མིག་སྐམ་ནད་པར་རྒྱུན་དུ་མིག་ལ་ཟ་འཕྲུག་ལངས་པ་དང་མིག་ནང་དུ་ཅི་ཞིག་ཡོད་པ་ལྟ་བུའི་ཚོར་སྣང་འབྱུང་བ། མིག་ཟུང་ཚ་ལམ་ལམ་བྱེད་པ་སོགས་ཀྱི་ནད་རྟགས་འབྱུང་སྲིད།
དོ་སྣང་བྱེད་དགོས་པ་ཞིག་ནི། མིག་སྐམ་ནད་པར་མཐོང་ཤུགས་ཇེ་ཞན་དུ་འགྲོ་བའི་ནད་རྟགས་འབྱུང་བར་མ་ཟད། སེམས་ཁམས་དང་བསམ་བློའི་སྟེང་དུའང་ཤུགས་རྐྱེན་ངན་པ་མི་ཉུང་བ་འབྱུང་སྲིད།
དབྱིན་ཇིའི་ནན་ཨན་ཕུའུ་ཏུན་སློབ་ཆེན་གྱི་ཞིབ་འཇུག་མི་སྣས་དྲ་རྒྱའི་སྟེང་ནས་མིག་སྐམ་ནད་པ1000དང་མིག་སྐམ་ནད་བྱུང་མེད་པའི་ནད་མེད་མི་སྣ1000བརྟག་དཔྱད་བྱ་ཡུལ་དུ་བཟུང་སྟེ་བརྟག་དཔྱད་ཐེངས་གཅིག་སྤེལ་བ་དང་། བརྟག་དཔྱད་ལ་ནང་དོན་གཉིས་འདུས་པ་སྟེ།གཅིག་གིས་བརྟག་དཔྱད་བྱ་ཡུལ་གྱི་མིག་གི་བདེ་ཐང་དང་མཐོང་ཤུགས་ལ་བརྟག་ཅིང་། གཅིག་གིས་འཚོ་བའི་སྤུས་ཀར་བརྟག་པ་རེད། བརྟག་དཔྱད་ལས་མངོན་པ་ལྟར་ན། མིག་སྐམ་ནད་ཀྱི་ཚབས་ཅི་ལྟར་ཆེ་ན་ནད་པའི་འཚོ་བ་དང་སེམས་ཁམས་སྟེང་ཐེབས་པའི་ངན་ཤུགས་དེ་ལྟར་ཆེ་ཞིང་། མིག་སྐམ་ནད་བྱུང་ཡོད་པའི་མི་དེ་དུས་རྒྱུན་གྱི་འཚོ་བའི་ཁྲོད་དུ་དཀའ་ཁག་དང་འཕྲད་ཚད་དེ་བས་མཐོ་བས། ཁོ་ཚོར་སེམས་ཁམས་མི་བདེ་བ་དང་ཡི་མུག་པའི་ཚོར་སྣང་སྣ་ཚོགས་འབྱུང་བ་དང་། ནད་རྟགས་ཚབས་ཆེན་ཡིན་པའི་ནད་པ་རྣམས་སྤྱི་ཚོགས་དང་འབྲེལ་འདྲིས་བྱེད་མི་འདོད་པར་སྒྱིད་ལུག་གི་སེམས་ཁམས་འབྱུང་སླ་བ་རེད། ཞིབ་འཇུག་མི་སྣས་ཤེས་པ་ལྟར་ན། ནད་མེད་མི་སྣ་དང་བསྡུར་ན་མིག་སྐམ་ནད་པར་གྲིམ་བུ་དང་ཐོས་ཤུགས་ཉམས་པ། ཚོར་རྐྱེན་རང་བཞིན་གྱི་རྒྱུ་མའི་ཕྱོགས་བསྡུས་གཉན་ཚད་སོགས་ཀྱི་ནད་འབྱུང་ཚད་ལྡབ་འགྱུར་གྱིས་མཐོ།
ཐེངས་དེའི་བརྟག་དཔྱད་ལས་ཤེས་པ་ལྟར་ན། མིག་སྐམ་ནད་པ་དང་ནད་མེད་མི་སྣའི་གློག་ཀླད་ལ་ལྟ་བའི་ཚད་དང་ཀློག་འདོན་ཚད་འདྲ་མཉམ་ཡིན་མོད། འོན་ཀྱང་མིག་སྐམ་ནད་པས་གློག་ཀླད་བཀོལ་བ་དང་ཀློག་འདོན་བྱེད་སྐབས་དྲོད་འདོན་འཕྲུལ་ཆས་བཀོལ་བ་དང་ཁང་པའི་ནང་གི་དྲོད་ཚད་མཐོ་དྲགས་པ། མཁའ་དབུགས་ལ་སྦགས་བཙོག་ཐེབས་ཡོད་པ་སོགས་ཀྱི་ཁོར་ཡུག་གི་རྒྱུ་རྐྱེན་ངན་པ་མི་ཉུང་བ་དང་འཕྲད་ཡོད་པ་དང་། རྒྱུ་རྐྱེན་དེ་དག་ནི་མིག་སྐམ་ནད་ཀྱི་འབྱུང་རྐྱེན་གཙོ་བོར་གྱུར་ཡོད་པས་མཉམ་འཇོག་བྱེད་དགོས། །
