སྤྱིར་ཚད་ལྡན་གྱི་བསྟན་བཅོས་བརྩམས་པ་ལ་ཆ་རྐྱེན་ཇི་ལྟར་ཚང་དགོས་ཤེ་ན། སྔོན་རྒྱ་གར་འཕགས་པའི་ཡུལ་དུ་ཡོངས་སུ་གྲགས་པའི་གཙུག་ལག་ཁང་གཉིས་ཡོད་པ་ལས། དཔལ་ནཱ་ལནྡྲར་བཞུགས་པའི་པཎྜི་ཏ་རྣམས་ཀྱིས་བཀའ་ཐམས་ཅད་ཕུན་སུམ་ཚོགས་པ་ལྔའི་སྒོ་ནས་འཆད་ཅིང་བརྩམས་པ་དང་། བསྟན་བཅོས་ཐམས་ཅད་རྩིས་འགོ་ཡན་ལག་ལྔའི་སྒོ་ནས་བརྩམས་པར་བཞེད་ལ། བི་ཀྲ་མ་ཤཱི་ལིའི་གཙུག་ལག་ཁང་ན་བཞུགས་པའི་པཎྜི་ཏ་རྣམས་ཀྱིས་ཉན་པ་པོའི་སྣོད་རུང་བ་བྱ་བ་དང་། བསྟན་པའི་རྣམ་བཞག་ངེས་པའི་སྒོ་ནས་ནས་འཆད་པར་བཤད། བོད་གངས་ཅན་གྱི་ལྗོངས་སུ་བཞུགས་པའི་མཁས་པ་ཕལ་མོ་ཆེ་རྣམས་ཀྱིས་ཆིངས་ཆེན་པོ་གསུམ་གྱི་སྒོ་ནས་བསྟན་བཅོས་འཆད་པར་གྲགས་ལ། དཀྱུས་ཀྱི་ས་གཅོད་པ་སྟག་མོའི་འཆོངས་ལྟ་བུ་དང་། ཚིག་གི་འབྲུ་ནོན་པ་རུས་སྦལ་གྱི་ནུར་འགྲོས་ལྟ་བུ། སྐབས་ཀྱི་དོན་བསྡུ་བ་སེངྒེའི་འགྱིང་ལྟ་བུ་སོགས་ཀྱི་སྒོ་ནས་འཆད་པར་གྲགས་ལ། དེས་མ་ཚད་གཞན་ཡང་རྩོམ་པ་པོ་དེ་ལ་བསྟན་བཅོས་བརྩམ་པའི་རྒྱུ་གསུམ་ཚང་དགོས་པའི་ལོ་རྒྱུས་ཡོད་ལ། རྒྱུ་གསུམ་ནི་བསྟན་བཅོས་བརྩམ་པ་ལ་རབ་ས་དང་པོ་ཆོས་ཉིད་ཀྱི་བདེན་པ་ཐོབ་དགོས་པ་བཤད་ལ། འབྲིང་ཡི་དམ་ལྷའི་ཞལ་གཟིགས་པ་དང་། ཐ་ནའང་རིག་པའི་གནས་ལྔ་ལ་མཁས་པ་ཞིག་མ་བྱུང་ན་བསྟན་བཅོས་བརྩམ་པའི་དབང་ཆ་མེད་པར་བཞེད་ལ། གལ་སྲིད་བསྟན་བཅོས་ཤིག་བརྩམས་ན་ཡང་དེ་ལ་པཎྜི་ཏ་རྣམས་ཚོགས་པའི་མདུན་སར་རྩོམ་པ་པོ་དེ་ལ་ཁྲི་རྒྱབ་ནས་དེའི་སྟེང་གང་བརྩམས་པའི་བསྟན་བཅོས་དེ་བཀླག་ཅིང་སྒྲོག་པར་བྱས་ཚེ་རྗོད་བྱེད་ཀྱི་ཚིག་ལ་ནོར་འཁྲུལ་དང་བརྗོད་བྱའི་དོན་ལ་འགལ་བ་མེད་པ་ཞིག་བྱུང་ན་མཆོད་བསྟོད་དང་བཀུར་བསྟི་་སོགས་བྱས་ཏེ་བསྟན་བཅོས་ཀྱི་གྲས་སུ་འཇོག་པ་དང་། དོན་མཐུན་ཞིག་མ་བྱུང་ན་རྩོམ་པ་པོ་དེའི་ལག་མགོ་བཅད་ནས་བརྩམས་པའི་བསྟན་བཅོས་དེ་དང་ལྷན་དུ་ཁྱི་རྔ་ཞིག་ལ་འདོགས་ནས་མེར་བསྲེགས་པའི་སྲོལ་ཡོད་པར་བཞེད། གང་ལྟར་ཡང་ལུང་སྤྱི་འགྲོས་ལྟར་རྒྱལ་བའི་བཀའ་དང་རྗེས་འཇུག་མཁས་པ་ཉན་རང་བྱང་སེམས་སོགས་དང་བྱེ་བྲག་རྒྱ་བོད་མཁས་པའི་ལོ་རྒྱུས་དེབ་ཐེར་སོགས་ལས་བཏུས་ཤིང་། ཕྱོགས་གང་དུ་གཏོགས་ན་སྤྱིར་ཀུན་སློང་གི་སྒོ་ནས་སེམས་བསྐྱེད་ཀྱི་དབང་དུ་བྱས་ན་ཐེག་པ་ཆེན་པོའི་ཁོངས་སུ་གཏོགས་དགོས་པ་ཡིན་ལ། དེའི་རྒྱུ་མཚན་ཡང་ས་གནས་ཀྱི་ལོ་རྒྱུས་དམིགས་བསལ་གྱི་དབང་དུ་བྱས་པ་ཡིན། དབུ་ནས་ཞབས་སུ་བསྡུས་པའི་དོན་ནི་བོད་མིའུ་གདུང་དྲུག་ལས་ཨ་ལྕགས་འབྲུའི་རིགས་ལས་ཆད་པའི་ཏྲེ་རབས་རིམ་བྱུང་གི་ལོ་རྒྱུས་དང་། ཁྱད་པར་དུ་ཏྲེ་དང་ཧོར་གྱི་ལོ་རྒྱུས་ལས་འཕྲོས་པའི་ཧོར་སེར་ད་ར་ཁག་ལྔའི་དཔོན་རབས་རིམ་བྱུང་རྣམས་ཀྱིས་མངའ་ཐང་དང་མཛད་འཕྲིན་ལ་བརྟེན་ནས་ས་གནས་དེའི་འཁོར་མངའ་འབངས་ཇི་ལྟར་སྐྱོང་ཚུལ་དང་། ལོ་ངོ་སྟོང་ཕྲག་མང་པོའི་ལོ་རྒྱུས་ལ་ཕྱིར་བལྟས་བྱེད་པའི་རྣམ་དཔྱོད་དང་ཤེས་རབ་ཀྱི་མིག་བསྒྲུབ་པའི་བདག་རྐྱེན་བྱེད་པ་བཅས་དང་།། དགོས་ཆེད་སུ་ཞིག་དོན་དུ་མཛད་ན་སྔོན་ནས་ད་བར་ཕ་ཡུལ་གྱི་ལོ་རྒྱུས་ཐ་ཐོར་ཙམ་མ་གཏོགས་མགོ་མཇུག་ཡོངས་སུ་རྫོགས་པ་ཞིག་མེད་པས། ད་ལན་ཁོ་འདིར་ཐོག་མཐའ་བར་གསུམ་གྱི་སྒོ་ནས་ས་གནས་འདིའི་མི་རབས་ནས་མི་རབས་ཀྱི་བར་དཔོན་རབས་རིམ་བྱུང་གི་རྒྱུད་འཛིན་བྱས་པའི་སའི་རྒྱ་ཁྱོན་འདིར་སྲིད་ཀྱི་དབང་བསྒྱུར་ཇི་ལྟར་བྱས་པ་དང་། ཆོས་ལུགས་དང་དམངས་སྲོལ་རིག་གནས་སོགས་ལོ་རྒྱུས་རང་བཞིན་ལྡན་པ་དང་། དེང་དུས་བློ་གསལ་ན་གཞོན་རྣམས་ལ་ཡབ་མེས་ཀྱི་མཛད་རྗེས་ལ་དྲན་གསོའི་འབོད་བསྐུལ་ཐེབས་པ་མ་ཟད། རང་ཉིད་ལ་ཡང་མདུན་སྐྱོད་ཀྱི་སྤོབས་པ་དང་སེམས་ཤུགས་ཐེབས་པའི་རྒྱུ་