2022ལོའི་ཟླ་7ཚེས་1ཉིན་གྱི་སྔ་དྲོའི་ཆུ་ཚོད་9པར། སི་ཁྲོན་དགེ་འོས་སློབ་ཆེན་གྱིས་གཙོ་གཉེར་བྱེད་པ་དང་། སི་ཁྲོན་དགེ་འོས་སློབ་ཆེན་ཞབས་བྲོ་སློབ་གླིང་གིས་སྒྲུབ་འགན་འཁུར་བའི་2020ལོའི་ལོ་འཁོར་གྱི་རྒྱལ་ཁབ་སྒྱུ་རྩལ་ཐེབས་རྩའི་རོགས་དངུལ་རྣམ་གྲངས་ཏེ་བོད་རིགས་དང་། ཆའང་རིགས། དབྱིས་རིགས་བཅས་ཀྱི་མི་རིགས་ཀྱི་རྔ་བྲོ་འཁྲབ་སྟོན་ཤེས་ལྡན་པ་གསོ་སྐྱོང་བྱེད་པ་ཞེས་པའི་སློབ་འགོ་ཚུགས་པའི་མཛད་སྒོ་དེ་ཁྲེང་ཏུའུ་ནས་དངོས་སུ་སྤེལ་བ་རེད། རྣམ་གྲངས་དེ་ནི་རྒྱལ་ཁབ་སྒྱུ་རྩལ་ཐེབས་རྩས་རོགས་སྐྱོར་བྱས་པ་དང་། སི་ཁྲོན་དགེ་འོས་སློབ་ཆེན་ཞབས་བྲོ་སློབ་གླིང་གི་དགེ་རྒན་ཆེ་མོ་བ་གཞོན་པ་བཀྲ་ཤིས་ཚེ་རིང་གིས་རྣམ་གྲངས་ཀྱི་འགན་འཁུར་བ་རེད། 

         ད་ཐེངས་ཀྱི་གསོ་སྐྱོང་འཛིན་གྲྭའི་སློབ་འགོ་ཚུགས་པའི་མཛད་སྒོ་རུ། སི་ཁྲོན་དགེ་འོས་སློབ་ཆེན་གྱི་རིམ་པ་ཁག་གི་དབུ་ཁྲིད་དང་དགེ་རྒན་འཐུས་ཚབ། དེ་མིན། སི་ཁྲོན་ཞིང་ཆེན་ཞབས་བྲོའི་མཁས་ཅན་མཐུན་ཚོགས་དང་། བོད་ལྗོངས་སློབ་ཆེན། སི་ཁྲོན་སློབ་ཆེན་སོགས་ཀྱི་དགེ་རྒན་སྐུ་མགྲོན་ཁག་ཅིག་དང་དེ་བཞིན་རྒྱལ་ཡོངས་ས་གནས་ཁག་ནས་ཡོང་བའི་སློབ་མ་30བཅས་ཞུགས་ཡོད་པ་རེད།

 

         ཤེས་རྟོགས་བྱུང་བར་གཞིགས་ན། བོད་རིགས་དང་། ཆའང་རིགས། དབྱིས་རིགས་བཅས་ཀྱི་མི་རིགས་ཀྱི་རྔ་བྲོ་འཁྲབ་སྟོན་ཤེས་ལྡན་པ་གསོ་སྐྱོང་བྱེད་པའི་རྣམ་གྲངས་གསོ་སྦྱོང་གི་དུས་ཡུན་ནི་2022ལོའི་ཟླ་7པ་ནས་ཟླ་8པ་བར་ཡིན་པ་དང་། གསོ་སྦྱོང་ཁྱོན་ཉིན་50ཡིན་པ།  ཕན་ཀྲི་ཧྭ་དང་ཝུན་ཁྲོན་སོགས་སུ་བསྐྱོད་དེ་དམངས་གཞས་འཚོལ་བསྡུ་ལག་ལེན་བྱ་རྒྱུ་ཡིན་པར་མ་ཟད། 2022ལོའི་ཟླ་8ཚེས་19ཉིན་སི་ཁྲོན་དགེ་འོས་སློབ་ཆེན་ལུང་ཧུའུ་ཟློས་གར་ཁང་དུ་གྲུབ་འབྲས་འཁྲབ་སྟོན་བྱ་རྒྱུ་ཡིན་པ་རེད།