གསར་འགོད་པས་བོད་རང་སྐྱོང་ལྗོངས་རིག་དངོས་ཅུས་ནས་ཤེས་རྟོགས་བྱས་པར་གཞིགས་ན། བོད་ལྗོངས་ཀྱི་རྒྱལ་ཡོངས་རིག་དངོས་ཡོངས་ཁྱབ་ཞིབ་བཤེར་ཐེངས་བཞི་པའི་དུས་མཚམས་གཉིས་པའི་ལས་དོན་བདེ་བླག་ངང་སྤེལ་བ་དང་། མིག་སྔའི་བར་ས་བབ་སྨི་4500ཡན་གྱི་རྫོང་16ཁྲོད་རྫོང་11ཏུ་ཡུལ་དངོས་སུ་བརྟག་དཔྱད་བྱས་པར་རིག་དངོས་ས་ཚིགས་300ལྷག་ཙམ་གསར་དུ་རྙེད་པ་དང་། རྒྱལ་ཡོངས་རིག་དངོས་ཡོངས་ཁྱབ་ཞིབ་བཤེར་ཐེངས་གསུམ་པའི་རིག་དངོས་ས་ཚིགས་205ལ་བསྐྱར་ཞིབ་བྱས་པ་རེད།

ཤེས་རྟོགས་བྱུང་བར་གཞིགས་ན། ས་བབ་མཐོ་ཚད་སྨི་4500ཡན་གྱི་ས་ཁུལ་དུ་ཡུལ་དངོས་བརྟག་ཞིབ་བྱེད་སྐབས་རིག་དངོས་ཐོན་ཁུངས་ཁ་ཐོར་ཡིན་པ་དང་འགྲིམ་འགྲུལ་སྟབས་མི་བདེ་བ། འཕྲིན་གཏོང་གི་བརྡ་རྟགས་མེད་པ།  ས་ཁུལ་ཁ་ཤས་མི་མེད་ལུང་སྟོང་ཡིན་པ་སོགས་ཀྱི་དབང་གིས་ཡོངས་ཁྱབ་ཞིབ་བཤེར་རུ་མིས་སྐབས་འགར་ཆུ་བོ་དང་གངས་རི། འཁྱག་རོམ་བཅས་བརྒལ་དགོས་པ་དང་། ཐ་ན་རྐང་ཐང་ལ་བསྐྱོད་ཚེ་ད་གཟོད་དམིགས་སར་སླེབས་ཐུབ་ཀྱི་ཡོད་པ་རེད།

ཆ་སྙོམས་ས་བབ་མཐོ་ཚད་སྨི་5000ཡན་ཟིན་པའི་བོད་ལྗོངས་ནག་ཆུ་གྲོང་ཁྱེར་ཉི་མ་རྫོང་དུ་ཡོངས་ཁྱབ་ཞིབ་བཤེར་རུ་མིས་དུས་ཡུན་ཉིན་50ཡི་ནང་ཁོངས་གཏོགས་ཁུལ་གྱི་ཤང་གྲོང་14དང་སྲིད་འཛིན་གྲོང་ཚོ་78ལ་ཞིབ་བཤེར་བྱས་ཏེ་ཁྱོན་ལམ་ཐག་སྤྱི་ལེ་14000ཙམ་བསྐྱོད་ཅིང་། གནས་སྤོ་མི་ཐུབ་པའི་རིག་དངོས་ས་ཚིགས་256ལ་བརྟག་དཔྱད་ཐོ་འགོད་བྱས་པའི་ནང་རྒྱལ་ཡོངས་རིག་དངོས་ཡོངས་ཁྱབ་ཞིབ་བཤེར་ཐེངས་གསུམ་པའི་རིག་དངོས་ས་ཚིགས་41ལ་བསྐྱར་ཞིབ་བྱས་པ་དང་རིག་དངོས་ས་ཚིགས་148གསར་དུ་རྙེད།

