ཡིད་ཀྱི་སྤང་ལྗོངས་ཐོག་ལ། །
བཞད་པའི་སྙིང་གི་མེ་ཏོག།
ཡིད་ལ་ཡོང་པའི་དབང་གིས། །
ཚེ་འདིར་འགྲོགས་ན་བསམ་བྱུང་།།
ཡ་ཆུང་ཞིང་སར་འཁྲུངས་པའི། །
དུས་བཞི་འགྱུར་མེད་མེ་ཏོག །
ཚེ་འདིར་དུངས་བའི་མེ་ཏོག །
རེ་བའི་ཀློང་ལ་འཁྲུངས་ཡོད། །
གངས་ཅན་ཁ་བའི་ཞིང་གི །
གངས་ལ་མཛེས་པའི་མེ་ཏོག །
གངས་དཀར་སེམས་སུ་འཁྲུངས་པའི། །
གངས་རིའི་མཛངས་མ་ཁྱེད་ཡིན། །
མཛའ་གྲོང་དར་རྩེ་མདོ་ནས།།
རྒྱ་བོད་འཚང་ཁ་ཤིག་ཤིག།
མཛའ་གཞས་ལྷུང་ལྷུང་གོ་དུས། །
མཛའ་མོ་མེ་ཏོག་དྲན་བྱུང་། །
ཡིད་ཀྱི་མེ་ལོང་ངོས་སུ།།
ཡིད་སེམས་རབ་དུ་མགུ་བའི།།
ཡིད་འཕྲོག་མཛེས་པའི་མེ་ཏོག།
ཡིད་འོང་གཏམ་ཞིག་ལབ་ཤོག།
སེམས་ཀྱི་མགུལ་ལ་ཐོགས་པའི། །
སེམས་ཀྱི་རིན་ཐང་ཆེན་པོ། །
སེམས་ཀྱི་གཡུ་ཆུང་དྲུག་དཀར། །
སེམས་ཀྱི་མེ་ཏོག་ཁྱེད་ཡིན། །
སེམས་ལ་འཛུལ་བའི་ཉིན་ནས། །
སེམས་ལ་སྐྱིད་ཅིག་ཆགས་སོང་། །
སེམས་ལ་བཞུགས་རོགས་གནོངས་དང་། །
སེམས་ལ་ཡོད་ཚད་ཁྱེད་ཡིན། །
སེམས་སུ་ཁྱེད་ཉིད་མངའ་བས། །
སེམས་སུ་མཛེས་པས་ཁེངས་སོང་། །
སེམས་སུ་གཏན་དུ་བཞུགས་དང་། །
སེམས་སུ་ཁྱེད་ལས་སུ་ཡོད། །
སེམས་པ་དཀར་པོའི་འཚམས་འདྲི།
ཞིམ་མངར་ལྡན་པའི་འོ་ཇ། །
འགྱུར་བ་མེད་པའི་དུངས་བ། །
མེ་ཏོག་ཁྱེད་ལ་འཚམ་པ། །
ཆུང་འདྲིས་སེམས་ཀྱི་མེ་ཏོག །
དེ་རིང་ཐེངས་གཅིག་མཇལ་བས།།
ཚིག་གསུམ་བཤད་ནི་བསམས་རུང་།།
འཚུབ་ནས་བཤད་ནི་མ་ཕོད།།
སྙིང་གཏམ་མར་དཀར་རིལ་བུ།།
ཡིག་ཆུང་བྲིས་ནས་མཚོན་ཡོང་།།
བརྩེ་བ་ཁྱེད་ལ་བྱིན་པས།།
སེམས་པ་ང་ལ་གནང་རོགས། །
བརྩེ་སེམས་འདྲེས་པའི་ཉིང་ཁུ།།
དྲན་པའི་ཀློང་ལ་བསྙལ་ཡོད།།
རྨི་ལམ་ནང་ནས་དྲན་པ།།
སྨོན་ལམ་ཚིག་ལ་བཏབ་ཡོད། །
