ཟླ8པའི་ཚེས8ཉིན། སྐབས་བདུན་པའི་ཀྲུང་གོའི་ལའང་ཧྲན་དབྱིས་རིགས་ཀྱི་རྒྱལ་སྤྱིའི་དཔལ་འབར་དུས་ཆེན་གཟབ་རྒྱས་ངང་སྤེལ། ད་ཐེངས་ཀྱི་དཔལ་འབར་དུས་ཆེན་ལ་ཡུལ་སྐོར་དང་རིག་གནས། ལུས་རྩལ། ཚོང་དོན་སོགས་བརྗོད་བྱ་བྱས་པའི་བྱེད་སྒོ་ཆེ་གྲས་བཞི་ཡོད། དེའི་ནང་། ཡུལ་སྐོར་བྱེད་སྒོ་ཁག24དང་། རིག་གནས་བྱེད་སྒོ་དང་ལུས་རྩལ་བྱེད་སྒོ་ཁག་9 ཚོང་དོན་བྱེད་སྒོའི་ཚན་པ་2སོགས་ཡོད། དཔལ་འབར་དུས་ཆེན་འདི་ཡུལ་སྐོར་དུས་ཆེན་ཙམ་དུ་མ་ཟད་རིག་གནས་དུས་ཆེན་དང་ཚོང་ལས་དུས་ཆེན་ཞིག་ཏུའང་འགྱུར་བཞིན་ཡོད།
དེ་རིང་སྔ་དྲོར། དུས་ཆེན་མཛད་སྒོའི་རིག་རྩལ་འཁྲབ་སྟོན་དང་བསྟུན་ནས་དབྱིས་རིགས་ཀྱི་ཡུལ་སྲོལ་པར་རིས་བཤམ་སྟོན་སྤེལ་བ་དང་། སྐབས་འདིའི་དཔལ་འབར་དུས་ཆེན་དེ་ཤར་ཕྱོགས་ཀྱི་དགའ་སྤྲོའི་མཚན་མོ། དབྱིས་རིགས་ཀྱི་དཔལ་འབར་དུས་ཆེན་ཞེས་པ་བརྗོད་བྱར་བྱས་ཏེ། ལའང་ཧྲན་གྱི་གཟུགས་བརྙན་ཇེ་བཟང་དུ་གཏོང་བ་དང་། ལའང་ཧྲན་གྱི་སྤུས་རྟགས་བསྐྲུན་རྒྱུ་གཙོ་ཐིག་ཏུ་བཟུང་བ། ལའང་ཧྲན་གྱི་ཡུལ་སྐོར་འཕེལ་རྒྱས་ཀྱི་ཚད་ཤུགས་ཇེ་མགྱོགས་སུ་གཏོང་བ་དང་། ཕྱི་ཕྱོགས་སུ་སྒོ་འབྱེད་པའི་ཚད་ཇེ་མཐོ་རུ་གཏོང་བ་སོགས་དམིགས་འབེན་དུ་བཟུང་ནས། སྲིད་གཞུང་གི་གཙོ་ཁྲིད་རྒྱུན་འཁྱོངས་དང་ཁྲོམ་ར་འགུལ་སྐྱོད་བཅས་བེད་སྤྱོད་བྱས་ཏེ། ཤར་ཕྱོགས་ཀྱི་དགའ་སྤྲོའི་མཚན་མོ། དབྱིས་རིགས་ཀྱི་དཔལ་འབར་དུས་ཆེན་ཞེས་པ་དེ་ཁྱད་དུ་འཕགས་པའི་མི་རིགས་རིག་གནས་རྟགས་ཅན་དུ་འགྱུར་བ་དང་། མུ་མཐུད་དུ་ལའང་ཧྲན་དབྱིས་རིགས་ཀྱི་རིག་གནས་རྒྱུད་འཛིན་དང་དར་སྤེལ་བཏང་ནས། ལའང་ཧྲན་གྱི་སྐད་གྲགས་སྔར་བས་ཇེ་མཐོ་རུ་གཏང་རྒྱུ་དང་ཕྱི་ཕྱོགས་སུ་སྙན་གྲགས་ཀྱི་ཚད་ཇེ་ཆེ་རུ་གཏང་བ་དེའོ།།
དཔར་འབར་དུས་ཆེན་ལ་ལའང་ཧྲན་གྱི་དབྱིས་སྐད་དུ་ཏུའུ་ཙེ་ཞེས་འབོད་ལ། མི་རྣམས་ཀྱིས་མེ་མ་འཇིག་ན་མིའི་རིགས་ཀྱང་ཡུན་དུ་གནས་པའི་ཡིད་ཆེས་བརྟན་པོར་བཟུང་ཡོད། མེ་ནི་གནམ་རྒན་མས་བསྩལ་བའི་རྟེན་མཆོག་དང་འོད་གསལ་གྱི་གཡང་ནོར། འཚོ་གནས་ཀྱི་རེ་སྨོན་ཡིན་ཞིང་། དབྱིས་རིགས་ཀྱི་སྲོལ་རྒྱུན་དུས་ཆེན་ཁྲོད་ཀྱི་ཁྱབ་རྒྱ་ཆེས་ཆེ་བ་དང་ནང་དོན་ཆེས་ཕུན་སུམ་ཚོགས་པ། རྣམ་པ་ཆེས་རྒྱ་ཆེ་བ། མི་ཞུགས་ཚད་ཆེས་མང་བ། མི་རིགས་ཀྱི་ཁྱད་ཆོས་ཆེས་འབུར་དུ་ཐོན་པའི་དུས་སྟོན་ཆེན་མོ་ཞིག་ཡིན། 1994ལོར། ལའང་ཧྲན་དབྱིས་རིགས་ཀྱི་དཔལ་འབར་དུས་ཆེན་དེ་ཀྲུང་གོའི་དམངས་སྲོལ་གྱི་དུས་སྟོན་ཆེན་མོ་བཅུ་དང་སི་ཁྲོན་གྱི་མཚན་སྙན་རྒྱས་པའི་དུས་ཆེན་བཅུའི་གྲས་སུ་ཚུད་ཅིང་། མཉམ་འབྲེལ་རྒྱལ་ཚོགས་ཀྱི་སློབ་གསོ་དང་ཚན་རིག་རིག་གནས་རྩ་འཛུགས་ཀྱི་2010ལོའི་འཛམ་གླིང་གི་མངོན་མེད་རིག་གནས་ཤུལ་བཞག་གི་ཞིབ་མཆན་རྣམ་གྲངས་ཀྱི་གྲས་སུ་བཀོད།།
