ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཚེས་23ཉིན་གྱི་སྔ་དྲོར། མི་དམངས་ཚོགས་ཁང་ཆེན་མོར་ཟླ་དཔྱད་ལས་གཞིའི་ཟླ་བའི་ལྷ་མོ་དྲུག་པ་རྟགས་ཅན་གྱི་ཞིབ་འཇུག་དང་ཚོད་ལྟའི་ནང་ཞུགས་མཁན་མི་སྣའི་འཐུས་མིར་མཇལ་འཕྲད་གནང་སྐབས་གསུང་བཤད་གལ་ཆེན་གནང་ཡོད། ཁོང་གིས། ཟླ་དཔྱད་ལས་གཞིའི་གྲུབ་འབྲས་ནང་རང་རྒྱལ་གྱི་མཁའ་སྐྱོད་པ་མི་རབས་ཁ་ཤས་ཀྱི་བློ་གྲོས་དང་སྙིང་སྟོབས་འདུས་ཡོད་པ་དང་། ཕྱོགས་གཞན་ཞིག་ནས་ང་ཚོར་ལོ་འདི་དག་རིང་ཚན་རྩལ་རང་ཚུགས་དང་རང་སྟོབས་རང་སྤེལ་ཐད་གྲུབ་འབྲས་མངོན་གསལ་དོད་པོ་ཐོབ་པ་མངོན་ཞིང་། ཀྲུང་གོ་བའི་བློ་སྟོབས་དང་ལ་རྒྱ། གདིང་ཤུགས་བཅས་གང་ལེགས་མངོན་ཡོད། སྤྱི་ཚོགས་ཡོངས་སུ་ཕུགས་འདུན་དོན་གཉེར་དང་། འཚོལ་ཞིབ་བྱེད་ཕོད་པ། མཉམ་དུ་འགག་སྒྲོལ། མཉམ་ལས་མཉམ་རྒྱལ་བཅས་ཀྱི་ཟླ་དཔྱད་སྙིང་སྟོབས་དར་སྤེལ་ཤུགས་ཆེན་གཏོང་བ་དང་། ཀྲུང་ཧྭའི་བུ་ཕྲུག་ཡོངས་ཀྱི་མི་རིགས་ཀྱི་རང་བློ་རང་འཁེལ་གྱི་བསམ་པ་དང་སྤོབས་སེམས་སྔར་བས་ཆེ་རུ་གཏོང་བ། ཀྲུང་གོའི་རྣམ་པའི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ལ་སྒོ་ཀུན་ནས་སྐུལ་འདེད་གཏོང་བའི་སྟོབས་ཤུགས་ཆེན་པོ་གཅིག་ཏུ་སྒྲིལ་བ་བཅས་བྱེད་དགོས་ཞེས་ནན་སྟོན་གནང་ཡོད།
ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལི་ཆང་དང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཤུའེ་ཞང་། ལི་ཞི་བཅས་བྱེད་སྒོར་ཞུགས་ཡོད་པ་རེད།
སྔ་དྲོའི་ཆུ་ཚོད་10པ་ཡོལ་ཙམ་ལ། ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་མི་སྣ་མི་དམངས་ཚོགས་ཁང་ཆེན་མོའི་ཚོམས་ཆེན་བྱང་མར་ཕེབས་པ་དང་། ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་ཡུན་རིང་གྲགས་ཡོད། ཞི་ཅིན་ཕིང་སོགས་ཀྱིས་ཚང་མ་དང་བྱམས་བརྩེའི་ངང་ཕྱག་བཏང་བ་དང་འབྲེལ་ལྷན་དུ་དྲན་རྟེན་སྐུ་པར་ཡང་བསྐྱོན་པ་རེད།
