དབྱར་གནས་ནི་འབའ་ཐང་མི་དམངས་ཀྱི་ལོ་རེའི་བོད་ཟླ་དྲུག་པ་དང་བརྒྱད་པར་འབའ་ཉ་ཆུང་སྟེང་ཞེས་པའི་ཐང་སྐྱིད་པོ་ལྕང་མའི་ར་བས་བསྐོར་བའི་སར་གཏོང་བའི་སྲོལ་རྒྱུན་གྱི་དུས་ཆེན་ཞིག་ཡིན། དབྱར་གནས་སུ་འབའ་རྒྱང་མཁར་རས་ལོ་རེར་ལྷ་མོ་ཟློས་གར་ཆེན་པོ་བརྒྱད་རེས་མོས་འཁྲབ་པ་དང་། དེ་མིན་འབའ་གཞས་འཆམ་པ་དང་། ཆང་གཞས་དང་གནས་མོ། ལ་གླུ་བཅས་ལེན་བ། ཁ་ཤགས་རྩེ་བ་སོགས་ཀྱི་བྱ་འགུལ་སྣ་མང་སྤེལ་དགོས་ཀྱི་ཡོད། ཨ་ཅེ་ལྷ་མོ་ཞེས་པ་ནི་གྲུབ་ཆེན་ཐང་སྟོང་རྒྱལ་པོས་སྤྱི་ལོ1385ལོ་ཙམ་ལ་གསར་གཏོད་མཛད་པ་ཞིག་ཡིན།1659ལོར། རྒྱལ་དབང་སྐུ་ཕྲེང་ལྔ་པས་དེ་མོ་སྤྲུལ་སྐུ་ངག་དབང་དགེ་ལེགས་འབའ་ཐང་དུ་མངགས་ཏེ་འབྲས་སྤུངས་དགོན་གྱི་བློ་གསལ་གླིང་གི་དཔེ་ལྟར་འབའ་ཆོས་སྡེ་དགོན་ཕན་བདེ་གླིང་གི་འདུ་ཁང་བཞེངས་བཅུག་པ་དང་། འདུ་ཁང་བཞེངས་གྲུབ་ནས་རབ་གནས་དགའ་སྟོན་བྱེད་སྐབས།འབའ་ཆོས་སྡེ་དགོན་གྱི་གཙོ་བདག་འབའ་ལཱ་ཁ་བླ་མ་སྐུ་ཕྲེང་བཅུ་བཞི་པ་མགོན་དཀར་བློ་བཟང་ཆོས་གྲུབ་ཀྱིས་བོད་ནས་གདན་པའི་ལྷ་མོ་ཚོགས་པའི་མཁས་ཆེན་ཆོས་འགྱུར་ལགས་ཀྱི་ཁྲིད་སྟོན་འོག གྲྭ་པ་འགའ་ཞིག་གིས《རྒྱང་མཁར་ར》དང《བཀྲ་ཤིས་ཞི་བ》སོགས་ཟློས་གར་འཁྲབ་པ་རེད།
དེ་ནས་བཟུང་། བོད་ཀྱི་ཟློས་གར་དེ་འབའ་ཐང་དུ་ཟམ་མི་ཆད་པར་གོང་འཕེལ་བྱུང་བ་དང་ཆབས་ཅིག་རིམ་བཞིན་རང་ཉིད་ཀྱི་ཁྱད་ཆོས་ལྡན་པའི་འབའ་ཐང་གི་རྒྱང་མཁར་ར་ཞེས་པ་དེ་ཆགས་དེ་ད་ལྟའི་བར་དུ་ལོ་ངོ་སུམ་བརྒྱ་ལྔ་བཅུ་ལྷག་གི་ལོ་རྒྱུས་ཡོད་དོ།།