བོད་ལྗོངས་ནག་ཆུ་གྲོང་ཁྱེར་ཡོངས་ཁྱབ་ཞིབ་བཤེར་རུ་ཁག་གི་སྤྱི་ཁྱབ་རུ་དཔོན་ཟླ་བ་ཡིས།  ཡོངས་ཁྱབ་ཞིབ་བཤེར་གྱི་རུ་མི་ཚོས་ས་མཐོ་མི་འཕྲོད་པ་ལས་བྱུང་བའི་གཟུགས་པོའི་འགྲན་སློང་ཁྱད་དུ་བསད་ནས་ཉིན་ལྟར་ཞོགས་སྔ་ལངས་དང་དགོང་འཕྱི་ཉལ། ཡུལ་དངོས་སུ་སྐྱོད་པ་དང་ཡུལ་དེ་གའི་གྲོང་མིར་བཅར་འདྲི་བྱེད་པ། ལོ་རྒྱུས་ཀྱི་ཚད་ལྡན་ཡིག་ཆ་ལ་ལྟ་བ་སོགས་ཀྱི་བྱ་ཐབས་སྣ་ཚོགས་བརྒྱུད་ལོ་རྒྱུས་རིག་གནས་དང་ཚན་རིག་གི་རིན་ཐང་ལྡན་པའི་རིག་དངོས་འབོར་ཆེན་ཤེས་རྟོགས་ཐུབ་ཡོད་ལ། དེ་དག་ཁྲོད་ལོ་རྒྱུས་དུས་སྐབས་མི་འདྲ་བའི་རིང་གི་རྗེས་ཤུལ་དང་བང་སོ། གནའ་བོའི་སྐྲུན་དངོས། གནའ་བོའི་གྲོང་མིའི་སྡོད་ཁང་། བྲག་བརྐོས་རི་མོ། རྡོ་ཆས་སོགས་ཚུད་ཡོད་ཅེས་བཤད།

ཤེས་རྟོགས་བྱུང་བར་གཞིགས་ན། མིག་སྔར་བོད་ལྗོངས་ཀྱི་ས་ཁུལ་དང་གྲོང་ཁྱེར། རྫོང་བཅས་ཁག་ལ་ཡོངས་ཁྱབ་ཞིབ་བཤེར་རུ་ཁག་107གྱི་ཡོངས་ཁྱབ་ཞིབ་བཤེར་རུ་མི་1037རིག་དངོས་ཡོངས་ཁྱབ་ཞིབ་བཤེར་ལས་དོན་ནང་ཞུགས་ཡོད་པ་དང་།   ད་བར།རང་རྒྱལ་གྱི་ས་བབ་མཐོ་ཤོས་ཀྱི་རྫོང་སྟེ་བོད་ལྗོངས་ནག་ཆུ་གྲོང་ཁྱེར་མཚོ་གཉིས་རྫོང་དང་ས་བབ་མཐོ་ཤོས་ཀྱི་ཤང་སྟེ་ལྷོ་ཁ་གྲོང་ཁྱེར་སྣ་དཀར་རྩེ་རྫོང་ཕུ་མ་བྱང་ཐང་ཤང་གི་རིག་དངོས་ཡོངས་ཁྱབ་ཞིབ་བཤེར་གྱི་ལས་འགན་བདེ་བླག་ངང་ལེགས་འགྲུབ་བྱུང་ཡོད། གཞན་གཞིས་རྩེ་གྲོང་ཁྱེར་ས་ཁུལ་ནང་གི་ས་བབ་མཐོ་བའི་རྫོང་དང་ཆུས་ཀྱི་ཡུལ་དངོས་བརྟག་ཞིབ་ལས་དོན་སྤེལ་འགོ་ཚུགས་ཟིན་པ་དང་། མངའ་རིས་ས་ཁུལ་གྱི་ཡུལ་དངོས་བརྟག་དཔྱད་ལས་དོན་སྤེལ་འགོ་ཚུགས་ཟིན་ཞིང་། ཡོངས་ཁྱབ་ཞིབ་བཤེར་བྱེད་ཚད་40%ཟིན་ཡོད་པ་རེད། །