ལྷ་ས་དང་ཨ་མ།
ལྷ་སར་ཐེངས་གཅིག་མཇལ་རྗེས
གཞི་ནས་ཨ་མའི་སེམས་པ་བདེ་ལ་བབས་སོང
ཁོ་མོས
ཐུགས་ལྷོད་ལྷོད་ཀྱིས
ད་ནི་ཤི་སོང་རུང་འགྱོད་པ་མེད་ཅེས་བསྙད་བྱུང
ལྷ་ས་དང་ཁོ་བོ།
ལོ་འདི་འགར
ཨ་མའི་དད་སྟོབས་ཀྱི་གཟི་དཔལ་ཁྲོད
ངས་སེམས་ཀྱི་ལྷ་ས་ཡང་ཡང་དྲན་གྱིན་ཡོད
2015ལོའི་ཟླ6ཚེས3ཉིན།
ད་ལྟ།
ཁ་བ་མར་མར་འབབ་པའི་མཚན་གཞུང་དེར
མི་ཚོགས་ཀྱི་རུས་པ་འཁྱག་ལ་འབྱར་ཟིན་པས
སྟོད་ཀྱི་ཉི་མ་ལྷ་སར་འཐེན་པའི་གཙང་ངོགས་སུ
འཁྲེང་ཞེན་གྱི་ཟམ་པ་འཛུགས་མཁན་ཅི་ཙམ་ལྷག་ཡོད
2015ལོའི་ཟླ6ཚེས9ཉིན།
མཆུ་སྒྲོས།
ལྷོད་གཤིས་ཆགས་པའི་མཆུ་སྒྲོས་ཀྱིས
བདག་གི་དབང་ལྔའིརྩ་ལམ་རེ་རེ་སྦྲིད་པར་བྱས་རྗེས
བདག་གི་འཇིག་རྟེན་ལ
མུན་པ་ཁམ་གང་གི་ཡོལ་བ་འཐེན་སོང
མེ་ཏོག་ཁྲི་ཡི་མཚོ་མོ་སྐྱིལ་སོང
2015/6/17/
ཁེར་རྐྱང་དང་ཐ་མག
སྣང་བའི་དབྱིངས་སུ་རྣམ་རྟོག་གི་མུན་པ་འཐིབ་པའི་སྐབས་འདིར
འབར་ཞུན་རྐང་གཅིག་ཚག་སྒྲ་དང་བཅས་དམར་གསོད་བཏང་རྗེས
མཛུབ་བར་དུ་འཆིང་བའི་ཐ་མག་གི་མཆུ་སྒྲོས་ལ་འོ་ཡང་ཡང་བྱས་ན
ཐག་རིང་ཐག་རིང་གི་བྱ་ཁྱུ་དཀར་བོ་སྤྲིན་པ་ལྷོ་བགྲོད་ཞིག་ལྟར
སེམས་ཀྱི་རྣང་ཞིང་དུ་ཡང་ཡང་ལྡིང་སྐོར་བརྒྱབས་ཤིང
ར་རོ་བའི་སྐྱོ་གདུང་གི་རི་སྒང་ལ་བཙུགས་པའི་དར་ལྕོག
འཇིག་རྟེན་ལ་གཙང་ཕྱགས་ཤིག་གི་ཟོལ་གྱིས་རྣམ་རྟོག་གི་ཁམས་ཆེན་མོ
ཚོད་ཚོད་ལ་དཀར་ཞིང་དྭངས་པར་བསྒྱུར་བར་འབད་པའོ།།
2015ལོའི་ཟླ4བའི་ཚེས23ཉིན།
འཁོར་བ་སྙིང་མེད་ཀྱི་མིག་ཟུང་གཡར་བ།
ཉི་མ་ནི་པིར་མཁན་གྱིས་བྲིས་པའི་སྒྱུ་རྩལ་བརྩམས་ཆོས་ཤིག་སྟེ
འོད་སྟོང་ཅན་དང་གདུང་བའི་འོད་འབྱིན་སོགས་དོན་གྱིས་སྟོང་མོད
གྲོག་མ་དག་དབུགས་ཧལ་ཧལ་དང་རྔུལ་ཆུ་ཁྲུམ་ཁྲུམ་གྱིས
ཉི་མའི་ཕྱོགས་སུ་ཕ་བོང་ཞིག་དྲུད་ནས་བཞུད་ཀྱིན་འདུག
2015/6/23/ཉིན།
