དཔྱད་རྩོམ་འདིའི་ནང་དོན་ནི་ཕ་ཡུལ་གྱི་ལོ་རྒྱུས་ལ་དཔྱད་གཞིར་བཟུང་ནས་ཐོག་མཐའ་བར་གསུམ་བསྡུས་བརྗོད་ཀྱི་ཚུལ་དུ་གོ་བདེར་གཏོང་བ་ཞིག་ཡིན་ལ། དེང་དུས་ལོ་རྒྱུས་སྨྲ་བ་ཕལ་ཆེ་བས་བོད་ཀྱི་གནའ་བོའི་ལོ་རྒྱུས་དང་རྒྱལ་རབས་སོགས་ལ་ཞིབ་འཇུག་བྱེད་པའི་དཔྱད་བརྗོད་མང་ཙམ་བྲིས་ཡོད་ནའང་། དེ་ནི་སྤྱིའི་ཆ་ནས་ཤེས་བྱེད་དུ་འགྲོ་བ་ཙམ་ལས་ས་གནས་ཀྱི་ལོ་རྒྱུས་བྱེ་བྲག་ལ་ཕན་པ་ཆེར་མ་མཐོང་ནས། ཁོ་མོས་རང་ཉིད་ལྟེ་ཁྲག་འཕོས་པའི་ས་གནས་ཕ་ཡུལ་དཀར་མཛེས་ཀྱི་གནའ་བོའི་ལོ་རྒྱུས་ལ་དཔྱད་གཞིར་བྱས་ནས་ཏྲེ་རབས་ལས་འཕྲོས་པའི་ལོ་རྒྱུས་ལ་ཞིབ་འཇུག་བྱེད་པ་ནི་ཆུ་འགོ་གངས་དང་། ཆོས་འགོ་སངས་རྒྱས་ལ་བཏུགས་པའི་དཔེ་ལྟར་ཕ་ཡུལ་གྱི་མི་རབས་དེ་དག་ཐོག་མར་གང་ནས་བྱུང་བའི་རིགས་རུས་ཀྱི་འབྱུང་རྩ་བརྩད་གཅོད་བྱེད་པ་ནི་རང་ཉིད་ཀྱི་སློབ་སྦྱོང་བྱས་པའི་གྲུབ་འབྲས་ཕ་ས་མ་ཡུལ་ལ་བཅངས་བའི་དོན་ཆེན་ཞིག་ཏུ་བརྩིས་པ་ཡིན་ལ། གནའ་ནས་ད་བར་ཕ་ཡུལ་འདི་ཉིད་ཀྱི་ལོ་རྒྱུས་ཁ་ཚང་ཞིག་གཏན་ནས་མེད་པས་དེའི་རྐྱེན་གྱིས་ཕ་ཡུལ་གྱི་ལོ་རྒྱུས་ལ་ཞིབ་འཇུག་གི་ཁ་ཕྱོགས་བཟུང་ནས་དཔྱད་རྩོམ་འདི་བྲིས་པ་ཡིན། ཕ་ཡུལ་གྱི་ལོ་རྒྱུས་ལ་ཞིབ་འཇུག་བྱེད་དགོས་ན་ཐོག་མར་བསྐལ་པ་ཡ་ཐོག་གི་བོད་ཀྱི་འགྲོ་བ་མིའི་རིགས་འདི་ཇི་ལྟར་བྱུང་བའི་ལོ་རྒྱུས་ལ་ངེས་ཤེས་ཤིག་མེད་ན་ཕ་ཡུལ་གྱི་ལོ་རྒྱུས་གཏིང་ཚུགས་པ་ཞིག་ཤེས་པ་ནི་སྲིད་མཐའ་མ་བཀག་ཙམ་ལགས་པས། དེས་ན་ཐོག་མར་བསྐལ་བ་ཡ་ཐོག་གི་བོད་མིའི་འགྲོ་བའི་རིགས་ཀྱི་ཐུན་མོང་གི་འཚོ་བ་སྤྱོད་པའི་དུས་མཇུག་ཙམ་ལ་ཐོན་རྫས་ཀྱི་ལྷག་མ་གསོག་འཛོག་བྱེད་སྲོལ་བྱུང་བའི་རྐྱེན་གྱིས་མི་རྣམས་ཕན་