བློན་ཆེན་འདན་མ་དེས་རྨོག་དཀར་འཁོར་གསུམ་ཕུད་ནས་ལག་པ་གཡོན་པས་བཏེགས། གཡས་པས་འགྲམ་པ་སྐྱོར་ནས་ན་རེ། འོ་ན་ཁྲི་རྒོད་ལྷ་སྲས་རྣམས།
ཕོ་དཔའ་བོའི་རྒོད་རྟགས་དེ་ཙམ་རེད། རྟ་འདོ་བའི་མགྱོགས་རྒྱུག་དེ་ཙམ་རེད། ད་མ་མཛད་རང་ཡུལ་དཀར་པོར་འབྱོན། ཐུགས་ཞིབ་པར་ལྷོད་ལ་དགོངས་པ་ཐོངས། ཟེར་ནས་ཇུས་ཚོད་འཛིན་པའི་གླུ་སྙན་མོ་དྲུག་འགྱུར་ལ་དྲངས་ཏེ། འདི་ལྟར་ཕུལ་པར་གདའ་འོ། །
གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་ལེན་པ་ཚངས་པའི་ལྷ་ལ་མཆོད། །
གླིང་གེ་སར་དབུ་འཕང་དགུང་ལ་སྟོད། །
ངག་འགུགས་པ་སྐུ་ལྷ་གཉན་པོ་མཆོད། །
དཔོན་འབུམ་པའི་སྐུ་ཇུས་བརྟན་པར་མཛོད། །
ཚིགས་བཅད་པ་ཀླུ་རྒྱལ་གཙུག་ན་མཆོད། །
སྡེ་མཐོང་སྨོན་ངོ་སོ་གྱེན་ལ་བསྟོད། །
ས་འདིའི་ས་ངོ་མ་ཤེས་ན། །
ཨ་ཆེན་དམར་པོའི་ཚུར་མཐའ་རེད། །
གཡག་ལ་སེར་པོའི་མར་གཤམ་རེད། །
ཧོར་གླིང་དཀར་ནག་ས་མཚམས་རེད། །
ང་དང་ང་ངོ་མ་ཤེས་ན། །
སྨུག་པོ་ལྡོག་གི་རྒྱལ་རབས་དང་། །
དགུང་སངས་ནམ་མཁའ་མཉམ་ཆགས་རེད། །
སྐྱེན་པོ་འདན་མའི་གདུང་རབས་དང་། །
སེར་བོ་ས་གཞི་མཉམ་གྲུབ་རེད། །
འབུམ་པའི་རྒྱལ་རབས་ཇི་སྲིད་ལ། །
འདན་མ་བློན་རབས་འབྲལ་མེད་དར། །
རྒྱ་མོའི་དར་དང་ཐང་དཀར་སྒྲོ། །
རྨོག་དཀར་རྩེ་ན་འབྲལ་མེད་ཡིན། །
ཉག་ཕྲག་མདའ་དང་མཆོག་དཀར་གཞུ། །
ཕོ་རྒོད་ལུས་ལ་འབྲལ་མེད་ཡིན། །
བདེ་མོའི་གསེར་སྒ་འཇམ་པའི་སྟན། །
རྟ་འདོ་བའི་སྟེང་ན་མཉམ་འཛོམ་རེད། །
གླིང་སེང་ཆེན་ནམ་མཁའི་རང་མདངས་ལ། །
ཞལ་དཀར་རི་རྒྱལ་ལྷུན་པོ་འཁྲུངས། །
དར་འཕེན་ཁྲི་གདུགས་གཡས་ན་ཤར། །
ཉི་འབུམ་ཟླ་བ་གཡོན་ན་ཚེས། །
རིན་ཆེན་དར་ལུ་ཕྲག་ལ་རྒྱས། །
དཔའ་སེང་འོད་དཀར་པང་ན་མཛེས། །
སེང་སྟག་དགུ་ཚིགས་སྐེད་ལ་བཅིངས། །
དགའ་སྡེ་སྐྱ་རེངས་འོད་ལ་ཆགས། །
འདན་མ་སྨིན་དྲུག་རྩེ་ནས་རྒྱས། །
ཕ་ཁུ་རི་རྒྱལ་ལྷུན་པོ་མཐོ། །
འཛམ་གླིང་ལྷོ་ཡི་རྒྱན་ལ་བཀོད། །
གསོན་དང་གླུ་ལ་དོན་འབྲས་ཡོད། །
ཧོར་རྗེ་གུར་དཀར་རྒྱལ་པོ་ཁོང་། །
འབུམ་དམག་དཔུང་ཚོགས་གླིང་ལ་ཕབ། །
མཐོང་སྨོན་བྲན་ལ་བཀོལ་བསམ་སྟེ། །
བསམ་པའི་སོག་ལེ་ཁ་གཉིས་མ། །
ཤིང་གསོམ་པའི་སྟེང་ལ་མི་འགྲོ་དོ། །
མོ་གཞིས་ཁྲ་མོ་ཤོར་ན་ཡང་། །
ཕོ་རྒོད་རྟིང་མ་གྲུ་བཞི་པ། །
མ་ཤོར་ལམ་སེ་འཛིན་ངེས་ཡིན། །
ཡ་རྩེའི་འབུམ་ཤོག་བཅུ་གཉིས་ནས། །
དཔྲལ་པའི་མིག་དང་ཁོག་པའི་སྙིང་། །
