གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
ལྷ་ཡར་མཁྱེན་གནམ་ཐེལ་དཀར་པོ་མཁྱེན། །
བར་མཁྱེན་བར་ཐེལ་ཁྲ་བོ་མཁྱེན། །
མར་མཁྱེན་ས་ཐེལ་ནག་པོ་མཁྱེན། །
ལྕགས་ནག་དམ་པའི་དགུ་སྒྲིག་མཁྱེན། །
རྒྱལ་པོ་དམར་པོའི་གདུང་རྒྱུད་མཁྱེན། །
གཉིད་མེད་ཨ་མཆོད་གུ་རུ་མཁྱེན། །
གཟིམས་མེད་མར་མེ་ཚེ་འབར་མཁྱེན། །
མཁྱེན་གཟིགས་གླུ་ལ་དཔལ་མགོན་མཛོད། །
ང་སྟོབས་ཆེན་བསམ་དོན་འགྲུབ་པར་ཤོག །
ས་འདིའི་ས་ངོ་མ་ཤེས་ན། །
ཐང་དམར་པོ་བཞི་ལིང་གོང་བ་རེད། །
ང་དང་ང་ངོ་མ་ཤེས་ན། །
གནམ་འཁོར་ལོ་རྩིབས་བརྒྱད་མར་ཞབས་ན། །
ས་པདྨ་འདབ་བརྒྱད་ཡར་སྟེང་ན། །
ཨ་ཆེན་ཧོར་གྱི་ས་ཆ་ན། །
མི་སྟོབས་ཆེན་ཟེར་བ་གཅིག་ལས་མེད། །
རྟ་འཛོམ་ཤེས་ཟེར་བ་གཅིག་ལས་མེད། །
སྟག་གི་ཁ་སྤོར་མཉེད་མི་ཡིན། །
གཟིག་གི་ཐིག་ལེ་བཀོག་མི་ཡིན། །
དཔའ་རྟིང་མ་སུམ་སྟོང་ལུས་ལ་ཚང་། །
ཕོ་ལོ་ཉི་ཤུ་རྩ་ལྔ་ཡིན། །
སྟོང་རི་སྐྱིད་རྫོང་མཁར་ནང་ན། །
རྨོག་གི་ཁྱུང་གཏོར་ཁྲ་འབར་ཡིན། །
ཁྲབ་ཀྱི་སྐེད་བཟོ་ཁྲ་འབར་ཡིན། །
རལ་གྲིའི་དཔའ་ལུང་ཁྲ་འབར་ཡིན། །
སྡིག་པ་ར་ཙའི་སྲས་པོ་ཡིན། །
སྡིག་གཅོད་ཤན་པའི་ཨ་ནུ་ཡིན། །
རྩལ་ཆེན་སྤུན་གསུམ་ནུ་བོ་ཡིན། །
ང་འདྲ་འཛམ་གླིང་ཧོར་ན་མེད། །
གནམ་ས་གཉིས་ཀྱི་གཞུང་ཤིང་ལ། །
དཔའ་ཆེ་ནས་དགུང་ལ་གྲགས་པ་དེ། །
བདུད་ཡ་མེད་ཀླུ་བཙན་དཔོན་དང་གཅིག །
རྒྱ་ལྷོ་ཁྲི་བུ་ཡི་སྟག་མིག་གཉིས། །
ཧོར་སྟོབས་ཆེན་གླང་བོ་ཁྲ་འབར་གསུམ། །
གླིང་འབུམ་པའི་རྒྱ་ཚ་ཞལ་དཀར་བཞི། །
ཕོ་འདི་བཞིན་ཡན་ལ་གནམ་ལས་མེད། །
དཔོན་པོ་གུར་དཀར་རྒྱལ་པོ་ལགས། །
ཁྱོད་ཧོར་དམག་གླིང་ལ་ཆས་ལེ་འདི། །
ཡིན་བསམ་ཧོར་དམག་ནང་ན་མེད། །
ཧོར་ཕར་ཆས་དམག་གི་མགོ་མ་ལ། །
དགྲ་སྒེར་ལང་ཇག་རྒྱུག་མགོ་མ་བྱུང་། །
ཁེར་ཉིན་སྨུག་པོ་སྐྱ་གཅིག་བྱུང་། །
རྟ་ཁྲ་ཁྱུ་ནོམ་ལ་དེད་ནས་སོང་། །
ཕུ་བོ་སྡིག་གཅོད་རྨ་འབེབས་བྱས། །
དེ་རྒྱབ་དཀར་པོ་སྐྱ་གཅིག་བྱུང་། །
རྟ་ཁྲ་ཁྱུ་མང་པས་མི་ཚད་པའི། །
སྟོང་ཤོམ་འབུམ་ཐུབ་མགོ་བྱས་ཀྱི། །
མི་དེ་རྒོད་བརྒྱ་ཚོ་བཅུ་གཅིག་ཤོར། །
དེ་རྗེས་ཝ་ཐུང་ཁེར་འགྲོས་བྱུང་། །
གུར་དཀར་ཝ་མོ་ནང་མཐུན་བྱས། །
རྙེད་ཀྱང་ཝ་མོའི་གྲོགས་པོ་རྙེད། །
བློ་གཏད་ཝ་ཐུང་དཔོན་ལ་བྱས། །