རུ་གྱུར་ནས་ལེ་ལོ་དང་བག་མེད་རྣམ་གཡེང་སོགས་བྱ་བ་ངན་ཞེན་གྱི་ལེ་ལོའི་དབང་དུ་ནམ་ཡང་མི་གཏོང་བར་གོ་ཆའི་བརྩོན་འགྲུས་ལ་གོམས་པ་ལྷུར་ལེན་པའི་རྒྱུ་རུ་འགྱུར་བ་དང་། ཏྲེ་ཧོར་གྱི་ལོ་རྒྱུས་ལ་མིང་དོན་མཚུངས་པའི་དཔྱད་བརྗོད་དང་ལོ་རྒྱུས་ཀྱི་རིན་ཐང་མཚོན་པའི་ས་གནས་ཀྱི་ཁྱད་ཆོས་ལྡན་པའི་དཔོན་རབས་དང་། ཆོས་ལུགས་མཚོན་བྱེད་དུ་སོང་བའི་དགོན་སྡེ་ཁག་མང་པོ་ཞིག་བྱུང་ཡོད་པའི་ལོ་རྒྱུས་དང་། རིག་གནས་མཚོན་བྱེད་དུ་སོང་བའི་རི་ཆུ་ཐང་གསུམ་དང་ཡུལ་གྲུ་སོ་སོའི་ཞིང་འབྲོག་དམངས་ཚོགས་འཚོ་གནས་བྱས་པའི་ཡུལ་སྲོལ་གོམས་གཤིས་མང་པོ་ཞིག་དང་། ཁྱད་པར་དུ་དེང་དུས་ཡུལ་སྐོར་གྱི་ལྟེ་གནས་ལྟ་བུར་སོང་བའི་འཛམ་གླིང་གེ་སར་རྒྱལ་པོའི་གཙོས་གླིང་གི་དཔའ་བརྟུལ་སུམ་བཅུའི་དཔའ་བོའི་གོ་མཚོན་དང་། ཡང་ཐུལ་དམ་པའི་མི་བདུན་སོགས་ཁྲ་མོ་གླིང་དཀར་སྟོད་ཀྱི་གནའ་གྲོང་གསར་བཞེངས་བྱས་ནས་མང་ཚོགས་ཀྱི་འཚོ་བ་ཇེ་ལེགས་སུ་བཏང་བའི་ཐབས་ལམ་ཉག་གཅིག་ཏུ་གྱུར་ཡོད་པའི་ལོ་རྒྱུས་དང་། ཞིང་འབྲོགས་ས་གནས་སོ་སོའི་སྒོ་རྩ་རུ་འགྲིམ་འགྲུལ་སྐྱེལ་འདྲེན་བྱེད་པའི་གཞུང་ལམ་དང་། ཆུ་བེད་ཐོན་ལས་དང་གློག་སྒྲོན་ས་ཚུགས་སོགས་ཀྱི་དགའ་ལྡན་རྣམ་པར་རྒྱལ་བའི་ཁང་བཟང་ལས་ལྷ་ཡུལ་གྱི་བཀོད་པ་ཕུན་སུམ་ཚོགས་པའི་དྲྭ་རྒྱའི་དུས་རབས་ཀྱི་མཐོ་རླབས་གསར་པའི་ནང་ཚོང་ལས་ཐོན་སྐྱེད་ཀྱི་དཔལ་འབྱོར་ཕུན་སུམ་ཚོགས་པ་དང་། ཚན་རིག་དང་ལོ་རྒྱུས་ཟུང་དུ་འབྲེལ་བའི་རིག་གནས་ཀྱི་རྐང་འཛིན་པའི་ན་གཞོན་ཤེས་ཡོན་ཅན་མང་པོའི་གསོ་སྐྱོང་བྱས་ནས་འཛམ་གླིང་གི་ཡང་རྩེར་སོན་པའི་རང་རྒྱལ་གྱི་དུས་རབས་གསར་བའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་མཛེས་སྡུག་སེམས་སུ་བསྐྲུན་པའི་ཐབས་དམ་པ་ལག་བསྟར་བྱེད་པའི