རི་སྐེད་ལང་ལོང་དུ་འཁྲིག་པའི།།
སྨུག་ཆུང་སྲིན་བལ་གྱི་འདབ་མ།།
འདུར་མ་འདུར་རྒྱུག་གིས་བྲེལ་དེ།།
ས་ཆ་ག་ཤེད་ལ་བཞུད་འགྲོ།།
བྲེལ་བྲེལ་འཚུབ་ཀྱི་གོམ་འགྲོས།།
དལ་དལ་ལྷོད་ལྷོད་དུ་ཕོབ་ལ།།
མ་གསང་ཚིག་གསུམ་གྱི་དྲན་གདུང་།།
རྒྱང་རིང་བྱམས་པ་ལ་སྐྱེལ་རོགས།།
ཆུ་ཆེན་ཆུ་ཆུང་གི་འདུས་མདོ།།
རི་གདང་རི་རྒྱུད་ཀྱི་སྣེ་མོ།།
ཁམས་པ་དར་རྩེ་ཡི་མདོ་ནས།།
ང་ཡིས་བརྩེ་འཕྲིན་འདི་ཤོར་བྱུང་།།
སྐྱ་རེངས་ནམ་མཐའ་ནས་བཏེགས་ཏེ།།
མཚམས་སྤྲིན་དམར་སེར་གྱི་མཐིལ་ལ།།
ཉིན་བྱེད་མེ་ཕུང་བཞིན་བསྒྲོན་དུས།།
ཡིད་ལ་སྙིང་ཉེ་ཁྱེད་འཕོས་བྱུང་།།
ཤེས་རིག་འོ་མངར་ལ་རོལ་བའི།།
བློ་ལྡན་ངང་ཆུང་གི་ཁྱུ་ཚོགས།།
གནས་བཅུའི་སློབ་གཉེར་ལ་བརྩོན་ཚེ།།
ཁྱེད་ཀྱང་ཡོད་ན་རེ་སྙམ་སོང་།།
བརྒྱད་ཉིས་བཅུ་དྲུག་གི་ལང་ཚོས།།
སྙེམས་པའི་ན་ཆུང་གི་ཉམས་འགྱུར།།
ལྡེམ་མྱུར་གར་སྟབས་ལ་བསྒྱུར་ཚེ།།
ཁྱེད་ཀྱི་མཛེས་དཔལ་དེ་དྲན་བྱུང་།།
ས་སྲོད་སྨག་རུམ་གྱི་གསང་བ།།
གློག་འོད་ཁྲ་ཆིལ་གྱིས་གཏོར་དུས།།
རྒྱང་རིང་གྲོང་ཁྱེར་གྱི་གློག་འོད།།
འདི་གར་འཕྲོས་ན་རེ་སྙམ་བྱུང་།།
ལྷོད་ཆགས་དགུང་སྔོན་གྱི་དཀྱིལ་འཁོར།།
སྐར་ཚོམས་ཕྲ་རྒྱན་གྱིས་བཏབ་སྟེ།།
མི་འཇིགས་སྟོང་དབྱིངས་ཀྱི་ཁྲི་ལ།།
འཁྱུད་པའི་ཟླ་དཀར་ལ་ཁྱེད་མཐོང་།།
གློ་བུར་ཁྱེད་སྙིམ་ཀྱི་སྙིང་ལ།།
ཁོ་བོ་བྱེའུ་ཕྲུག་བཞིན་ལྷུང་ནས།།
ཁྱེད་ཞལ་དྲོད་རླངས་ཀྱིས་དྲོས་ན།།
སྙམ་པའི་བྱིས་བློ་དེ་འཁྲུལ་འདུག །
ལྗོན་ཤིང་ཡལ་འདབ་ཀྱི་བྱེའུའི།།
གཤོག་སྒྲ་ཐོས་འཛིན་ལ་བརྒྱུད་དུས།།
གཤོག་ཆུང་ང་རང་ལ་ཡོད་ན།།
ཁྱེད་ཕྱོགས་འཕུར་ཆོག་ཨང་སྙམ་བྱུང་།།
དུས་བཞིའི་བཅོས་མིན་གྱི་རང་མདངས།།
སྐད་ཅིག་སྐད་ཅིག་ལ་འགྱུར་ཡང་།།
ཁྱེད་རང་ཐོབ་འདོད་ཀྱི་འདུན་མ།།
ཚེ་འདིར་འགྱུར་བ་རང་མི་འདུག །
སྨོན་ལམ་ལྷ་ཚོགས་ལ་བྱས་ཡོད།།
སྐྱབས་འཇུག་རང་སེམས་་ལ་ཞུས་ཡོད།།
སྐལ་བ་གྲངས་མེད་ཀྱི་གཏན་གྲོགས།།
ཁྱེད་རང་ཡིན་ན་རེ་དགའ་བ།།
