དེ་ཡང་ཏྲེ་ཧོར་ས་གནས་ཀྱི་དཔོན་རབས་བདུན་པ་ཧོར་ནམ་མཁའ་རྒྱལ་མཚན་གྱིས་དབང་བསྒྱུར་བྱས་པའི་དུས་རྫ་སྟོད་ག་ཡུས་གོང་མན་ཆད་ནས་རྟའུའི་ཆོ་ལོ་སྣ་ཡན་ཆད་མགོ་ལོག་ལྕགས་མོ་ཚང་ཚུན་ཆད་གཅིག་འགྱུར་གྱི་རྒྱལ་ཕྲན་བཙུགས་ནས་དབང་བསྒྱུར་བྱས། དེའི་རྗེས་སུ་མ་ཟུར་དབང་ལུས་ཀྱང་ནམ་མཁའ་རྒྱལ་མཚན་གྱིས་ཇི་ལྟར་དབང་བསྒྱུར་བྱས་པ་ལྟར་དཔོན་རབས་གོང་མའི་མཛད་རྗེས་མ་སྣོག་པར་རང་ཚུགས་ཡོད་པའི་ཐོག་དཔོན་ཐབས་ཀྱི་དབང་བསྒྱུར་བྱས་ཀྱང་སྐུ་ཚེ་ཡུན་རིང་མ་སྲིང་པར་ཞི་བར་གཤེགས། ཧོར་ཆོས་རྗེ་ལ་༧གོང་ས་ལྔ་པ་ཆེན་པོས་ཏཱ་ཀཱུ་ཤི་ཝན་ཤིའི་ཆོ་ལོ་བསྩལ་བ་ལྟར་ཧོར་ནམ་མཁའ་རྒྱལ་མཚན་གྱིས་དཔའ་ངར་དང་དཔོན་ཐོབ་ཀྱིས་འབངས་སུ་བཀུག་པའི་ས་གནས་དེ་དག་ལ་དབང་བསྒྱུར་བྱེད་ཆོག་པའི་བཀའ་བཙིགས་ཀྱི་ཕྱག་རྒྱ་ལག་མཐིལ་དུ་བཀྲམས་ནའང་། རྐྱེན་ངན་དང་བར་ཆད་ཀྱིས་ཟིན་ནས་དབང་ལུའི་སྐུ་ཚེའི་འདུ་བྱེད་ཡུན་དུ་མ་སྲིང་བར་ལྔ་པའི་ལམ་དུ་གཤེགས་སོང་བར་གྲགས། དེ་ནས་བཟུང་ཡུན་རིང་མ་འགྱངས་པར་ཧོར་གྱི་གདུང་སྲས་དེ་དག་ནང་མ་འཆམ་པར་ཕན་ཚུན་བརྩི་འཇོག་མེད་པར་རང་མཐོང་གི་ལྟ་བ་རེ་འཛིན་ནས་མ་ཟུར་དང་ཏྲེ་བོ་བྲག་མགོ་བཅས་ཧོར་སེར་ད་ར་ཁག་གསུམ་དུ་གྱེས་སོང་བར་གྲགས། དེའི་རྗེས་སུ་མ་ཟུར་དཔོན་ལ་བུ་གཉིས་བཙས་པ་དེ་ཆེར་སྐྱེས་པ་ན་ཡང་ཕན་ཚུན་ནང་མ་མཐུན་པར་དཔོན་ཁག་གཉིས་སུ་གྱེས་ནས་ས་རིས་སྡེ་གསུམ་དུམ་བུ་བགོས་པ་དང་། གཞིས་བསྡོད་ཀྱི་ཁང་པ་གསར་དུ་རྒྱབ་པས་ཧོར་ཁོང་གསར་ཚང་ཞེས་གྲགས། དེ་ནས་ཧོར་སེར་ད་ར་ཁག་བཞིར་གྱེས་པ་དང་། བོད་རབ་བྱུང་བཅུ་གཅིག་པའི་ས་ཡོས་ཏེ་སྤྱི་ལོ་༡༦༣༩ལོར། སོག་པོ་གུ་ཤྲི་ཧན་གྱིས་ཁམས་ཕྱོགས་སུ་དམག་དཔུང་སྐྱོད་ནས་དཔུང་འཇུག་བྱེད་སྐབས་བེ་རི་རྒྱལ་པོ་དོན་ཡོད་རྡོ་རྗེས་གདོང་ལེན་བྱས་པའི་རྐྱེན་གྱིས་ས་གཞིས་ཡུལ་མཁར་སོགས་རྩ་བརླགས་སུ་བཏང་ནས་བེ་རི་རྒྱལ་པོ་ཆབ་མདོ་རུ་བཙོན་འཇུག་བྱས་ཏེ་མཐར་སྲོག་ལ་རྒོལ་བར་གྲགས། བེ་རི་དཔོན་གྱི་སྲས་དང་འཁོར་གཡོག་ཁ་ཤས་ས་བུད་ནས་ཏྲེ་ཧོར་ལ་བསླེབས་པ་ན། ཧོར་ཚང་ལ་མགོ་འདོགས་ཞུས་ནས་ས་རིས་སྡེ་གསུམ་གྱི་བགོ་སྐལ་སྤྲོད་པས་དེ་ནས་བཟུང་མ་ཟུར་དང་ཁང་སར་ཏྲེ་བོ་བྲག་མགོ་བེ་རི་བཅས་ཧོར་སེར་ད་ར་ཁག་ལྔ་དེ་ལྟར་བྱུང་བར་ཡིན་ནོ།། ད་ནི་ད་ར་ཁག་ལྔའི་དཔོན་རབས་གང་དག་བྱུང་བ་དང་དཔོན་རབས་དེ་དག་གིས་ས་རིས་སྡེ་གསུམ་ཇི་ལྟར་སྐྱོང་བའི་ཚུལ་ནི། དང་པོ་མ་ཟུར་དཔོན་རབས་ཀྱི་གདུང་གང་ལས་མཆེད་པ་ནི་ཐོག་མར་ཧོར་ནོར་མཁའ་རྒྱལ་མཚན་དང་བཙུན་མོ་ཆེ་བ་འཇམ་དབྱངས་དཔལ་མོ་གཉིས་ཀྱི་སྲས་གཉིས་བྱུང་བའི་མ་ཟུར་དབང་ལུའི་ཡབ་ཀྱི་དཔོན་རབས་རྒྱུད་འཛིན་བྱས་ཀྱང་ཡུན་རིང་མ་འགོར་བར་སྐུ་ཚེའི་འདུ་བྱེད་བཏང་བའི་ལོ་རྒྱུས་གོང་དུ་ཞུས་ཟིན་ལ། སྤྱིར་ཧོར་སེར་ད་ར་ཁག་ལྔའམ་ཏྲེ་ས་སྟོད་སྨད་བར་གསུམ་ལ་དབང་བསྒྱུར་མ་ཟུར་དཔོན་དེ་ཁ་གཅིག་གྲགས་ཀྱི་དབང་ཆ་ཡོད་པར་བཞེད་པ་དང་། ད་ར་ཁག་གཞན་གྱིས་ཀྱང་སྐབས་དེར་བརྩི་འཇོག་བྱེད་པའི་ལུགས་སྲོལ་མ་ཉམས་པར་ཡོད་པ་ཡིན་ལ། རྗེས་སུ་ཧོར་ཆོས་རྗེ་ངག་དབང་ཕུན་ཚོགས་ཀྱིས་ཆོས་སྲིད་གཉིས་ཀྱི་བསྟན་པའི་བདག་པོའི་ཐུགས་ཁུར་བཞེས་སྐབས་ཀྱང་དེ་ལས་རྩིས་ཐང་ཆེ་བར་ཆགས་ཡོད་པ་ཡིན། དེ་ཡང་མ་ཟུར་དབང་ལུ་སྐུ་མ་གཤེགས་གོང་ནུ་བོ་ཆོས་རྗེ་ངག་དབང་ཕུན་ཚོགས་དབུས་སུ་འབྲས་སྤུངས་སློབ་གཉེར་བཞུགས་ནས་རྗེས་སུ་སློབ་མཐར་ཕྱིན་ཏེ་བཀའ་བཅུ་བའི་མཚན་རྟགས་བཞེས་པ་དང་། ཕྱིར་བྱོན་ནས་སྐབས་དབང་ལུ་གཤེགས་ཤུལ་སྲས་གཉིས་ནར་མ་སོན་པར་མ་ཟུར་དཔོན་གྱི་ཐུགས་ཁུར་བཞེས་པ་དང་། དེ་རྗེས་དབུས་སུ་བྱོན་སྐབས་སོག་པོ་གོ་ཤྲི་བསྟན་འཛིན་ཆོས་རྒྱལ་ཡང་སྐུ་ཚེའི་མཐར་མཇུག་རྫོགས་ནས་གཤེགས་པ་ལ་ཐུགས་ཁྲལ་ཚེགས་མེད་ངང་དགོངས་རྫོགས་སུ་རྒྱལ་དབང་ལྔ་པའི་མདུན་དགོན་སྡེ་བཅུ་གསུམ་བཞེངས་པའི་དམ་བཅའ་ཕུལ་ནས་ཕྱིར་བྱོན་པ་དང་། སྔོན་ཁུ་བོ་བཀའ་བཅུ་ནམ་མཁའ་འོད་ཟེར་གྱིས་ཤུགས་རི་རྩེའི་རི་ཁྲོད་དེ་ཉིད་སྤོས་ནས་དགོན་པ་གསར་རྒྱག་བྱས་པའི་འགོ་ནས་མཇུག་པར་འགྲོ་གྲོན་ཡོངས་རྫོགས་ཁོང་གིས་བཏང་བའི་ལོ་རྒྱུས་ཡོད་ལ། འདུ་ཁང་གསར་རྒྱག་བྱས་པ་དེ་ད་ལྟའི་དཀར་མཛེས་དགོན་པ་འདི་ཉིད་ཡིན་དང་། རྗེས་སུ་དགོན་སྡེ་བཅུ་གསུམ་གྱི་ཐོག་མར་དཀར་མཛེས་དགོན་ཡིན་པ་མ་ཟད་སྐབས་དེར་གྲྭ་ཚང་གཞན་བཞིའི་འདུ་ཁང་དང་དགེ་འདུན་པའི་གྲྭ་ཤག་སོགས་གསར་དུ་རྒྱག་ནས་རྒྱ་སྐྱེད་དུ་བཏང་བ་སོགས་དགོན་སྡེ་བཅུ་གསུམ་གྱི་ཐོག་མར་བཞེངས་ཚུལ་ནི་འོག་ཏུ་འཆད་པར་འགྱུར་རོ།། དེ་ནས་ཆོས་རྗེ་ངག་དབང་ཕུན་ཚོགས་སྐུ་གཤེགས་རྗེས་ཏྲེ་བོ་དང་བྲག་མགོ་གཉིས་མ་ཟུར་དཔོན་གྱི་དབང་འོག་ཏུ་མ་འདུམ་པར་དེང་དུས་དཀར་མཛེས་ལུང་པ་འདིའི་ཆུ་ཉིན་སྲིབ་ལ་མ་ཟུར་ཚང་གིས་དཔོན་སར་ཁོ་ནར་བསྐྱངས་བར་གྲགས། སྐབས་དེར་མ་ཟུར་དཔོན་དབང་ལུའི་བུ་ནམ་མཁའ་བསམ་འགྲུབ་ཀྱིས་གཡོག་མོ་ཞིག་དང་འབྲེལ་བ་བྱས་ཐོག་མངལ་དུ་སྦྲུམ་པ་བྱུང་བ་དེ་རང་སར་ཉག་རོང་དུ་ལོག་སོང་བ་དེ་མ་ཟུར་བློན་པོ་ཨུ་ཆེན་ཁམ་ཡ་ཟེར་བ་དེ་བློ་མ་བདེ་ནས། རྗེས་སུ་གཡོག་མོ་མ་བུ་བཙལ་བར་ཉག་རོང་དུ་སོང་ནས་རྙེད་པ་དང་གཞན་སུས་ཀྱང་མ་མཐོང་བར་བྱས་ནས་མ་ཟུར་སྲས་དེ་མཚོ་ཁ་རྒྱལ་པོ་ཧུ་ཐི་ཇིའི་སྐུ་དྲུང་དུ་ཁྲིད་ནས་ལོ་རྒྱུས་རྣམས་ཆད་ལུས་མེད་པར་ཞུ་བར་ཕུལ་ཐོག་རྒྱལ་པོའི་ཧོར་གྱི་གདུང་རྒྱུད་མ་ནོར་བར་ཡིན་པ་གསུངས་ནས་བཱ་ཐུ་ནོ་ཡོན་ཞེས་མཚན་གྱི་མངའ་གསོལ་དང་བཅས་དཔའ་དམ་ཞྭ་གོས་སོགས་ཀྱང་གནང་བར་གྲགས། དེ་ནས་བློན་པོ་ཕྱིར་ཕེབས་པའི་ལམ་བར་དུ་བཙན་སྒུའི་སྒང་ཐོག་ཏུ་ཉག་དམག་གིས་སྒུག་ར་བྱས་ཏེ་ཉག་རོང་ཇག་དམག་རྒྱབ་ནས་ཕན་ཚུན་འཐབ་འཁྲུགས་བྱུང་ནས་ཧོར་ཉག་བར་འཁོན་དང་གྱོད་གཞིའི་ས་བོན་བཞག