རྒྱང་ལ་ཤོར་འགྲོ་བ་ནི།
དུས་ཚོད་ཀྱིས་རྨས་པའི་ལོ་ཟླ་དག་མ་རེད།
སེམས་པའི་རྙི་ནས་བོར་སོང་བའི།
ལན་ཆགས་ཀྱི་གྲིབ་མ་དག་ཀྱང་ག་ལ་ཡིན།
མཚན་མོ་རེ་རེར།
སྔར་བཞིན་ལྷིང་འཇགས་ཀྱིས་སིམ་ན་ཡང་།
ད་དུང་ཅི་ཞིག་ལ།
སེམས་ཀྱི་གཏིང་ཞིག་ནས་འཚུབ་ཆ་ཞིག་ལངས་འོང་།
ལོ་ཟླ་དུས་ཀྱིས་བསྲེགས་པ་ནི།
སེམས་ཀྱིས་ཟིན་ཐབས་བྲལ་ན་ཡང་།
ངའི་མིག་མདུན་ན་ལྷག་པའི་དངོས་པོ་དག
རླུང་འཚུབ་དྲག་པོ་ཞིག་ལྡང་བ་བཞིན།
གཅིག་རྗེས་གཉིས་མཐུད་དུ།
རེ་རེ་བཞིན་གང་ཞིག་ཏུ་ཁྱེར་སོང་།
དོན་དམ་དུ།
ང་ཚོ་ལའང་རྒྱང་རིང་ཞེས་པའི།
ཕྱིར་ལྡོག་དཀའ་བའི་གྲུ་ལོག་ཅིག་ཡོད་དམ།
ཅིའི་ཕྱིར། གནས་དེར་ང་ཚོ་ཁེར་རྐྱང་དུ་འགྲོ་དགོས་པ་རེད།
འཁོར་བའི་འདུ་ལོང་།
སྐབས་རེར། ལྷིང་འཇགས་ནི་བདེ་སྐྱིད་ཅིག་ཏུ་སྒོམ་ཆོག་ན་ཡང་།
བདེ་སྐྱིད་དེ་ནི་ཆེས་ཡུན་ཐུང་ཙམ་ཞིག་སྟེ།
ཧ་ཅང་འགྲོས་མྱུར་བའི་དུས་ཚོད་ཀྱི་བཞུད་སྟངས་ཤིག་རེད།
ང་ཚོས་རང་རང་གི་ལུས་ཕུང་འདིས་ཅི་ཡང་ཐེག་མི་ནུས་ན་ཡང་།
སྐྱོ་གདུང་གི་མུན་པ་རིགས་ཤིག་དྲན་པའི་སྣེ་རུ་བསྣོལ་ཡོང་བ།
སེམས་པས་མ་ཐེག་པར།
འགའ་ཤས་ཀྱིས་སྐྱོ་བའི་མིག་ཆུ་མཚམས་མེད་དུ་གཏོང་གིན།
རང་རང་གི་གྲིབ་མའི་གམ་དུ།
སྡུག་བསྔལ་མ་ལུས་ཡོངས་སུ་བསྐུངས་འདུག
ཉི་མ་ཚ་མོ་མགོ་ཐོག་ནས་འོད་ལམ་ལམ་དུ་འཕྲོས།
མྱི་ངན་གྱི་གདུང་བ་འཕྱུར་བའི་ཁ་དོག་ནག་པོ་དག
མིག་ལམ་དུ་ཡང་ནས་བསྐྱར་དུ་ངོམ།
འཁྱག་སྣང་ཞིག་བསྐྱེད་ཡོང་བའི་བསིལ་རླུང་ཕྲན་བུ་དེ་ཡང་།
སེམས་པའི་ཕྱི་ནང་མེད་པར་ལྷག་མེད་དུ་ལྡང་།
དུས་ཚོད་ཀྱི་ཐ་གུ་སོ་སོའི་སེམས་སུ་འཐེན་ཡོད་ནའང་།
རྨོངས་བའི་གཟེབ་ནང་ནས་མགོ་འཁོར་སྟེ།
ཆེས་མུན་ནག་དང་ཐག་ཉེ་བའི་ང་ཚོས།
གཏོས་ཆེ་བའི་ལེ་ལོའི་ཁུར་བོ་ལྕི་མོ་དག
ཚེ་གང་བོར་རྒྱབ་ནས་ཐང་ཙམ་ལའང་གཡུགས་མ་ཐུབ།
གློ་བུར་དུ་ངག་གི་རྒྱུན་ཐག་ཆད་སོང་བ།
དེ་རིང་ཁོ་ན་མ་རེད།
ང་ཚོ་་ཡིས།
རང་ཉིད་སུ་ཞིག་ཡིན་པའང་འགྲེལ་བཤད་ཤེས་ཀྱིན་མི་འདུག
འགྱུར་ལྡོག་ཆེ་བའི་སེམས་པ་ལ་ཡང་།
ད་ནི་སོ་སོས་གཟབ་ནན་གྱིས་སེམས་ཆུང་དགོས་འདུག
རང་གིས་སེམས་པ་འདིས་ཀྱང་རང་ཉིད་བསླུས་པ་གྲངས་མེད།
