གཞི་རིམ་གྱི་སྤྱི་པའི་རིག་གནས་འཛུགས་སྐྱོང་ལ་ཤུགས་སྣོན་དང་རྒྱ་ཆེའི་ཞིང་འབྲོག་མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བ། རོང་འབྲོག་མང་ཚོགས་ཀྱི་ཐོབ་ཚོར་དང་སྐྱིད་སྣང་། བདེ་འཇགས་ཚོར་སེམས་ཇེ་ཆེ་དང་གྲོང་གསེབ་དར་སྤེལ་ལ་སྐུལ་འདེད་གཏོང་ཆེད། སྤྱི་ཟླ་11པའི་ཚེས་11ཉིན། མཛོད་དགེ་རྫོང་ཨུ་དྲིལ་བསྒྲགས་པུའུ་ཡིས་གྲོང་སྡེ་རིམ་པར་རིག་གནས་སྒྲིག་ཆས་སྦྱིན་པའི་མཛད་སྒོ་སྤེལ།

མཛད་སྒོ་སྤེལ་ཡུལ་དུ་དངོས་ཟོག་ལེན་མཁན་འཐུས་མི་རྣམས་ཀྱིས་དགའ་སྤྲོའི་ངང་དངོས་ཟོག་རྩིས་ལེན་བྱས་ཏེ། དངོས་ཟོག་དང་སྒྲིག་ཆས་རེ་རེ་བཞིན་སྒྲིག་ནས་དུས་ལྟར་བེད་སྤྱོད་བྱ་བར་གྲ་སྒྲིག་བྱས། ཚང་མས་དངོས་ཟོག་དེ་དག་ནི་མིག་སྔའི་གཞི་རིམ་གྱི་རིག་གནས་འཛུགས་སྐྱོང་ཁྲོད་ཁ་ཚ་དགོས་གཏུག་ཏུ་གྱུར་བའི་རྩ་ཆེའི་ཐོན་ཁུངས་ཤིག་ཡིན་པས་གནད་དོན་མང་པོ་ཐག་གཅོད་ཐུབ་ལ། ཞིང་འབྲོག་མང་ཚོགས་ཀྱི་དངོས་ཡོད་གནད་དོན་དག་སེལ་བྱས་ཏེ། རིག་གནས་ལ་བརྟེན་ནས་དམངས་ལ་ཕན་པའི་དམིགས་ཚད་དང་ཕན་འབྲས་མངོན་འགྱུར་བྱུང་ཐུབ་ཅེས་བཤད།

རིག་གནས་དངོས་ཟོག་སྒྲིག་ཆས་དེ་དག་དུས་འགོར་ཡུལ་དངོས་རྟོག་ཞིབ་དང་སྤྱི་ཚོགས་ཀྱི་གནས་ཚུལ་དང་དམངས་འདུན་འཚོལ་བསྡུ། དོན་དངོས་གནས་ཚུལ་རྟོག་ཞིབ་བཅས་བྱས་པ་བརྒྱུད། གཞི་རིམ་རིག་གནས་ཀྱི་སྒྲིག་ཆས་ལེགས་སྒྱུར་དང་འཐུས་ཚང་དུ་གཏོང་རྒྱུར་དམིགས་ནས། དམིགས་སའི་རང་བཞིན་དང་ཉེར་སྤྱོད་རང་བཞིན་ལྡན་པའི་སྒྲིག་བཀོད་དང་སྒྲིག་ཆས་ཉོ་སྒྲུབ་བྱས་ཏེ་སྤྱོད་གོ་ཆོད་པར་བྱས། ཐེངས་འདིའི་བྱེད་སྒོའི་ཐོག་གྲོང་གསེབ་ཀྱི་སྤྱི་ཕན་གློག་བརྙན་རྐུབ་སྟེགས་650དང་དཔེ་སྒྲོམ་120། གྲོང་གསེབ་ཀྱི་སྤྱི་ཕན་གློག་བརྙན་སྟོན་སར་བརྡ་ཁྱབ་སྒྲོམ་གཞི་14བཅས་བཀོད་སྒྲིག་བྱས། གཞི་རིམ་གྱི་རིག་གནས་སྒྲིག་བཀོད་དང་སྒྲིག་ཆས་རྙིང་ལ་ཆག་སྐྱོན་ཤོར་བའི་གནད་དོན་ཐག་གཅོད་བྱས་པ་རེད། །