ཉེ་ཆར། མེ་ཏོག་གྲོང་ཁྱེར་དཔེ་སྐྲུན་ཁང་དང་མེ་ཏོག་གྲོང་ཁྱེར་རྩོམ་རིག་སློབ་གླིང་།《མེ་ཏོག་གྲོང་ཁྱེར》དུས་དེབ་དང《འབོལ་རྩོམ》དུས་དེབ་བཅས་ཀྱིས་གཙོ་གཉེར་བྱས་པའི་མེ་ཏོག་གྲོང་ཁྱེར་རྩོམ་རིག་བྱ་དགའ་སྐབས་བརྒྱད་པའི་དཔྱད་འདེམས་བྱེད་སྒོ་ཕུན་སུམ་ཚོགས་པའི་ངང་མཇུག་བསྒྲིལ་ཞིང་། དཀར་མཛེས་ཁུལ་གྱི་བུད་མེད་རྩོམ་པ་པོ་གཡང་མཚོའི་བརྩམས་ཆོས《ཉམ་ཆུང་བའི་རེ་སྒུག》ཞེས་པ་ལ་ལྷུག་རྩོམ་བྱ་དགའ་ཐོབ་ཡོད་པ་རེད། འདིས་དཀར་མཛེས་ཁུལ་གྱི་རྩོམ་རིག་བྱ་གཞག་འཕེལ་རྒྱས་ལ་གཟི་བརྗིད་ལྡན་པ་མངོན་པར་མཚོན་ཡོད།

ཐེངས་འདིའི་དཔྱད་འདེམས་ཁྲོད《མེ་ཏོག་གྲོང་ཁྱེར》དུས་དེབ་2019ལོའི་འདོན་ཐེངས་དང་པོ་ནས་2023ལོའི་འདོན་ཐེངས་དྲུག་པའི་བར་དང་། 2020ལོ་ནས་2021ལོའི་འདོན་ཐེངས་གསུམ་པའི་བར་གྱི་ཆེད་བསྒྲིགས་ཆེ་གྲས་བཅས་ཏེ（ལོ་ལྔ་ཡི་རིང་གི་འདོན་ཐེངས་33）སྟེང་གི་བརྩམས་ཆོས་དག་ཕྱོགས་བསྡུས་བྱས་པ་ཡིན་ལ། སྒྲུང་རིང་དང་སྒྲུང་འབྲིང་། སྒྲུང་ཐུང་། སྙན་ངག །ལྷུག་རྩོམ། རིག་རྩལ་དཔྱད་བརྗོད་སོགས་ཀྱི་བྱ་དགའི་རྣམ་གྲངས་འཛོམས་ཡོད་པ་རེད།

གཡང་མཚོ་ནི་དཀར་མཛེས་ཁུལ་དར་མདོ་གྲོང་ཁྱེར་གྱི་མི་ཡིན་ལ། ཀྲུང་གོའི་རྩོམ་པ་པོ་མཐུན་ཚོགས་ཀྱི་ཚོགས་མི་དང་། པཱ་ཅིན་རྩོམ་རིག་སློབ་གླིང་གི་གན་རྒྱ་བཞག་པའི་རྩོམ་པ་པོ། ལུའུ་ཞུན་རྩོམ་རིག་སློབ་གླིང་སྐབས་སོ་གཉིས་པའི་མཐོ་རིམ་ཞིབ་འཇུག་འཛིན་གྲྭའི་སློབ་མ་བཅས་ཡིན། སྔ་ཕྱིར《ཟླ་བ་བཅུ་པ》དང《ཀྲུང་གོའི་རྩོམ་པ་པོ》《མི་རིགས་རྩོམ་རིག》《གཞོན་ནུའི་རྩོམ་རིག》སོགས་ཀྱི་དུས་དེབ་ཏུ་བརྩམས་ཆོས་མང་པོ་བཀོད་པར་མ་ཟད། ལྷུག་རྩོམ་ཕྱོགས་བསྒྲིགས《ཨའོ་གྲོང》ཞེས་པ་པར་སྐྲུན་བྱས་ཡོད་ལ། བརྩམས་དེབ་འདི་ལ་རྒྱལ་ཡོངས་གྲངས་ཉུང་མི་རིགས་སྐབས་བཅུ་གཅིག་པའི་རྩོམ་རིག་གསར་རྩོམ་གྱི“རྟ་མཆོག་བྱ་དགའ”ཐོབ་ཡོད། །