མགར་བ་རྒྱལ་པོ་ཤིན་ཏུ་ཁྲོས་ཏེ་རལ་གྲི་སྡིག་པའི་ཡུ་བ་ཅན་གྱི་འཆང་བ་ནས་བཟུང་སྟེ་བུ་ཆུང་ལ་གླུ་འདི་ལྟར་བླངས་སོ། །
གནས་བྲག་ནག་མདུང་སོ་གཤིབས་འདྲ་ནས། །
ང་མགར་བའི་ཐེའུ་རང་སྤུན་གསུམ་མཁྱེན། །
ཕོ་ང་ངོ་ཁྱོད་ཀྱིས་མ་ཤེས་ན། །
དཔའ་ཡ་མེད་མགར་བ་རྒྱལ་པོ་ཟེར། །
གླུ་འདི་ཡི་གླུ་ངོ་མ་ཤེས་ན། །
ང་མགར་བའི་དཔའ་བོ་ངར་གླུ་ཡིན། །
ཁྱོད་བུ་ཆུང་ཚེ་ཟད་ཚུར་ཉོན་དང་། །
མི་ཚེ་ཟད་སྲིན་པོའི་སྒོ་ཁར་ཐོན། །
ཚེ་ཡང་ཟད་མགར་བ་ང་ལ་ཐུག །
དགྲ་བསམ་མེད་ཧམ་པ་ཆེ་ལུགས་ལྟོས། །
མཁར་ཁྲག་ཟོར་གནམ་ལ་བཤམས་འདྲ་བོ། །
ཧོར་ཡ་རྩེ་མཁར་དམར་རྩེ་སྟོང་རེད། །
དེས་ཕུང་ཆུ་ཡིས་བཤིགས་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
བུ་སྤུན་དགུ་དགྲ་ལ་ཆས་འདྲ་འདི། །
ཧོར་རི་བོ་རྡོ་རྗེ་རྩེ་དགུ་རེད། །
དེ་སྤྲང་དགུས་སྡེ་དགུ་ཉུལ་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
མཁར་སྨུག་པོ་རྫ་རི་སྤུངས་འདྲ་འདི། །
ཧོར་གུར་ནག་སྨུག་དགུ་དགུ་རྫོང་རེད། །
དེ་རྡོ་ཕུང་ཐོག་གིས་བཤིགས་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
གཡག་རྒོད་པོའི་རུ་ཐུར་གཟེངས་འདྲ་དེ། །
ཧོར་གཡག་ལ་སེར་བོའི་ལ་ཁ་རེད། །
དེ་གཡག་ཆད་འདམ་ལ་ཟུག་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
སྤང་སེར་པོའི་གསེར་ཞུ་གོན་འདྲ་འདི། །
ཧོར་གུར་སེར་གསེར་མཁར་རིང་མོ་རེད། །
འདི་སྤང་རི་མེ་ཡིས་འཚིག་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
གོས་དམར་ནག་ན་བཟའ་གོན་འདྲ་འདི། །
ང་མགར་བའི་སོལ་རི་ནགས་རྫོང་རེད། །
དེ་གླ་རེ་པས་ལྡེ་གོན་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
ཡང་གནམ་ལྕགས་ཁྲོ་ཆུ་འཁྱིལ་འདྲ་འདི། །
ང་མགར་བའི་ལྕགས་མཁར་རིང་མོ་རེད། །
དེ་རྫ་མ་རྡོ་བས་བཅོམ་འདྲ་ཟེར། །
གཏམ་དེ་འདྲ་བཤད་པ་དགྲ་ལ་སྒྱུར། །
ཁྱོད་བུ་ཆུང་མ་འདུག་འཆི་གྲབས་གྱིས། །
ཤི་དམྱལ་བའི་ཡུལ་ལ་འགྲོ་གྲབས་གྱིས། །
གནམ་ཨ་སྔོན་རིག་པ་དེ་རིང་ཡིན། །
ས་དོག་མོ་རིག་པ་དེ་རིང་ཡིན། །
