བོད་རང་སྐྱོང་ལྗོངས་ལྷོ་ཁ་གྲོང་ཁྱེར་རྒྱ་ཚ་རྫོང་ར་ཀོ་གྲོང་ཚོར་སྐྱོད་སྐབས་གང་སར་སྟར་སྡོང་མཐོང་རྒྱུ་ཡོད།  རྒྱ་ཚ་རྫོང་གི་སྟར་ཀར་འདེབས་འཛུགས་ལོ་རྒྱུས་ཡུན་རིང་ལྡན་ཞིང་།  དེ་ནི་ས་གནས་དེ་གའི་སྲོལ་རྒྱུན་གྱི་ཁྱད་ལྡན་ཞིང་ལས་ཐོན་རྫས་ཀྱི་གྲས་ཤིག་ཡིན་པ་དང་།  ར་ཀོ་གྲོང་ཚོ་ཁོ་ནར་སྟར་སྡོང1000ལྷག་ཙམ་ཡོད།  “སྟར་སྡོང་འདེབས་འཛུགས་དང་བྲིན་ཚོང་བྱེད་པ་དེ་ར་ཀོ་གྲོང་ཚོའི་གྲོང་མིའི་འབབ་འཕར་ཕྱུག་འགྱུར་གྱི་ཐབས་ལམ་གལ་ཆེན་ཞིག་ཏུ་གྱུར་ཡོད”ཅེས་ར་ཀོ་གྲོང་ཚོའི་གྲོང་ཚོར་བཅའ་སྡོད་ཧྲུའུ་ཅི་དང་པོ་ཝང་ཧྲི་ཞིན་གྱིས་གསར་འགོད་པར་ངོ་སྤྲོད་བྱས།

ར་ཀོ་གྲོང་ཚོའི་སྟར་སྡོང་།

        ར་ཀོ་གྲོང་ཚོའི་ཏང་ཀྲི་པུའི་ཧྲུའུ་ཅི་ཟླ་བས་གསར་འགོད་པར་རང་ཉིད་ཀྱི་ཁྱིམ་དུ་སྟར་སྡོང་ལྔ་ཡོད་པ་དང་ལོ་གཅིག་ལ་སྟར་ཀ་རྒྱ་མ1000ལྷག་ཙམ་ཐོན་གྱི་ཡོད།  ལོ་རེའི་ཟླ་དགུ་པ་དང་བཅུ་པའི་ནང་ལྷོ་ཁའི་དངོས་ཟོག་སྤེལ་རེས་ཚོགས་འདུའི་ཐོག་འཚོང་གི་ཡོད་པས་ཡོང་འབབ་སྒོར་ཁྲི་གཉིས་གསུམ་ཙམ་ཡོད་ཅེས་བཤད།

ར་ཀོ་གྲོང་ཚོའི་ཏང་ཀྲི་པུའི་ཧྲུའུ་ཅི་ཟླ་བའི་རྒྱབ་ལོགས་སུ་ཡོད་པའི“རྩམ་པ་ལྷ་མོའི”སྟར་སྡོང་།

        “གྲོང་ཚོའི་ནང་གི་སྟར་སྡོང་ཚང་མར་རང་ཉིད་ཀྱི་མིང་ཡོད།  ང་ཚོས་ལྗོན་ཤིང་དེར་རྩམ་པ་ལྷ་མོ་ཞེས་འབོད་ཀྱི་ཡོད།  གང་ལགས་ཤེ་ན།  ཤིང་སྡོང་དེ་ལས་སྐྱེས་པའི་སྟར་ཀའི་བྲོ་བ་རྩམ་པ་དང་འདྲ་པོ་ཡོད་པས་ཡིན”ཞེས་ཟླ་བས་ཞིང་ཁའི་ནང་གི་མཐོ་ཞིང་ཆེ་བའི་སྟར་སྡོང་ཞིག་ལ་མཛུབ་མོ་བཙུགས་ནས་བཤད།  “རྩམ་པ་ལྷ་མོ”ནི་ར་ཀོ་གྲོང་ཚོའི་གྲོང་མི་ཉི་མ་ཚང་གི་སྟར་སྡོང་ཡིན་པ་དང་ལོ་ལྟར་ཐོན་འབབ་རྒྱ་མ2000ལྷག་ཙམ་ཐོན་གྱི་ཡོད། ཐོན་འབབ་དེ་རྒྱ་ཚ་རྫོང་ཧྲིལ་པོར་སྐད་གྲགས་ཡོད།“རྩམ་པ་ལྷ་མོ”ཞེས་པའི་སྟར་སྡོང་དེ་ཁོ་ནས་ལོ་ཧྲིལ་པོའི་ཡོང་འབབ་སྒོར་ཁྲི6ལྷག་ཙམ་ཡོད།

