ལྗོན་པ་རིད་པོའི་རྩ་བར་འོ་མ་སྐྱོགས་གང་བླུགས། །
འོ་མའི་མངར་ཁར་འགྲོགས་ཏེ་ཁྱོད་ཀྱི་སེམས་ནང་ཞུགས། །
ལྗོན་པ་ཡལ་འདབ་རྒྱས་ཏེ་རྩེ་མོ་འཆི་བར་འཕྲད། །
འཆི་བདག་གདོང་ཞལ་བརྗེད་ཕྱིར་བར་དབྲག་ཡོལ་བས་བཅད། །
བྱ་སྤུ་གཅིག་གིས་སྒུལ་སྒུལ་བྱས་པས་ཀྱང་། །
ང་ཡི་མི་ཚེ་མཚོ་ནང་ཁང་པ་བཞིན་དུ་མཁའ་ལ་འཕྱོ། །
ངུ་སྐད་གཅིག་གིས་ལན་འགར་གཙགས་པས་ཀྱང་། །
ང་ཡི་མི་ཚེ་སྨིག་རྒྱུའི་གཙང་པོ་བཞིན་དུ་ཡོམ་ཡོམ་གཡོ། །
མགོ་གཅིག་གདོང་པ་གཉིས་ཀྱིས་ཁེབས་པའི་འཇིག་རྟེན་པ། །
གོམ་སྟབས་གྱ་གྱུས་རང་ལ་འཆིང་ཐག་སླེ་བའི་འགྲུལ་བཞུད་པ། །
ཇི་ལྟར་སོང་ཡང་འདོད་པས་དེ་ལྟར་གཟིར་བའི་ནད་རོ་མ། །
ང་ལ་འཐམས་ཤིང་གཞན་ཡང་གཏོང་བར་མི་བྱེད་ཆོ་འཕྲུལ་མ། །
སེམས་ནང་དགོན་པ་མེད་ན་དགོན་པར་མཇལ་བ་ཐན། །
མུན་པ་རྒྱ་ཡན་གཏོང་ན་འོད་རྗེས་འདེད་པ་ཐན། །
ཐན་ལྟས་གྲོགས་སུ་ཁྱེར་ནས་རྫིག་རྫིག་འགྱིང་བ་ང་། །
སྡིག་པའི་ཞྭ་མོ་གྱོན་ཏེ་ཀྲོག་ཀྲོག་འགྲོ་བ་ང་། །
སྒོ་རའི་ནང་ལ་ཁ་བ་དཀར་ནག་རེས་སུ་འབབ། །
སེམས་ཀྱི་ནང་ལ་གསེར་དང་ས་རྡུལ་མཉམ་དུ་སྤུངས།
འཇིགས་རུང་སྒོ་མོ་སྔར་ནས་བརྒྱབ་པ་གཏན་དུ་བརྒྱབ། །
དཀྱིལ་འཁོར་དབུས་ལ་བདུད་ཀྱི་ཁྱེའུ་གསར་དུ་འཁྲུངས། །
འཇིག་རྟེན་བྱེད་པོའི་ལག་པའི་ནང་། །
ཕྱིན་ཅི་ལོག་པའི་གནས་ལུགས་མང་། །
འགས་གཏོར་ཆེན་པོ་བྱུང་བའི་མཐུས། །
ཆོས་ཉིད་གསར་པའི་མྱུ་གུ་འབུས། །
དེ་ཕྱིར་ཁྱོད་དང་ངའམ་ཁོ་སོགས་ཅི་ཡང་མིན། །
ལག་ནང་བདེན་པ་དག་ཀྱང་གཞན་ལ་དགོས་ན་སྦྱིན། །
དོན་དམ་སྟོང་པ་ཉིད་ཀྱི་ཉེ་སར་སླེབས་པ་དང་། །
ཚེ་གཅིག་བཙལ་བའི་དོན་རྣམས་སོ་སོའི་དབྱིངས་སུ་དེངས། །
2020/11/12རྨ་ཆུ།