སྤྲོ་སེམས་འཁོལ་བའི་ཐལ་མོའི་རྡེབ་སྒྲའི་ཁྲོད། ཞི་ཅིན་ཕིང་གིས་གསུང་བཤད་གལ་ཆེན་གནང་ཡོད། ཁོང་གིས། ད་ལོའི་ཟླ་6ཚེས་25ཉིན། ཟླ་བའི་ལྷ་མོ་དྲུག་པ་རྟགས་ཅན་གྱི་ལས་འགན་ལེགས་འགྲུབ་བྱུང་རྗེས་ཕྱིར་ལོག་པ་དང་། ང་རང་ནས་རྟེན་འབྲེལ་གློག་འཕྲིན་བཏང་བ་ཡིན། དེ་རིང་ང་དང་ཀྲུང་དབྱང་གི་འགོ་ཁྲིད་བློ་མཐུན་གཞན་དག་ནས་ལྷན་རྒྱས་ལ་འཚམས་འདྲིར་ཡོང་བ་ཡིན། ཏང་ཀྲུང་དབྱང་གི་ཚབ་ཞུས་ནས་ལྷན་རྒྱས་ལ་སླར་ཡང་སྤྲོ་སེམས་འཁོལ་བའི་རྟེན་འབྲེལ་དང་ལྷག་བསམ་ཟོལ་མེད་ཀྱི་འཚམས་འདྲི་ཞུ་རྒྱུ་ཡིན་ཞེས་གསུངས་གནང་ཡོད།
ཞི་ཅིན་ཕིང་གིས། ཟླ་བའི་ལྷ་མོ་དྲུག་པ་རྟགས་ཅན་གྱིས་མིའི་རིགས་ཀྱི་ལོ་རྒྱུས་ཐོག་ཟླ་བའི་གོ་ལའི་རྒྱབ་ངོས་ནས་དངོས་དཔེ་ཐེངས་དང་པོ་བླངས་པ་དང་། འགག་རྩའི་ལག་རྩལ་མང་པོ་ཞིག་ཚད་བརྒལ་བྱས་ཡོད། དེ་ནི་རང་རྒྱལ་གྱིས་མཁའ་སྐྱོད་རྒྱལ་ཁབ་སྟོབས་ཆེན་དང་ཚན་རྩལ་རྒྱལ་ཁབ་སྟོབས་ཆེན་བསྐྲུན་པར་ཐོབ་པའི་མཚོན་རྟགས་རང་བཞིན་གྱི་གྲུབ་འབྲས་གཞན་ཞིག་དང་རང་རྒྱལ་གྱི་ཟླ་དཔྱད་ལས་གཞིའི་ལམ་ཚད་རྡོ་རིང་གལ་ཆེན་ཞིག་རེད། ལོ་20ཡི་རིང་ཟླ་དཔྱད་ལས་གཞིས་འགག་རྩའི་ལྟེ་བའི་ལག་རྩལ་ཁྱབ་ཁོངས་ནང་རྒྱུན་མཐུད་འགག་སྒྲོལ་བྱ་རྒྱུར་དམིགས་ཤིང་། ཚན་རིག་ཤེས་རྟོགས་དང་ལག་རྩལ་གསར་གཏོད། ལས་གཞི་ལག་ལེན། གྲུབ་འབྲས་གཞན་སྒྱུར། རྒྱལ་སྤྱིའི་མཉམ་ལས་སོགས་ཀྱི་ཐད་གཡུར་ཟའི་གྲུབ་འབྲས་ཐོབ་ཡོད་པ་དང་། སྤུས་ཚད་མཐོ་བ་དང་ཕན་འབྲས་ཆེ་བའི་ཟླ་བའི་གོ་ལར་འཚོལ་ཞིབ་བྱེད་པའི་ལམ་བུའི་ཐོག་བསྐྱོད་དེ། རང་རྒྱལ་གྱི་མཁའ་སྐྱོད་བྱ་གཞག་འཕེལ་རྒྱས་དང་མིའི་རིགས་ཀྱིས་འཇིག་རྟེན་བར་སྣང་འཚོལ་ཞིབ་བྱ་ཆེད་ལེགས་སྐྱེས་གལ་ཆེན་ཕུལ་ཡོད་ཅེས་བསྟན་གནང་ཡོད།
