གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་རེ་རེ་མི་ལེན་ཀ་མེད་རེད། །
རེ་རེ་མ་བླངས་ཚོད་ཡོད་རེད། །
སྐྱིད་ན་ཇ་ཆང་མཚར་གླུ་རེད། །
སྡུག་ན་རང་སེམས་སྐྱོ་གྲོགས་རེད། །
ས་འདིའི་ས་ངོ་མ་ཤེས་ན། །
དུག་ཐང་སྐྱ་མོའི་ཡ་མཐའ་རེད། །
ང་དང་ང་ངོ་མ་ཤེས་ན། །
སྐྱ་ལོ་སྟོན་པའི་ཕ་ས་ནས། །
བསོད་ཟད་སེང་ལྕམ་འབྲུག་མོ་ཡིན། །
མེ་ཏོག་གོང་མ་ལྷ་ནས་ཕོག །
བཀོད་ཐང་འབུམ་པའི་གླིང་ལ་བབས། །
ཆོས་བྱ་བ་དབུ་ནག་གཞུང་ཤིང་བསམས། །
དེ་སྟེ་ན་ནིང་གནམ་ལོ་ཚུན། །
ཧོར་སེར་དཔོན་པོ་གུར་དཀར་འདིས། །
འབུམ་དམག་དུག་མཚོ་གླིང་ལ་ཕབ། །
སྡོད་བསམ་རྐང་པའི་གོམ་ཆུང་འཁྲུལ། །
འགྲོ་བསམ་གོས་མཐའ་ཕུར་པ་བཏབ། །
གླེང་བསམ་ལྕེ་སྣེ་དིག་གིས་མནན། །
ལྟ་བསམ་ཁྲ་ཆུང་ལིང་གིས་སྒྲིབ། །
ཤི་གསོའི་སྨན་ལ་ཞེ་སྙེག་འདི། །
བཙན་དུག་ཁོང་བའི་སྲོག་ལེན་རེད། །
འབྲུག་མོའི་ལས་ཀྱི་རི་མོ་འདི། །
བྱ་སྒྲོ་རླུང་གིས་གར་བསྐྱོད་རེད། །
ད་དུང་བསམ་པའི་གཞི་དཀྱིལ་ན། །
གུར་དཀར་སྟག་ཞུ་རྒྱལ་པོ་ལ། །
མདུན་གྱི་དཔྲལ་བ་གཏོད་པ་ལས། །
འཆི་བདག་དམྱལ་བའི་དཔོན་པོ་ལ། །
སྐྱིས་སྡུག་མཉམ་ཁུར་བྱས་ན་དགའ། །
ཆུ་ཕ་རི་ལམ་གཞུང་སྐྱ་མོ་ན། །
ཁྲི་དཔོན་རྒྱ་ཚ་དབུ་བཞུགས་པའི། །
དཔའ་བརྟུལ་ལྷ་དམག་ཚུར་ལ་གསོན། །
མ་རྒྱུག་བྱང་མའི་རྟ་ཁ་འཐེན། །
མ་འབྱོན་གསེར་སྒའི་གོང་བ་གནོན། །
གསོན་དང་ཞུ་རྒྱུ་འགའ་རེ་གདའ། །
ལྟོས་དང་ལྟད་མོ་འདི་འདྲ་གདའ། །
འབྲུག་མོའི་མདུན་གྱི་ཟངས་སྒྲོམ་འདི། །
ཧོར་རྒྱལ་ཆེན་བཞི་བཅུ་ཞེ་དགུ་པོའི། །
བླ་གནས་ཁམས་གསུམ་གྲོང་འཇོམས་རེད། །
ཐེའུ་རང་དཀར་པོའི་སྐུ་མཁར་རེད། །
ལྕགས་ཕུར་བྱིས་པ་ལོ་བརྒྱད་ཙམ། །
མེ་སྟག་ཁྲོམ་ཁྲོམ་ཡོད་དོ་ཟེར། །
ཧོར་སྡེ་དམར་ནག་བཅུ་གཉིས་འདིས། །
མཆོད་ན་ཟས་ཕུད་ཕུལ་ས་རེད། །
གླེང་ན་སྐྱབས་འགྲོ་ཞུ་ས་རེད། །
དངོས་མེད་མགོ་མ་བླ་ལྕགས་རེད། །
དངོས་ཡོད་རྟིང་མ་གུར་དཀར་རེད། །
མདའ་གཅིག་གིས་སྔོན་ནས་གཏོར་ན་བསམས། །
འབེན་བཞག་སེར་མོའི་ལག་གིས་བླངས། །
ཁྲི་དཔོན་ཞལ་ལུ་དཀར་པོ་ལ། །
འགྲན་མེད་སེང་ཆེན་རྒྱལ་པོ་ཡིས། །
ཕྱག་མདའ་འཕུར་ཤེས་ཐོག་གི་ལྕེ། །
དོང་བའི་ཁ་སྲུང་གནང་ནས་ཡོད། །
