མཛེས་སེ།
འཇིག་རྟེན་འདི།
ང་རང་ཁྱོད་ལ་འཁྲེང་བའི་ཞེ་འདང་དེ་ཨེ་རེད།
ཐག་རིང་གི་མཁའ་མཐའ་ན་ཆགས་པའི།
ཡིད་སེམས་སྨྲེང་བྱེད་ཀྱི་སྤྲིན་པ་དེ་ཁྱོད་ཡིན་ནམ།
མཛེས་སེ།
སྟོད་རྒྱུད་ཀྱི་གཙང་གསུམ་མགོ་ཁུངས་སུ།
ཆར་ཆེན་འབབ་ཀྱིན་འདུག་གམ།
ནང་དགོང་གཉིས་ཀར།
འབྲི་མོ་གཡུང་ལ་འབེབ་མཁན་གྱི།
བཞོན་མ་གླུ་བ་དེ་ཁྱོད་ཡིན་ནམ།
མཛེས་སེ།
ཆར་ཞོད་ཆེ་བའི་དུས་སུ།
ཁྱོད་ཀྱིས་འབྲི་མོ་འཇོ་དགོས་སམ།
མཛེས་སེ།
ཇོ་ཇོ་རི་ལ་བཞུད་ཀྱང་།
སེམས་གཏམ་སྙིང་ལ་ཉར་མཁན་དེ་ཁྱོད་རང་ཡིན།
མཛེས་སེ།
ཁྱོད་ཉིད་མཐོ་སྒང་ན་གཤར་བའི།
རི་དྭགས་ཁྱུ་གཅིག་གི་རྗེས་ན་ཡོད་དམ།
མཛེས་སེ།
ནམ་ཞིག་ང་རང་འཇིག་རྟེན་འདི་ནས།
ཁྱོད་ལ་འཕྲད་ཀྱང་སྲིད་སྙམ་ནས།
ངས་ཅི་ནུས་ཀྱིས་རང་ཉིད་འཚོ་ཐབས་བྱས་མོད།
ཁྱོད་ནི་དྭངས་གཙང་གི་བདེན་པ་མཚོན་པའི།
ཚེ་སྲོག་སྐད་ཅིག་ཐ་མ་དེ་རེད་པས།
ད་ལྟ་སྨོན་ལམ་གཙང་མ་ཙམ་ལས་ཅི་ཡང་མེད།
མཛེས་སེ།
འདི་ལྟར་བསམ་དུས།
ང་རང་འཚོ་བ་ལ་རེ་ཐག་གཏིང་ནས་ཆད་འགྲོ།
འཇིག་རྟེན་གྱི་སྣང་བའི།
འཇའ་ཚོན་ཞིག་ལ་མཛེས་སེ་ཟེར།
གངས་ལྗོངས་ཀྱི་ཉི་འོད་ནང་དུ་བཞད་པའི།
མེ་ཏོག་ཅིག་ལ་མཛེས་སེ་ཟེར།
མཐོ་སྒང་གི་རི་ལུང་ན་ལང་ལོང་འཕྱུར་བའི།
སྨུག་པ་དེ་ལ་མཛེས་སེ་ཟེར།
མཛེས་སེ། མཛེས་སེ། མཛེས་སེ།
