ཞི་ཅིན་ཕིང་གིས་དབུས་ཨ་ཧྥེ་རི་ཁར་རོགས་སྐྱོར་བྱེད་མཁན་གྱི་ཀྲུང་གོའི་སྨན་བཅོས་རུ་ཁག་གི་རུ་མིར་འཕྲིན་ལན་སྤྲིངས་ནས།

བྱམས་སེམས་དང་བྱང་ཆུབ་པའི་ལག་རྩལ་ལ་བརྟེན་ནས་ས་གནས་དེ་གའི་མི་དམངས་ལ་བདེ་སྐྱིད་བསྐྲུན་པ་དང་། བྱ་སྤྱོད་དངོས་ལ་བརྟེན་ནས་ཀྲུང་གོའི་གཏམ་རྒྱུད་ཡག་པོ་ཤོད་དགོས་པའི་སྐུལ་ལྕག་གནང་བ།

        ཤིན་ཧྭ་གསར་འགྱུར་ཁང་པེ་ཅིང་ནས་ཟླ་2ཚེས་10ཉིན་གློག་འཕྲིན་འབྱོར་གསལ། ཟླ་2ཚེས་9ཉིན་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གིས་དབུས་ཨ་ཧྥེ་རི་ཁ་སྤྱི་མཐུན་རྒྱལ་ཁབ་ལ་རོགས་སྐྱོར་བྱེད་མཁན་ཀྲུང་གོའི་སྨན་བཅོས་རུ་ཁག་ཁག་19པའི་རུ་མིར་འཕྲིན་ལན་སྤྲིངས་ནས་ཁོང་ཚོ་དང་དེ་བཞིན་ཕྱི་རྒྱལ་ལ་རོགས་སྐྱོར་བྱེད་མཁན་གྱི་རྒྱ་ཆེའི་སྨན་བཅོས་རུ་མིར་འཚམས་འདྲི་གནང་བ་དང་འབྲེལ་ཐུགས་རེ་ཟབ་མོ་གནང་བ་རེད།

        ཞི་ཅིན་ཕིང་གིས་འཕྲིན་ལན་ནང་། ཁྱེད་ཚོས་དབུས་ཨ་ཧྥེ་རི་ཁར་ལས་ཀ་དང་འཚོ་བའི་ཐད་དཀའ་ངལ་ཁྱད་བསད་བྱས་ནས་བློ་གཅིག་སེམས་གཅིག་གིས་ས་གནས་དེ་གའི་མང་ཚོགས་ལ་ཞབས་འདེགས་ཞུས་ཡོད། ཁྱེད་ཚོ་ནི་སྲོག་སྐྱོབ་རྨས་སྐྱོར་བྱེད་མཁན་གྱི་གོས་དཀར་ལྷ་རྗེ་དང་མཛའ་བརྩེ་བརྒྱུད་སྤྲོད་བྱེད་མཁན་གྱི་མཛའ་གྲོགས་ཕོ་ཉ་རེད། འདི་ལོ་ནི་ཀྲུང་གོས་ཕྱི་རྒྱལ་ལ་རོགས་སྐྱོར་བྱེད་མཁན་སྨན་བཅོས་རུ་ཁག་མངགས་གཏོང་བྱས་ནས་ལོ་60འཁོར་བའི་ལོ་ཞིག་ཡིན། དེ་སྔ་ཕྱི་རྒྱལ་ལ་རོགས་སྐྱོར་བྱེད་པའི་སྨན་བཅོས་ལས་འགན་སྒྲུབ་མྱོང་བ་དང་ད་ལྟ་སྒྲུབ་བཞིན་པའི་བློ་མཐུན་ཚོར་ལྷག་བསམ་ཟོལ་མེད་ཀྱི་འཚམས་འདྲི་ཞུ་རྒྱུ་ཡིན་ཞེས་གསུངས་པ་རེད།