དེ་མ་འཕེན་དགོས་པའི་དུས་གཅིག་གདའ། །
དེ་མིན་སུ་རྩེབ་གང་རྩེབ་གྱིས། །
མདའ་ཉག་ཕྲན་ཁ་ལོ་བསྒྱུར་ནས་ཐོངས། །
མ་གཟུར་འབེན་ལ་མདའ་མོ་ཕོངས། །
མ་གཡེལ་རྟེན་ལ་ཉག་ཕྲན་མངོགས། །
དེ་སྔ་གླིང་རུའི་མདའ་འཕེན་དེ། །
མང་ན་སྡིག་པའི་ཁ་སྣོན་རེད། །
ཉུང་ན་ཕན་མེད་གནོད་མེད་རེད། །
ད་རེས་མདའ་འཕེན་མདེའུ་སྡེ་ཡིས། །
ལྕགས་ནག་ས་ལ་བརྡབ་ཐུབ་ན། །
འབུམ་དམག་ཆུ་ལ་བསྒྱུར་ནས་ལྷག །
རྟེན་འབྲེལ་དཀར་པོའི་དཔྱད་གཞི་ལ། །
དེ་རིང་ཡོད་ན་དཔའ་བརྟུལ་རེད། །
དེ་མིན་སྟོང་གཏམ་ནག་པོ་ཡིན། །
གནའ་མི་བོད་ཀྱི་གཏམ་དཔེ་ལ། །
དགུང་ནས་ཤར་བའི་ཉི་མ་དེ། །
མུན་པའི་གླིང་ལ་མ་གཟུར་དགོས། །
འཇིག་རྟེན་ས་ཆུ་བསྲོས་ནས་ཤོག །
མུན་ལ་གཟུར་ན་ཉི་མ་མིན། །
ནམ་གུང་བཅོ་ལྔའི་ཟླ་བ་དེ། །
སྤྲིན་ནག་འགྲོས་ལ་མ་གཟུར་དགོས། །
ཁམས་གསུམ་མཚན་མོ་བཅོམ་ནས་ཤོག །
སྤྲིན་ལ་བཟུར་ན་ཟླ་བ་མིན། །
དགུང་ནས་འབབ་པའི་ཐོག་ལྕེ་དེ། །
བར་སྣང་སྟོང་ལ་མ་གཟུར་དགོས། །
དགྲ་འདྲེ་འབྱུང་པོ་བཅོམ་ནས་ཤོག །
སྟོང་ལ་བཟུར་ན་གནམ་ལྕགས་མིན། །
གླིང་ཕྲུག་དཔུང་པའི་མདའ་འཕེན་དེ། །
གཟས་པའི་འབེན་ལ་མ་གཟུར་དགོས། །
ལྕགས་ནག་ཐལ་ཕུང་བཟོས་ནས་ཤོག །
འབེན་ལ་བཟུར་ནས་སྐྱེན་པོ་མིན། །
དེ་ནས་གླིང་གི་རྒྱལ་བློན་རྣམས། །
མྱུར་མྱུར་བྱོན་ན་དགོས་པ་ཆུང་། །
དལ་དལ་དཔུང་སྡེབས་བྱས་ན་དགའ། །
མགྱོགས་མགྱོགས་འདོ་བ་ཁེར་རྒྱུག་ལས། །
མང་མང་སྐྱ་མགོ་གཤིབ་ན་སྐྱིད། །
དེ་ཚོ་ཐུགས་ཀྱི་ཟུར་ལ་ཞོག །
མ་རྒྱུད་མཁའ་འགྲོ་སྡེ་ལྔ་རྣམས། །
སེང་ལྕམ་འབྲུག་མོས་འབེན་བཞག་ལ། །
གླིང་དཀར་མདའ་སྣེ་ཁྲིད་ལ་ཤོག །
མེ་ལྕེ་འབར་ཞིང་འུར་ལྡིར་གཡོས། །
དུ་རླུང་འཚུབ་ཅིང་འུར་སྒྲ་སྒྲོགས། །
མདེལ་སྣེ་དམག་གི་རྒྱལ་མོས་དྲོངས། །
སྨྱུག་སྐེད་གནོན་སྦྱིན་དམར་པོས་འཚོས། །
ལྟོང་པ་སྲིད་པའི་རྒྱལ་མོས་སྲུངས། །
ངས་དགྲ་འདུལ་ལན་པོ་ཡོང་བར་ཤོག །
སོ་ནམ་གཞུང་ཞིང་ཡོད་པར་ཤོག །
ལྷ་ཆོས་མགོ་མ་ཚུགས་པར་ཤོག །
མི་ཆོས་རྩ་བ་ཚུགས་པར་ཤོག །
དྲོད་མ་ཡལ་དགྲ་ཤ་ཟ་བར་ཤོག །
གཡང་མ་ཉམས་རང་ནོམ་འཁོར་བར་ཤོག །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
ཚ་ཞང་ཐུགས་ལ་དེ་འདྲ་ཞོག །