ཚུན་མ་མཐུན་པར་ས་ཆ་སོ་སོར་གྱེས་པ་ལས་སྤྱིའི་ཆ་ནས་མིའུ་གདུང་དྲུག་གམ་རུས་ཆེན་བཞི་ལས་ཇི་ལྟར་གྱེས་པའི་ལོ་རྒྱུས་ལ་དཔྱད་གཞི་བྱས་པ་ལས། སྲིད་པའི་རྒྱལ་བུ་ཐིང་གི་ཞེས་པ་ལས་བུ་གསུམ་བྱུང་བ་རྒྱ་བོད་ཧོར་གསུམ་དུ་གྱེས་པའི་ལོ་རྒྱུས་དང་། དེ་ནས་བོད་མི་ཁྲི་དོ་ཆེན་པོ་བྱ་བ་དེ་ལ་བུ་དྲུག་བྱུང་བ་ནི་དབྲ་འབྲུ་ལྡོང་གསུམ་སྒ་དང་བཞི་ནུ་བོ་དབས་ཟླ་གཉིས་དང་དྲུག་སྟེ་བོད་ཀྱི་མི་རྒྱུད་དྲུག་པོ་དེས་དམའ་ཁ་ཤུལ་རབས་འདེབས་སྟག་པ་དེར་བོད་མི་གསུམ་བུ་དྲུག་དེ་ནང་མ་མཐུན་ནས་ས་བགོས་བྱས་ནས་ལྡོང་གིས་པ་མ་ལེ་པང་དང་དབྲ་ཡིས་དབྲ་མོ་རབ་བཀྲ་འབྲུ་ཡིས་འབྲུ་མོ་ཁྲོམ་ཁྲོམ་ལྒ་ཡིས་ལྒར་མ་མེ་པོ་ཐོབ། དབས་བརྡ་གཉིས་གཉིས་ཀྱིས་རྒྱ་བོད་ས་མཚམས་སུ་མདའ་དར་གོང་མ་ཞེས་པ་བཟུང་ཞེས་གྲགས་ལ། ཏྲེ་རབས་འདི་སེ་རྨུ་ལྡོང་སྟོང་དབྲ་འབྲུ་དྲུག་སྟེ་མིའུ་གདུང་དྲུག་གམ་ཡང་ན་སེ་འབྲུ་ལྡོང་སྟོང་སྟེ་རུས་ཆེན་བཞི་སོགས་ཀྱི་ནང་ཚན་ལས་ཆད་པའི་ཨ་ལྕགས་འབྲུ་ཡི་རིགས་ཡིན་ལ་དེས་འབྲུ་མོ་ཁྲོམ་ཁྲོམ་ཞེས་པའི་ས་གནས་དེ་དག་ཏུ་དབང་བསྒྱུར་བྱས་པར་རྒྱུད། འབྲུ་རྗེ་ལྷ་བུ་ཐོད་དཀར་ཞེས་པའི་མི་རྒྱུད་དེ་ལས་ཆད་པའི་འབྲུ་སྟག་རྒོད་བྱ་བ་དེ་ལ་བུ་གསུམ་བྱུང་བའི་ཆུང་བ་འབྲུ་ཉི་མ་དཀར་པོ་གདུང་ལས་ཏྲེ་ཡི་མི་རྒྱུད་འདི་ཉིད་ཆད་པ་ཡིན། འབྲུ་ཉི་མ་དཀར་པོ་དེ་ལ་ཡང་བུ་གསུམ་བྱུང་བའི་ཆུང་བ་མ་གད་ཀྱི་རིགས་འདི་ལ་ཏྲེ་རབས་འདི་བྱུང་བ་གྲགས་པས་སྲས་ཏྲེ་རྗེ་སེ་བོ་ཞེས་པ་དེའི་རིགས་རུས་སུ་ཆད་ཡོད་པ་ལོ་རྒྱུས་རྣམས་སུ་གསལ་བས་དེར་རྟེན་ཏྲེ་རབས་ཀྱིས་གང་དུ་དབང་བསྒྱུར་བྱས་པའི་ས་གནས་དང་ཇི་ལྟར་དབང་བསྒྱུར་བྱས་པའི་ལོ་རྒྱུས། ཏྲེ་རབས་དེ་ཉིད་སུམ་པ་རྒྱལ་པོའི་མངའ་འོག་ཏུ་དབང་བསྒྱུར་བྱས་ནས་འཕེལ་འགྲིབ་དང་ཆགས་འཇིག་ཇི་ལྟར་བྱུང་བའི་ཚུལ། འབྲུ་ཏྲེ་བོ་དགྲ་ལྷའི་མི་བདུན་ཞེས་དཔོན་རབས་འདི་དག་གིས་དབང་བསྒྱུར་བྱས་པར་རྒྱུད་ཆོས་ལུགས་ལ་བཅད་འཕྲི་བྱས་པའི་ཚུལ་དང་ཆབ་སྲིད་ཀྱི་སྒྲིག་སྲོལ་ཇི་ལྟར་བཙུགས་པ། དཔལ་འབྱོར་འཕེལ་རྒྱས་དང་ཚོང་ལས་འགྲན་བརྩོད་ཀྱི་ལས་འགུལ་སྤེལ་བ་བཅས་བསྟན་ཡོད་ལ། ཏྲེ་རབས་ཀྱི་དཔོན་སར་སུམ་པ་རྒྱལ་པོའི་ཁྲིམས་ར་བཅུའི་མགོན་གནོན་གྱི་ཁྲིམས་དཔོན་བསྐོ་བཞག་གནང་བ་སོགས་ལོ་རྒྱུས་ཀྱི་མཛད་རྗེས་ཧ་ཅང་མི་དམན་པར་འཇོག་ཡོད། ཁྲི་དཔོན་ཉི་མ་དཀར་ལེབ་ཀྱི་བོད་དབུས་གཙང་རུ་བཞིའི་དམག་དང་འཐབ་འཛིན་བྱས་ཏེ་བཙན་པོའི་དམག་གིས་རྒོལ་ལན་བསློག་མ་ཐུབ་པར་རུ་བཞིའི་དམག་གི་མགོ་གནོན་ཞེས་དཔའ་བོའི་མཚན་སྙན་གནམ་སའི་བར་ཤོང་དཀའ་བའི་གནས་སུ་གྱུར་ཡོད་པའི་ལོ་རྒྱུས་ཡོད་ལ། རྗེས་སུ་སུམ་པ་རྒྱལ་ཁབ་བོད་བཙན་པོའི་གཡོ་འོག་ཏུ་ཚུད་ནས་ཏྲེ་རབས་ཀྱང་བཙན་པོའི་མངའ་འོག་མ་སོང་རང་སོང་དུ་གྱུར་ཀྱང་ཏྲེ་རབས་བརྒྱད་པ་སྤྱི་ཕུད་འཁོར་ལོ་བཟང་པོ་བོད་བཙན་པོའི་ནང་བློན་དུ་སོང་བ་གྲགས་ལ། སྐབས་དེར་ཏྲེ་བོའི་ཡུལ་འདིར་རྒྱལ་བ་བུ་རམས་ཤིང་པའི་བསྟན་པ་རིན་པོ་ཆེ་དར་བའི་དབུ་བརྙེས་པའི་ལོ་རྒྱུས་ཡང་ཏྲེ་བོའི་ཀ་བྲག་ཇོ་ཁང་བཞེངས་པའི་རྟེན་འབྲེལ་ལས་རྟོགས་ཐུབ། དེ་རྗེས་སུ་འབྲུ་ཏྲེ་བོ་དགྲ་ལྷའི་མི་བདུན་ཞེས་དཔོན་རབས་བདུན་གྱི་རིང་གི་ལོ་རྒྱུས་གསེར་ཕྲེང་པོ་ཏི་བཅུ་གསུམ་ཡོད་རབ་བཤད་ཀྱང་། རྗེས་སུ་དུས་འགྱུར་གྱི་འོག་ལོ་རྒྱུས་དེ་དག་གི་མིང་གི་ལྷག་མར་ཙམ་མ་གཏོགས་ཤོག་ལྷེ་གཅིག་ཀྱང་མཐོང་རྒྱུ་མེད་པར་དམིགས་མེད་ཆོས་ཀྱི་དབྱིངས་སུ་རྒྱས་འདེབས་ཟིན་པར་ལགས་སོ། དེ་ལྟ་ནའང་དབུས་གཙང་ནས་བོད་བཙན་པོའི་གདུང་རྒྱུད་ནང་འཁྲུགས་བྱུང་བ་ནས་ཆུ་མགོ་སྐམ་པོའི་ཡུར་བ་ལས་དྭངས་བསིལ་གྱི་འབབས་རྒྱུན་ཞིག་འབྱུང་མི་སྲིད་པའི་དཔེ་ལྟར། ཏྲེ་རབས་ཀྱང་རིམ་གྱིས་མཐའ་བསྡུས་ཏེ་ནང་ཆེན་དཔོན་རབས་མཆེད་པའི་ལོ་རྒྱུས་དང་། ཏྲེ་རབས་རྒྱལ་སྲིད་བཏང་བའི་ཤུལ་དུ་ས་གནས་འདིར་བར་སྐབས་ཤིག་ཏུ་དབྲ་ཡི་རིགས་ཀྱི་དབང་བསྒྱུར་བྱས་པའི་ལོ་རྒྱུས་ཡོད་ནའང་། ཡུན་རིང་མ་འགོར་བར་དབྲ་བླ་ཧོར་སོག་གིས་སྟེང་ཆེན་དགོན་དུ་རྒྱང་ཕུད་བཏང་ནས་ཏྲེ་རབས་ཧོར་གྱིས་དབང་བསྒྱུར་བྱས་ནས་སྲིད་གཞུང་གི་ལྟེ་བར་མནྜལ་ཐང་དུ་མགོན་ཁང་བཞེངས་པ་དང་། སྲིད་འཛིན་ས་གནས་ཧོར་ཁོང་ནང་སྐྱས་འདེབས་པའི་ལོ་རྒྱུས་སོགས་དང་། དེ་ནས་བཟུང་མ་ཟུར་གཙོ་བོར་བྱས་པའི་ཧོར་སེར་ད་ར་ཁག་མང་དུ་གྱེས་ནས་སྡེ་འགོ་དང་དཔོན་འགོ་ཁག་སོ་སོའི་མ་ཟུར་དཔོན་པོའི་བཀའ་ལ་བརྩི་འཇོག་དགོས་པའི་ལོ་རྒྱུས་ཡོད་ཀྱང་། རྗེས་སུ་ཁང་སར་དཔོན་གྱི་མ་ཟུར་དང་ཁང་སར་གཉིས་ཀའི་དཔོན་ཐབས་དབང་བསྒྱུར་བྱེད་དགོས་པའི་ལོ་རྒྱུས་དང་། དེས་མ་ཚད་བེ་རི་དང་བྲེ་བོ་བྲག་འགོ་གསུམ་གྱིས་ཀྱང་གྲོགས་ཡོད་ན་གྲི་སོ་ཁམ་བགོས་དང་། དགྲ་ཡོད་ན་མདུང་མོ་མཉམ་སློང་བྱེད་དགོས་པའི་དཔེ་ལྟར་ད་ར་ཁག་ལྔའི་སྐྱིད་སྡུག་ལ་ལྟ་རྟོགས་མཉམ་བྱེད་ཀྱི་ལོ་རྒྱུས་གསལ་བར་བཀོད་ཡོད། དེ་ལྟར་དཔོན་རབས་དེ་དག་གི་ས་གནས་འདིར་དབང་བསྒྱུར་བྱས་པར་རྒྱུད་དཔལ་འབྱོར་དང་ཆབ་སྲིད་རིག་གནས་ཆོས་ལུགས་སོགས་ཕྱོགས་གང་ཐད་ནས་ཀྱང་། གཞན་ལ་འགྲམ་ཆུ་ལྡང་མི་དགོས་པར་རང་རྐྱ་ཐུབ་པའི་རྣམ་དཔྱོད་དང་ཤེས་རབ་སོགས་