ལོ་གསར་གྱི་གུང་གསེང་སྐབས་སུ། མི་རྣམས་ལག་ཁྱེར་ཁ་པར་གྱི་སྟེང་ནས་བརྙན་ཐུང་ལ་ལྟ་བ་དང་འཁྱུག་དབྱངས་དང་མགྱོགས་འཕྲིན་རྩེ་བ་སོགས་ཀྱི་རོལ་རྩེད་ལ་གཡེང་བས། མིག་ཟུང་སྐམ་པ་དང་མིག་ནང་དུ་ཅི་ཞིག་ཡོད་པའི་ཚོར་སྣང་འབྱུང་བ་སོགས་ཀྱི་སྣང་ཚུལ་མི་ཉུང་བ་བྱུང་ཡོད།
དོན་དངོས་སུ།ནད་རྟགས་དེ་དག་ནི་མིག་སྐམ་ནད་དང་ཡང་ན་མིག་ངལ་བའི་རྟགས་ཡིན་ལ།མིག་སྐམ་ནད་ཀྱི་འབྱུང་རྐྱེན་ནི་ཧ་ཅང་རྙོག་འཛིང་ཆེ་བ་ཞིག་ཡིན་ཏེ། མིག་ངལ་བྱུང་བ་ལས་གཞན་ད་རུང་བུད་མེད་རྣམས་ལ་མཚོན་ན་སྐུལ་རྩི་ལ་འགྱུར་ལྡོག་བྱུང་བ་དང་ཡང་འབྲེལ་བ་དམ་པོ་ཡོད།སྤྱིར་བཏང་དུ་བུད་མེད་རྣམས་ནི་ལོ40ཡན་ལ་བུད་རྗེས་ལུས་སྟེང་གི་སྐུལ་རྩི་ཇེ་ཉུང་དུ་འགྲོ་བ་དང་། དེའི་ཁར་དགུན་ཁར་ཁང་པའི་ནང་གི་མཁའ་དབུགས་སྐམ་པ་སོགས་དུས་རྒྱུན་ཁོར་ཡུག་གི་ཤུགས་རྐྱེན་འོག མིག་སྐམ་ནད་འབྱུང་ཚད་ཧ་ཅང་མཐོ། རྒན་པ་རྣམས་ལ་མིག་ལྕིབས་གཤེར་རྨེན་གྱི་བྱེད་ནུས་ལ་གེགས་རྐྱེན་ཐེབས་པ་དང་། མིག་ངོས་སྣུམ་ཚིལ་ཟགས་ཐོན་དོ་མཉམ་མིན་པ་སོགས་ཀྱི་དབང་གིས་མིག་སྐམ་ནད་བསླངས་པ་རེད།
ཚང་མར་དྲན་སྐུལ་བྱེད་རྒྱུ་ཞིག་ནི། མིག་ཟུང་སྐམ་པ་དང་མིག་ངལ་བ། མིག་ནང་དུ་ཅི་ཞིག་ཡོད་པ། སྐྲངས་གཟེར་དང་ཚ་ལམ་ལམ་བྱེད་པ་སོགས་ཀྱི་ཚོར་སྣང་འབྱུང་སྐབས་དོ་སྣང་ལེགས་པོ་བྱེད་དགོས། ནད་པས་མིག་བཀོལ་སྤྱོད་བྱེད་པར་ཚོད་འཛིན་བྱེད་དགོས་ལ། ཐག་ཉེ་ས་ནས་བརྙན་རིས་སོགས་ལ་མི་ལྟ་བར་མ་ཟད་རྒྱུན་དུ་ཚ་བཅོས་བྱེད་དགོས། གལ་ཏེ་གོང་གི་བྱེད་ཐབས་དེ་དག་སྤྱད་ནའང་ནད་རྟགས་ད་རུང་ཇེ་ཡང་དུ་མི་འགྲོ་ན། སྨན་པའི་མཛུབ་སྟོན་འོག0.1%ནས0.3%ཅན་གྱི་ཤེལ་སྐྱུར་ནཱ་སོགས་མིས་བཟོས་མིག་ཆུ་ཁ་གསབ་བྱེད་དགོས། གལ་ཏེ་མིག་གི་གཉན་ཚད་དང་བསྡོངས་ནས་མིག་ཟུང་དམར་པོར་གྱུར་པ་སོགས་ཀྱི་ནད་རྟགས་ཚབས་ཆེན་བྱུང་ན། གར་ཚད་དམའ་བའི་སྐུལ་རྩི་བཀོལ་ཏེ་མིག་ངོས་ཀྱི་རེད་མིན་རང་བཞིན་གྱི་གཉན་ཚད་ལ་ཚོད་འཛིན་བྱེད་དགོས། གོང་གི་བྱེད་ཐབས་དེ་དག་སྤྱད་ན་ནད་པ་མང་ཆེ་བའི་ནད་རྟགས་ཇེ་ཡང་དུ་འགྲོ་ངེས།།
