར་གྱི་བྲག་ལ་ཐུབ་དབང་གནས་བརྟན་ཚོགས༔ ཟབ་པའི་གཏེར་གསུམ་དཀོར་སྲུང་སྲས་ལ་གཏད༔ གཡོན་གྱི་རི་ནི་སེང་ཆེན་འགྱིང་བ་འདྲ༔ ལྷོ་ཡི་བྲག་ལ་ཉེ་སྲས་བརྒྱད་རྣམས་དང་། ཕྱོགས་བཅུའི་སངས་རྒྱས་རྣམས་ཀྱི་སྐུ་ཡང་གསལ༔ སྒོས་ཁྱད་གཏེར་དགུ་དཀོར་སྲུང་ཡུམ་ལ་གཏད༔ ལྕགས་རི་ཁྲ་བོའི་སྒོ་ཁང་ལྷོ་རུ་བསྟན༔ སྒོ་ཡི་ནང་དུ་བྲག་རི་རིན་ཆེན་འདྲ༔ དབུས་ཀྱི་ཆ་ལ་པད་འབྱུང་སྒྲུབ་ཕུག་ཡོད༔ དཔལ་ཆེན་དགུ་དང་རྡོ་རྗེ་སེམས་དཔའ་དང༔ དྲུག་པ་རྡོ་རྗེ་འཆང་དང་ཤཱཀྱ་ཐུབ༔ ཨོ་རྒྱན་བདག་གི་སྐུ་རྣམས་རང་བྱོན་གསལ༔ ཕྱོགས་བཞིའི་ཀླུང་ཆེན་བཞི་ཡི་མདོ་རྣམས་ལ༔ ཤར་གྱི་གཙང་དཀར་མཆོད་རྟེན་འོད་འབར་དང༔ ལྷོ་ཡི་འཁོར་ལོ་ཨཀྴ་ལྔ་བཅུ་ལ༔ ནུབ་ཀྱི་སེང་རྫོང་སྐུ་གདུང་ཆ་བརྒྱད་དང༔ བྱང་གི་ཕ་ཝཾ་ནག་པོ་ལོགས་རྣམས་སུ༔ མི་འགྱུར་བ་ཡི་རྟགས་བརྒྱད་མཚན་རྟགས་དགུ༔ མཚམས་ཀྱི་ཀླུང་ཆེན་རྣམས་ཀྱི་ཕུ་རྣམས་སུ༔ ཤར་ལྷོ་དཔལ་གྱི་གཏོར་མ་འདྲ་བའི་རི༔ མངོན་རྫོགས་རྒྱལ་པོ་མཁས་པ་སུམ་ཅུ་ཡིས༔ རྫུ་འཕྲུལ་བྱིན་གྱིས་བརླབས་པའི་སྐུ་རང་བྱོན༔ ནོར་ལྷ་ཕོ་བརྒྱད་མོ་བརྒྱད་གཙོ་བོ་གཉིས༔ གཏེར་བདག་བཅོ་བརྒྱད་རྣམས་ཀྱིས་ནོར་ཆར་འབེབས༔ ལྷོ་ནུབ་རྡོ་རྗེ་འདྲ་བའི་བྲག་རི་ལ༔ པད་འབྱུང་བདག་གིས་རྫུ་འཕྲུལ་སྣ་ཚོགས་པའི༔ བཀོད་པ་བསམ་མི་ཁྱབ་པའི་མཚན་རྟགས་དང༔ རང་བྱུང་གྲུབ་ཆུ་འཆི་མེད་ཚེ་ཆུ་དང༔ དངོས་གྲུབ་ཆུ་བོ་ཁྲུས་ཀྱི་ཆུ་བོ་ཡོད༔ ནུབ་བྱང་རིན་ཆེན་བྲག་རི་སྒོམ་འདྲ་ལ༔ མ་སངས་དམ་ལ་བཏགས་པའི་མཚན་རྟགས་དང༔ རྣམ་འཇོམས་རྣམ་པར་རྒྱལ་མ་གདུགས་དཀར་མོ༔ གྲྭ་ལྔའི་ལྷ་མོ་ཀྲི་ཡའི་ལྷ་ཚོགས་བཞུགས༔ བྱང་ཤར་བྲག་རི་གཏེར་གྱི་བུམ་པ་འདྲ༔ རང་བྱུང་ཐུགས་རྗེའི་ལྷ་ཚོགས་བཞི་བཅུ་གཉིས༔ ཁྱད་པར་ཅན་གྱི་ཕྱག་སྟོང་སྤྱན་སྟོང་དང༔ རྟ་འགྲིན་དབུ་དགུ་ཕྱག་ནི་བཅོ་བརྒྱད་ཅན༔ རྡོ་རྗེ་ཕག་མོ་ཞལ་གསུམ་ལ་སོགས་པའི༔ མཁའ་འགྲོ་དགོངས་འདུས་དཀྱིལ་འཁོར་ལྷ་ཚོགས་ཡོད༔ ཕྱོགས་མཚམས་རྣམས་ཀྱི་བར་གྱི་ཀླུང་ཆེན་ལ༔ དང་པོར་དཔའ་བོ་བྲག་ལ་རྟ་མགྲིན་དང༔ གཉིས་པར་རུ་ཡི་བྲག་ལ་འཇམ་དཔལ་ནག༔ གསུམ་པར་སྐུ་ཡི་བྲག་ལ་ཕྱག་རྡོར་དང༔ བཞི་པར་ཉེ་བའི་བྲག་ལ་སྨེ་བ་བརྩེགས༔ ལྷོ་ཕྱོགས་བྲག་ལ་རིག་འཛིན་འདུས་པ་སོགས༔ དཀྱིལ་འཁོར་རབ་འབྱམས་རྒྱ་མཚོའི་སྐུ་རྣམས་གསལ༔ ཁྱད་པར་ལྷོ་ཕྱོགས་དབུས་ཀྱི་བྲག་རི་ལ༔ བརྟན་མའི་གསང་ཕུག་གཡས་ལོགས་མཚོ་རྒྱལ་དང༔ སྟེང་ལ་བཻ་རོ་རྒྱབ་ཏུ་གཉགས་ཆེན་སོགས༔ ལས་ཅན་དག་པའི་འཁོར་བདུན་རྣམས་ཀྱིས་ཀྱང༔ བསྒྲུབས་པའི་གནས་དང་གྲུབ་རྟགས་མཚན་མ་བཅས༔ མི་འགྱུར་འཛེར་གྱིས་རབ་ཏུ་གཏམ་པའོ༔ ཡོན་ཏན་གཏེར་ལྔ་གཏེར་ཕྲན་ཉི་ཤུ་སྦས༔ ཡོན་ཏན་སྐུ་ཡི་ཡོན་ཏན་དག་ལ་འདུས༔ བརྡ་ཐིམ།