དེ་ནས་རྗེས་སུ་དཔའ་ཐུ་ནོ་ཡོན་མ་ཟུར་དཔོན་སར་འཁོད་སྐབས་སྔོན་གྱི་དགྲ་ལན་བསློགས་ཕྱིར་སྐུ་ངོ་དེ་ཉིད་ཀྱི་དམག་དཔོན་བྱས་ནས་ཕྱི་དགྲ་འདུལ་བ་ལ་དཔའ་མཚན་ཆེ་བའི་ཧོར་དམག་གི་དཔའ་བོ་ཇའི་སང་སེངྒེ་སོགས་ཁྲིད་ནས་ཉག་སྐེད་བུ་རྫི་ཡན་ཆད་ཧོར་མ་ཟུར་དཔོན་བཱ་ཐུ་ནོ་ཡོན་གྱིས་དབང་དུ་བསྡུས་པར་གྲགས། རྗེས་སུ་ཉག་སྐེས་བུ་ལོང་མས་དབང་བསྒྱུར་མ་བྱས་བར་ད་ར་ཁག་ལྔ་མ་ཚད་སྡེ་དགེ་དང་གླིང་ཚང་སོགས་ཀྱང་མ་ཟུར་དཔོན་འོག་ཏུ་འདུས་ཡོད་པར་གྲགས་སོ།། སྤྱིར་ཧོར་མ་ཟུར་པཱ་ཐུ་ནོ་ཡོན་དེ་དཔའ་རྒོད་ལ་སྙིང་སྟོབས་ཆེ་བ། རྒྱུད་དྲང་ལ་ཡ་རབ་ཀྱི་མཛད་སྤྱོད་མངའ་བ། དམ་པའི་ཆོས་ལ་དད་ཅིང་འཁོར་འབངས་ལ་བྱམས་བརྩེ་ཆེ་བ་ཞིག་ཡིན་པར་མ་ཟད། དུས་རྒྱུན་བླ་མ་དཀོན་མཚོག་ལ་ཕྱག་མཆོད་དང་བཀུར་བསྟི་མཁས་པ། ཁ་བཏོན་དང་དགེ་སྦྱོར་ལ་བརྩོན་པའི་སྐྱེས་བུ་ཡ་རབས་ཤིག་ཡིན་པར་གྲགས་སོ།། སྟོང་སྐོར་ནི་ཧོར་ནམ་མཁའ་རྒྱལ་མཚན་གྱིས་སྐབས་ཧོར་ཚང་གི་མངའ་འོག་ཏུ་བསྡུས་པ་བཤད་མོད། བེ་རི་དགེ་བཤེས་འཇིགས་མེད་དབང་རྒྱལ་གྱིས། སྟོང་སྐོར་སྐུ་ཕྲེང་རིམ་བྱོན་གྱི་རྣམ་ཐར་དག་ཏུ་ཧོར་དཔོན་ནམ་མཁའ་རྒྱལ་མཚན་གྱིས་རྫ་ཁོག་ག་ཡུས་གོང་མན་ཆད་ནས་རྟའུ་ཆོ་ལོ་སྣ་ཡན་ཆད་མངའ་ཞབས་སུ་བསྡུས་ཡོད་པར་གྲགས་ཀྱང་སྟོང་སྐོར་གྱི་སྡེ་ཉུང་ངུ་འདི་ཆབ་འོག་ཏུ་མ་ཆུད་པ་འདི་ཞབས་སུ་བཅུག་དགོས་སྙམ་ནས་ཏྲེ་ཤོད་དོ་སྒང་ཐང་དུ་དམག་འཚོགས་བྱེད་སྐབས། གསེར་ཁང་དཀོར་གཉེར་གྱིས་མཐོང་བ་མངོན་སུམ་དུ། ཁྲབ་རྨོག་གི་གོ་ཆ་ཅན་གྱི་མི་དམར་ཞིག་གིས་གློ་སྙིང་ཁྱེར་ནས་འོང་སྟེ་གསེར་ཁང་གི་མཆོད་ཁང་ནང་བཞག་སོང་བར། ཕྱི་ཉིན་ནམ་ལངས་པ་དང་དུས་མཉམ་དུ་ལྟ་རུ་སོང་བས་བློ་སྙིང་མི་འདུག་མོད། ཁྲག་ཏིང་ཕོར་གང་མངོན་སུམ་དུ་ཡོད་པས་དེ་ནུབ་ཧོར་ནམ་མཁའ་རྒྱལ་མཚན་སྐུ་གཤེགས་འདུག་ཅེས་སྔོན་གྱི་གཏམ་ཁུངས་མ་ལས་བྱུང་ཞེས་གསུངས་སོ།། [ བེ་རི་དགེ་བཤེས་འཇིགས་མེད་དབང་རྒྱལ་གྱིསབརྩམས་པའི་ཏྲེ་ཡི་ལོ་རྒྱུས་། སྟོང་སྐོར་སྐུ་ཕྲེང་རིམ་བྱོན་གྱི་རྣམ་ཐར་དག་ཏུ་ཧོར་དཔོན་ནམ་མཁའ་རྒྱལ་མཚན་གྱིས་རྫ་ཁོག་ག་ཡུས་གོང་མན་ཆད་ནས་རྟའུ་ཆོ་ལོ་སྣ་ཡན་ཆད་མངའ་ཞབས་སུ་བསྡུས་ཡོད་པར་གྲགས་ཀྱང་སྟོང་སྐོར་གྱི་སྡེ་ཉུང་ངུ་འདི་ཆབ་འོག་ཏུ་མ་ཆུད་པ་འདི་ཞབས་སུ་བཅུག་དགོས་སྙམ་ནས་ཏྲེ་ཤོད་དོ་སྒང་ཐང་དུ་དམག་འཚོགས་བྱེད་སྐབས། གསེར་ཁང་དཀོར་གཉེར་གྱིས་མཐོང་བ་མངོན་སུམ་དུ། ཁྲབ་རྨོག་གི་གོ་ཆ་ཅན་གྱི་མི་དམར་ཞིག་གིས་གློ་སྙིང་ཁྱེར་ནས་འོང་སྟེ་གསེར་ཁང་གི་མཆོད་ཁང་ནང་བཞག་སོང་བར། ཕྱི་ཉིན་ནམ་ལངས་པ་དང་དུས་མཉམ་དུ་ལྟ་རུ་སོང་བས་བློ་སྙིང་མི་འདུག་མོད། ཁྲག་ཏིང་ཕོར་གང་མངོན་སུམ་དུ་ཡོད་པས་དེ་ནུབ་ཧོར་ནམ་མཁའ་རྒྱལ་མཚན་སྐུ་གཤེགས་འདུག་ཅེས་སྔོན་གྱི་གཏམ་ཁུངས་མ་ལས་བྱུང་ཞེས་གསུངས་སོ།། ] ལོ་རྒྱུས་དེ་དག་བདེན་པར་ཡིན་ངེས་པས་སྐབས་དེར་ཧོར་དཔོན་ནམ་མཁའ་རྒྱལ་མཚན་དེ་ལས་དང་བསོད་ནམས་ཀྱིས་མངའ་ཐང་རྒྱས་པའི་སྐབས་དང་ཁེལ་ནས་རྫ་སྟོད་ག་ཡུས་གོང་མན་ཆད་དང་རྟའུ་ཆོ་སྣ་ཡན་ཆད། མགོ་ལོག་ལྕགས་མོ་ཚང་ཚུན་ཆད་བཙན་པོའི་དཔུང་གི་མངའ་འོག་ཏུ་བསྡུས་པ་ལ་སྟོང་སྐོར་སྡེ་དུད་ཉུང་ངུ་ཞིག་བྲག་མགོ་དང་ཏྲེ་ཤོད་གཉིས་བར་དུ་རང་དགར་ལྷག་ལུས་སུ་སོང་བ་ཙམ་ལས་མངའ་འོག་ཏུ་བསྡུ་བའི་སྤོབས་པ་མེད་པ་ཞིག་ག་ལ་ཡིན། འོན་ཀྱང་སྐབས་འགར་ཆོས་ལུགས་པའི་སྐད་ཆ་ཐལ་ཆེ་བའི་གཏམ་དུ་འགྱུར་བར་ཡང་སྲིད་མོད། མདོར་ན་ཧོར་ནམ་མཁའ་རྒྱལ་མཚན་སྐུ་གཤེགས་པ་དང་ཁེལ་ནས་སྟོང་སྐོར་སྡེ་པ་ཏྲེ་ཧོར་གྱི་མངའ་འོག་ཏུ་བསྡུ་བར་དུས་སུ་མ་བབས་ནས་འགྱངས་སོང་བར་མིན་ནམ་སྙམ། ཟླ་བ་རྒྱལ་མཚན་ནི་སྟོང་སྐོར་ཞབས་དྲུང་ཆེས་ཐོག་མར་དེ་ཡིན་ལ། ཁོང་དབུས་ནས་རང་ཡུལ་སྟོང་སྐོར་ས་གནས་དེར་ཞབས་སོར་བཀོད་པ་དང་། གནས་གཞི་གཙུག་ལག་ཁང་བརྟེན་དང་རྟེན་པ་བཅས་གཞི་ནས་གསར་དུ་བཞེངས་པ་དང་། གཙུག་ལག་ཁང་དེའི་མཚན་ལ་གསེར་ཁང་དང་། དགོན་པ་དེའི་མཚན་ལ་བཀྲ་ཤིས་ལྷུན་པོ་ཞེས་གསོལ་བར་གྲགས། དེ་ནས་དགོན་པ་དེར་རྟེན་བཞུགས་དང་རབ་གནས་ཀྱི་མཛད་སྒོ་རྒྱ་ཆེར་སྤེལ་ནས་དད་ལྡན་མང་ཚོགས་ཡོངས་ཀྱིས་སྟོང་སྐོར་བླ་མ་ཞེས་དད་གུས་ཀྱི་མཆོད་སྡོང་ཆེན་པོ་ཞིག་ཏུ་གྱུར། ཞབས་དྲུང་དང་པོ་ཟླ་བ་རྒྱལ་མཚན་ནི་ཕྱི་སོ་ཐར་གྱི་སྡོམ་རྒྱུན་གཙང་ཞིང་ནང་བྱང་སེམས་ཀྱི་བསླབ་པས་ཕྱུག་པ། གསང་བ་སྔགས་ཀྱི་དམ་ཚིག་གི་ཆུ་བོ་མ་ནུབ་པར། ཐོས་པས་རང་རྒྱུད་གྲོལ་ཞིང་བསམ་པས་སྒྲོ་འདོགས་ཆོད་པ་སྒོམ་པས་ཉམས་རྟོགས་འཕེལ་བ་བཅས་རང་སྣང་དབང་དུ་འདུ་ཞིང་གཞན་སྣང་ཟིལ་གྱིས་གནོན་པའི་དམ་པའི་སྐྱེས་བུ་ཚད་ལྡན་ཞིག་ཡིནཔ་སྨོས་ཅི་དགོས། ཁོང་གི་འཆད་ཉན་སྤེལ་གསུམ་གྱིས་རྒྱལ་བ་བུ་རམ་ཤིང་པའི་བསྟན་པ་རིན་པོ་ཆེ་ཕྱོགས་ཀྱི་མཐའ་གྲུ་ཀུན་ཏུ་ཁྱབ་པར་མཛད་པ་ཞིག་ཀྱང་ཡིན། སྟོང་སྐོར་ཞབས་དྲུང་ལྔ་པ་ངག་དབང་བསོད་ནམས་རྒྱ་མཚོ་མཆོག་ཧོར་ཁོག་ཏུ་ཕེབས་པའི་དུས་མཚུངས་སུ་ཧོར་ཚང་དཔོན་པོས་དགའ་དད་གུས་གསུམ་གྱིས་སྔར་གྱི་སྡེ་དགོན་གཉིས་ལ་ས་རིས་སྡེ་གསུམ་སྐུ་སྐལ་དུ་ཕུལ་བ་གཞིར་བཞག་ཐོག་ཧོར་ཚང་སྟོད་སྨད་ནས་དུད་ཁྱིམས་ལྔ་རེ་རྩིས་པའི་བཅུ་ཕུལ་བ་དང་། སྔོན་ཆད་སྟོང་སྐོར་སྐུ་ཕྲེང་དྲུག་པ་འཇམ་དཔལ་དགེ་འདུན་རྒྱ་མཚོ་ལ་ དངོས་གྲུབ་བསྟན་འཛིན་དང་ནམ་མཁའ་བསོད་ནམས་ཏེ་ཁང་སར་དང་མ་ཟུར་དཔོན་གཉིས་ཀས་ཧོར་སྡེ་སྟོད་སྨད་ནས་དུད་ཁྱིམ་ལྔ་རེ་བསྡོམས་པས་སྡེ་དགོན་གཉིས་ཀྱིས་ཞལ་འདེབས་སུ་འབུལ་བར་བཀྱག་ཡོད་པ་དེ་བལྟ་སྣང་དུ་ད་ར་ཁག་ལྔའི་ཁོངས་ནས་མ་ཟུར་ཚང་གིས་བསྡུས་པར་འདྲ་ན་ཡང་། དོན་དུ་ཁྲལ་བསྡུད་ཁྲིམས་འཇལ་ཡོངས་རྫོགས་སྟོང་སྐོར་དགོན་པ་དང་བླ་བྲང་གཉིས་ལ་ཞུ་དགོས་པས་ཁྲིམས་འགོ་རང་སྐྱོང་ཡིན་པར་བཞེད་དོ།། འདི་ལ་ཞིབ་ཏུ་བསམ་ན་ཧོར་སེར་ད་ར་ཁག་ལྔ་དེ་མ་ཟུར་དཔོན་གྱི་མགོ་འཛིན་མཛད་དགོས་པ་མངོན་ཡང་། སྐབས་དེར་མ་ཟུར་དཔོན་དེར་ཆོས་དད་ཆེ་བས་སྟོང་སྐོར་ཞབས་དྲུང་དེ་དག་ལ་བླ་སློབ་དང་མཆོད་ཡོན་གྱི་འབྲེལ་བ་ཟབ་པའི་དབང་གིས། ཞབས་དྲུང་རྣམས་བླ་ཐབས་དང་ཁ་དྲག་བཙན་པའི་རྐྱེན་ལས་ལོ་ལྟར་ཁྲལ་མཇལ་ཁྲིམས་བཅོལ་མ་བྱས་ཐབས་མེད་བྱུང་ནས་ཁྲིམས་མགོ་རང་སྐྱོང་ཡིན་པའི་རྒྱུ་མཚན་ཡང་དེ་ལྟ་བུ་ཞིག་ལ་ཐུགས་ཡོད་པར་སེམས་སོ།། སྟོང་སྐོར་ཞབས་དྲུང་ལྔ་པའི་འགྲོ་དོན་གྱི་བཞེད་པ་མདོ་སྨད་དུ་འཕེལ་བར་གཟིགས་ནས་སྟོང་སྐོར་འདིར་ཡུན་རིང་མ་བཞུགས་པར་སྐུ་ཚབས་རེ་གཉིས་ཀྱིས་འཐུས་པར་བྱས་ནས་རིམ་བཞིན་རྗེ་ལན་བྱས་པར་རྒྱུད་སྐུ་ཚབས་དེ་དག་ལ་ཡུལ་གྱི་རྒྱུས་མངའ་མེད་པའི་རྐྱེན་གྱིས་ཡུལ་མི་དང་དཔོན་ཆུང་དེ་དག་གིས་དམའ་འབེབས་དང་བརྙས་བཅོས་བྱས་ནས་སྟེང་གི་དཔོན་མགོ་ལས་འོག་གི་གཡོག་མགོས་མཐོ་བ་ལྟ་བུར་གྱུར་སོང་བར་བཤད། སྐབས་དེ་ཤད་ནས་མཚོ་སྔོན་ཕྱོགས་སུ་རྒྱའི་ས་སྒོ་ཆིན་སྲིད་གཞུང་གི་ཆབ་སྲིད་འོག་ཚུད་ནས་དེའི་ཚེ་ཞབས་དྲུང་གི་སྐུ་ཚབ་སྤྱི་ལ་དབང་བའི་དཔོན་པོ་ལ་ཧབ་ཇི་དམག་གནང་བར་བརྟེན་དཔོན་ཆུང་རྣམས་དེའི་འོག་མགོ་སྒུར་ནས་བསྡད་རྒྱུའི་འཆར་འགོད་ཡོད་ཀྱང་། ཡུལ་མི་རྣམས་ཀྱིས་རྒྱ་ཡི་ཁྲིམས་སྲོལ་དང་འགྲོ་ལུགས་མ་ཤེས་པའི་རྐྱེན་གྱིས་ཇི་བཞིན་གཏན་ཁེལ་མ་བྱུང་བར་གྲགས། སྐབས་དེར་སྡེ་དགོན་གཉིས་ཀྱིས་ཞབས་དྲུང་ཟི་ལིང་ནས་གདན་འདྲེན་ཐེངས་འགར་བཏང་ཡང་། སྐུ་གསུང་ཐུགས་རྟེན་སོགས་དངོས་པོ་གྱ་ནོམ་པ་རེ་གནས་ནས་མ་ཕེབས་པས། སྐུ་ཚབ་རེ་གཉིས་ཀྱི་འཐུས་པར་བྱས་ནས་བར་སྐབས་ཤིག་སྟོང་སྐོར་དགོན་དུ་ཞབས་སོར་མ་བཀོད་པར་ཡུན་རིང་འགོར་སོང་བ་གྲགས། དེ་ཡང་བེ་རི་དགེ་བཤེས་འཇིགས་མེད་དབང་རྒྱལ་གྱིས། ད་ར་མཁན་པོའི་སྐབས་མཚོ་སྔོན་ཕྱོགས་སུ་དུས་འགྱུར་བྱུང་ནས་མདོ་ཁམས་ཐམས་ཅད་རྒྱའི་ས་སྒོ་ཆིན་ཏང་གི་འོག་ཏུ་ཚུད། དེའི་ཚེ་ཞབས་དྲུང་གི་སྐུ་ཚབ་སྡེ་སྤྱིའི་དཔོན་པོ་ལ་ཧབ་ཇི་དམག་སོགས་གནང་ནས་འོག་གི་དཔོན་ཆུང་རྣམས་དེའི་འོག་ཏུ་ཐུ་བེ་ཧཱུ་ལྟ་བུ་སྡད་རྒྱུ་བྱས་འདུག་ཀྱང་། ཞེས་གསུངས་པ་དེ། [ དེ་ཡང་བེ་རི་དགེ་བཤེས་འཇིགས་མེད་དབང་རྒྱལ་གྱིས། ད་ར་མཁན་པོའི་སྐབས་མཚོ་སྔོན་ཕྱོགས་སུ་དུས་འགྱུར་བྱུང་ནས་མདོ་ཁམས་ཐམས་ཅད་རྒྱའི་ས་སྒོ་ཆིན་ཏང་གི་འོག་ཏུ་ཚུད། དེའི་ཚེ་ཞབས་དྲུང་གི་སྐུ་ཚབ་སྡེ་སྤྱིའི་དཔོན་པོ་ལ་ཧབ་ཇི་དམག་སོགས་གནང་ནས་འོག་གི་དཔོན་ཆུང་རྣམས་དེའི་འོག་ཏུ་ཐུ་བེ་ཧཱུ་ལྟ་བུ་སྡད་རྒྱུ་བྱས་འདུག་ཀྱང་། ཞེས་གསུངས་པ་དེ།] དོན་དུ་སྐབས་དེར་མཚོ་སྔོན་གྱི་ཕྱོགས་དེར་ཆིན་རྒྱལ་རབས་སྲིད་གཞུང་གི་འོག་ཏུ་ཚུད་ནས་དེའི་ཚེ་ཞབས་དྲུང་གི་སྐུ་ཚབ་སྡེ་སྤྱིའི་དཔོན་པོ་ལ་ལས་དམག་རེ་གནང་ནས་འོག་གི་སྡེ་དཔོན་ཆུང་ངུ་དེ་ཚོ་དེའི་འོག་ཏུ་མགོ་སྒུར་ནས་བསྡད་རྒྱུ་བྱས་འདུག་ཅེས་པ་དང་། ཀྱང་ཞེས་མི་མཐུན་པར་ཤུགས་སྟོན་གྱི་ཕྲད་དེས་རྒྱའི་ས་སྒོ་ཡོང་ས་ཐག་རིང་བ་དང་། ཡུལ་མི་རྣམས་ཀྱིས་རྒྱའི་ཁྲིམས་ལུགས་མི་ཤེས་པའི་སྟབས་ཀྱིས་ཇི་བཞིན་མ་བྱུང་བའི་དོན་དུ་ཤེས་པར་བྱའོ།། དེ་ནས་སྡེ་དགོན་གཉིས་ཀྱི་སྐྱ་སེར་ཐམས་ཅད་ཞབས་དྲུང་རིན་པོ་ཆེའི་ཐུགས་རྗེའི་ཕྱག་འོག་མ་ཚུད་པར་རིང་དུ་སོང་བའི་རྐྱེན་གྱིས་ཕྱོགས་གང་ཐད་ནས་ཉམས་དམན་པར་གྱུར་ཏེ་གཞུང་སྡེའི་འོག་གི་དཔོན་ཆུང་དེ་ཚོའི་འབངས་ཀྱི་དཔལ་འབྱོར་འཕྲོག་བརྩོད་ཀྱི་འཁྲུགས་སློང་བྱས་པ་དང་། ཡང་དཔོན་ཆུང་དེ་ཚོ་ཡང་དཔོན་པོ་གཞན་དག་གིས་དབང་བསྒྱུར་བྱེད་པའི་ཁྲལ་འོག་ཏུ་ཚུད་ནས་མགོ་སྒུར་དགོས་པ་བྱུང་བའི་ཚེ། དགོན་པ་དང་བླ་བྲང་གི་ལྷ་སྡེ་རྣམས་རང་དབང་སྤུ་ཙམ་མེད་པར་གྱུར་ཏེ། ཚེ་སྲོག་ཀྱང་འཚོ་དཀའ་བའི་དུས་ངན་གྱི་དམུ་གབ་རལ་གྲིའི་སོ་ཁར་སོང་བ་ལྟར་བདེ་བའི་སྣང་བ་སྐད་ཅིག་ཙམ་ཡང་མེད་པ་གྱུར་ནས། རིམ་གྲོ་འདོན་དགོས་ཚེ་རྔ་དང་དུང་གི་སྒྲ་ཡང་གྲགས་པར་ཕར་ཞོགས་དྲིལ་བུའི་སྒྲ་ཡང་ཐོས་པའི་དོགས་པ་བྱུང་བའི་དུས་དེར། སླར་ཡང་གདན་འདྲེན་ཞུ་བར་ཕྱིན་ནས་གནས་ཚུལ་རྣམས་གོང་ལྟར་སྙན་སེང་ཕུལ་བས་གཞི་ནས་འབྱོན་རྒྱུ་ཞལ་གྱིས་བཞེས་ནས་སྟོང་སྐོར་སྡེ་དགོན་གཉིས་ཀྱི་མདུན་སར་ཞབས་སོར་བཀོད་ནས་སྟོང་སྐོར་ཟླ་སྙི་གཉིས་ཀྱི་གདན་སར་བཞུགས་ནས་སྡེ་དགོན་གཉིས་ཀྱི་སྡུག་བསྔལ་ལས་དབུགས་དབྱུང་བའི་ཆེད་ཆོས་ཐོག་གི་ལས་ཕྲན་ཚེག་རེའི་ཆོས་སྲིད་གཉིས་ཀྱི་བསྟན་པ་ལ་རྒྱ་ཆེར་གཟིགས་སྐྱོང་གནང་བར་མཛད་ཀྱང་། རིང་པོ་མ་ལོན་པར་སླར་ཡང་མཚོ་ཁའི་ཕྱོགས་སུ་ཆིབས་ཞལ་བསྒྱུར་ནས་སྡེ་དགོན་གཉིས་ལ་འབྱོར་རྒུད་ངེས་མེད་ཀྱི་གནས་ཚུལ་མང་ཙམ་བྱུང་བའི་ལོ་རྒྱུས་རྣམས་སྟོང་སྐོར་ཞབས་དྲུང་རིམ་བྱོན་གྱི་རྣམ་ཐར་ལས་གསལ་ལོ།། དེ་ལྟར་ཧོར་ཁོང་མ་ཟུར་དཔོན་རབས་ཐོག་མར་ཧོར་ནམ་མཁའ་རྒྱལ་མཚན་གྱིས་མདོ་ཁམས་ཏྲེ་ཧོར་ཡུལ་དེར་དབང་བསྒྱུར་བྱས་པར་གྲགས་ཀྱང་སྐུ་ཚེ་ཡུན་རིང་མ་བསྲིང་བར་དགུང་གྲངས་སོ་བདུན་ཐོག་ཞི་བར་གཤེགས་སོ། དེ་ནས་ནམ་མཁའ་རྒྱལ་མཚན་གྱིས་སྲས་ཆེ་བ་དབང་ལུའི་དཔོན་སར་བཟུང་བར་བྱས་ཀྱང་གདུང་སྲས་རྣམས་གཅིག་འོག་གཅིག་མ་འདུམ་པར་ཧོར་སེར་ད་ར་ཁག་གསུམ་དང་བཞི་ལྔ་སོགས་སུ་རིམ་པར་གྱེས་ནས་སྐབས་དེར་སྟོང་སྐོར་ཞབས་དྲུང་སྐུ་ཕྲེང་ལྔ་པ་བསོད་ནམས་རྒྱ་མཚོ་སྐབས་ཧོར་ཁོང་གི་དཔོན་དབང་ལུའི་མཆོད་ཡོན་དུ་བཀུར་ཏེ་དེ་ནས་བཟུང་ཧོར་སེར་ད་ར་ཁག་ལྔ་སྟོང་སྐོར་ཞབས་དྲུང་ལྔ་པ་ནས་བཟུང་ཞབས་དྲུང་རིམ་བྱོན་གྱིས་ཧོར་སེར་ད་ར་ཁག་གི་སྡེ་དཔོན་དགོན་སྡེ་བཅས་ཀྱི་ཆོས་སྲིད་གཉིས་ཀའི་ཕྱོགས་ལ་ཁ་གཅིག་གྲགས་ལྟ་བུར་གྱུར་ཡོད་པར་ལོ་རྒྱུས་ཡིག་ཚང་རྣམས་ལས་བརྟག་ན་ཤེས་པར་འགྱུར་རོ།། སྟོང་སྐོར་སྐུ་ཕྲེང་རིམ་བྱོན་གྱི་མཚན་། སྐུ་ཕྲེང་དང་པོ་ཞབས་དྲུང་ཟླ་བ་རྒྱལ་མཚན། གཉིས་པ་ཡོན་ཏན་རྒྱལ་མཚོ། གསུམ་པ་རྒྱལ་བ་རྒྱལ་མཚོ། བཞི་པ་མདོ་རྒྱུད་རྒྱ་མཚོ། ལྔ་པ་བསོད་ནམས་རྒྱ་མཚོ། དྲུག་པ་འཇམ་དཔལ་དགེ་འདུན་རྒྱ་མཚོ། བདུན་པ་བློ་བཟང་མདོ་རྒྱུད་ཡེ་ཤེས་བསྟན་པའི་རྒྱལ་མཚན། བརྒྱད་པ་ངག་དབང་མདོ་རྒྱུད་ཡོན་ཏན་རབ་རྒྱས། དགུ་པ་བློ་བཟང་ཐུབ་བསྟན་འཇིག་མེད་ཚུལ་ཁྲིམས་རྒྱ་མཚོ། བཅུ་པ་བློ་བཟང་ཐུབ་བསྟན་འཇིགས་མེད་བྱམས་པ་རྒྱ་མཚོ་བཅས་ཏེ་ཕྱིས་སུ་སྟོང་སྐོར་འདི་ད་ར་ཁག་བདུན་གྱེས་ཚུལ་གྱི་ནང་གཅིག་ཏུ་བགྲངས་བར་སྣང་ངོ་།། དེ་ནས་ཧོར་མ་ཟུར་དབང་ལུའི་སྐབས་དེར་ཉག་རོང་གཡོག་མོ་ལ་ཐོན་པའི་བུ་དེ་མཚོ་ཁ་རྒྱལ་པོའི་དཔོན་ཐབས་ཀྱི་ཞྭ་གོས་སྟ་གོན་དང་མཚན་གསོས་པ་དེ་དུས་སུ་སྨིན་ནས་ཉག་རོང་ལ་དགྲ་ལན་བསློགས་པ་སོགས་གོང་དུ་ཡང་ཅུང་ཟད་བཤད་ཟིན་ལ། དེ་ལྟར་དཔོན་སར་འཁོད་ནས་ཧོར་བཱ་ཐུར་ནོ་ཡོན་གྱིས་སྔ་རྗེས་སུ་བཙུན་མོ་གཉིས་བླངས་བའི་ཆེ་བ་དེ་རྒྱལ་རོང་ནས་ཁྲོ་ཤུལ་བཟའ་ངག་དབང་དཔལ་མོ་ཡིན། དེ་ལ་སྲས་གཉིས་འཁྲུངས་པའི་ཆེ་བ་དེ་དཱ་ཧན་ནོ་དང་། ཆུང་བ་མཁན་པོ་ཚངས་དབྱངས་ཞེས་སྐྱ་སེར་གཉིས་བྱུང་བར་གྲགས། བཙུན་མོ་ཆུང་བ་ལ་བེ་རི་སྲས་མོ་བེ་བཟའ་མ་ལ་སྲས་གཉིས་བྱུང་བའི་ཆེ་བ་རྡོ་རྗེ་རབ་བརྟན་དང་། ཆུང་བ་བླ་མ་ངག་དབང་སྟེ་སྐྱ་སེར་གཉིས་བྱུང་བ་དང་། བཙུན་མོ་ཆེ་ཆུང་གཉིས་ཀྱི་སྲས་དེ་དག་ཕན་ཚུན་ནང་མ་འཆམ་ནས་མ་ཟུར་ལས་ཁང་སར་ཟུར་དུ་གྱེས་དགོས་པར་བྱུང་། དེ་ནས་བེ་རི་ཚང་གི་བེ་བཟའ་མའི་སྲས་ཆེ་བ་རྡོ་རྗེ་རབ་བརྟན་གྱིས་ཁང་