གླུ་ཐ་ལ་ལ་མོ་ཐ་ལ་ལེན། །
གླུ་ཨ་ལ་ལ་མོ་ཨ་ལ་ལེན། །
གླུ་ལེན་པ་ཨ་སྔོན་དགུང་ནས་ལེན། །
དགུང་སྔོ་སངས་མཐའ་ལ་འཇལ་མི་མེད། །
ངག་འགུགས་པ་གཡུ་འབྲུག་སྐད་ལ་འགུགས། །
ང་ཁྲོ་རྒྱལ་ངར་དབྱིངས་གནམ་ས་ཁྱབ། །
ཚིག་འཐུ་བ་ཆུ་ཆེན་སྔོན་མོ་བཅད། །
ཆབ་མར་འབབ་རྦ་ཀློང་གཞན་ལས་རྩུབ། །
ས་འདིའི་ས་ངོ་མ་ཤེས་ན། །
ཧོར་གླིང་དཀར་ནག་ས་མཚམས་རེད། །
ཕོ་ང་དང་ང་ངོ་མ་ཤེས་ན། །
ཤར་རྨ་ཡུལ་སྟོད་ཀྱི་གླིང་དཀར་ན། །
སྲིབ་ལུང་སུ་རུའི་གདོང་ཟུར་ན། །
སྐུ་མཁར་སྙིང་རྫོང་ནང་བཅུད་ལ། །
ང་མ་བཞིའི་དཔོན་པོ་ཁྲོ་ཐུང་ནི། །
གོས་རྨ་བྱ་གྱོན་པའི་སྐུ་བསོད་ཅན། །
ཡིན་ཐག་ཆོད་དཔོན་པོ་ཁྲོ་རྒྱལ་ཡིན། །
ཁྲོ་ཡང་དག་སྡང་བའི་དགྲ་ལ་རེད། །
རྒྱལ་ཡང་དག་བྱམས་པའི་གཉེན་ལ་རེད། །
སྲིན་རྟ་མགྱོགས་པའི་གོང་གནོན་ཡིན། །
སྲིན་གྲི་འབར་བའི་རྩེ་ཡ་ཡིན། །
ད་ཉོན་དང་གླིང་དཀར་རྗེ་བློན་རྣམས། །
སྒང་པ་བོད་ཀྱི་གཞུང་ཤིང་ལ། །
བྱ་ཆེན་ཁུ་བྱུག་གསུང་སྙན་ལ། །
དཔྱིད་ཉི་རིང་སྐྱོ་བ་སློང་མི་ཟེར། །
གཡུ་འབྲུག་སྔོན་མོའི་རྒྱང་གྲགས་ལ། །
ཐེའུ་རང་གི་ཐོག་ལྕེ་ཁྲིད་མི་ཟེར། །
ཅོག་ཆུང་ཁྲ་མོའི་དྲུག་འགྱུར་ལ། །
སྒང་པའི་མཚན་གཉིད་དཀྲོག་མཁན་ཟེར། །
མ་བཞིའི་དཔོན་པོ་ཁྲོ་རྒྱལ་ལ། །
ཕྱི་དགྲ་ནང་ལ་ཁྲིད་མཁན་ཟེར། །
གཏམ་ཕུགས་མེད་སྨྲ་བ་སླ་མོ་ཡོད། །
དོན་ཡང་དག་ལག་ཏུ་ལེན་པ་དཀའ། །
ད་སྔ་ཉི་མའི་ཕན་ཆད་ལ། །
ང་ཁྲོ་ལུ་དམར་ཡག་འཛུམ་དྲུག་འདི། །
སྡར་ཆུང་ཝ་མོའི་གྲལ་ལ་བཞག །
མགྱོགས་པ་ཐང་དཀར་རྔ་ནག་འདི། །
བྱ་ནག་ཁྭ་ཏའི་གྲལ་ལ་བཞག །
ཟངས་ལྟོང་མདའ་མོ་དྲུག་ཅུ་འདི། །
རྒན་མོའི་འཕང་ཤིང་གྲལ་ལ་བཞག །
རྒོད་ཡང་དག་སྙིང་གི་རྟིང་མ་འདི། །
ཕྱི་སྣེ་ནང་ཁྲིད་གྲལ་ལ་བཞག །
འོན་ཀྱང་གཞེས་ནིང་དཔྱིད་ཀ་ནས། །
འབྲུག་མོའི་གླུ་ལ་འདི་འདྲ་བྱུང་། །
ཕར་འགྲོ་དམག་ལ་བཙུན་གསུམ་ཡོད། །
ཕོ་རྒོད་པོ་མི་བཙུན་འཕྱོར་པོ་བཙུན། །
དེ་བདེན་ངེས་རྒྱ་ཚ་ཞལ་དཀར་རེད། །
རྟ་མགྱོགས་པ་མི་བཙུན་འགྲོས་མ་བཙུན། །
དེ་བདེན་ངེས་རྒྱ་བྱ་སོག་དཀར་རེད། །
གྲི་རྣོན་པོ་མི་བཙུན་ཤུབས་ཁྲ་བཙུན། །
དེ་བདེན་པ་ཡ་ཟི་སྐར་ཕྲན་རེད། །
ཚུར་འོང་དམག་གི་བཙུན་གསུམ་ལ། །
