གལ་ཏེ། ཁྱོད་རང་སང་ཉིན་ཏན་ཏན་འགྲོ་དགོས་ཚེ།
ངས་བརྩེ་གདུང་དང་མིག་ཆུ་ཡུག་གཅིག་ཏུ་བསྲེས་ནས།
ཁྱོད་ལ་རྟེན་དུ་ཉར་ཆོག་པའི་ལེགས་སྐྱེས་ཤིག་འཚོལ་དགོས།
རི་རབ་ཀྱི་མགུལ་དུ་འཁྲིགས་པའི་སྨུག་པ་དང་།
སྤྲིན་གྱི་ཟ་ཟུར་ནས་བརྡོལ་བའི་ཆར་ཐིགས་རེ་རེས།
ངས་ཁྱོད་ལ་རལ་དུ་མེད་པའི་ལྭ་བ་ཞིག་བཟོ་དགོས།
ནམ་མཁའ་སྟོང་བ་འདིའི་འོག་ཏུ།
རི་བོ་མཐོན་པོ་དེའི་ཕར་ནང་དུ།
དྲོད་དང་སེམས་པས་གཉོར་བའི་མེ་ཏོག་ཅིག་གདབ་དགོས།
གལ་ཏེ། ཁྱོད་རང་སང་ཉིན་འགྲོ་དགོས་པའི་དབང་དུ་བཏང་ན།
ངས་རང་གི་སེམས་པ་སྙི་མོ་འདི་དང་མིག་ཆུ་འཛད་མེད་དེས།
ཚིག་དང་ཐ་སྙད་ཀྱིས་མཚོན་མི་ཐུབ་པ་དེ་དག་ཀྱང་རྫོགས་པར་ཞུ་ན་བསམ།