ཡོང་ཡང་ཝ་མོ་ག་ལེར་ཡོང་། །
དེ་རིང་བུ་ཆུང་ཁེར་རྒྱུག་བྱུང་། །
རྟ་ཁྲ་ཁྱུ་དེ་ཙམ་དེད་ནས་ཐལ། །
ལྷ་རྟེན་རྔ་ཐུག་བྲེགས་ནས་ཐལ། །
ཆུང་སྣང་ངུའི་ཁ་ཡ་མ་བྱུང་ན། །
གླིང་དཔའ་བརྟུལ་འགྲན་ཡ་ཅི་ལ་ཡོང་། །
འབྲུག་མོ་ནོམ་ལ་ཅི་འདྲ་ལེན། །
ཨ་ཀྱང་མཚར་རྒྱུ་ཆེ་བ་ལ། །
ཧོར་ཡ་རྩེ་མཁར་གྱི་གདན་སྟེང་ན། །
ཨ་མགོ་མར་གྱིས་བརྒྱན་མི་ཚོ། །
ཁོག་སྟོད་ལྷུག་ལྷུག་བྱེད་མི་ཚོ། །
དེ་རིང་མེད་ལེ་ཅི་ཁོ་རེད། །
བུ་ལོ་བཅུའི་ར་མདའ་སུ་ལ་བབས། །
འགྲོ་ཟེར་ལེའི་ཁས་ལེན་ཡོད་ན་ལོངས། །
ཡང་མིན་ན་སྟོབས་ཆེན་སོང་ཆོག་ཀྱང་། །
གླིང་སྣང་ངུ་ལོ་བཅུས་ཇག་འགྲོ་ལ། །
དཔའ་སྟོབས་ཆེན་ར་མདའ་ཆས་པ་དེ། །
ཤིང་ཆུང་སྟེང་ལ་སྟ་རེ་འདྲ། །
གཏམ་རྣ་བ་ཐུབ་ལེ་ཨེ་གདའ་ན། །
བབས་བབས་ཐ་དད་བྱས་པས་ན། །
ཁོ་ཡང་གླིང་རུའི་སྣང་ངུ་རེད། །
ཧོར་གུར་དཀར་ཁྲི་བཙུན་མན་ཆད་ནས། །
མགར་བའི་ཐོག་སེར་འབྲུག་རྒྱལ་ཡན། །
ཧོར་དཔོན་ཆེན་མདུན་ན་སྣང་ངུ་མང་། །
ཕོ་འདྲ་བསམ་ཡོད་ན་ར་མདའ་སོང་། །
རང་ཁྱིམ་ནས་གཅེས་ན་དཔའ་མེད་རེད། །
དཔའ་འདྲ་ཡང་གདོང་ལ་མ་ཕོད་ན། །
མི་རེ་རེས་འདི་ཙམ་བྱས་པས་ན། །
ཧོར་མི་མང་ངོ་མང་ཡོང་ངེས་ཡིན། །
ཁོ་མི་ཆུང་གིས་དེ་ཙམ་ནུས་ལུགས་ལ། །
གླིང་དཔའ་བརྟུལ་གཞན་ཚོས་ཅི་བྱེད་ཤེས། །
ཡང་མིན་ན་རྟ་ཁྲ་བསྐུར་ལ་ཐོངས། །
དམག་ཁྲ་བོ་ཕྱིར་རྗེས་ཧོར་ལ་འགྲོ། །
ཁ་ཁ་སོ་སོ་སྡོད་རྒྱུ་གྱིས། །
དེ་མིན་གླིང་ལ་འགྲོ་བསམས་ན། །
རྟ་ཁྲ་ཁྱུ་ར་མདའ་རྫོངས་དང་དགའ། །
དེད་དེད་ངང་ལ་གཏོང་སྲིད་ན། །
ཧོར་ལས་དམག་འབུམ་ཚོ་བཅུ་གཉིས་དེ། །
ཤར་གླིང་སླེབས་ལོང་ཡོང་ལེ་མེད། །
མི་ཟད་རྟིང་མ་མཐོང་ངེས་ཡིན། །
རྟ་ཟད་རྐང་ཟད་མཐོང་ལེ་ཡོད། །
ཟོག་ཟད་སྤྲང་པོ་མཐོང་ངེས་ཡིན། །
དཔོན་གུར་དཀར་གྱིས་ཁྱོད་སོང་ཚིག་གཅིག་མེད། །
ཧོར་ཤན་པ་རྣམས་ང་འགྲོ་ཚིག་གཅིག་མེད། །
ལས་ཅི་རེད་ཨེ་ཤེས་ཧོར་རུའི་སྡེ། །
གོ་ཕུག་གི་གཅེས་རྩེད་སུས་ཀྱང་ཡོད། །
དཔའ་འདྲ་མཉམ་གདོང་ལ་ལངས་ཡོད་ན། །
སྣང་ངུའི་ནང་ནས་སྣང་རྒོད་ཡིན། །
ཕ་ཨ་ཁུའི་ཉམས་ལ་མ་ཕན་ན། །
བུ་སྣང་ངུ་མང་བས་ཕན་པ་མེད། །
འགྲོ་བསམས་ན་སྣང་ངུ་སུ་ཡང་སོང་། །
བདེན་ཨེ་བསམ་གུར་དཀར་རྒྱལ་པོ་ལགས། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
