གཅིག ཆེད་སྤྱོད་རང་བཞིན། སྒེར་བཟུང་རང་བཞིན་ནམ་སྒེར་སྡོམ་རང་བཞིན་དེ་ཁེ་དབང་འཛིན་མཁན་གྱིས་མོས་མཐུན་བྱས་པའམ་བཅའ་ཁྲིམས་ནང་གཏན་འཁེལ་བྱས་པ་ཕུད། ཁེ་དབང་འཛིན་མཁན་ཕུད་པའི་སྐྱེ་བོ་སུ་ཞིག་གིས་ཀྱང་ཁེ་དབང་དེ་ལོངས་སུ་སྤྱོད་པའམ་བེད་སྤྱོད་བྱ་མི་ཆོག དེའི་ཐོག་ནས་ཁེ་དབང་འཛིན་མཁན་གྱིས་སྒེར་བཟུང་ངམ་སྒེར་སྡོམ་བྱས་པའི་ཆེད་སྤྱོད་ཁེ་དབང་ལ་བཅའ་ཁྲིམས་ཀྱིས་སྲུང་སྐྱོང་ནན་མོ་བྱེད་པ་ལས་མི་གཞན་གྱི་གནོད་འཚེ་མི་ཕོག་པ་མཚོན་ཡོད། “བཙན་འདོམས་བཀའ་འཁྲོལ”དང“བསྡུ་སྤྱོད”སོགས་བཅའ་ཁྲིམས་ཀྱི་གོ་རིམ་བརྒྱུད་ན། ད་གཟོད་ཁེ་དབང་འཛིན་མཁན་གྱི་ཆེད་སྤྱོད་དབང་ཆ་བསྒྱུར་ཐུབ།
གཉིས། ས་ཁོངས་ཀྱི་རང་བཞིན། ངོས་འཛིན་དང་སྲུང་སྐྱོང་བྱེད་སའི་ས་ཁོངས་ཁོ་ནར་གོ་ཆོད་ཅིང་། རྒྱལ་སྤྱིའི་སྤྱི་ཆིངས་སམ་ཕྱོགས་གཉིས་ཕན་ཚུན་གཉིས་ཕན་གྱི་ཆོད་ཡིག་བཞག་པ་ཕུད། རྒྱལ་ཁབ་ཅིག་གི་བཅའ་ཁྲིམས་ཀྱིས་སྲུང་སྐྱོང་བྱེད་པའི་ཁེ་དབང་ག་གེ་མོ་དེ་རྒྱལ་ཁབ་དེའི་ཁྱབ་ཁོངས་ཁོ་ནར་བཅའ་ཁྲིམས་ཀྱི་ནུས་པ་ཐོན་པ་ཡིན། དེར་བརྟེན་ཤེས་བྱའི་ཐོན་དབང་ལ་ས་ཁོངས་ཀྱི་རང་བཞིན་ལྡན་ཞིང་། ཆ་རྐྱེན་ངེས་ཅན་ཞིག་གི་འོག་རྒྱལ་སྤྱིའི་རང་བཞིན་ཡང་ལྡན།
གསུམ། དུས་ཚོད་ཀྱི་རང་བཞིན། གཏན་འཁེལ་བྱས་པའི་དུས་བཀག་ཁོ་ནར་སྲུང་སྐྱོང་ཐོབ་པ་ཡིན་ཏེ། བཅའ་ཁྲིམས་ཀྱིས་ཁེ་དབང་ཁག་ལ་སྲུང་སྐྱོང་བྱེད་པ་ཚང་མར་གོ་ཆོད་པའི་དུས་ཡུན་ངེས་ཅན་ཞིག་གཏན་འབེབས་བྱས་ཡོད་ཅིང་། རྒྱལ་ཁབ་ཁག་གི་བཅའ་ཁྲིམས་ཀྱིས་སྲུང་སྐྱོང་བྱེད་པའི་དུས་ཡུན་གྱི་རིང་ཐུང་ཧ་ལམ་འདྲ་མཚུངས་ཡིན་མོད། དེ་ལ་གཅིག་མཚུངས་མིན་པའང་ཡོད་དེ། རྒྱལ་སྤྱིའི་གྲོས་ཆོད་ལ་ཞུགས་པའམ་ཡང་ན་རྒྱལ་སྤྱིའི་རེ་འདུན་ལ་ཞུགས་སྐབས་ད་གཟོད་ཁེ་དབང་ག་གེ་མོ་ཞིག་ལ་གཅིག་གྱུར་གྱི་སྲུང་སྐྱོང་དུས་ཡུན་ཡོད།
