རྔ་བ་ཁུལ་ཨུ་དང་མཛོད་དགེ་རྫོང་ཨུའི་སྟོན་དུས་སློབ་ཞུགས་ཀྱི་བཀོད་སྒྲིག་ལག་ལེན་ཏུ་བསྟར་ཆེད། ཉེ་ཆར། མཛོད་དགེ་རྫོང་སྲིད་འཛིན་ཅུས་ཀྱིས་སྣེ་ཁྲིད་དེ། རྫོང་མི་དམངས་ཁྲིམས་ཁང་དང་རྫོང་སྤྱི་བདེ་ཅུས་སྒྲིག་འཛུགས་བྱས་ནས། ཐེ་བོ་གྲོང་རྡལ་དུ་འོས་འགན་སློབ་གསོའི་བཅའ་ཁྲིམས་དང་གཞོན་ནུ་ལོ་ཆུང་སྲུང་སྐྱོང་བཅའ་ཁྲིམས་ཀྱི་ཆེད་དོན་ཁྲིམས་སྐྱོང་སྒྲོག་འགྲེལ་བྱེད་སྒོ་སྤེལ།
སྒྲོག་འགྲེལ་ཚོ་ཆུང་གིས་འོས་འགན་སློབ་གསོའི་བཅའ་ཁྲིམས་དང་གཞོན་ནུ་ལོ་ཆུང་ལ་སྲུང་སྐྱོང་བྱེད་པའི་བཅའ་ཁྲིམས་སྒྲོག་འགྲེལ་གྱི་དོན་དངོས་ལ་དམིགས་ནས། མི་སྒེར་དང་ཁྱིམ་ཚང་། སྤྱི་ཚོགས་བཅས་ཀྱི་ཐད་ནས་སློབ་ལོ་རན་པའི་བྱིས་པ་དང་ལོ་ཆུང་བྱིས་པར་འོས་འགན་སློབ་གསོ་དང་ལེན་བྱ་རྒྱུར་འགན་ལེན་བྱས། ཁྱིམ་བདག་གིས་འགན་ལེན་དགོས་པའི་བུ་ཕྲུག་གི་སློབ་གསོའི་འགན་འཁྲི་བཅས་འགྲེལ་བཤད་ཞིབ་ཕྲ་བྱས། དེ་དང་ཆབས་ཅིག་སྒྲོག་འགྲེལ་ཚོ་ཆུང་གིས་མང་ཚོགས་དང་བསམ་བློ་བརྗེ་རེས་བྱས་ཏེ། ཁོ་ཚོར་འོས་འགན་སློབ་གསོ་ནི་སློབ་ལོ་རན་པའི་བྱིས་པའི་ཁེ་དབང་ཡིན་པར་ངོས་འཛིན་ལེགས་པོ་ཡོད་པར་བྱས།
བྱེད་སྒོར་བརྗོད་དོན་སྒྲོག་དེབ་དང་བདེ་འཇགས་ཐོ་བ། ཆར་གདུགས་དང་ཆར་ལྷམ། ལག་སྒྲོན་སོགས་ཁྲིམས་ལུགས་ཁྱབ་གདལ་ཐོན་རྫས་ཁྱོན་200ལྷག་སྤྲད། འོས་འགན་སློབ་གསོའི་གལ་ཆེའི་རང་བཞིན་ལ་མང་ཚོགས་ཀྱི་ངོས་འཛིན་དང་བསམ་ཤེས་བྱེད་ཤུགས་ཆེ་རུ་བཏང་ནས་སློབ་ལོ་རན་པའི་ལོ་ཆུང་བྱིས་པར་སློབ་གསོ་མྱོང་བའི་ཁེ་དབང་ཁྲིམས་ལྟར་འགན་ལེན་བྱས། །