གཅེས་པའི་བུ་དང་རྒོད་པའི་མི། །
དེ་དྲག་ཆམ་ལ་ཕབ་ནས་ཐལ། །
འབུམ་ཕྱེད་སྙིང་མེད་ཁོག་སྟོང་བཟོས། །
ཁྱུ་ཕྱེད་མིག་མེད་ལོང་བ་བཟོས། །
ཡིད་ཚིམ་པོ་གུར་དཀར་ཁོ་ལ་བྱས། །
གླིང་དཀར་ནོར་བུའི་ས་ཆ་ནས། །
དབུ་གང་མཐོ་དགུང་དང་མཉམ་ཞིང་གདའ། །
དཔའ་ཡང་དག་འབྲུག་བཞིན་གྲགས་ནས་ཐལ། །
རྒོད་ཟེར་བ་ལག་གིས་བླངས་ངེས་ཡིན། །
དེ་རིང་ཉི་མ་ཕན་ཆད་ནས། །
ད་བབ་ལས་ཀྱི་སོ་ནམ་ལ། །
འཛམ་གླིང་ནོར་བུ་དགྲ་འདུལ་ཁོང་། །
འཛོམ་འཁྱིལ་ལེ་གླིང་ལ་བྱོན་པའི་དུས། །
གླིང་དཀར་པོ་བདེ་བའི་རེས་ལ་བབ། །
དེ་བར་ལྷ་དམག་དཔུང་རྒོད་འདི། །
དཔའ་རྒོད་གཡེར་ཐོག་ནས་དཔའ་ཚོད་ཟུངས། །
རྟ་འདོ་བའི་ཆིབས་ཁ་ཚུར་ར་འཐེན། །
ཡོབ་གསེར་ལོང་རྐང་ཆུང་བདེ་ལ་སྤོས། །
མི་རྒོད་འཇམ་པའི་གདན་ཆུང་གནོན། །
རྟ་མགྱོགས་ཟ་བའི་བྲེས་ལ་ཐོགས། །
གནའ་མི་བོད་ཀྱི་གཏམ་དཔེ་ལ། །
ཕོ་རྒོད་པོས་རང་ཚོད་མ་ཟིན་ན། །
རྒོད་ཟེར་བ་ཆུ་ལ་འདེབས་ཀྱང་སྲིད། །
རྟ་བཟང་པོས་མགྱོགས་ཚོད་མ་ཟིན་ན། །
མགྱོགས་ཟེར་བ་ས་ལ་བརྡབས་ཀྱང་སྲིད། །
མཚོན་རྣོན་པོས་རྣོ་ཚོད་མ་ཟིན་ན། །
ངར་མ་སོ་ཁ་རྡུགས་ཀྱང་སྲིད། །
ད་མི་བཞུགས་གླིང་དཀར་སྟོད་ལ་འབྱོན། །
ལོ་ངོ་ཕྱེད་དང་གཉིས་གསུམ་ཚུན། །
སེང་ཆེན་བྱང་ནས་ཚུར་བྱོན་ཞོར། །
གེ་སར་དམག་གི་རྒྱལ་པོ་ལ། །
དཔའ་བརྟུལ་ཁྲི་རྒོད་དཔུང་པས་བསྐོར། །
འཛོམ་འཁྱིལ་ལེ་སེར་པོ་ཧོར་ལ་འགྲོ། །
སྐྱེས་མཆོག་ཆོས་ཉིད་ངང་ལ་བཞུགས། །
མཆེད་གསུམ་ངར་མའི་རུ་སྣེ་ཁྲིད། །
རྒོད་གསུམ་ཁས་ལེན་གདོང་ལ་འབུད། །
ད་དུང་དེ་ཡིས་མི་ཚད་པའི། །
ཁྱུང་སྒོ་ངའི་གཤོག་སྒྲོ་ངོམ་རྒྱུ་ལ། །
རྨུ་སྤྱང་རིན་ཆེན་དར་ལུ་ཡོད། །
གཡུ་འབྲུག་མཚོ་ལ་སྨིན་རྒྱུ་ལ། །
འོམ་བུའི་ཨ་ནུ་དཔའ་སེང་གདའ། །
སྣང་རྒོད་མཆེད་གཉིས་མཚར་རྒྱུ་གདའ། །
འབུམ་ཐུབ་རྟིང་མ་ངོམ་འོས་ཡོད། །
གལ་ཆེ་མདོ་འགག་གཏུགས་པ་ན། །
གསོད་ཅི་དགོས་འདན་མའི་ལག་ལ་ཞོག །
འདྲེན་ཅི་དགོས་འཛམ་གླིང་གེ་སར་མཛོད། །
སྡིག་མཐའ་སངས་རྒྱས་ཡོང་ངེས་ཡིན། །
ཧོར་མཐའ་གླིང་གིས་འཛིན་ངེས་རེད། །
ལས་དེ་ལས་དགའ་ཞིང་ལར་ནས་མེད། །
དེ་རིང་ཉི་མ་ཕན་ཆད་ནས། །
ངེད་རང་རྒྱལ་བློན་དཔའ་བརྟུལ་རྣམས། །
འཛོམ་འཁྱིལ་ལེ་གླིང་དཀར་སྟོད་ལ་འབྱོན། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
གླིང་རྗེ་བློན་ཐུགས་ལ་དེ་འདྲ་ཞོག །
ཅེས་གླུ་དེ་ལྟར་ཕུལ་བ། །