ཞི་ཅིན་ཕིང་གིས། མཐའ་ཡས་པའི་འཇིག་རྟེན་ཁམས་སུ་འཚོལ་ཞིབ་དང་མཁའ་སྐྱོད་ཀྱི་རྒྱལ་ཁབ་སྟོབས་ཆེན་བསྐྲུན་རྒྱུ་ནི་ང་ཚོས་དོན་གཉེར་ལྷོད་མེད་བྱེད་པའི་མཁའ་སྐྱོད་ཀྱི་ཕུགས་འདུན་ཞིག་ཡིན། ཀྲུང་གོ་གསར་པ་དབུ་བརྙེས་ནས་ལོ་75སོང་རིང་། ཀྲུང་གོ་གུང་ཁྲན་ཏང་གི་འགོ་ཁྲིད་འོག རང་རྒྱལ་གྱི་མཁའ་སྐྱོད་པ་མི་རབས་ནས་མི་རབས་ཀྱིས་རང་སྤོབས་རང་སྤེལ་དང་རང་བརྟེན་གསར་གཏོད་བྱ་རྒྱུ་མཐའ་འཁྱོངས་ཀྱིས། མཁའ་སྐྱོད་བྱ་གཞག་མེད་པ་ནས་ཡོད་པ་དང་། ཉམས་ཞན་ནས་སྟོབས་ཆེན། “ཕུགས་འདུན་འཆར་འགོད”ནས“འབད་འཐབ་བྱས་ནས་ཕུགས་འདུན་མངོན་འགྱུར”བཅས་ཀྱི་བར་སྐུལ་འདེད་བཏང་སྟེ། ལོ་རྒྱུས་རང་བཞིན་དང་། སྤུས་ཚད་མཐོ་བ། མཆོང་སྐྱོད་རྣམ་པ་བཅས་ཀྱི་འཕེལ་རྒྱས་མངོན་འགྱུར་ཡོང་བ་བྱས་ནས། མཁའ་སྐྱོད་ཀྱི་རྒྱལ་ཁབ་སྟོབས་ཆེན་བསྐྲུན་རྒྱུའི་ཐད་གོམ་སྟབས་བརྟན་པོ་ཞིག་སྤོས་ཡོད་ཅེས་ནན་སྟོན་གནང་ཡོད།
ཞི་ཅིན་ཕིང་གིས། ཕྱི་རིམ་གྱི་བར་ཁམས་ནི་མིའི་རིགས་ཐུན་མོང་གི་མཁའ་ཁོངས་ཡིན་ཞིང་། བར་སྣང་ཁམས་འཚོལ་ཞིབ་བྱེད་པ་ནི་མིའི་རིགས་ཐུན་མོང་གི་བྱ་གཞག་ཅིག་རེད། ཟླ་དཔྱད་ལས་གྲྭས་ཐོག་མཐའ་བར་གསུམ་དུ་འདྲ་མཉམ་གཉིས་ཕན་དང་། ཞི་བདེ་བཀོལ་སྤྱོད། མཉམ་ལས་མཉམ་རྒྱལ་བཅས་ཀྱི་རྩ་དོན་རྒྱུན་འཁྱོངས་བྱེད་པ་དང་། ཟླ་བའི་ལྷ་མོ་རྟགས་ཅན་ནི་ཀྲུང་གོའི་ཡིན་ལ་མིའི་རིགས་ཐུན་མོང་ལ་དབང་བ་ཞིག་ཀྱང་ཡིན་པས། དེས་རྒྱལ་སྤྱིའི་ཚན་རྩལ་མཉམ་ལས་ལ་གར་སྟེགས་ཆེན་པོ་མཁོ་འདོན་བྱས་པ་དང་། འཛམ་གླིང་ཧྲིལ་པོའི་ཟབ་ཡངས་བར་སྣང་འཚོལ་ཞིབ་ཆེད་ཀྲུང་གོའི་བློ་གྲོས་དང་ཀྲུང་གོའི་སྟོབས་ཤུགས་སྐྱེས་སུ་ཕུལ་ཡོད། ང་ཚོས་མུ་མཐུད་བློ་རྒྱ་ཡངས་པོས་རྣམ་པ་སྣ་ཚོགས་ཀྱི་རྒྱལ་སྤྱིའི་མཁའ་སྐྱོད་སྤེལ་རེས་མཉམ་ལས་ལ་སྐུལ་འདེད་གཏོང་བ་དང་། རྒྱལ་ཁབ་ཁག་དང་གོང་འཕེལ་གྱི་གྲུབ་འབྲས་མཉམ་སྤྱོད་དང་ཕྱི་རིམ་གྱི་བར་ཁམས་བཅོས་སྒྲིག་འཐུས་སྒོ་ཚང་དུ་བཏང་ནས། མཁའ་སྐྱོད་ཚན་རྩལ་གྱི་གྲུབ་འབྲས་ལ་བརྟེན་ནས་མིའི་རིགས་ལ་བདེ་སྐྱིད་དེ་བས་ཆེ་བ་བསྐྲུན་དགོས་ཞེས་བསྟན་གནང་ཡོད།