སར་ཚང་གི་དཔོན་སར་བཟུང་བར་གྲགས། ཁྲོ་ཤུལ་སྲས་མོའི་ཁྲོ་བཟའ་མའི་སྲས་ཆེ་བ་དཱ་ཧན་ནོ་ཡོན་གྱིས་སེར་ཤུལ་བཟའ་བསོད་ནམས་སྐྱིད་བཙུན་མོར་བླངས་ནས་སྲས་གཉིས་བྱུང་བའི་ཆེ་བ་བསོད་ནམས་དང་ཆུང་བ་མཁན་པོ་སྟོབས་ལྡན་གཉིས་འཁྲུངས། ཆེ་བ་བསོད་ནམས་ཀྱིས་ཧོར་མ་ཟུར་ཚང་གི་དཔོན་ས་བཟུང་ནས་རྒྱལ་རོང་ཁྲོ་སྐྱབས་རྒྱལ་བ་ཚང་གི་སྲས་མོ་ང་ཤི་མ་བསོད་ནམས་མཚོ་ཞེས་པ་དེ་ཁབ་ཏུ་བཞེས་ནས་དེ་ལ་སྲས་མ་ཟུར་ཏིང་འཛིན་དབང་པོ་བྱུང་བ་གྲགས། ཡབ་བསོད་ནམས་ཡུན་རིང་མ་འཚོ་བར་ཤི་ཤོར་སོང་བས། བར་སྐབས་དེར་ནུ་བོ་སྟོབས་ལྡན་གྱིས་མ་ཟུར་དཔོན་གྱི་ཐུགས་འགན་མ་བཞེས་རང་བཞེས་བྱུང་བར་གྲགས། རྒྱལ་རོང་ཁྲོ་སྐྱབས་རྒྱལ་བ་ཚང་གི་སྲས་མོ་ང་ཤི་མ་བསོད་ནམས་མཚོའི་སྲས་ཏིང་འཛིན་དབང་པོ་ལ་སྲས་སྲས་མོ་གཉིས་བྱུང་བའི་ཆེ་བ་ནམ་མཁའ་དབང་རྒྱལ་ཡིན་ལ། སྲས་མོ་དགེ་ཚུལ་མ་བློ་བཟང་སྒྲོལ་མ་ཆུང་བ་ཡིན། ནམ་མཁའ་དབང་རྒྱལ་གྱིས་མ་ཟུར་ཚང་གི་དཔོན་སར་བཟུང་ནས་རྒྱལ་རོང་ཁྲོ་སྐྱབས་རྒྱལ་པོའི་སྲས་མོ་ཞིག་བཙུན་མོར་བླངས་བར་གྲགས་ཀྱང་ཡུན་རིང་ཚེ་མ་བརྟན་པར་འདས་སོང་བར་གྲགས། ཡང་སྐྱར་ཁྲོ་སྐྱབས་ཚང་གི་དཔོན་མོ་དཀོན་མཆོག་སྒྲོལ་མ་ཁབ་ཏུ་བཞེས་ནས་དེ་གཉིས་ལ་སྲས་ཚེ་དབང་རྣམ་རྒྱལ་འཁྲུངས་བ་དང་། མ་ཟུར་ཚང་གི་དཔོན་ཚེ་དབང་རྣམ་རྒྱལ་དང་བཙུན་མོ་དཔལ་འཛིན་གཉིས་ལ་སྲས་བསོད་ནམས་དབང་རྒྱལ་འཁྲུངས། ཡང་མ་ཟུར་དཔོན་བསོད་ནམས་དབང་རྒྱལ་ཞུ་བ་དེ་ལ་སྲས་བཀྲ་ཤིས་དབང་རྒྱལ་འཁྲུངས། སྲས་འདི་ཉིད་ཀྱིས་སྐབས་དེར་ནང་དམེ་བྱས་ནས་མཚོན་འོག་ཏུ་གྲོངས་སོང་བར་གྲགས། དེ་ནས་བསོད་ནམས་དབང་རྒྱལ་ལ་སྲས་གྲོངས་ནས་ཤུལ་དུ་སྲས་མོ་གཅིག་ལས་སྲས་མེད་སྟབས་སྲས་མོ་དེ་ཁང་སར་ཚང་གི་དཔོན་དངོས་གྲུབ་ཏིང་འཛིན་འཇིག་མེད་ཀྱིས་བག་མར་བླངས་ནས་སྔོན་ཆད་ཁང་སར་དང་མ་ཟུར་གཉིས་སྟབས་མ་ལེགས་པའི་ཉེན་ཡོལ་གྱི་གཅིག་འགྱུར་ཡོང་ཆེད་དཔོན་ཚང་སྐྱར་གསོ་བྱེད་པའི་རྨང་གཞི་གཏིང་ཡང་། དངོས་གྲུབ་ཏིང་འཛིན་འཇིགས་མེད་ཀྱི་བཙུན་མོ་མ་ཟུར་སྲས་མོ་སྐུ་ཚེ་ཡུན་རིང་མ་བརྟན་པར་ཚེའི་དུས་བྱས་ནས་ལྔ་པའི་ལམ་དུ་ཕྱིན་སོང་། དེ་ནས་བཟུང་མ་ཟུར་ཚང་གི་དཔོན་བརྒྱུད་རིགས་རུས་དང་བཅས་པ་རྩ་བ་གཏིང་ནས་ཆད་སོང་བ་ཡིན་ནོ།། མ་ཟུར་དཔོན་རབས་རིམ་བྱུང་ནི། མ་ཟུར་དཔོན་དབང་ལུ། ཧོར་ནམ་མཁའ་བསམ་འགྲུབ། ཧོར་བཱ་ཐུར་ནོ་ཡོན། ཧོར་དཱ་ཧན་ནོ་ཡོན། ཧོར་བསོད་ནམས། ཧོར་སྟོབས་ལྡན། ཧོར་ཏིང་འཛིན་དབང་པོ། ཧོར་ནམ་མཁའ་དབང་རྒྱལ། ཧོར་ཚེ་དབང་རྣམ་རྒྱལ། ཧོར་བསོད་ནམས་དབང་རྒྱལ། ཧོར་བཀྲ་ཤིས་དབང་རྒྱལ་བཅས་སོ།། གོང་གི་དཔོན་རབས་དེ་དག་ཤ་ཁྲག་གཅིག་ལས་ཆད་པའི་ཕ་མེས་ཀྱི་བརྒྱུད་པ་ཟམ་མ་ཆད་པར་བྱུང་ནའང་དེ་ཐམས་ཅད་མཐར་ཚེ་གཅིག་གི་མགོ་མཇུག་ཏུ་བསྡུས་སོང་བ་འདི་ལ་བསམ་ན་འཁོར་བའི་བྱ་བཞག་འདི་ཇི་ལྟར་ཡ་མཚན་ཆེ་ཡང་སྐྱེས་པའི་མཐར་འཆི་བ་དང་། འདུས་པའི་མཐར་འབྲལ་བ་ཟེར་བའི་དཔེ་དེ་ལོས་བདེན་སྙམ་པའི་ངེས་ཤེས་གཏིང་ཚུགས་པ་ཞིག་སྐྱེ་བར་འགྱུར་རོ།།། དེ་ལྟར་ནའང་སྔོན་མ་ཟུར་དཔོན་རབས་དེ་དག་གིས་དབང་བསྒྱུར་བྱས་པའི་འོག་གི་འབངས་སྡེ་རྣམས་རྩ་བ་ཆད་མེད་པས་དེ་དག་ཁང་སར་ཚང་གིས་འོག་ཏུ་རྒྱུན་བསྐྱངས་བྱས་པ་ལགས་སོ།། གཉིས་པ་བྲེ་བོའི་དཔོན་རབས་ཇི་ལྟར་ཆད་པ་དང་དཔོན་ཐབས་ཀྱི་དབང་བསྒྱུར་གང་འདྲ་བྱས་པའི་སྐོར་ཅུང་ཟད་བཤད་ན། བྲེ་བོའི་དཔོན་རབས་ཇི་ལྟར་ཆད་པའི་སྐོར་ཅུང་ཟད་བཤད་པ་ལ། དེ་ཡང་མཁས་དབང་བེ་རུ་དགེ་བཤེས་འཇིག་མེད་དབང་རྒྱལ་གྱིས་འདི་ལྟར་གསུངས་ཏེ། བོད་མིའུ་གདུང་དྲུག་ལས་འདི་ཡང་ཨ་ལྕགས་འབྲུ་ཡི་གདུང་ནས་ཆད་པའི་ཚོ་པ་ཞིག་སྟེ་ཚོ་དཔོན་ཡང་འབྲུ་ཡི་རིགས་ཀྱི་ཁྲོ་བོ་ཐོག་རྫིས་ཞེས་པ་ནས་མི་རབས་ཉེ་བརྒྱད་ཀྱིས་དཔོན་ས་བཟུང་བ་བཤད་པ་དང་། [ དེ་ཡང་མཁས་དབང་བེ་རུ་དགེ་བཤེས་འཇིག་མེད་དབང་རྒྱལ་གྱིས་བརྩམས་པའི་ཏྲེ་ཡི་ལོ་རྒྱུས་ལས། བོད་མིའུ་གདུང་དྲུག་ལས་འདི་ཡང་ཨ་ལྕགས་འབྲུ་ཡི་གདུང་ནས་ཆད་པའི་ཚོ་པ་ཞིག་སྟེ་ཚོ་དཔོན་ཡང་འབྲུ་ཡི་རིགས་ཀྱི་ཁྲོ་བོ་ཐོག་རྫིས་ཞེས་པ་ནས་མི་རབས་ཉེ་བརྒྱད་ཀྱིས་དཔོན་ས་བཟུང་བ་བཤད་པ་དང་། གོང་གི་ཏྲེ་རབས་སྤྱིའི་བྱུང་བ་བཤད་པ་གཉིས་ཕལ་ཆེར་གནད་གཅིག་སྟེ། ཁྲོ་བོ་ཐོག་རྫིས་ཞེས་པའང་གོང་དུ་བགྲངས་པའི་ཏྲེ་རབས་དེ་དག་གི་བར་མཚམས་ཤིག་ཡིན་ངེས་སྙམ། ཞེས་གསུངས་པ་ལྟར་ན། ] འདིའི་དོན་དང་གོང་གི་ཏྲེ་རབས་སྤྱིའི་བྱུང་བ་བཤད་པ་གཉིས་ཕལ་ཆེར་གནད་གཅིག་སྟེ། ཁྲོ་བོ་ཐོག་རྫིས་ཞེས་པའང་གོང་དུ་བགྲངས་པའི་ཏྲེ་རབས་དེ་དག་གི་བར་མཚམས་ཤིག་ཡིན་ངེས་སྙམ། ཞེས་གསུངས་པ་ལྟར་ན། བོད་སིལ་བུར་འཐོར་ནས་འོག་གི་རྒྱལ་ཕྲན་རྣམས་ཀྱང་ཆགས་འཇིག་ཅི་རིགས་བྱུང་བ་དང་བསྟུན་ནས་ཏྲེ་རབ་དབྲ་ཡིས་དབང་བསྒྱུར་བྱས་པའི་སྐབས་དེར་དབྲ་དཔོན་གྱིས་ཏྲེ་བོའི་མནྜལ་ཐང་གི་ལྟེ་བར་བྱས་པའི་ཉེ་འཁོར་གྱི་སྡེ་འབངས་རྣམས་མངའ་འོག་ཏུ་བསྡུས་པ་ཙམ་ལས་ཏྲེ་ཤོད་སྟོད་སྨད་བར་གསུམ་ལ་དབང་བསྒྱུར་བྱས་མེད་པར་འདྲ་སྟེ། བྲེ་བོའི་དཔོན་གྱི་མངའ་འོག་ཏུ་ཡོད་པའི་འབངས་སྡེ་དེ་དག་སྔོན་ཏྲེ་བོའི་ས་ཁུལ་མནྜལ་ཐང་གི་སྟོད་སྨད་ཟུར་ཞིག་ནས་ཆད་པའི་འབངས་སྡེ་ཡིན་པར་ངེས་ཏེ་བོད་སིལ་བུར་འཐོར་ནས་དེ་དང་ཆབ་ཅིག་ཏུ་ཏྲེ་རབས་ཀྱང་འཐོར་ཞིག་སོང་བའི་ཤུལ་དུ་བྲེ་བོའི་འབངས་སྡེ་རྣམས་དཔོན་ཆུང་གཅིག་གི་འོག་སྡེར་ཆགས་ནས་དབྲ་དཔོན་གྱི་མངའ་འོག་མ་འདུས་པ་ཡིན་པར་རྒྱུ་མཚན་རིག་པ་དུ་མའི་སྒོ་ནས་སྒྲུབ་ཐུབ་བར་ཡིན་ནོ།། གང་ལྟར་ཡང་ཏྲེ་བོའི་དཔོན་རབས་ནི་བེ་རི་འཇིག་མེད་ཀྱི་བཤད་པ་ལྟར་ན་ཧོར་ནམ་མཁའ་རྒྱལ་མཚན་གྱིས་དབང་བསྒྱུར་མ་བྱས་བར་གོང་དུ་བཤད་པ་ལྟར་ཐོག་མའི་ཏྲེ་ཡི་དཔོན་རྒྱུད་མ་ཉམས་པར་ཏྲེ་རབས་མཐའ་མ་ཏྲེ་བོ་དཔལ་འབྱོར་རྡོ་རྗེའི་བར་ཁྲིམས་མགོ་རང་སྐྱོང་བྱེད་པའི་ཏྲེ་བོའི་ས་ཁུལ་དེར་འཚོ་སྡོད་བྱས་ཡོད་པར་རྗེས་སུ་དཔོག་ཐུབ། དེ་ལྟར་ཏྲེ་ཧོར་དཔལ་འབྱོར་རྡོ་རྗེའི་སྔར་ཕྱི་བཙུན་མོ་གསུམ་བླངས་པར་གྲགས་ཀྱང་སྲས་མོ་ལྷ་ལྕམ་བསོད་ནམས་སྒྲོལ་མ་གཅིག་པུ་མ་གཏོགས་གདུང་སྲས་གཅིག་ཀྱང་མ་སྐྱེས་པར་གྲགས།། སྐབས་དེར་ཧོར་ནམ་མཁའ་རྒྱལ་མཚན་གྱིས་ཐོག་མར་བྲེ་བོའི་ས་ཁུལ་དུ་དབང་བསྒྱུར་བྱས་པར་རྒྱུད། ཁོ་རང་གིས་བཙུན་མོ་འབྲིང་བའི་བུ་ཆེ་བ་དབང་པོ་ལྷ་