ཀུན་གྱིས་ཤེས་གསལ་ལྟར། བོད་ལ་ཐང་ག་དང་ལྷ་མོ། སྤོས། བོད་སྨན། གེ་སར། རས་པ་ལ་སོགས་ས་མཐོའི་ཁྱད་ཆོས་ལྡན་ཞིང་སྣ་མང་ཕུན་སུམ་ཚོགས་པའི་སྲོལ་རྒྱུན་རིག་གནས་དང་མངོན་མིན་རིག་གནས་ཤུལ་བཞག་མང་དག་ཅིག་ཡོད། མངོན་མིན་རིག་གནས་ཤུལ་བཞག་དེ་དག་ནང་བོད་ལྗོངས་ཀྱི་མི་རིགས་ཁག་གི་ལོ་རྒྱུས་རིག་གནས་དང་མི་རིགས་ཀྱི་སྙིང་སྟོབས་བསྡུས་ཡོད་ཅིང་། འདི་ནི་བོད་ལྗོངས་མི་རིགས་ཁག་གི་མི་དམངས་ཀྱི་དཀའ་སྤྱད་ཀྱི་རྔུལ་ཆུ་ལས་འཁྲུངས་པའི་ཉིང་བཅུད་ཅིག་རེད་ལ། རྩ་ཆེ་ཞིང་རིན་ཐང་བྲལ་བའི་རིག་གནས་ཀྱི་ཐོན་ཁུངས་ཤིག་ཀྱང་རེད།
གཞོན་ནུ་ལོ་ཆུང་གི་ཚོགས་སྤྱི་ནི་མེས་རྒྱལ་གྱི་མ་འོངས་ཡིན་པས་ཁོང་ཚོས་མངོན་མིན་རིག་གནས་ཤུལ་བཞག་ལ་རྒྱུས་མངའ་ལོན་པ་དང་མཐོང་ཆེན་ཐུབ་པ་བྱས་ན་ང་ཚོའི་མི་རིགས་ཀྱི་རིག་གནས་སྲུང་སྐྱོབ་དང་རྒྱུན་འཛིན་ཐུབ་ངེས་ཡིན་པས། དེར་བརྟེན་སློབ་གྲྭ་ནི་མངོན་མིན་རིག་གནས་ཤུལ་བཞག་ཁྱབ་གདལ་གཏོང་གནས་གལ་ཆེན་ཞིག་ཏུ་གྱུར་ཡོད། སྤྱི་ལོ་2021ལོའི་ཟླ་བ་8པར། ཀྲུང་གུང་ཀྲུང་དབྱང་གཞུང་ལས་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་ལས་ཐིང་གིས༼མངོན་མིན་རིག་གནས་ཤུལ་བཞག་ལ་སྲུང་སྐྱོབ་བྱེད་པའི་ལས་དོན་ལ་སྔར་བས་ཤུགས་སྣོན་རྒྱག་རྒྱུའི་སྐོར་གྱི་བསམ་འཆར༽ཞེས་པའི་ནང་། མངོན་མིན་རིག་གནས་ཤུལ་བཞག་གི་ནང་དོན་རྒྱལ་དམངས་སློབ་གསོའི་བརྒྱུད་རིམ་ཧྲིལ་པོར་ཁྱབ་པ་བྱེད་པ་དང་། མངོན་མིན་རིག་གནས་ཤུལ་བཞག་གི་སློབ་ཁྲིད་སྒྲིག་གཞི་དང་བསླབ་གཞིའི་མ་ལག་འཐུས་ཚང་འཛུགས་པ། མངོན་མིན་རིག་གནས་ཤུལ་བཞག་གི་ཀུན་ཤེས་སློབ་གསོའི་ཀློག་དེབ་དཔེ་སྐྲུན་བྱེད་པ་བཅས་བྱེད་དགོས་ཞེས་བསྟན་ཡོད། ཉེ་བའི་ལོའི་རིང་། བོད་རང་སྐྱོང་ལྗོངས་ཀྱིས་མངོན་མིན་རིག་གནས་ཤུལ་བཞག་རྒྱུད་སྤེལ་དང་ཁྱབ་གདལ་གཏོང་ཤུགས་རྒྱུན་མཐུད་ཆེ་རུ་བཏང་བ་དང་། རིམ་པ་ཁག་གི་སློབ་གྲྭས་མངོན་མིན་རིག་གནས་ཤུལ་བཞག་ཤེས་པ་དང་། མངོན་མིན་རིག་གནས་ཤུལ་བཞག་སྤྱོད་པ། མངོན་མིན་རིག་གནས་ཤུལ་བཞག་ངོམས་པ་བཅས་ཀྱི་འདུ་ཤེས་སློབ་གྲྭའི་ཁྲོད་དུ་རྩ་བ་ཚུགས་རྒྱུར་ཁྲིད་སྟོན་དང་སྐུལ་མ་བྱེད་པ། མངོན་མིན་རིག་གནས་ཤུལ་བཞག་སློབ་གྲྭར་སྐྱོད་རྒྱུ་རྒྱུན་རྣམ་ཅན་དང་ཚད་ལྡན་ཅན་དུ་འགྱུར་རྒྱུར་སྐུལ་འདེད་གཏོང་བ་བཅས་བྱས་ནས་མངོན་མིན་རིག་གནས་ཤུལ་བཞག་སྲུང་སྐྱོབ་དང་རྒྱུན་འཛིན་བྱ་རྒྱུ་དེ་དེང་རབས་སློབ་གསོའི་མ་ལག་ཁྲོད་དུ་མཉམ་འདྲེས་གཏིང་ཟབ་ཐུབ་པ་བྱས་ཡོད།
ལྷོ་ཁར་གནའ་ནས་སྒོར་གཞས་ཀྱི་ཕ་ཡུལ་ཞེས་བརྗོད་སྲོལ་ཡོད། དེའི་ཁྲོད་ནས་གྲ་ནང་གི་སྒོར་གཞས་ཀྱི་གདངས་དབྱངས་དམིགས་བསལ་ཆེ་ཞིང་། སྟངས་སྟབས་འཁྲུག་ཆ་དོད་པས་སྤྱི་ལོ་2006ལོར་བོད་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་ནང་བཅུག་ཡོད། དམངས་ཁྲོད་ཀྱི་ཞབས་བྲོའི་སྒྱུ་རྩལ་དེ་རྒྱུན་འཛིན་གང་ལེགས་ཡོང་ཆེད། གྲ་ནང་རྫོང་གི་སློབ་གྲྭ་འབྲིང་ཆུང་གིས་རྒྱང་བསྒྲགས་ལུས་སྦྱོང་དེ་སྒོར་གཞས་སུ་བསྒྱུར་ཡོད།
རྡེལ་རྩིས་ནི་རྒྱུན་གཏན་གྱི་འཚོ་བའི་ཁྲོད་ཀྱི་རྡོ་ཧྲུག་དང་ཤིང་ཆུང་། སྟར་ཁ་སོགས་དངོས་རྗེས་རྡེའུར་བྱས་ནས་རྩིས་རྒྱག་པའི་རྩིས་ཀྱི་རིག་པ་ཞིག་ཡིན་པ་དང་། སྤྱི་ལོ་2017ལོར་བོད་རང་སྐྱོང་ལྗོངས་ཀྱི་མངོན་མིན་རིག་གནས་ཤུལ་བཞག་ནང་བཅུག་ཡོད། དུས་མཚུངས། རྡེལ་རྩིས་ཉིད་ཀྱང་ལྷ་ས་དགེ་འོས་མཐོ་རིམ་ཆེད་ཚན་སློབ་གྲྭའི་རང་འདེམས་སློབ་ཚན་དུ་བཀོད་སྒྲིག་བྱས་ནས་སློབ་གྲྭའི་ནང་རྒྱུན་འཛིན་བྱེད་བཞིན་ཡོད། ལོ་མང་རིང་། ལྷ་ས་གྲོང་ཁྱེར་ཁྲེན་ཀོན་ཆུས་མྱང་བྲན་སློབ་ཆུང་གིས་བོད་ཀྱི་རིག་གནས་སློབ་གསོ་ཉིད་མི་རིགས་ཀྱི་སྙིང་སྟོབས་དར་སྤེལ་དང་མི