་ལོ་རྒྱུས་ཀྱི་དཔྱད་གླེང་ལ་རྣམ་དཔྱོད་ཡངས་པའི་ཤེས་རབ་ཀྱིས་ཤེས་བྱའི་སྒོ་དུ་མ་འབྱེད་པར་བྱེད་པའི་དོན་སྙིང་དང་ལྡན་པའི་སྐུལ་སློང་མི་འདོར་བའི་སྒོ་ནས་ད་ལན་འདིར་གླེང་གཞིའི་ཚུལ་དུ་བཀོད་པ་ཡིན། དེ་ཡང་གནའ་བོའི་གཞུང་ཆེན་ཁག་རྣམས་ཀྱིས་ཐོག་མའི་གླེང་གཞི་ཕུན་སུམ་ཚོགས་པ་ལྔའི་སྒོ་ནས་འཆད་པའི་སྲོལ་ཡོད་པ་དང་། ཁོ་མོས་འདིར་བསྟན་བཅོས་ཀྱི་རྗེས་སུ་འབྲངས་ནས་གོ་བདེ་བའི་དབང་དུ་བྱས་ཏེ་རྩིས་མགོ་ཡན་ལག་ལྔའི་སྒོ་ནས་ལོ་རྒྱུས་ཀྱི་བྱུང་རིམ་རྣམས་གསལ་བར་མཚོན་པའི་ཕྱིར་བཀོད་པ་ཡིན་ལ། དེ་ཡང་ཕ་མེས་རྣམས་ཀྱིས་མི་རབས་ནས་རྒྱུད་པའི་དགྲ་འདུལ་གཉེན་སྐྱོང་དང་། རྨོས་བརྐོ་སོ་ནམ་སོགས་ཀྱི་སྐྱིད་སྡུག་རེས་མོས་ཀྱི་མི་ཚེའི་འདུ་བྱེད་ཀྱི་ཡོ་ལངས་སུ་སེམས་ཀྱི་མཛེས་སྡུག་བསྐྲུན་པའི་གནའ་བོའི་ལོ་རྒྱུས་ལ་དཔྱད་བརྗོད་ཀྱི་མེ་ཏོག་གཏོར་ནས། བོད་ཀྱི་ལོ་རྒྱུས་བྱེ་བྲག་པ་ཞིག་གི་ཚབ་མཚོན་དང་ལྡན་པའི་སྒོ་ནས་དངོས་ཤུགས་རྒྱུད་གསུམ་གྱིས་ནུས་པར་གསར་དུ་སྟོན་ཡོད་ཅིང་། མི་རབས་རྗེས་མ་རྣམས་ལ་ཕ་ཡུལ་ལོ་རྒྱུས་ཀྱི་ཆུ་རྒྱུན་རིང་དུ་བསྲིང་བའི་མིག་གི་དགའ་སྟོན་དུ་སྤེལ་བ་དང་། རྣ་བའི་བདུད་རྩི་རུ་བསྒྱུར་ནས་སེམས་ཀྱི་དྭངས་བ་འདྲེན་པའི་གསོས་འདེབས་སུ་འགྲོ་བའི་ཆེད་ཕ་ཡུལ་དཀར་མཛེས་ལ་བཅངས་བའི་སྒོ་གསུམ་གྱི་འཇུག་པའི་བྱ་བ་མཐའ་དག་ཕ་མེས་ཀྱི་ལོ་རྒྱུས་འདིར་སྔོན་བྱོན་ཡབ་མེས་རྣམས་ལ་བྱས་པར་དྲིན་བཟོའི་ཆེད་དང་། རང་ཉིད་ཀྱི་སློབ་སྦྱོང་བྱས་པའི་གྲུབ་འབྲས་དང་དགེ་བའི་བཤེས་གཉེན་རྣམས་ཀྱིས་དཀའ་ངལ་དང་སྐུ་ཚེགས་མང་པོ་བསགས་ནས་སློབ་ཁྲིད་བྱས་པར་ཆུད་མི་ཟ་བའི་ཆེད་མཐར་ཕྱིན་དཔྱད་རྩོམ་གྱི་ལམ་ནས་ཕ་ཡུལ་ལ་བཅངས་བའི་ལོ་རྒྱུས་ཀྱི་ལེགས་སྐྱེས་འདི་ཉིད་ཕུལ་བར་ལགས་སོ།།