        སྟར་ཀ་ནི་རང་བྱུང་ཁམས་ཆེན་མོས་རྒྱ་ཚ་མི་དམངས་ལ་སྤྲད་པའི་རྒྱུ་ནོར་ཞིག་རེད། ལྷོ་ཁ་གྲོང་ཁྱེར་རྒྱ་ཚ་རྫོང་ནི་མཚོ་བོད་ས་མཐོའི་ལྷོ་རྒྱུད་དང་ཡར་ཀླུང་གཙང་པོའི་བར་རྒྱུད་དུ་གནས་པ་དང་། ལོ་མང་རིང་ཉི་འོད་ཕོག་ཚད་འདང་ངེས་ཡོད་པ་དང་། ཆར་ཆུ་འབེལ་བ། གནམ་གཤིས་དྲོ་བ། ཁོར་ཡུག་བཟང་པོ་བཅས་ཀྱི་དགེ་མཚན་ལྡན་པས་སྟར་ཀའི་འདེབས་འཛུགས་ལ་དམིགས་བསལ་གྱི་ལེགས་ཆ་ལྡན་ཡོད། རྒྱ་ཚ་རྫོང་ཡོངས་སུ་སྟར་སྡོང་ཁྱོན་ཁྲི54ལྷག་ཙམ་ཡོད་པ་དང་ལོ་བརྒྱ་ཡན་གྱི་གནའ་བོའི་སྟར་སྡོང3000ལྷག་ཙམ་ཡོད་པས་བོད་རང་སྐྱོང་ལྗོངས་སུ་སྐད་གྲགས་ཆོད་པའི“ལོ་ངོ་སྟོང་གི་སྟར་ཀའི་འབྱུང་གནས”རེད།

        ཉེ་བའི་ལོ་ཤས་རིང་།  ཁྲོམ་རའི་དགོས་མཁོ་ཆེ་རུ་ཕྱིན་པ་དང་བསྟུན་ནས་རྒྱ་ཚ་རྫོང་གི་སྟར་ཀའི་ཐོན་ལས་འཕེལ་རྒྱས་མྱུར་པོ་ཕྱིན་ཡོད། ས་གནས་དེ་གའི་སྲིད་གཞུང་གིས་ལག་རྩལ་གསོ་སྦྱོང་དང་མ་དངུལ་རོགས་སྐྱོར་སོགས་ཀྱི་བྱེད་ཐབས་སྣ་ཚོགས་བརྒྱུད་ཞིང་པར་སྟར་ཀའི་སྤུས་ཚད་དང་ཐོན་ཚད་མཐོ་རུ་གཏོང་རོགས་བྱས་པ་དང་ཆབས་ཅིག་སྐྱེ་ཁམས་འཛུགས་སྐྱོང་ཡང་བྱས་ནས་རི་ངོས་དང་། དུས་ཡུན་རིང་པོའི་ནང་རྨོ་འདེབས་བྱས་མེད་པའི་ས་རྒོད། ཤིང་འཛུགས་ནགས་ཚལ། ནགས་ཁྲོད་ས་སྟོང་སོགས་སུ་སྟར་སྡོང་བཏབ་ནས་དཔལ་འབྱོར་འཕེལ་རྒྱས་དང་ཁོར་ཡུག་སྲུང་སྐྱོང་གི“གཉིས་ཕན”གྱི་ལམ་བུའི་ཐོག་བསྐྱོད་དེ། སྟར་ཀའི་ཐོན་ལས་རྒྱ་ཚ་རྫོང་གི་སྐྱེ་ཁམས་དམངས་ཕྱུག་གི་མཛེས་སྡུག་ལྡན་པའི་མཛེས་ལྗོངས་ཤིག་ཏུ་གྱུར་ཡོད།