་རིགས་ཀྱི་རིག་གནས་རྒྱུན་འཛིན་བྱེད་པའི་ཐབས་ལམ་གལ་ཆེན་ཞིག་ཏུ་བརྩིས་ནས་སྔ་རྗེས་སུ་ལྷ་མོ་དང་བོད་ཡིག་ཡིག་གཟུགས་སོགས་ཁྱད་ལྡན་སློབ་གསོ་བཀོད་སྒྲིག་གིས་སློབ་མ་རྣམས་ནས་ཕུལ་བྱུང་སྲོལ་རྒྱུན་རིག་གནས་ལ་སྔར་བས་ཤེས་རྟོགས་དང་རྒྱུན་འཛིན། དར་སྤེལ་བཅས་གཏོང་རྒྱུར་ཁྲིད་སྟོན་བྱས་ཡོད། མིག་སྔར། བོད་ལྗོངས་སུ་སློབ་གྲྭ་མང་པོ་ཞིག་མངོན་མིན་རིག་གནས་ཤུལ་བཞག་སློབ་གྲྭ་སྐྱོད་པའི་དཔེ་སྟོན་རྟེན་གཞིར་གྱུར་བས། རྒྱ་ཆེའི་དགེ་སློབ་ཚོས་བོད་རིགས་ཀྱི་སྲོལ་རྒྱུན་རིག་གནས་སྲུང་སྐྱོབ་དང་རྒྱུན་འཛིན་བྱེད་པའི་གསོན་ཤུགས་སྐུལ་སྤེལ་ཐུབ་པ་བྱུང་ཡོད།
ཨ་ཅང་ཅང་། མངོན་མིན་རིག་གནས་ཤུལ་བཞག་རྣམ་གྲངས་སློབ་གྲྭའི་སློབ་གསོའི་འོག་ཏུ་རྒྱུན་འཛིན་བྱེད་པའི་དོན་སྙིང་དེ་ནི་སློབ་མ་ཚོར་མངོན་མིན་རིག་གནས་ཤུལ་བཞག་གི་ཤེས་བྱ་ངོ་སྤྲོད་དང་མངོན་མིན་རིག་གནས་ཤུལ་བཞག་གི་རྩལ་ནུས་ཁོང་དུ་ཆུད་པའི་ལག་ཤེས་པ་དང་རྒྱུན་འཛིན་པ་ཁག་ཅིག་གསོ་སྐྱོང་བྱེད་པ་ཙམ་མ་ཡིན་པར། དེ་ལས་གལ་འགངས་ཆེ་བ་ཞིག་ནི་མངོན་མིན་རིག་གནས་ཤུལ་བཞག་ཞིབ་འཇུག་དང་དོ་དམ་བྱེད་པའི་ཆེད་དོན་ཤེས་ལྡན་མི་སྣ་ཁག་ཅིག་གསོ་སྐྱོང་བྱས་པ་བརྒྱུད་བོད་ལྗོངས་ཀྱི་མངོན་མིན་རིག་གནས་ཤུལ་བཞག་སྲུང་སྐྱོབ་དང་གསར་སྤེལ་ཐད་རིག་ནུས་ཀྱི་རྒྱབ་སྐྱོར་ཐུབ་པ་བྱ་རྒྱུ་དེ་རེད།
མངོན་མིན་རིག་གནས་ཤུལ་བཞག་ནི་གཟུགས་མེད་གསོན་གནས་ཀྱི་རིག་གནས་ཤིག་ཡིན་པས། གཞོན་ནུ་ལོ་ཆུང་ཚོགས་སྤྱིས་མངོན་མིན་རིག་གནས་ཤུལ་བཞག་ལ་རྒྱུས་མངའ་ལོན་ཚད་དང་སྲུང་སྐྱོབ་བྱེད་པའི་འདུ་ཤེས་རྒྱུན་མཐུད་མཐོ་རུ་བཏང་སྟེ་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་མི་རབས་ནས་མི་རབས་བར་རྒྱུན་འཛིན་ཐུབ་པའི་ཐད་དགེ་མཚན་ལྡན་པའི་ནུས་པ་འདོན་ཐུབ་པ་བྱེད་དགོས།