ཕོ་འཕྱོར་པོ་མི་བཙུན་རྒོད་པོ་བཙུན། །
རྒོད་ཡང་དག་མ་བཞིའི་ཁྲོ་ཐུང་རེད། །
རྟ་འགྲོས་མ་མི་བཙུན་མགྱོགས་པ་བཙུན། །
མགྱོགས་ཐག་ཆོད་འཕར་བ་རྔ་ནག་རེད།
མཚོན་ཤུབས་ཁྲ་མི་བཙུན་རྣོན་པོ་བཙུན། །
རྣོ་ཐག་ཆོད་སྲིན་གྲི་སོ་ངར་རེད། །
ངས་དེ་རིང་ཉི་མའི་གདོང་གང་ལ། །
བསད་བསད་མཐེ་བོང་གཡས་པ་རྣམས། །
གཞུ་ཤུབས་བཀང་ནས་ཁྱེར་ཞིང་ཡོད། །
ཁོ་གེ་སར་བྱུང་ན་སྟོན་རྒྱུ་ཡིན། །
སྒ་སྡེ་ཆོས་སྐྱོང་བེར་ནག་ཅན། །
ངོམ་རྒྱུ་ངོ་གསར་མོ་འདྲ་གཉིས། །
དེ་མིན་གླིང་གི་དཔོན་བློན་ལ། །
དཔའ་རྟགས་ལག་མཚན་ག་ན་ཡོད། །
གནའ་མི་བོད་ཀྱི་གཏམ་དཔེ་ལ། །
ཡུ་བ་འཆང་རྒྱུ་མ་བྱུང་ན། །
རྩ་བ་བཟུང་ཟེར་སྟོང་གཏམ་ཡིན། །
གང་བྱས་སྟོན་རྒྱུ་མ་བྱུང་ན། །
ཕོ་དེ་བྱས་ཟེར་བ་སྟོང་གཏམ་ཡིན། །
ང་རྒོད་པོས་རྟིང་མ་དེ་ཙམ་རེད། །
རྒྱ་ཚའི་ལག་རྗེས་ག་ན་ཡོད། །
དར་འཕེན་ལག་རྗེས་ཅི་ལ་བྱེད། །
ལྷ་དར་དཔའ་མཚན་གང་གིས་བྱེད། །
འདན་མའི་མདའ་རྒོད་ག་ལ་འཕངས། །
སེང་སྟག་ལེབ་ཆེན་ག་ལ་གཡུགས། །
མདུང་ནག་པོའི་སྡིག་ཞབས་ག་ལ་སོང་། །
གླིང་དཀར་ཕོ་གསར་ནང་ཤེད་ན། །
ཚ་བོ་སྣང་ཆུང་གཡུ་སྟག་གཅིག །
དམར་ལེབ་ག་ཡུ་ཁ་འཐམ་གཉིས། །
ཨ་ཕོའི་ཉ་ཚ་འདས་པོ་གསུམ། །
རྒོད་པོའི་གྲུབ་རྟགས་བཞག་ཙམ་ཡིན། །
རྒོད་མཐའ་རླུང་ལ་བསྐུར་བ་ཡིན། །
དེ་མིན་པ་ཁྲ་བོས་སྤྱང་འཐབ་རེད། །
གླིང་དཀར་སྟོད་ན་ཁ་ཕོ་ཆེ། །
གཡག་ལ་འགྲིམ་དུས་རི་རྩེ་བཟུང་། །
དཔུང་ཡ་གཏུག་དུས་གོ་མཚོན་ཕུད། །
ཅི་རེ་གླིང་གི་ཝ་མོ་རྣམས། །
ལ་གཞི་ཕོ་གསར་ངར་རྒོད་འདི། །
ཉིན་སྔ་དྲོ་ཡོད་ཀྱང་ཕྱི་དྲོ་མེད། །
ད་ལོ་ཡོད་ཀྱང་དོ་ཞག་མེད། །
ལ་ཆེན་རྟ་གསར་བང་ཁ་འདི། །
སྔ་ཉིན་ཡོད་ཀྱང་ཕྱི་ཉིན་མེད། །
དབྱར་ཁ་ཡོད་ཀྱང་དགུན་ཁ་མེད། །
དཔེ་དེ་དང་དོན་གཉིས་ཁྲིགས་སེ་རེད། །
རྒས་སྐྲ་ལོ་དཀར་པོས་དེ་བྱས་དེ། །
ད་ནངས་ཞན་ཀྱང་དོ་ནུབ་རྒོད། །
ད་ལོ་མི་མངོན་ཕྱི་ལོ་འབྱེད། །
སོ་ལམ་བྱང་མའི་འདོ་བ་དེ། །
སྔ་དྲོ་མི་བུལ་ཕྱི་དྲོ་མགྱོགས། །
དབྱར་ཁ་མི་བཟང་དགུན་ཁ་འབྱེད། །
དཔེ་དེ་དང་དོན་གཉིས་ཨེ་མཚུངས་དོ། །
གོ་ན་རྣ་བའི་བདུད་རྩི་ལ། །
མ་གོ་གླུ་ཡི་འགྲེལ་བ་ཞུ། །
གླིང་རྗེ་བློན་ཐུགས་ལ་དེ་འདྲ་ཞོག །