ཞི་ཅིན་ཕིང་གིས། བར་སྣང་ཁམས་འཚོལ་ཞིབ་བྱེད་པའི་ལས་དོན་དེར་མཇུག་སྒྲིལ་བའི་དུས་ཤིག་མེད་པས། མཁའ་སྐྱོད་འཐབ་ཕྱོགས་ཀྱི་བློ་མཐུན་ཚོས་ཡང་འབད་བསྐྱར་འབད་དང་དུས་བསྟུན་མདུན་སྐྱོད་བྱས་ཏེ། ཟླ་བའི་གོ་ལའི་དངོས་དཔེར་ཚན་རིག་ཞིབ་འཇུག་ཞིབ་ཚགས་བྱེད་པ་དང་། ཟབ་ཡངས་བར་སྣང་འཚོལ་དཔྱད་སོགས་མཁའ་སྐྱོད་ཀྱི་ལས་གཞི་གལ་ཆེན་མུ་མཐུད་ལེགས་པར་སྒྲུབ་པ། བར་སྣང་ཚན་རིག་དང་། བར་སྣང་ལག་རྩལ། བར་སྣང་བཀོལ་སྤྱོད་བཅས་ཁྱོན་ཡོངས་ནས་གོང་འཕེལ་འགྲོ་རྒྱུར་སྐུལ་འདེད་བཏང་སྟེ། མཁའ་སྐྱོད་སྟོབས་ཆེའི་རྒྱལ་ཁབ་འཛུགས་སྐྲུན་བྱ་ཆེད་མུ་མཐུད་བྱས་རྗེས་གསར་པ་འཇོག་རྒྱུའི་རེ་བ་ཡོད་ཅེས་ནན་སྟོན་གནང་ཡོད།
དེ་རྗེས་ཞི་ཅིན་ཕིང་སོགས་མི་དམངས་ཚོགས་ཁང་ཆེན་མོའི་ཚོམས་ཆེན་ཤར་མར་ཕེབས་ནས། ཟླ་བའི་གོ་ལའི་དངོས་དཔེ་དང“མཁའ་དབྱིངས་ཟླ་འཛིན། ལོ་ངོ་ཉི་ཤུའི་ཟླ་དཔྱད་ལས་གཞི”ཡི་གྲུབ་འབྲས་འགྲེམས་སྟོན་ལ་གཟིགས་སྐོར་གནང་བ་རེད།
ལི་ཀན་ཅེ་དང་། ལི་ཧྲུའུ་ལེ། ཀྲང་ཡིའུ་ཞ། ཀྲང་གོ་ཆིང་། ཝུའུ་ཀྲེང་ལུང་བཅས་གོང་གསལ་གྱི་བྱེད་སྒོར་ཞུགས་ཡོད།
ལས་དཔྱད་ལས་གཞི་ལག་ལེན་བསྟར་བ་ནི་ཏང་ཀྲུང་དབྱང་གིས་རང་རྒྱལ་གྱི་དཔལ་འབྱོར་ཚན་རྩལ་གོང་འཕེལ་གྱི་དུས་བབ་ཆེན་པོར་སྟངས་འཛིན་གནང་ནས་སྤེལ་བའི་འཐབ་ཇུས་བཀོད་སྒྲིག་གལ་ཆེན་ཞིག་རེད། རང་རྒྱལ་གྱི་མཁའ་སྐྱོད་ལོ་རྒྱུས་ཐོག་ད་ལྟའི་བར་ལག་རྩལ་ཆུ་ཚད་མཐོ་ཤོས་ཀྱི་ཟླ་དཔྱད་ལས་འགན་ཞིག་ཡིན་པའི་ངོས་ནས། ཟླ་བའི་ལྷ་མོ་དྲུག་པ་རྟགས་ཅན་གྱིས་མིའི་རིགས་ལོ་རྒྱུས་ཐོག་ཐེངས་དང་པོ་ཟླ་བའི་གོ་ལའི་རྒྱབ་ངོས་ནས་དངོས་དཔེ་བླངས་ཏེ་ས་གོ་ལར་ཕྱིར་ལོག་ཐུབ་པ་དེས། འབྱུང་འགྱུར་རང་རྒྱལ་གྱིས་ཟླ་བའི་གོ་ལ་དང་རྒྱུ་སྐར་འཚོལ་དཔྱད་བྱ་རྒྱུར་རྨང་གཞི་བརྟན་པོ་ཞིག་བཏིངས་ཡོད་པ་རེད། །