        ཞི་ཅིན་ཕིང་གིས། ཀྲུང་གོ་མི་དམངས་ཞི་བདེར་དགའ་བ་དང་ཚེ་སྲོག་ལ་གཅེས་སྤྲས་བྱེད་མཁན་ཞིག་ཡིན། ཕྱི་རྒྱལ་ལ་རོགས་སྐྱོར་བྱེད་པའི་སྨན་བཅོས་ནི་གསོན་ཉམས་དོད་པའི་མཚོན་ཚུལ་ཞིག་རེད། ཁྱེད་ཚོས་ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་བཅངས་ནས་དཀའ་ཚེགས་ལ་མི་སྐྲག་པ་དང་། ལེགས་སྐྱེས་ཧུར་ཐག་འབུལ་བ། ནད་བཅོས་སྲོག་སྐྱོབ། བརྩེ་སེམས་ཟབ་མོ་བཅངས་པ་བཅས་ཀྱི་ཀྲུང་གོའི་སྨན་བཅོས་རུ་ཁག་གི་སྙིང་སྟོབས་དར་སྤེལ་ཤུགས་ཆེན་བཏང་སྟེ་བྱམས་སེམས་དང་བྱང་ཆུབ་པའི་ལག་རྩལ་ལ་བརྟེན་ནས་ས་གནས་དེ་གའི་མི་དམངས་ལ་བདེ་སྐྱིད་བསྐྲུན་པ་དང་བྱ་སྤྱོད་དངོས་ལ་བརྟེན་ནས་ཀྲུང་གོའི་གཏམ་རྒྱུད་ཡག་པོ་བཤད་དེ་མིའི་རིགས་ཀྱི་འཕྲོད་བསྟེན་བདེ་ཐང་གི་གཅིག་མཐུན་འདུས་གྲུབ་གཏོད་རྒྱུར་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་དགོས་ཞེས་གསུངས་པ་རེད།

        ཕྱི་རྒྱལ་ལ་རོགས་སྐྱོར་བྱེད་པའི་སྨན་བཅོས་ནི་རང་རྒྱལ་གྱིས་ཕྱི་ཕྱོགས་ལ་རོགས་སྐྱོར་བྱེད་པའི་ལས་ཀའི་ནང་དོན་གལ་ཆེན་ཞིག་ཡིན། 1963ལོར་རང་རྒྱལ་གྱིས་ཨར་ཅི་རི་ཡར་ཕྱི་རྒྱལ་ལ་རོགས་སྐྱོར་བྱེད་མཁན་སྨན་བཅོས་རུ་ཁག་དང་པོ་མངགས་གཏོང་བྱས་ཡོད། ལོ་60ཡི་རིང་རིམ་རྩིས་བྱས་ན་ཨ་ཧྥེ་རི་ཁ་དང་། ཨེ་ཤེ་ཡ། མེ་གླིང་། ཡོ་རོབ་དང་རྒྱ་མཚོ་ཆེ་མོའི་གླིང་བཅས་ཀྱི་རྒྱལ་ཁབ་དང་ས་ཁུལ་76ལ་སྨན་བཅོས་རུ་མི་མི་ཐེངས་ཁྲི་3བཏང་བ་དང་ནད་པ་མི་ཐེངས་དུང་ཕྱུར་2.9ལ་སྨན་བཅོས་བྱས་པར་རྒྱལ་སྤྱིའི་སྤྱི་ཚོགས་ཀྱི་བསྔགས་བརྗོད་རྒྱ་ཁྱབ་ཐོབ་ཡོད། མིག་སྔར། ཕྱི་རྒྱལ་ལ་རོགས་སྐྱོར་བྱེད་མཁན་སྨན་བཅོས་རུ་ཁག་གིས་གོ་ལ་ཧྲིལ་པོའི་རྒྱལ་ཁབ་56གི་སྨན་བཅོས་ས་ཚིགས་115རུ་ལས་ཀ་བྱས་པའི་ནང་ཕྱེད་ཀ་ཙམ་ནི་ཐག་རིང་ལུང་ཁུག་གི་དཀའ་ཚེགས་ཆེ་བའི་ས་ཁུལ་དུ་གནས་ཡོད། ཉེ་ཆར། དབུས་ཨ་ཧྥེ་རི་ཁར་རོགས་སྐྱོར་བྱེད་མཁན་ཀྲུང་གོའི་སྨན་བཅོས་རུ་ཁག་ཁག་19པའི་རུ་མི་11གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་སྤྲིངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་ལག་བསྟར་བྱས་ཚུལ་དང་ས་གནས་དེ་གའི་དམངས་ཚོགས་ལ་སྨན་བཅོས་ཞབས་ཞུ་བསྒྲུབ་ཚུལ་སོགས་སྙན་སེང་ཞུས་ཏེ་མིའི་རིགས་ཀྱི་འཕྲོད་བསྟེན་བདེ་ཐང་གི་གཅིག་མཐུན་འདུས་གྲུབ་གཏོད་རྒྱུར་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་འབུལ་རྒྱུའི་ཆོད་སེམས་མཚོན་པར་བྱས་ཡོད།