ཟླ8པའི་ཚེས3ཉིན། ཐུན་མོང་མ་ཡིན་པའི་གཡག་ཁ་འདུལ་བའི་འགྲན་བསྡུར་སི་ཁྲོན་ཞིང་ཆེན་རྔ་བ་བོད་རིགས་ཆའང་རིགས་རང་སྐྱོང་ཁུལ་ཧུང་ཡོན་རྫོང་དུ་སྤེལ་ཞིང་། དེ་ནི་ས་གནས་ཀྱིས་ཧུང་ཡོན་རྩྭ་ཐང་ཆེན་མོའི་ཐུན་མོང་མ་ཡིན་པའི་གཡག་གི་རིག་གནས་ཕུན་སུམ་ཇེ་ཚོགས་སུ་གཏོང་བ་དང་། ཞིང་འབྲོག་མང་ཚོགས་ཀྱི་གདོད་མའི་རྣམ་པའི་ཐོན་སྐྱེད་དང་འཚོ་བ་རོལ་སྟངས་མངོན་པའི་ཆེད་དུ་གཉེར་བའི་རིག་གནས་ལུས་རྩལ་གྱི་བྱ་འགུལ་ཞིག་རེད།
ཧུང་ཡོན་གྱི་གཡག་ཁ་འདུལ་བའི་འགྲན་བསྡུར་དེ་རྒྱལ་ཡོངས་དང་ཐ་ན་འཛམ་གླིང་དུའང་དམིགས་བསལ་ཅན་ཞིག་ཡིན་ལ། བཏུལ་བྱའི་གཡག་ཚང་མ་སི་ཁྲོན་ནུབ་རྒྱུད་ཀྱི་མཐོ་སྒང་གི་རྔམ་བརྗིད་ལྡན་པའི་རྨེ་བའི་གཡག་ཡིན། ཉིན་དེར། ཧུང་ཡོན་རྫོང་གི་ཤང་དང་གྲོང་རྡལ་སོ་སོ་ནས་ཡོང་བའི་འབྲོག་པ་གཡག་རྩལ་ཅན་རྣམས་ཀྱིས་ཨང་གྲངས་ལྟར་རིམ་བཞིན་གཡག་ར་ནང་དུ་ཡོང་ནས། ལྟ་སྐུལ་མི་སྣ་དང་ཡུལ་དངོས་ལས་དོན་མི་སྣའི་རམ་འདེགས་འོག གཡག་རེ་བཟུང་ནས་འགྲན་བསྡུར་ནང་ཞུགས་པ་རེད། སུས་ཀྱང་ཞོན་མྱོང་མེད་པའི་གཡག་དེ་དག་གི་སྟེང་དུ་སྒལ་དང་ཡོབ་གང་ཡང་མེད་ལ། གཡག་རྩལ་ཅན་རྣམས་སྐྱ་ཐེར་ཐེར་གྱི་གཡག་ལ་ཞོན་ཏེ། གཡོན་ལག་གིས་གཡག་གི་མཇིང་པར་འཇུས་པ་དང་། གཡས་ལག་ནི་གཡག་གི་རྔ་མར་འཇུས་ཞིང་། རྐང་པ་གཉིས་ཀྱིས་གཡག་གི་ལུས་ལ་དམ་པོར་འབྱར་ནས་གཡག་རྩལ་ངོམ་པ་ཡིན།
རྨེ་བའི་གཡག་ནི་གཙོ་བོ་སི་ཁྲོན་ནུབ་བྱང་རྒྱུད་ཀྱི་མཐོ་སྒང་གི་ཧུང་ཡོན་རྩྭ་ཐང་ཆེན་མོ་རུ་འཚོ་སྡོད་བྱེད་བཞིན་ཡོད་པ་དང་། དེ་ནི་རང་རྒྱལ་གྱི་རྩྭ་ཐང་གི་འབྲོག་ས་གཙོ་བོ་ཡིན་པའི་ཆ་ནས། ནུབ་བྱང་རྒྱུད་ཀྱི་མཐོ་སྒང་དུ་ཕྲ་རྒྱན་པའི་གཡུ་མདོག་གི་མཚོ་མོ་ཞིག་དང་གཉིས་སུ་མ་མཆིས། རི་ཚོགས་ཀུན་གྱིས་གཡོགས་པའི་ཡངས་ཤིང་རྒྱ་ཆེ་བའི་རྩྭ་ཐང་དུ་གཙང་ཆུ་ལྷུང་ལྷུང་དུ་འབབ་བཞིན་ཡོད་ལ། གནས་དེ་ནི་རྨ་ཆུའི་སྟོད་རྒྱུད་ཀྱི་ཆུ་ཁུངས་གསོ་སྐྱོང་ཁུལ་གཙོ་བོ་དང་སྐྱེ་ཁམས་བྱེད་ནུས་ཁུལ་ཡང་ཡིན།
ཉེ་བའི་ལོ་འགའི་རིང་། སི་ཁྲོན་ནུབ་བྱང་རྒྱུད་ཀྱི་མཐོ་སྒང་རྩྭ་ཐང་གི་རྫོང་སོ་སོས་གཡག་གི་ཐོན་ལས་འཕེལ་རྒྱས་ལ་མཐོང་ཆེན་དང་གཡག་གི་རིག་གནས་ལ་རྒྱུན་འཛིན་དང་སྲུང་སྐྱོང་གང་ལེགས་བྱས་ནས། ཧུར་ཐག་གིས“སྦྲ་གུར་ཡུལ་སྐོར”དང“འབྲོག་པའི་འཚོ་བ་ཉམས་ལེན”སོགས་ཀྱི་གཡག་གི་རིག་གནས་ལྟེ་བར་འཛིན་པའི་ཡུལ་སྐོར་རྣམ་གྲངས་བཏོད་པ་དང་། གཡག་གི་ཐོན་ལས་དམ་པོར་འཛིན་པ་དང་ཆབས་ཅིག་ཏུ་གཡག་གི་རིག་གནས་སྔོག་འདོན་དང་རྒྱུན་འཛིན་སྲུང་སྐྱོང་བྱས་ཏེ། ས་གནས་ཀྱི་འབྲོག་སའི་སླར་གསོ་དང་། འབྲོག་ས་དར་སྤེལ་གྱི་སྣེ་ཁྲིད་དེ་ཞིང་འབྲོག་མང་ཚོགས་འབབ་འཕར་ཡོང་བར་སྐུལ་ཁྲིད་བྱས་པ་མ་ཟད། སྐྱིད་སྣང་མངོན་གསལ་གྱིས་མཐོ་རུ་ཕྱིན་པ་རེད། །