ལྕམ་བསོད་ནམས་སྒྲོལ་མའི་མག་པ་གཏོང་། དུས་དེ་ནས་བཟུང་སྟེ་ཏྲེ་ཡི་གདུང་རྒྱུད་ཆད་ནས་བཙན་པོ་ཧོར་གྱི་གདུང་རིགས་ཀྱི་དཔོན་སར་བཟུང་ཏེ་ས་ཁུལ་དེར་དབང་བསྒྱུར་བྱེད་པའི་ཐོག་མར་འགོ་ཚུགས་པར་དེ་ནས་གྲགས་སོ།། བྲེ་བོའི་དཔོན་རབས་རིམ་བྱུང་ནི། ཏྲེ་བོ་དཔལ་འབྱོར་རྡོ་རྗེ། ཏྲེ་བོ་དཔོན་དབང་པོ། ཨོ་ཆེན་ནོ་ཡོན་ནམ་ཧོར་ངག་དབང་གྲགས་པ། དཱ་ཧན་ནོ་ཡོན། དུ་ར་ནོ་ཡོན། བསོད་ནམས་ནོར་བུ། ཏྲེ་བོ་དཔོན་ཆུང་ཕྲིན་ལས་འཇིགས་མེད། ཏྲེ་བོ་དཔོན་དངོས་གྲུབ་བསྟན་སྐྱོང་། ཏྲེ་བོ་དཔོན་ཏིང་འཛིན་ཆོས་གྲགས། དཔོན་རབས་བཅུ་པ་འཇམ་དབྱངས་མཁྱེན་རབ་དབང་ཕྱུག་བཅས་སོ།། དེ་ལྟར་དཔོན་རབས་བཅུའི་ནང་གི་མཐར་མཇུག་གི་དཔོན་འཇམ་དབྱངས་མཁྱེན་རབ་དབང་ཕྱུག་ལ་བོད་སྡེ་པ་གཞུང་གི་མདའ་དཔོན་བསྐོ་བཞག་གི་ཐོབ་ཐང་སྤྲོད་པའི་ལོ་རྒྱུས་རྣམས་ཆིང་སྲིད་གཞུང་གི་སྐུ་ཚབས་དམག་སྤྱིའི་ཤེས་སོང་བས། དེ་ནས་བཟུང་སྡེ་པ་གཞུང་དང་ཟླ་འབྲེལ་བྱེད་མི་ཆོག་པའི་བཀག་སྡོམ་དང་ཁྲིམས་བསྒྲགས་བྱས་ཏེ་མཐར་སྐུ་སྲོག་གོ་མིང་ཏང་གིས་ལག་དུ་གྲོངས་སོང་བའི་ལོ་རྒྱུས་དེ་ལ་བརྟེན་ནས་བྲེ་བོའི་གདུང་རྒྱུད་དཔོན་རབས་དང་བཅས་པའི་རྩ་བ་དེ་ནས་ཆད་སོང་བར་གྲགས་སོ།། གསུམ་པ་བྲག་མགོའི་དཔོན་རབས་ཇི་ལྟར་བྱུང་བའི་སྐོར་བཤད་པ་ལ། བྲག་མགོ་དཔོན་ཐོག་མར་ཧོར་ནམ་མཁའ་རྒྱལ་མཚན་གྱིས་ཧོར་སྟོད་སྨད་བར་གསུམ་ལ་དབང་བསྒྱུར་བྱས་ནས་སྐུ་ཚེའི་མཇུག་ཏུ་ཁོ་རང་གི་བཙུན་མོ་ཆུང་བ་ལ་བུ་གཉིས་བཙས་པའི་ནང་གི་ཆེ་བ་ནོར་བུ་བྲག་མགོའི་ས་ཁུལ་ལ་དབང་བསྒྱུར་བྱེད་པའི་དཔོན་ཐབས་སུ་མངའ་གསོལ་མཛད་པ་ཡིན་ལ། སྤྱིར་ཧོར་མ་གསུམ་བུ་དྲུག་ཅེས་པའི་ནང་ཧོར་ནམ་མཁའ་རྒྱལ་མཚན་གྱིས་བཙུན་མོ་གསུམ་བཞེས་པ་ལ་བཙུན་མོ་རེ་ལ་བུ་སྐྱ་སེར་གཉིས་རེ་བྱུང་བའི་ནང་ཆེ་བ་སྐྱ་བོ་གསུམ་ལ་བཙན་པོ་ཧོར་གྱི་དཔོན་རབས་རྒྱུད་འཛིན་གྱི་གོ་ཐོབ་སྤྲོད་པ་དང་། བཙུན་མོ་ཆེ་བའི་བུ་མ་ཟུར་དབང་ལུ་ལ་མ་ཟུར་ཚང་དཔོན་རྒྱུད་ཀྱི་སྐུ་ཚབ་ཀྱི་དབང་ཆ་སྤྲོད་ནས་ད་ལྟ་དཀར་མཛེས་རྫོང་སྒོ་སྟོད་སྨད་ཀྱི་ས་རིས་སྡེ་གསུམ་ལ་དབང་བསྒྱུར་བྱེད་པའི་གོ་ཐོབ་སྤྲོད་པ་མ་ཟད་ཏྲེ་ཤོད་སྤྱི་པའི་མགོ་གཙོའི་གོ་ཐོབ་སྤྲོད་པ་དང་། བཙུན་མོ་འབྲིང་བའི་བུ་དབང་ལུ་ལ་བྲེ་བོ་ས་ཁུལ་ཏུ་དབང་བསྒྱུར་བྱེད་པའི་གོ་ཐོབ་གནང་བ་དང་། བཙུན་མོ་ཆུང་བའི་བུ་ནོར་བུ་ལ་བྲག་མགོའི་ས་རིས་སྡེ་གསུམ་ལ་མངའ་དབང་བསྒྱུར་བར་བྱེད་པའི་དཔོན་ཐོབ་ཀྱི་གོ་གནས་བྱིན་པ་གྲགས། དེ་ནས་མ་ཟུར་དབང་ལུ་དང་ཧོར་ཆོས་རྗེ་ངག་དབང་ཕུན་ཚོགས་གཉིས་ཞིང་ལ་གཤེགས་པའི་རྗེས་སུ་ཧོར་ཚང་སྤྱི་པའི་དཔོན་འོག་ཏུ་གཞན་རྣམས་ཀྱིས་མགོ་མ་སྒུར་བར་རང་སྡེ་རང་སྐྱོང་ལྟ་བུའི་གོ་ཐོབ་བཟུང་བར་གྲགས། བྲག་མགོའི་དཔོན་ནོར་བུ་དང་ཕ་གཅིག་ཡིན་པ་ལ་མ་ཁ་ཁ་ཡིན་པའི་ཧོར་ཆོས་རྗེ་ངག་དབང་ཕུན་ཚོགས་ལྷ་དབང་ཕྱོགས་ལས་རྣམ་པར་རྒྱལ་བ་དེ་ཉིད་ཀྱི་གདན་ས་གཙོ་བོ་ཧོར་བྲག་མགོའི་དགའ་ལྡན་རབ་བརྟན་རྣམ་རྒྱལ་གླིང་ལ་བྱས་ནས་ས་གནས་དེའི་དགོན་སྡེ་གཉིས་ཀྱི་མཆོད་ཡོན་གྱི་སྡེ་དང་བླ་སློབ་ཀྱིས་འབྲེལ་བ་ཟབ་མོ་ཚུགས་པར་གྲགས། ནུ་བོ་ནོར་བུས་ཀྱང་ཆོས་སྲིད་ཟུང་འབྲེལ་གྱིས་མངའ་འབངས་མཐའ་ནས་སྐྱོང་ཞིང་ཡུལ་དེའི་སྡེ་འབངས་རྣམས་ཀྱིས་དཔོན་ནོར་བུ་ཞེས་གྲགས་པ་དོན་ལྡན་གྱི་སྙན་པའི་གཏམ་གྱིས་རོལ་མོས་འཛིན་མའི་ཁྱོན་དུ་ཁྱབ། སྐབས་དེའི་བྲག་མགོའི་དཔོན་གྱི་དབང་བསྒྱུར་བྱས་པའི་མངའ་ཁོང་ནི་ད་ལྟའི་བྲག་མགོ་རྫོང་གི་ས་གནས་གཞིར་བཞག་བྱས་ཐོག་རྫ་ཁོག་གི་རྫ་སྟོད་སྨད་བར་གསུམ་དང་། གསེར་རྟ་ཚོ་པའི་མ་ལག་བཅོ་བརྒྱད་དང་བཅས་པ། མགོ་ལོག་དང་གོང་ལམ་ཕྱོགས་གསུམ་བཅས་ཡིན་པ་གྲགས་ཀྱང་། ཕྱིས་སུ་ཧོར་སེར་ད་ར་ཁག་གི་བེ་རི་ཚང་ལ་ས་རིས་སྡེ་གསུམ་གྱི་སྐལ་ཐོབ་སྤྲོད་པའི་ནང་རྫ་སྟོད་སྨད་དང་གོང་ལམ་སོགས་ཀྱི་ནང་བྲག་མགོའི་དཔོན་གྱིས་བགོ་སྐལ་བྱིན་ཡོད་པར་གྲགས་ལ། གསེར་རྟ་ཚོ་ཆེན་བཅོ་བརྒྱད་པོ་དེ་དག་བྲག་མགོའི་དཔོན་དྲིན་ཆེ་ཚེ་དབང་ནོར་བུའི་དབང་བསྒྱུར་བྱས་པའི་སྐབས་ས་བཙོང་བྱས་པར་གྲགས་པའི་ས་གནས་དེར་བཤད་ཡམས་དེང་དུས་ཀྱང་ཡོད་པར་བཞེད་དོ།། བྲག་མགོ་དཔོན་ནོར་བུའི་སྐབས་དེར་ཧོར་དགོན་སྡེ་དང་བླ་བྲང་ཁག་གི་བླ་སྤྲུལ་ཆེ་ཁག་གི་ནང་ནས་སྟོང་བསྐོར་ཞབས་དྲུང་རིམ་བྱོན་དང་། ལམ་བྲག་སྐལ་བཟང་རྣམ་རྒྱལ་སོགས་ལམ་བྲག་སྐུ་ཕྲེང་རིམ་བྱོན། བྲག་དཀར་སྐུ་ཕྲེང་རིམ་བྱོན། བུ་རམ་སྣ་བློ་ལྡན་ཆོས་འཕེལ། ཁང་སར་སྐྱབས་མགོན། རྫ་ཆོས་རྗེ་སྐུ་ཕྲེང་གསུམ་པ་སོགས་བླ་སློབ་ཀྱི་དམ་ཚིག་གཅིག་པ་དང་མཆོད་ཡོན་གྱི་འབྲེལ་བ་ཟབ་པའི་དབང་གིས་བླ་སྤྲུལ་དེ་དག་གིས་ཐུགས་རྩེའི་ནམ་ཡང་མི་འདོར་བའི་སྦྱིན་པའི་བདག་པོའི་རྣམ་དཀར་གྱིས་ལས་ལ་འབད་པར་བསམ་གྱིས་མི་ཁྱབ་པར་མཛད་པའི་ལོ་རྒྱུས་རྒྱས་པ་ནི་བླ་སྤྲུལ་དེ་དག་གི་རྣམ་ཐར་ལས་གསལ་བས་འདིར་མ་སྤྲོས་སོ།། བྲག་མགོའི་དཔོན་རབས་ཀྱི་མིང་རགས་རིམ་ཙམ་ཞིག་ཞུས་ན། བྲག་མགོའི་དཔོན་ནོར་བུ། བྲག་མགོའི་དཔོན་དྲིན་རྗེ་ཚེ་དབང་ནོར་བུ། ཆོས་མཛད་བློ་བཟང་མཁས་གྲུབ། བྲག་མགོ་དཔོན་དབང་ཆེན་དགྲ་འདུལ་བཅས་སོ། །གོང་གི་དཔོན་རབས་འདི་དག་གི་མངའ་འོག་ཏུ་དགོན་སྡེ་དང་ཡུལ་སྡེ་མང་དུ་ཡོད་པ་བཤད་ཀྱང་ཕྱིས་སུ་ས་ཁུལ་སྟོད་སྨད་ཁག་བགོས་བྱས་ནས་དེ་དག་གི་ས་མིང་ཆུ་མིང་དང་། དཔོན་སར་མཚམས་ཐིག་སོགས་ཞིབ་ཕྲ་བྱས་པའི་ཁུངས་ལྡན་གྱི་ལོ་རྒྱུས་ཡིག་ཆ་རྙེད་སོན་མ་བྱུང་བས་གང་བྱུང་དུ་བཤད་པའི་ངལ་བར་མ་བྱས་སོ།། བཞི་པ་བེ་རིའི་དཔོན་རབས་ཇི་ལྟར་ཆད་ཚུལ་ནི། སྤྱིར་བེ་རི་ཞེས་འབོད་པའི་མིང་འདི་རིང་མོ་ཞིག་ནས་ཡོད་པའི་རུས་མིང་ཞིག་ཡིན་པ་དང་། དེའང་བོད་ཀྱི་རུས་ཆེན་བཞིའི་ནང་གང་གི་ཁོངས་སུ་གཏོགས་པ་ཡིན་ཞེ་ན། མཚོ་སྔོན་མི་རིགས་དཔེ་སྐྲུན་ཁང་གིས་པར་བསྐྲུན་བྱས་པའི་རུས་མཛོད་མེ་ཏོག་སྐྱེད་ཚལ་གྱི་སྡེབ་༩༢པའི་ནང་འདི་ལྟར་གསུངས་ཏེ། སྔོན་ཁམས་བེ་རི་རྒྱལ་པོ་ཞེས་པར་ཁམས་ཀྱི་རྒྱལ་པོ་ཆེན་པོ་དེའི་གདུང་རིགས་ནི། ལྷ་གདོང་དཀར་པོ་རྒྱུད་པ་དངོས་དེ་ཡིན་ལ། ཞེས་གསུངས་པ་དང་། ཡང་དེ་ཉིད་ལས། བར་སྐབས་སུ་བེ་རི་རྒྱལ་པོ་དོན་ཡོད་རྒྱལ་བློན་ནས་བླ་མ་དང་དགོན་པ་སྤྱི་པ་ཁྱད་པར་དུ་དགེ་ལུགས་པ་ལ་གནོད་ཚབ་ཆེ་བས། དགེ་ལུགས་ཀྱི་སྦྱིན་བདག་ཆེན་མོ་སོག་པོ་ཨུ་ལོད་རྒྱལ་པོ་གོ་ཤྲི་ཧན་དཔུང་བཅས་ཀྱི་བཅོམ་ནས་རྒྱལ་ས་འཁོར་བཅས་ཐམས་ཅད་བཅོམ་ཞིང་གཏོར་བ་ཡིན་ལ། བར་ཁམས་ངོམ་ཤོད་དུ་ལྡོང་དཀར་པོའི་མི་རྒྱུད་འདི་ཡོད་གསུངས་པ་སོགས་ལ་བརྟག་ན། བོད་ཀྱི་རུས་ཆེན་བཞིའི་ནང་གི་ལྷ་ལྡོང་དཀར་པོའི་རྒྱུད་པ་མ་ཉམས་པར་ཡིན་པ་ར་སྤྲོད་བྱས་ཡོད་པ་དང་། བར་ཁམས་ངོམ་ཤོད་དུ་ལྡོང་དཀར་པོའི་མི་རྒྱུད་འདི་ཡོད་གསུངས་པ་དེས། བར་ཁམས་ཀྱི་སའི་ཆར་གཏོགས་ནི་འབྲི་ཆུ་དང་རྫ་ཆུ་འབབ་ཡུལ་གྱི་ཁམས་ཀྱི་ས་ཆ་སྟེ། དེང་དུས་སྡེ་དགེ་དང་མི་ཉག འབའ་ལི་རྒྱལ་གསུམ། ཤོ་སྟར་ལྷོ་གསུམ། སྨར་བྲག་ཆབ་གསུམ། དཀར་བྲག་དར་གསུམ་སོགས་ཡིན། ངོམ་ཤོད་ནི་དེང་དུས་ཆབ་མདོ་ཁུལ་སྲིད་གཞུང་གི་མངའ་ཁོངས་སྨར་ཁམས་དང་གོ་འཇོ་བྲག་གཡབ་གང་རུང་གི་སའི་ཆར་གཏོགས་ཤིག་ཡིན་ངེས་སྙམ་པས་དཔྱད་པ་འཚལ། སྔོན་བསྐལ་པ་ཡ་ཐོག་གི་སྐབས་ཞང་ཞུང་དང་བོད་གྲུ་གུ་དང་གེ་སར་སོག་པོ་སོགས་རྒྱལ་ཕྲན་དུ་མ་གྱེས་པའི་ནང་བེ་རི་འདི་རྒྱལ་ཕྲན་གང་གི་ཁོངས་སུ་གཏོགས་པ་ཡིན་སྙམ་ན། དེ་ནི་གོ་དུ་ཞུས་པ་ལྟར་སྐབས་དེར་ཁམས་ཀྱི་ས་ཆ་མང་ཆེ་བ་དེ་བེ་རིས་མངའ་འོག་ཏུ་དབང་བསྒྱུར་བྱས་པའི་ལོ་རྒྱུས་ལས་གསལ་བར་ལྟར་སུམ་པ་ངོས་འཛིན་བྱེད་སྐབས་ལོ་རྒྱུས་དག་ཏུ་དེང་སང་གི་སྨར་ཁམས་དང་གོ་འཇོ་བྲག་གཡབ་རྒྱལ་རོང་སོགས་སུ་ངོས་འཛིན་བྱས་ཡོད་སྟབས་བེ་རི་ཡང་སུམ་པའི་མངའ་འོག་ཡིན་པར་ཟུར་ལྟས་ལེབ་མཐོང་གིས་ཤེས་ཐུབ། དེ་ཡང་རྒྱ་བོད་ཡིག་ཚང་ཆེན་མོ་ལས། ཕུ་བོ་བེ་ལ་མཆེད་དྲུག་ཡོད། །སྟོད་ན་པ་ཚབ་འབྲི་གཡག་གཉིས། །བར་ན་རོ་འཛི་རག་ཤ་གཉིས། །སྨད་ན་མེ་ཉག་ཇི་ཐན་གཉིས། །ཆེ་དྲུག་མཚན་ལ་བཙུན་དྲུག་སྟེ། །བེ་རི་ལ་མདོ་དང་གླིང་པ་གཉིས། །རོ་འཛི་ལ་ཕུ་དང་འདབ་པ་གཉིས། །གྱི་ཐན་ལ་རྒྱས་སྡུས་ཆེ་ཆུང་གཉིས། །དེ་ཆེ་བཙུན་སྤེལ་མ་བཅུ་གཉིས་ཡིན། ། ཞེས་པ་ལྟར། [ དེ་ཡང་རྒྱ་བོད་ཡིག་ཚང་ཆེན་མོ་ལས། ཕུ་བོ་བེ་ལ་མཆེད་དྲུག་ཡོད། །སྟོད་ན་ཕ་ཚབ་འབྲིང་ཡས་གཉིས། །བར་ན་རོ་འཛི་རག་ཤ་གཉིས། །སྨད་ན་མེ་ཉག་ཇི་ཐན་གཉིས། །ཆེ་དྲུག་མཚན་ལ་བཙུན་དྲུག་སྟེ། །བེ་རི་ལ་མདོ་དང་གླིང་པ་གཉིས། །རོ་འཛི་ལ་ཕུ་དང་འདབ་པ་གཉིས། །གྱི་ཐན་ལ་རྒྱས་སྡུས་ཆེ་ཆུང་གཉིས། །དེ་ཆེ་བཙུན་སྤེལ་མ་བཅུ་གཉིས་ཡིན། ། ] བེ་རི་ཞེས་པའི་མིང་འདི་རིང་མོ་ཞིག་ནས་རུས་ཀྱི་སྒོ་ནས་ཐོགས་པའི་མིང་ཡིན་པར་རྗེས་སུ་དཔོག་ཐུབ། དེའང་སྔོན་ཁམས་བེ་རི་རྒྱལ་པོ་ཞེས་རྒྱལ་པོ་ཆེན་པོ་དེའི་གདུང་རིགས་ནི་ལྷ་ལྡོང་དཀར་པོ་རྒྱུད་དངོས་དེ་ཡིན་པ་གོང་དུ་ཡང་བཤད་ཟིན་ཏོ།། ད་ནི་སྨུག་པོ་ལྡོང་གི་རྒྱུད་པ་ཡིན་པའི་དབང་དུ་བཏང་ནའང་འདི་ལྟར་ཏེ། དེ་ཡང་དབུ་ནག་མི་བུ་འདྲ་ཆགས་ལས། སྨུག་པོ་ལྡོང་གི་ཆེ་རབ་བཤད་པ་ན། སྟོད་ན་ཚ་བ་འབྲི་གཡག་གཉིས། །དབུ་ནག་བོད་ཀྱི་མགོ་འཛིན་བྱེད། །བར་ན་ཁ་བོ་བེ་རི་གཉིས། །དབུ་ནག་བོད་ཀྱི་གཞུང་འཛིན་བྱེད། །སྨད་ན་མི་ཉག་ཁྱི་ཐན་གཉིས། །ཁམས་ཀྱི་མགོ་ལོ་རྡོག་པས་མནན། །ཞེས་ལྡོང་གི་རུས་མཛོད་བཅོ་བརྒྱད་དང་ཤུལ་ཆེན་བཅོ་བརྒྱད་སོགས་གྲངས་ཀྱི་དབྱེ་བའི་ནང་ཚན་བར་པ་ཁ་བོ་དང་བེ་རི་གཉིས་དབུ་ནག་བོད་ཀྱི་གཞུང་འཛིན་ཡིན་པ་ངོས་འཛིན་བྱས་ཡོད་པ་དངོས་བསྟན་མིག་མཐོང་ལག་ཟིན་དུ་གསལ་ལོ།། ལྷ་ལྡོང་དཀར་པོ་དང་སྨུག་པོ་ལྡོང་སྟེ་ལྡོང་རིགས་འདི་གཉིས་ཀ་འབྲོང་རབས་ལས་། ཡང་འདི་ལྟར་གསུངས་ཏེ། སྤོ་ཆུ་གནམ་ཆུ་དཀར་པོའི་སྲས། །ཡབ་ལྡོང་ཆེན་པོ་སྤོ་གྲོ་བྱུང་། །དེ་སྲས་ལྡོང་རྗེ་གཉའ་ཁྲི་བཙན། །ས་བདག་གཉན་ར་རྒྱལ་པོ་ཡི། །བུ་མོ་ཁབ་ཏུ་བཞེས་པ་ལས། །ལྡོང་གི་རུ་ཁྲི་རྒྱལ་པོ་ནས། །རིམ་རྒྱུད་ཆོས་འཕེལ་ནག་པོ་ལས། །འབྲོང་གླིང་གཉིས་ཀྱི་རྒྱུད་པ་བྱུང་། །ཞེས་དང་། འབྲོང་པའི་དེབ་སྨུག་ལས། །ཉི་མ་ལེབ་ཆེན་ཉི་མའི་བུ། །ཟླ་བ་ལེབ་ཆེན་ཟླ་བའི་བུ། །སྐར་མ་ལེབ་ཆེན་སྐར་མའི་བུ། །ཆོས་ལ་འཕན་དེ་ལྡོང་གི་བུ། །ཞེས་གསུངས་པའི་ཉི་མ་ལེབ་ཆེན་ནི་ལྷ་ལྡོང་དང་། ཆོས་འཕན་ནག་པོ་ནི་སྨུག་པོ་ལྡོང་གི་རྒྱུད་པ་ཡིན་པས་འདི་དག་ཕན་ཚུན་ཕ་ཚན་གྱི་རུས་རྒྱུད་གཅིག་པ་ལས་ཆད་པའི་རིགས་ཡིན་པས་དོན་ལ་འགལ་བ་ཅི་ཡང་མེད་དོ།།[ འབྲོང་རབས་ལས། སྤོ་ཆུ་གནམ་ཆུ་དཀར་པོའི་སྲས། །ཡབ་ལྡོང་ཆེན་པོ་སྤོ་གྲོ་བྱུང་། །དེ་སྲས་ལྡོང་རྗེ་གཉའ་ཁྲི་བཙན། །ས་བདག་གཉན་ར་རྒྱལ་པོ་ཡི། །བུ་མོ་ཁབ་ཏུ་བཞེས་པ་ལས། །ལྡོང་གི་རུ་ཁྲི་རྒྱལ་པོ་ནས། །རིམ་རྒྱུད་ཆོས་འཕེལ་ནག་པོ་ལས། །འབྲོང་གླིང་གཉིས་ཀྱི་རྒྱུད་པ་བྱུང་། །ཞེས་དང་། འབྲོང་པའི་དེབ་སྨུག་ལས། །ཉི་མ་ལེབ་ཆེན་ཉི་མའི་བུ། །ཟླ་བ་ལེབ་ཆེན་ཟླ་བའི་བུ། །སྐར་མ་ལེབ་ཆེན་སྐར་མའི་བུ། །ཆོས་ལ་འཕན་དེ་ལྡོང་གི་བུ། །ཞེས་གསུངས་སོ།] སྤྱིར་ཁམས་ལ་སྟོད་སྨད་བར་གསུམ་ཕྱེས་ནས་འདུས་བསྡོད་བྱས་པའི་ལོ་རྒྱུས་ནང་བེ་རི་འདི་བར་ཁམས་ཀྱི་སའི་ཆར་གཏོགས་དེང་དུས་ཆབ་མདོ་ས་ཁུལ་འདི་ཡིན་པ་གྲགས། དེའང་དུས་རིམ་མི་འདྲ་བའི་ནང་སྔ་ཕྱི་བར་གསུམ་གྱི་ནང་སྟོད་དུ་བྱུང་བའི་བེ་རི་དེ་སུམ་པ་རྒྱལ་པོའི་ཁོངས་གཏོགས་ཀྱི་བེ་རི་དེ་ཡིན་པ་ངོས་འཛིན་བྱས་ཡོད་ལ། དེ་ནས་དང་པོ་སྟོད་ཀྱི་ཨ་གྲགས་བེ་རིའི་མི་རྒྱུད་ལས་ཆབ་མདོ་བེ་རི་འདི་ཆད་པར་གྲགས་ལ། ཆབ་མདོའི་བེ་རི་འདི་གཞན་དང་མི་འདྲ་བའི་སྟོབས་འབྱོར་དང་མངའ་ཐང་སོགས་རྒྱས་པ་བྱུང་ནས་ཡུན་རིང་གཞིས་ཆགས་པར་བྱས། དེ་ནས་ཆབ་མདོའི་བེ་རིའི་སོག་པོ་གོ་ཤྲི་ཧན་ལ་གདོང་ལེན་གྱིས་འཐབ་འཁྲུགས་བྱས་ཀྱང་སོག་དམག་ལ་གདོང་ལེན་མ་ཐུབ་པར་མཐར་བེ་རི་རྒྱལ་པོ་ཆབ་མདོ་རུ་བཙོན་འཇུག་བྱས་ནས་སྲོག་ལ་རྒོལ་བར་བྱས་པ་དང་། ཤུལ་དུ་བེ་རི་འཐོར་ཞིག་དུ་སོང་བ་རྣམས་ཡུལ་བོར་ནས་མཐར་ཏྲེ་ཧོར་དུ་འཁྱར་ཏེ་མཚོ་ཁ་རྒྱལ་པོ་ལ་མགོ་འདོགས་ཞུས་པ་དང་། སྐབས་དེར་མཚོ་ཁ་རྒྱལ་པོའི་བཀའ་ལུང་ལ་བརྟེན་ནས་ཧོར་དཔོན་ནམ་མཁའ་རྒྱལ་མཚན་གྱིས་ཧོར་སེར་ད་ར་ཁག་གསུམ་གྱི་ས་རིས་སྡེ་གསུམ་གྱིས་བགོ་སྐལ་བྱིན་ནས་དེ་ནས་བཟུང་ཏྲེ་ཧོར་གྱི་བེ་རི་འདི་བྱུང་བས་ད་ར་ཁང་བཞིའི་ས་ཁུལ་རྒྱ་སྐྱེད་བྱུང་བ་མངོན། བེ་རི་དཔོན་རབས་རིམ་བྱུང་གི་མཚན་ནི། བེ་རི་སྨད་མའི་དཔོན་རབས་ཀྱི་དང་པོ་བེ་རི་རྩ་འབུམ། བེ་རི་ཆོས་འབུམ། བེ་རི་ཨ་འཕེན་རྒྱལ། བེ་རི་ཀླུ་བཙན་རྒྱལ། བེ་རི་དོན་ཡོད་བུ་རྒྱལ། བེ་བཟའ་ལྷ་འཛོམ། བེ་སྲས་དོན་གྲུབ་ནོར་བུ། བེ་སྲས་གཡུང་དྲུང་སྟོབས་རྒྱལ། བེ་བཟའ་ཆེ་བ་ཀུན་ལྷུན་གསང་ཡུམ། བེ་བཟའ་ཆུང་བ་ལྷ་ཐོག་ཡུམ། ལྷ་རྗེ་ངག་དབང་ཡེ་ཤེས། བེ་རི་རྒྱལ་སྲས། བེ་རི་ཁྲོམ་དགེ། བེ་རི་སྲས་ཀུན་དགའ་བསྟན་པའི་རྒྱལ་མཚན། བེ་རི་རྒྱལ་རྒན་མ། བེ་རི་མཁྱེན་བརྩེ་འོད་ཟེར། བེ་རི་དཔལ་ལྡན་སྒྲོལ་མ། བེ་རི་སྲས་དབང་འདུས། བེ་རི་བསོད་ནམས་རྒྱལ། བེ་རི་ནམ་མཁའ་རྒྱལ་བཅས་སོ།། དེ་ལྟར་བེ་རི་རྒྱལ་སྲས་དོན་གྲུབ་ནོར་བུའི་རང་གི་ཁྱིམ་ཚང་དང་འཁོར་འབངས་ལྷག་མ་རྣམས་ཁྲིད་ནས་ཆབ་མདོ་ནས་སྡེ་དགེ་རྒྱུད་དེ་ཏྲེ་ཧོར་དུ་བསླེབས་ནས་མཚོ་ཁ་རྒྱལ་པོ་ལ་སྙན་སེང་ཕུལ་བ་ལྟར་ཧོར་ཚང་གི་མ་ཟུར་དཔོན་གྱིས་མཚོ་ཁའི་རྒྱལ་པོའི་བཀའ་ལུང་དང་ལེན་གྱིས་སྐབས་དེར་ཧོར་མ་ཟུར་གཙོ་བོར་བྱས་པའི་ཏྲེ་བོ་བྲག་མགོ་བཅས་དཔོན་ཁག་གསུམ་གྱིས་ས་རིས་སྡེ་གསུམ་བགོ་སྐལ་སྤྲོད་པ་སོགས་གོང་དུ་ཞུས་ཡོད་ནའང་སུས་སྤྲོད་དང་གང་དུ་སྤྲོད་ཇི་ལྟར་སྤྲོད་སོགས་མ་སྨོས་པས་འདིར་ཅུང་ཟད་ཁ་གསལ་གྱི་ཚུལ་དུ་སྨོས་ན། དཔོན་ཁག་གསུམ་གྱིས་རང་རང་གི་ས་ཁོངས་ནས་དྲས་ཏེ་ས་ཞིང་དང་ཁང་གཞིས་སོགས་གྲོང་སྡེ་གསར་བཞེངས་ཀྱི་བགོ་སྐལ་གནང་བར་བརྟེན་འཚོ་སྡོད་ཀྱི་གཞིས་གསར་བསྐྲུན་པའི་ལོ་རྒྱུས་ནི། མཁས་དབང་བེ་རི་དགེ་བཤེས་ཀྱིས་ཏྲེ་རབས་ཧོར་གྱིས་དབང་བསྒྱུར་བྱས་པའི་སྐོར་ལས། ཏྲེ་བོ་དཔོན་གྱིས་གནང་བའི་ས་རིས་ཐོག་ད་ལྟའི་ཞི་སེར་དང་ཨ་གྲགས་ནང་། ཤིང་ཚང་དང་གོང་ལམ་ནང་། བྲག་མགོ་དཔོན་གྱིས་ས་རིས་ཐོག་མཁར་གསར་ལ་འདབས། མ་ཟུར་དཔོན་གྱིས་ས་རིས་ཐོག་བེ་རི་དང་། གཙང་འགྲམ། གསེར་མཁར། མདའ་མགོ། ཟླ་བ་དགོན། མོ་ལོ། འབའ། སྡེ་ཕྱི་སྟེང་། བྲག་འཁོར་འབོ་ཆོག་སོགས་དེང་སང་གི་བར་མཐོང་ཆོས་སུ་ཡོད་པ་དེ་དག་ཡིན་ཞེས་གསུངས་སོ།། ལྔ་པ་ཁོང་སར་དཔོན་རབས་ཇི་ལྟར་བྱུང་བའི་སྐོར་ལ། ཧོར་དཔོན་ནམ་མཁའ་རྒྱལ་མཚན་གྱིས་བཙུན་མོ་ཆེ་བའི་སྲས་མ་ཟུར་དབང་ལུའི་སྐབས་དེར་ཉག་རོང་ནས་བཙས་པའི་གཡོག་མོས་བུ་ཧོར་བཱ་ཐུར་ནོ་ཡོན་གྱི་བཙུན་མོ་གཉིས་བཞེས་པའི་ཆེ་བ་ཁྲོ་ཤུལ་བཟའ་ངག་དབང་དཔལ་མོ་ལ་སྲས་ཆེ་ཆུང་གཉིས་བྱུང་བའི་ཆེ་བ་དཱ་ཧན་ནོ་ཡོན་དང་མཁན་པོ་ཚངས་དབྱངས་གཉིས་འཁྲུངས། བཙུན་མོ་ཆུང་བ་བེ་བཟའ་མ་ལ་ཡང་སྲས་ཆེ་ཆུང་གཉིས་བྱུང་བའི་ཆེ་བ་རྡོ་རྗེ་རབ་བརྟན་དང་ཆུང་བ་བླ་མ་ངག་དབང་གཉིས་སྐྱེས། བཙུན་མོ་ཆེ་བའི་སྲས་ཆུང་བ་མཁན་པོ་ཚངས་དབྱངས་དང་བཙུན་མོ་ཆུང་བའི་སྲས་ཆུང་བ་བླ་མ་ངག་དབང་གཉིས་རབ་ཏུ་བྱུང་བ་དང་། བཙུན་མོ་ཆེ་ཆུང་གཉིས་ཀྱི་སྲས་ཆེ་བ་གཉིས་ནར་སོན་རྗེས་དཔོན་སར་མ་འདུམ་པར་བུ་གཉིས་ནང་འཁྲུགས་བྱས་པར་གྲགས། གནས་ལུགས་ལྟར་ན་བཙུན་མོ་ཆེ་བའི་སྲས་ཆེ་བ་དཱ་ཧན་ནོ་ཡོན་གྱིས་མ་ཟུར་དཔོན་གྱི་གོ་ཐབས་ལ་དབང་བསྒྱུར་བྱེད་དགོས་ན་ཡང་། ཆུང་བ་རྡོ་རྗེ་རབ་བརྟན་གྱིས་དེ་ལྟར་འཐད་པ་མ་བྱུང་བས་སྤྱི་ལོ་༡༧༢༨ལོར་མན་ཇུ་གོང་མ་ཡུང་ཀྲི་ཁྲི་ལོ་༡༧༣༥ལ་ཞུ་གཏུགས་བཅོལ་བར་བྱས་པས། གོང་མས་འཇལ་ས་དང་། བཀའ་རྟགས། བཀའ་ཡིག་བཅས་ཆོ་ལོ་བསྩལ་ནས་གནས་སྐབས་དཔོན་སའི་ཐོབ་ཐང་མེད་ན་ཡང་རིམ་གྱིས་ཟུར་དུ་སྡེ་དཔོན་བྱེད་ཆོག་པའི་བཀའ་ཕབ་པ་མ་ཟད། མན་ཇུ་གོང་མ་ཁྲི་སྟོན་མཛད་སྒོ་དང་བསྟུན་ནས་གོང་མའི་ཕོ་བྲང་དུ་མཇལ་སར་ཡོང་དགོས་པའི་བཀའ་ལུང་བསྩལ། དེ་ནས་ཏྲེ་ཤོད་ཆུ་ཉིན་སྲིབ་ས་རིས་སྡེ་གསུམ་དང་སྔོན་མ་ཟུར་དཔོན་གྱི་མངའ་འོག་ཏུ་ཡོད་པའི་རོང་འབྲོག་གཉིས་ཀྱི་སྡེ་འབངས་ཡོངས་རྫོགས་དཱ་ཧན་ནོ་ཡོན་དང་རྡོ་རྗེ་རབ་བརྟན་བུ་སྤུན་གཉིས་ལ་བགོས་ཏེ་མ་ཟུར་ལས་ཁང་སར་ཟུར་དུ་གྱེས་པ་དང་། སྲས་དཱ་ཧན་ནོ་ཡོན་་གྱིས་མ་ཟུར་མ་གཞིས་ཀྱི་དཔོན་རྒྱུད་འཛིན་པ་བྱས་པར་དང་། རྡོ་རྗེ་རབ་བརྟན་གྱིས་ཕོ་བྲང་གསར་དུ་རྒྱབ་ནས་ཁང་སར་ཚང་ཞེས་མཚན་གྱི་སྙན་གྲགས་ཏྲེ་ཤོད་ཆུ་ཉིན་སྲིབ་ལ་ཁྱབ་པར་གྱུར། མཁས་དབང་བེ་རི་འཇིག་མེད་ཀྱིས་དཔོན་པོ་འདིས་ལྕགས་ཁྱི་སྤྱི་ལོ་༡༧༣༠ལོར་རྒྱལ་མཆོག་སྐལ་བཟང་རྒྱ་མཚོ་མཇལ་བཅར་དང་འབྲེལ་བསྙེན་བཀུར་ཟབ་རྒྱས་ཞུས། སླར་ཡང་ཆུ་གླང་སྟེ་སྤྱི་ལོ་༡༧༣༢ལོར་གོང་ས་༧སྐྱབས་མགོན་ཆེན་པོར་བརྟན་བཞུགས་རྒྱ་ཆེར་ཕུལ། ཁྲི་ཆེན་ངག་དབང་མཆོག་ལྡན་མགར་ཐར་ནས་རང་གི་ཕོ་བྲང་དུ་གདན་དྲངས་ནས་ཆོས་འབྲེལ་བསྙེན་བཀུར་ཞབས་ཏོག་རྒྱ་ཆེར་མཛད་པ་སོགས་སྐུ་ཚེ་གང་པོར་བསྟན་འགྲོའི་ཕན་བདེ་ཐུགས་ལ་བཅངས་ནས་མཛད་བཟང་བླ་མེད་བསྐྱངས་བར་གྲགས་ཞེས་གསུངས་པ་ལ་བརྟག་ན། ཡབ་ཧོར་བཱ་ཐུར་ནོ་ཡོན་དེ་ཆོས་དད་ཆེ་བས་ཁོང་གིས་སྲས་ཀྱང་དམ་པའི་ཆོས་ལ་ཁ་ཞེ་གཉིས་མེད་ཀྱི་དད་པའི་ས་བོན་ཡོད་པ་བླ་ཆེན་དེ་དག་དང་ཆོས་འབྲེལ་ཐོགས་པ་བྱས་པའི་རྟགས་ཀྱིས་རྗེས་སུ་དཔོག་ཐུབ། ཁང་སར་ཚང་གི་དཔོན་རབས་ཐོག་མར་རྡོ་རྗེ་རབ་བརྟན་ལ་གདུང་སྲས་གཉིས་བྱུང་བའི་ཆེ་བ་ཏིང་འཛིན་དང་ཆུང་བ་ཆོས་མཛད་བློ་བཟང་རྣམ་རྒྱལ་གཉིས་འཁྲུངས་པ་གྲགས། སྲས་ཆེ་བ་ཏིང་འཛིན་གྱིས་ཁང་སར་ཚང་གི་དཔོན་རྒྱུད་འཛིན་པར་བྱས་པ་དང་། ཆུང་བས་སྤྱི་ལོ་༡༧༥༥་ལོར་ལམ་གྲགས་བསྐལ་བཟང་རྣམ་རྒྱལ་དཔལ་བཟང་པོ་མཆོག་བྱང་རྒྱུད་ནས་རང་ཡུལ་དུ་གདན་འདྲེན་ཞུས་པ་དང་། སྤྱི་ལོ་༡༧༩༢ལོར་དག་པའི་ཞིང་མཆོག་ཞི་བར་གཤེགས་སོང་བར་གྲགས། ཏིང་འཛིན་གྱི་བུ་ནོར་བུ་ལ་བསོད་ནམས་མཆོག་ལྡན་འཁྲུངས། སྲས་བསོད་ནམས་མཆོག་ལྡན་སྐུ་ནར་སོན་པ་དང་བཀྲ་ཤིས་སྒྲོལ་མའི་མཚན་ཅན་ཞིག་བཙུན་མོ་བཞེས་པས་དེ་ལ་སྲས་མོ་ཞིག་བཙས་ཀྱང་ཡུན་རིང་མ་འགོར་བར་མའུ་གཉིས་ཀ་ཚེ་ལས་འདས་སོང་བ་དང་། དཔོན་པོ་ཁོ་རང་ཡང་དེ་དང་ཆབ་ཅིག་ཏུ་ཕྱི་མའི་ཡུལ་དུ་གཤེགས་པར་གྲགས། དཔོན་བསོད་ནམས་མཆོག་ལྡན་ཞུ་བ་དེས་ཁང་སར་དཔོན་ཚང་གི་ལག་གཡོག་བྱེད་པའི་བུ་མོ་ཞིག་དང་ཞོར་དུ་ལྐོག་འབྲེལ་བྱས་ནས་དེ་ལ་སྲས་ཤིག་སྐྱེས་ནས་དཔོན་ཚང་གི་ནང་བློན་འགས་ཤེས་པ་ལས་གཞན་མང་ཆེ་བས་མ་ཤེས་པ་གྲགས། སྐབས་དེར་ནང་འཁོར་གྱི་སྡེ་དཔོན་དེ་དག་ནང་མ་འདུམ་པར་ཕན་ཚུན་བརྩོད་གཞི་ཅུང་བྱུང་བས། བསོད་ནམས་མཆོག་ལྡན་གྱི་ལྐོག་འབྲེལ་བྱས་པའི་གཡོག་མོ་དེས་བུ་རྒྱབ་ཏུ་ཁུར་ནས་བླ་མ་ལམ་གྲགས་ཚང་མཇལ་བར་ཕྱིན་པ་ན། ལམ་གྲགས་ཚང་ཐུགས་དགྱེས་ཚོར་དང་བཅས་འདི་ལྟར་གསུངས་ཏེ། ས་མཐའི་བྱིས་ལུས་ར་སློག་གྱོན། དཔོན་ལུ་བསྣམས་བཞེས་ཞུ་བའི་ལ་ཐང་མེད། །བུ་དེ་ལ་མིང་སྐལ་བཟང་དར