ཨ་སྔོན་ནམ་མཁའི་ན་བུན་དྭངས་དུས་དཀོན། །
འཚེར་འཚེར་ཉི་མའི་ཞལ་མཇལ་གོ་སྐབས་ཕྲ། །
རོང་རོང་མཁར་གྱིས་མཐོ་ཚད་འགྲན་པའི་ཚེ། །
སྒྲོ་ལྡན་འཕུར་རྩལ་ཅན་ཡང་གཤོག་རྩ་འདར། །
འཚུབ་འཚུབ་འགུལ་འཕྲུལ་འཁྱུ་དང་མི་ཚོགས་ཀྱིས། །
ས་སྟེང་འབུ་སྲིན་འགུལ་བའི་སྟོང་ཆ་ཕྲོགས། །
འ་འུར་བར་མེད་སྐད་སྒྲའི་རླབས་རྒྱུན་གྱིས། །
དབྱར་སྐྱེས་རྔ་བོ་ཆེ་ལའང་སྐྱེངས་པ་སྟེར། །
ཚོམ་ཚོམ་ས་འཛིན་སྔོ་ལྗང་གོས་ཀྱིས་བཀླུབས། །
ནང་བསྟན་གནས་རི་ཅིན་ཡུན་རི་བོ་འགྱིངས། །
རབ་རིབ་མཐོང་ལམ་གནས་དེར་ཅེར་བའི་ཚེ། །
འོད་སྲུངས་ཆེན་པོའི་བྱིན་རླབས་དཔོག་པར་རེ། །
ཚང་ཚིང་ལྗོན་ཤིང་སྐྱེ་གཟུགས་དགུང་ལ་རེག །
མཚམས་མཚམས་བྱ་བྱིའུ་གསུང་སྐད་ཀྱུ་རུ་རུ། །
ཆེ་ཆུང་འབྲས་ཤིང་ཡལ་འདབ་ཐུར་དུ་དཔྱངས། །
ཁྲུང་ཆིང་འདི་ཀོ་གཡུ་ལོ་བཀོད་པའི་ཚལ། །
ཞི་བདེའི་སྲིད་ཀྱི་དཔལ་ཡོན་ཀུན་ལ་སྙོམས། །
བཟོ་ཚོང་དཔལ་གྱི་འབྱོར་པ་ཉིན་བཞིན་རྒྱས། །
ཤེས་ཡོན་དཔལ་དང་འཕྲོད་བསྟེན་བྱ་གཞག་གིས། །
ཁྲུང་ཆིང་གསར་པའི་མངའ་ཐང་རྒྱས་པར་སྨོན། །
ལྡེམ་ལྡེམ་ཅཱ་ལིང་གཙང་པོ་འབྲི་ཆུར་འཁྲེང་། །
ཁྲ་ཆིལ་གློག་གི་རོལ་རྩེད་སྐར་མདར་འཁྲེང་། །
ནར་ནར་ལྗགས་དེ་རྒྱ་ཁོག་ཟས་ལ་འཁྲེང་། །
ཇ་ཡུན་འདུས་མི་བསིལ་མོ་ལྗོངས་ལ་འཁྲེང་། །