ཡོད་པ་གྲགས་ལ། དེ་ཡང་ཆོས་རྒྱུད་ཁག་གི་གྲུབ་མཐའ་སོ་སོའི་རང་རང་གི་གྲུབ་མཐའི་ཆོས་ལུགས་ལ་དད་པ་དང་བཤད་སྒྲུབ་གཉིས་ལྡན་གྱི་སྒོ་ནས་རྒྱལ་བའི་བསྟན་པ་རིན་པོ་ཆེ་མ་ཉམས་སོར་ཆུད་དང་། ཉམས་པར་སླར་གསོ་བྱེད་པའི་མཆོད་ཡོན་མཉམ་འབྲེལ་གྱི་བསྟན་པ་ཕྱོགས་མེད་དུ་སྤེལ་བ་དང་། གྲུབ་མཐའ་གཞན་གྱི་ཆོས་རྒྱུད་ལ་ཡང་དག་སྣང་གི་མཆོད་བསྟོད་དང་བཀུར་བསྟི་སོགས་ཀྱི་སྒོ་ནས་སྡང་ཞུགས་མེད་པར་སྟོན་པ་གཅིག་གི་བསྟན་པ་ལ་ཕྱོགས་དང་རིས་སུ་མ་བཅད་པར་གུས་པ་བྱེད་པ། ཆོས་རྒྱུད་སོ་སོའི་འཆད་པ་དང་བརྩོད་པ་བརྩམས་པའི་བསྟན་རྒྱུན་འཇོག་པ་སོགས་རྒྱལ་བསྟན་ཉིན་མོའི་དུས་ཀྱི་སྣང་བ་ལས་མི་ཡོལ་བའི་བཤད་བསྒྲུབ་གྱི་བསྟན་པ་སྤེལ་བར་བྱས་སོ། ། གཞན་ཡང་ཏྲེ་ཧོར་གྱི་སྒྱུ་རྩལ་ལས་བསྐྲུན་པའི་ཟློས་གར་དང་རྣམ་ཐར་སོགས་འཁྲབ་གཞུང་ཇི་སྙེད་ཅིག་ཡོད་པ་དང་། དེང་དུས་འཛམ་གླིང་ན་ཡོངས་སུ་གྲགས་པའི་སྔོན་མནྜལ་ཐང་སོག་པོའི་རྒྱལ་རྒྱུད་དང་ཆོས་འཕགས་ཟུང་གིས་ཐུགས་བསྐྱེད་དང་སྨོན་ལམ་གཅིག་ཏུ་གྲུབ་པའི་སྡེ་མགོན་ཁང་གི་གུར་མགོན་ལྷ་བརྒྱད་ལྕམ་བྲལ་དང་བཅས་པའི་སྐུ་བརྙན་དང་། ཆོས་རྒྱལ་སྲོང་བཙན་གྱིས་བཙུན་མོ་མ་གཅིག་སྒྲོལ་མ་དཀར་མོའི་རྣམ་འཕྲུལ་གྱི་སྐྱེ་བར་བཞེངས་པའི་འུ་ཤིན་ཀོང་ཇོའི་མཐའ་འདུལ་དང་ཡང་འདུལ་གྱི་གཙུག་ལག་ཁང་བཞེངས་པའི་ནང་ཚན་ཀ་བྲག་ཇོ་ཁང་བརྟེན་དང་རྟེནཔ་བཅས་པ་སོགས་བྱིན་རླབས་ཀྱིས་ཚན་ཁ་མ་ཡལ་བའི་བསྟན་ཁྱད་པར་དུ་འཕགས་པ་དུ་མ་ལོ་རྒྱུས་ཡིག་ཚང་རྣམས་སུ་འཁོད་པ་རྣམས་བསྲེགས་བཅད་བརྡར་བའི་གསེར་བཞིན་དུ་རྣམ་དཔྱོད་དང་ཤེས་རབ་ཀྱིས་གཏན་ལ་ཕབ་སྟེ་བྱི་དོར་བྱས་ནས་ལེགས་པར་བཀོད་པ་བཅས་ལགས་སོ།།
