བོད་མིའི་ས་ཁུལ་མང་ཆེ་བར་ཕུང་བོ་བྱ་ལ་འགྲེམས་སྲོལ་ཡོད། སྲོལ་དེ་བོད་དུ་ཆགས་ནས་ད་བར་ལ་ཧ་ལམ་ལོ་ངོ་དགུ་བརྒྱ་ཡས་མས་ཙམ་སོང་བའི་ལོ་རྒྱུས་ཡོད་སྐད་འདུག དེ་ཡང་ཐོག་མར་བོད་ལ་ནང་བ་སངས་རྒྱས་ཀྱི་ཆོས་དར་བའི་རྗེས་གཞི་ནས་རིམ་པས་དར་བ་ཞིག་ཡིན་པས་བརྗོད་མེད་ཡིན། གང་ལགས་ཤེ་ན། དེའི་གོང་ལ། མཐོ་བ་ཆོས་རྒྱལ་རྣམ་པ་ནས་དམའ་བ་མི་སེར་དཀྱུས་མའི་བར་གྱི་ཕུང་བོ་ཚང་མ་བང་སོ་བརྩིགས་ནས་ས་སྦས་གཏོང་བ་ལས། བྱ་གཏོར་བྱེད་པའི་སྲོལ་མེད། བོད་མིའི་ཁྲོད་ཕུང་བོ་བྱ་གཏོར་བྱེད་པའི་སྲོལ་དེ་དར་བའི་བསམ་པའི་རྨང་གཞི་ནི་སངས་རྒྱས་ཤཱཀྱ་ཐུབ་པའི་འཁྲུངས་རབས་ལས《སྟག་མོ་ལུས་སྦྱིན》ཞེས་གསལ་བའི་སྙན་སྒྲུང་ཇི་བཞིན“སྦྱིན་པའི”སྙིང་བོ་ཉམས་ལེན་ཡང་དག་བྱེད་པའི་ཕྱིར། བོད་མི་རྣམས་ཀྱིས་རང་ཉིད་ཚེ་ལས་འདས་པའི་རྗེས། རང་གི་ཤ་ཁྲག་གི་ཕུང་བོ་དེ་བྱ་ལ་སྦྱིན་ནས་སྦྱིན་པའི་སྤྱོད་ལམ་རླབས་པོ་ཆེ་མཚོན་གང་ཐུབ་ཞུས་པ་རེད། ཆོས་འབྱུང་ལོ་རྒྱུས་ལྟར་ན། སྤྱི་ལོའི་དུས་རབས་བཅུ་གཉིས་པའི་དུས་འགོར། ཕ་དམ་པ་སངས་རྒྱས་ཀྱི་སྲོལ་གཏོད་གནང་བའི“ཞི་བྱེད”ཅེས་པའི་གྲུབ་མཐའ་ཞིག་བོད་ལ་དར་བས། དེ་ལས་མ་གཅིག་ལབ་སྒྲོན་གྱི་ཕུང་བོ་གཟན་བསྐྱུར་གྱི་གདམས་པ་ཕྱག་ལེན་མཛད་པ་དང་། གཅོད་གཏོང་བའི་སྲོལ་དེ་དར་ཁྱབ་ཆེན་པོ་བྱུང་ཡོད། ཕུང་བོ་གཟན་བསྐྱུར་གྱི་གདམས་ངག་དེའི་ཤུགས་རྐྱེན་གྱིས་བོད་མིས་རང་ཉིད་ཚེ་ལས་འདས་རྗེས། ཕུང་བོ་སྦྱིན་པར་བཏང་སྟེ། སྦྱིན་པའི་འབྲས་བུ་བཟང་བོ་ཞིག་སྨིན་ནས། སྐྱེ་བ་ཕྱི་མར་མཐོ་རིས་ཀྱི་སྐྱེ་གནས་ཐོབ་པའི་རེ་བ་བཅོལ་བར་གྲགས། གཞན་ཡང་ཕུང་བོ་ངེས་པར་དུ་བྱ་རྒོད་ལ་འགྲེམས་དགོས་དོན་ནི་བཤད་སྲོལ་དུ། བྱ་རྒོད་ནི་ཞིང་སྐྱོང་གི་འཁོར་ཡིན་པར་ངོས་འཛིན་པ་མ་ཟད། བྱ་རིགས་ཀུན་གྱི་ནང་ནམ་འཕང་གཅོད་པའི་རྒྱལ་བོ་བྱ་རྒོད་ཡིན་པས། ཕུང་བོ་རྣམས་བྱ་དེར་སྦྱིན་ན། རང་གི་སྐྱེ་གནས་མཐོན་པོ་ཡོང་བའི་ངོས་འཛིན་གནང་སྲོལ་ཡོད།།
