“རི་སྔོ་ཆུ་དྭངས་ནི་གསེར་རི་དངུལ་རི་ཡིན་ལ་གངས་རི་འཁྱག་རོམ་ཀྱང་གསེར་རི་དངུལ་རི་ཡིན།”ཁོར་ཡུག་སྲུང་སྐྱོང་ནི་དམངས་འཚོ་ཡིན་པའི་ཁོར་སྲུང་གི་ཤེས་བྱ་ཁྱབ་གདལ་དང་ཁོར་སྲུང་འདུ་ཤེས་ཇེ་དྲག་ཏུ་སོང་བ་དང་བསྟུན་ནས་ས་ཁོངས་ཡོངས་སུ་གད་སྙིགས་མེད་པར་བཟོ་དཀའ་བའི་གནད་དོན་གཞིར་བཟུང་ནས་སེར་ཤུལ་རྫོང་ཀ་བཞི་ཡུལ་ཤོག་ཏང་ཨུ་སྲིད་གཞུང་གིས་ཞིབ་འཇུག་བྱས་པ་བརྒྱུད། མཚོ་སྔོན་ཞིང་ཆེན་སྒྲུབ་རྒྱུད་གྲོང་རྡལ་ཏང་ཨུ་སྲིད་གཞུང་དང་མཉམ་འབྲེལ་གྱིས་ཀ་བཞི་ཡུལ་ཤོག་གནམ་མཐའི་འབྲོག་ར་རུ་གད་སྙིགས་ཚུར་བསྡུའི་ས་ཚིགས་བསྐྲུན་རྒྱུའི་གཏན་འབེབས་བྱས་པ་རེད། ཟླ7ཚེས23ཉིན་སེར་ཤུལ་རྫོང་ཀ་བཞི་ཡུལ་ཤོག་གིས་གནམ་མཐའི་འབྲོག་རར་གད་སྙིགས་ཚུར་བསྡུའི་ས་ཚིགས་འཛུགས་པའི་མཛད་སྒོ་སྤེལ་བ་དང་། རྫོང་སྲིད་གྲོས་ཀྱི་ཏང་ཙུའི་ཁོངས་མི་ཀྲུའུ་ཞི་གཞོན་པ་ཉི་མ་རྒྱལ་མཚན་དང་། རྫོང་སྤྱི་ཁྱབ་བཟོ་ཚོགས། གུང་གཞོན་ཚོགས་པ་རྫོང་ཨུ། རྫོང་བུད་མེད་མཉམ་འབྲེལ་ལྷན་ཚོགས། རྫོང་སྡོད་ཁང་འཛུགས་སྐྲུན་ཅུས། རྫོང་ཁྲོམ་རའི་ལྟ་སྐུལ་དོ་དམ་ཅུས་སོགས་ཀྱི་འབྲེལ་ཡོད་འགན་འཁུར་བ་མཛད་སྒོར་ཞུགས་པ་རེད། མཛད་སྒོའི་ཐོག་སེར་ཤུལ་རྫོང་ཀ་བཞི་ཡུལ་ཤོག་ཏང་ཨུ་སྲིད་གཞུང་གིས་སྙིགས་འཁོར་དང་ཁོར་ཡུག་གཙང་སྦྲ་བྱེད་མཁན་མི156གནམ་མཐའི་འབྲོག་རའི་གད་སྙིགས་ཚུར་བསྡུའི་ས་ཚུགས་སུ་བསྐྱལ་ནས། སྲིད་འཛིན་གྲོང་ཚོ་ཁག་གི་འཁོར་སྐྱོད་མ་དངུལ་སྒོར་ཁྲི2མཁའ་མཐའི་འབྲོག་རའི་གད་སྙིགས་ཚུར་བསྡུའི་ས་ཚུགས་སུ་སྤྲད་རྒྱུ་དང་། སླད་ཕྱིན་གྱི་དོ་དམ་དང་འཁོར་སྐྱོད་ལམ་སྲོལ་ཚང་མ་གད་སྙིགས་ཚུར་བསྡུ་ས་ཚུགས་ཀྱིས་འགན་འཁུར་རྒྱུ་དང་། ལས་འཁྱུར་ངལ་གསོ་རྒྱག་མཁན་ལས་བྱེད་པ་ངག་ཐུབ་དང་ཤེར་སྟོབས་ཀྱིས་དུས་རྒྱུན་གྱི་དོ་དམ་ལས་དོན་བསྒྲུབ་རྒྱུ་རེད། དེ་དང་ཆབས་ཅིག་སེར་ཤུལ་རྫོང་ཀ་བཞི་ཡུལ་ཤོག་གིས་བཅོས་བསྒྱུར་གསར་གཏོད་མཐའ་འཁྱོངས་དང་། ཉེ་འགྲམ་ཡུལ་ཤོག་དང་མཉམ་འགུལ་ལ་མཐོང་ཆེན། གཞི་རིམ་བཅོས་སྐྱོང་ལ་ཤུགས་སྣོན། ཁྲོམ་རའི་ནུས་པ་འདོན་སྤེལ། དམངས་ཡོངས་དེའི་ནང་ཞུགས་རྒྱུར་ཁྲིད་སྟོན་བྱས་པ་རེད།
ཤེས་རྟོགས་བྱུང་བ་ལྟར་ན། ས་ཚུགས་འདི་ནི་སེར་ཤུལ་རྫོང་གི་གད་སྙིགས་ཕྱིར་བསྡུའི་ས་ཚུགས་ཐོག་མ་ཡིན། གད་སྙིགས་རིགས་དབྱེ་ནས་གཙང་སེལ་བྱེད་པའི་ཐག་གཅོད་ས་ཚུགས་ཀྱང་ཡིན། གོམ་སྟབས་རྗེས་མར་སེར་ཤུལ་རྫོང་ཀ་བཞི་ཡུལ་ཤོག་གིས་རྨང་གཞི་དེའི་ཐོག་ཉམས་མྱོང་ཕྱོགས་བསྡོམས་དང་མུ་མཐུད་འབད་བརྩོན་བྱས་ཏེ། དེ་ལས་མང་བའི་གད་སྙིགས་ས་ཚུགས་མང་པོ་བསྐྲུན་ནས་ཕ་ཡུལ་དུ་སྐྱེ་ཁམས་དོ་སྙོམས་ཀྱི་མཛེས་སྡུག་བསྐྲུན་རྒྱུ་རེད།