་རྒྱས་ཐོགས་པར་གྱིས་ཞེས་གསུངས་སོ།། དེ་ནས་བུ་དེ་ཧོར་གྱི་གདུང་རྒྱུད་སོང་ནས་ཆེར་སྐྱེད་པ་ན་དཔོན་སར་འཁོད་པ་མ་ཟད་སྡེ་འབངས་རྣམས་ལ་ཤིན་ཏུ་བྱམས་བསྐྱངས་བྱེད་པའི་དཔོན་ཆེན་ཞིག་བྱུང་བ་མ་ཟད། ལྷ་དང་བླ་མ་ལ་དད་ཅིང་གུས་པ་ཆེན་པོའི་དཀོན་མཆོག་དང་རྟེན་གསུམ་གྱི་བཞེངས་པ་བསམ་གྱིས་མི་ཁྱབ་པར་མཛད་པར་གྲགས། དེ་ལྟར་ཧོར་སྲས་བསྐལ་བཟང་དར་རྒྱས་དེ་ཐོག་མར་དབུས་སུ་བྱོན་ནས་ར་མོ་ཆེའི་ཇོ་བོ་མི་སྐྱོད་རྡོ་རྗེ་དང་། གཙུག་ལག་ཁང་ཆེན་པོའི་སྐུ་རྟེན་ཤཱཀྱ་མུ་ནེ་སོགས་གསེར་ཞལ་གསོས་ནས་ལྷ་ལྡན་དུ་རྟེན་གསུམ་རྣམས་ལ་མཇལ་ཁ་ཞུས་པ་མ་ཟད་སེ་འབྲས་དགའ་གསུམ་ཕེབས་ནས་གྲྭ་ཚང་རྣམས་ལ་མང་ཇ་བཏང་བ་དང་ཆོས་མཇལ་ཞུས་པར་གྲགས། དེ་ནས་རིམ་བཞིན་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དང་ཟང་རི་མཁར་དམར་སོགས་སུ་ཕེབས་པར་མ་ཟད་ཡར་ལུང་རྟེན་གསུམ་གནས་གསུམ། ཁྲ་འབྲུག་སྒྲོལ་མ་ལྷ་ཁང་མཇལ་ནས་གཙང་ཕྱོགས་སུ་ཞབས་སོར་བཀོད་ནས་ས་སྐྱ་དང་ངོར་དགོན་གཙང་སྟོད་བཀྲ་ཤིས་ལྷུན་པོ་སོགས་ཀྱི་དགོན་སྡེ་དང་གྲྭ་ཚང་རྣམས་ལ་བསྙེན་བཀུར་དང་མཆོད་མཇལ་ཚད་མེད་ཞུས་པར་གྲགས། དེ་ནས་རང་ཡུལ་དུ་ཞབས་སོར་བཀོད་ནས་གཙང་གི་རྒྱལ་རྩེ་དཔལ་འཁོར་མཆོད་རྟེན་ལ་དཔེ་བླངས་ནས་ཕྱི་མཆོད་རྟེན་གྱི་རྣམ་པའི་དབྱིབས་ལ་ནང་ལྷ་ཁང་གི་གྲུ་ཆོད་ཅན་གྱི་བུམ་པ་མན་ཆད་ལ་ཐོག་བརྩེགས་ལྔ་ཙམ་ཡོད་པ་ཞིག་བཞེངས་བསྐྲུན་གནང་བར་མཛད། ད་དུང་གཞན་ཡང་ཆོས་ཐོག་ཚོགས་གསོག་པའི་རྟེན་དཀར་དགོན་གྱི་འདུ་ཁང་སྦུག་ཏུ་འཕགས་པ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་སྐུ་ཐོག་བརྩེགས་གཉིས་ཡོད་པ་ཞིག་བཞེངས་ཡོད་པར་གྲགས། དེ་ནས་ཁོང་གིས་བཙུན་མོ་སྒྲོལ་མ་ལྷ་མཚོ་ཁབ་ཏུ་བཞེས་ནས་གདུང་སྲས་གསུམ་བྱུང་བར་གྲགས་ལ། སྲས་ཆེ་བ་དེ་རྫ་ར་བསྟན་པའི་དངོས་གྲུབ་ཀྱི་ཡང་སྲིད་དུ་ངོས་འཛིན་མཛད། སྲས་འབྲིང་བ་དེ་ཧོར་ཁང་སར་༧སྐྱབས་མགོན་སྐུ་ཕྲེང་དང་པོ་བློ་བཟང་ཚུལ་ཁྲིམས་ཀྱི་སྤྲུལ་པའི་སྐུ་སྐྱེ་ངོས་འཛིན་མཛད། སྲས་ཆུང་བ་དེ་སྐབས་དེའི་ཁང་སར་དཔོན་དངོས་གྲུབ་ཕུན་ཚོགས་ཀྱིས་ཁང་སར་ཚང་གི་དཔོན་སའི་གོ་ཐོབ་ཀྱི་མངའ་གསོལ་མཛད། གདུང་སྲས་ཆེ་བ་གཉིས་ཀྱིས་ཆོས་སྲིད་གཉིས་ཀའི་ཐད་ལ་ཕན་ཐོགས་རྒྱ་ཆེར་ཐོབ་པ་བྱུང་སྐད། ཁོང་གིས་དཀར་མཛེས་དགོན་པ་སོགས་ལའང་བཤད་སྒྲུབ་གཉིས་ཀྱི་ཐད་ལ་སྲི་ཞུ་མི་དམན་པར་མཛད་པའི་ལོ་རྒྱུས་ཡོད། དེ་ནས་ཕྱིས་སུ་སྡེ་དགེ་རྒྱལ་པོའི་སྲས་མོ་ཞིག་ཁབ་ཏུ་བཞེས་པར་གྲགས་ལ། བཙུན་མོའི་རྟེན་སྐལ་དུ་སྡེ་དགེ་རྒྱལ་པོས་བྱིན་ལྡན་གྱི་སྐུ་གསུང་ཐུགས་རྟེན་གནང་བ་དང་། སྡེ་དགེ་རྒྱལ་པོའི་ཤིན་ཏུ་མཐོང་ཆེན་མཛད་པ་གྲགས། དེ་ལྟར་ནའང་བཙུན་མོ་དེ་ལ་སྲས་མ་བྱུང་བས་དཔོན་འདིས་ལྐོག་ཏུ་བཙུན་མོའི་གཡོག་མོ་སྡེ་དགེའི་བྱེ་མོ་ཚང་གི་བུ་མོ་དེ་དང་ཞོར་དུ་འབྲེལ་བར་བྱས་པས་དེ་ལ་སྲས་མོ་གཅིག་བྱུང་བ་ནི་ཁང་སར་དཔོན་མོ་དབྱངས་ཅན་མཁའ་འགྲོ་ཡིན། སྲས་མོ་དབྱངས་ཅན་མཁའ་འགྲོ་ཆེར་སྐྱེད་པ་ན་སྡེ་དགེ་རྒྱལ་པོའི་སྲས་མོ་ལ་གདུང་སྲས་མ་བྱུང་བས་དེའི་རྐྱེན་གྱིས་བུ་ཚབ་ཏུ་ཨ་སྡུག་ཚང་གི་བུ་ཚེ་དབང་ཕུན་ཚོགས་དབྱངས་ཅན་མཁའ་འགྲོ་ལ་མག་པ་བསུས་ནས་སྲས་མོའི་ཆོ་གར་དབང་་བར་བྱས། དེ་གཉིས་ལ་སྲས་གཉིས་འཁྲུངས་བྱུང་བའི་ཆེ་བ་དེ་ཁང་སར་སྐྱབས་མགོན་སྐུ་ཕྲེང་གཉིས་པ་བློ་བཟང་མཐུ་སྟོབས་རྒྱ་མཚོའི་སྐུ་སྐྱེ་ངོས་འཛིན་གནང་པ་དང་། ཆུང་བ་དེ་ཁང་སར་དཔོན་དངོས་གྲུབ་བསྟན་འཛིན་འཇིག་མེད་གཉིས་ཡིན་ལ། སྲས་ཆུང་བ་དངོས་གྲུབ་ཏིང་འཛིན་འཇིག་མེད་འཁྲུངས་ནས་ཡུན་རིང་མ་འགོར་བར་ཨ་སྡུག་ཚེ་དབང་ཕུན་ཚོགས་དང་ཁ་བྲལ་སོང་བར་གྲགས། དེ་ནས་དངོས་གྲུབ་ཏིང་འཛིན་འཇིག་མེད་ན་སོན་པ་དང་གོང་དུ་ཞུས་པ་ལྟར་མ་ཟུར་དཔོན་བཀྲ་ཤིས་དབང་རྒྱལ་གྱིས་སྲས་མོ་བག་མ་བླངས། དེ་གཉིས་ལ་བུ་བུ་མོ་གཉིས་སྐྱེས་ཀྱང་བུ་དེ་ཆུང་དུས་ནས་ཡུན་རིང་མ་འགོར་བར་ཚེ་ཡི་དུས་བྱས་ནས་འཇིག་རྟེན་ཕ་རོལ་ཏུ་ཕྱིན་པ་མ་ཚད་ཕ་རྒན་དངོས་གྲུབ་ཏིང་འཛིན་འཇིག་མེད་ཀྱང་བུ་ཤི་ཤོར་བའི་སེམས་སྡུག་གིས་སྤྱི་ལོ་༡༩༢༥ལོར་ཚེའི་འདུ་བྱེད་ཡོངས་སུ་བཏང་སོང་བར་བཤད། སླར་ཡང་ཁོང་གི་མ་རྒན་དབྱངས་ཅན་མཁའ་འགྲོས་མ་ཟུར་དཔོན་པོས་དཔོན་ས་བཟུང་དགོས་བྱུང་བ་དང་། དེ་ནས་ཁང་སར་ཚང་གི་དཔོན་དངོས་གྲུབ་ཏིང་འཛིན་འཇིག་མེད་འདས་ནས་དུས་ཚོད་ཡུན་རིང་མ་སོང་བར་བཙུན་མོ་བེ་རི་སྲས་མོ་དཔལ་ལྡན་སྒྲོལ་མ་ལ་བེ་རི་དབང་འདུས་སྐྱེས་པ་དང་། ཁང་སར་དཔོན་མོ་དབྱངས་ཅན་མཁའ་འགྲོས་དཔལ་ལྡན་སྒྲོལ་མའི་བུ་དབང་འདུས་དེ་གཉེར་པ་བསོད་ནམས་ཕུན་ཚོགས་ཀྱི་བུ་ཡིན་པར་ངོས་འཛིན་བྱས་པས། ཁང་སར་ཚང་གི་མི་རྒྱུད་ཀྱི་གྲས་སུ་མ་འཇོག་བའི་རྐྱེན་གྱིས་བེ་རི་ཚང་དང་ཁང་སར་ཚང་བར་འཁྲུགས་ལོངས་ཚབ་ཆེན་ཐེབས་པའི་གྲབས་བྱུང་བ་དང་། དེ་ནས་ཁང་སར་སྐྱབས་མགོན་སྐུ་ཕྲེང་གཉིས་པ་བློ་བཟང་མཐུ་སྟོབས་རྒྱ་མཚོའི་གཙོའི་སྐུ་ཆེ་དཔོན་རབས་རྣམས་ཀྱིས་བར་འདུམ་བྱས་ཏེ་གཉེར་པ་བསོད་ནམས་ཕུན་ཚོགས་ཀྱིས་ཁང་སར་ཚང་ལ་དངུལ་སྲང་བརྒྱད་སྟོང་གི་བཤགས་པ་ཕུལ་དགོས་པ་དང་། སྲས་མོ་བདེ་ཆེན་དབང་མོས་ཁང་སར་དཔོན་གྱི་དཔོན་ཐབས་ཀྱི་ས་བཟུང་རྒྱུ་དང་གལ་སྲིད་དཔོན་མོ་ལ་གྱེན་ལོག་བྱུང་ཚེ་ཚེ་སྲོག་གི་ཁྲལ་འཇལ་ཁྲིམས་བཙུགས་ཀྱི་ཆོད་དོན་ཞལ་འཕངས་པར་མ་ཟད། བེ་རི་དཔལ་ལྡན་སྒྲོལ་མ་མ་བུ་གཉིས་ཀྱང་ཁང་སར་མ་གཞིས་ལ་འདུག་མི་ཆོག་པར་བེ་རི་ཚང་ལ་ཕྱིར་ལོག་འགྲོ་རྒྱུའི་གྲོས་ཐག་བཅད་ནས་འཇུག་འགྲིལ་སོང་བ་ཡིན། དེ་ནས་ཁང་སར་དཔོན་མོ་དབྱངས་ཅན་མཁའ་འགྲོ་གྲོངས་རྗེས་སུ་ཆེས་མཐར་མཇུག་གི་དཔོན་མོ་བདེ་ཆེན་དབང་མོས་ཁང་སར་ཚང་གི་དཔོན་སར་དབང་བསྒྱུར་བྱས་པ་ཡིན་ནོ།། ཧོར་ཁང་སར་ཚང་གི་དཔོན་རབས་ནི། དང་པོ་ཁང་སར་དཔོན་ཧོར་རྡོ་རྗེ་རབ་བརྟན། གཉིས་པ་ཁང་སར་དཔོན་ཧོར་བསྟན་འཛིན། གསུམ་པ་ཁང་སར་དཔོན་ཧོར་རྒྱལ་མཚན་ནོར་བུ། བཞི་པ་ཁང་སར་དཔོན་ཧོར་བསོད་ནམས་མཆོག་ལྡན། ལྔ་པ་ཁང་སར་དཔོན་ཧོར་བསྐལ་བཟང་དར་རྒྱས། དྲུག་པ་ཁང་སར་དཔོན་ཧོར་དངོས་གྲུབ་ཕུན་ཚོགས། བདུན་པ་ཁང་སར་དཔོན་མོ་ཧོར་དབྱངས་ཅན་མཁའ་འགྲོ། བརྒྱད་པ་ཁང་སར་དཔོན་ཧོར་དངོས་གྲུབ་བསྟན་འཛིན་འཇིགས་མེད། དགུ་པ་ཁང་སར་དཔོན་མོ་ཧོར་བདེ་ཆེན་དབང་མོ་བཅས་སོ།།
